O presidente da Xunta lembrou que o programa Talento Sénior está incluído no programa Talento 2021, impulsado pola Xunta, para reter e atraer 1.500 profesionais a Galicia para actividades de I+D+i
As entidades beneficiarias contarán cun incentivo da Xunta de 64.000 euros por persoa contratada
O presidente da Xunta lembrou que o programa Talento Sénior está incluído no programa Talento 2021, impulsado pola Xunta, para reter e atraer 1.500 profesionais a Galicia para actividades de I+D+i
O presidente do Goberno galego, Alberto Núñez Feijóo, destacou hoxe na rolda de prensa do Consello apoios por máis de 700.000 euros para atraer a investigadores e profesionais de alta cualificación na primeira convocatoria do programa Talento Sénior. Unha iniciativa destinada a atraer investigadores doutores e profesionais de alta cualificación con traxectorias consolidadas para que desenvolvan proxectos de I+D+i en empresas, organismos de investigación non universitarios e centros de coñecemento.
Ademais destes apoios, dos que se benefician sete empresas, o Centro Tecnolóxico da Automoción de Galicia (CTAG) e o Instituto Tecnolóxico de Galicia (ITG), Feijóo subliñou que os 11 especialistas contratados contan cunha media de 11 anos de experiencia en diferentes ámbitos da investigación e da innovación. E desenvolverán a súa actividade en sectores estratéxicos, como a automoción, a Industria 4.0, as TIC, o lácteo, a pesca ou os servizos de enxeñaría.
Logo de salientar que tres deles retornarán a Galicia, despois de traballar en Reino Unido, Francia e Madrid, o titular da Xunta explicou que todas as entidades beneficiarias contarán cun incentivo da Xunta de 64.000 euros por cada persoa contratada. Engadiu que estas entidades deberán retribuír ao profesional que se incorpore a través deste programa cun salario de, cando menos, 40.000 euros brutos por anualidade. Así mesmo, o persoal poderá estar contratado pola entidade beneficiaria desde o pasado 1 de xaneiro.
Ao longo da súa intervención, Feijóo lembrou que o programa Talento Sénior está incluído no programa Talento 2021, impulsado pola Xunta, para reter e atraer 1.500 profesionais a Galicia para actividades de I+D+i.
Por último, cómpre salientar que a través do programa Talento 2021, se prevé reforzar accións que xa están en marcha como: o programa Ignicia, pioneiro a nivel estatal, co que se está impulsando a transferencia de coñecemento e mediante o que se apoiaron 18 proxectos e 64 postos de traballo de alta cualificación; o programa Principia, que xa permitiu a 370 profesionais menores de 35 anos participar en labores de innovación; o programa Oportunius, centrado na atracción e retención de investigadores excelentes, que ten facilitado a formación a máis dun cento de investigadores; e as axudas aos investigadores, para desenvolver a súa carreira predoutoral e postdoutoral.
A conselleira de Educación fixo un percorrido polos stands nos que máis de 130 estudantes de 52 centros públicos miden desde onte a súas destrezas en 26 modalidades formativas
A Conselleira de Educación, Universidade e Formación Profesional, Carmen Pomar, visitou esta mañá o recinto feiral de Silleda onde se está desenvolvendo as Galicia Skills 2018, as Olimpíadas galegas de Formación Profesional que xa van pola súa quinta edición.
Carmen Pomar fixo un percorrido polos diferentes stands onde os 137 alumnos de 52 centros públicos de FP galegos levan desde onte participando en distintas exhibicións e competicións para expoñer as súas destrezas e habilidades en cada unha das 26 modalidades formativas presentes representadas neste evento.
A conselleira expresou os parabéns ao conxunto dos participantes, tanto alumnos como profesorado, por facer do Galicia Skills un escaparate que amosa a calidade das ensinanzas de Formación Profesional galega. Neste senso, Carmen Pomar ratificou o compromiso do Goberno da Xunta coa aposta cunha FP de prestixio, innovadora e conectada co tecido socio-produtivo da comunidade.
Logo de dous días de competición, mañá daranse a coñecer os gañadores das diferentes modalidades, que representarán a Galicia no torneo nacional que terá lugar en Madrid o vindeiro ano.
Para a celebración de Galicia Skills 2018 habilitáronse 10.000 metros cadrados na Feira Internacional de Galicia Abanca (en Silleda), con espazos propios para as exhibicións das modalidades de administración de sistemas en rede, carpintería, ebanistería, recepción hoteleira, cociña, servizos de restaurante e bar, panadería, coidados auxiliares enfermería, control industrial, electrónica, enxeñería de deseño mecánico-CAD, floraría, xardinaría paisaxística, fontanería e calefacción, instalacións eléctricas, mecanizado, mecatrónica, peiteado, pintura do automóbil, pintura e decoración, refrixeración e aire acondicionado, soldadura, solución de software para empresas, tecnoloxía da moda, tecnoloxía do automóbil e animación 3D e xogos.
O mundo dixital no que a tecnoloxía terá unha relevancia cada vez maior permitirá suplir boa parte das carencias que sofren moitas persoas con discapacidade, con todo aínda é necesario superar barreiras para lograr un acceso universal.
O mundo dixital no que a tecnoloxía terá unha relevancia cada vez maior permitirá suplir boa parte das carencias que sofren moitas persoas con discapacidade, con todo aínda é necesario superar barreiras para lograr un acceso universal.
Así o sostivo o presidente do Comité Español de Representantes de Persoas con Discapacidade (Cermi), Luís Cayo Pérez, na súa participación en XIV Congreso de Cermis Autonómicos, onde afirmou que este mundo dixital ao que se dirixe a sociedade permitirá reducir as desvantaxes que afrontan moitas persoas con discapacidade.
Na súa opinión, este futuro no que a tecnoloxía será clave supón unha "promesa certa de liberación" para as persoas con discapacidade, na medida na que estes avances "permitirán suplir funcionalidades corporais", polo que a "desvantaxe" que teñen as persoas con discapacidade "pódese atenuar moito".
Neste sentido, defendeu que a tecnoloxía supoñerá un "gran fito" para a emancipación das persoas con discapacidade, permitindo que moitas delas leven unha vida independente.
Con todo, advertiu tamén de que aínda hai barreiras para que esa tecnoloxía poida beneficiar a todas as persoas, como o seu elevado custo ou a falta dunha accesibilidade universal.
En leste mesmo evento diversas organizacións sociais demandaron que se aborde o impacto que a tecnoloxía terá no futuro laboral das persoas con discapacidade.
Accede á oferta de activades de Canal Sénior para este mes de decembro.
Busca actividades formativas de alfabetización dixital ou capacitación dixital nalgunha das 98 aulas repartidas en 92 concellos galegos para este mes de decembro.
Tras 8 días con máis de 127 actividades abertas á cidadanía a Mobile Week Coruña clausurouse no PALEXCO, nun acto ao que acudiron representantes das entidades que apoiaron este macroevento, como Abanca, a Deputación da Coruña, o Concello da Coruña, a Universidade da Coruña, o Club Financeiro Atlántico ou Mobile World Capital Barcelona. Conduciu a gala Silvia Jato, quen citou os moitos cambios que estaba a provocar a tecnoloxía nas nosas vidas e deu paso á participación de Eduardo Aldao, director de Innovación de Abanca, e Elena Vázquez, decana da Facultade de Matemáticas da USC, quen impartiron relatorios que foron seguidos por unha pequena mesa de debate aberta a preguntas do público.
Aldao falou sobre tecnoloxía e innovación financeira dende o punto de vista de Abanca, entidade que está a perseguir a innovación dende moitos ángulos, para sobrevivir nun eido sumamente dinámico. Temos así unha entidade que tanto investiga no uso de tecnoloxía blockchain como se anima a buscar talento dentro e fóra da empresa, contribúe ao emprendemento e á aceleración de negocios e mesmo consegue estar á cabeza da banca electrónica móbil no ámbito estatal.
Pola súa banda, Vázquez Cendón quixo falar sobre a tecnoloxía e o compromiso social, salientando o rol da tecnoloxía como punto de encontro e plataforma para compartir o coñecemento, salientando tamén que estamos ante un período de cambios aos que hai que adaptarse para poder velos non como unha ameaza, senón como unha oportunidade de futuro.
Ao peche da xornada, amenizada cunha actuación da gaiteira Susana Seivane, Jato aproveitou para lembrar aos asistentes que a Mobile Week Coruña vai ser un evento con continuidade, que xa ten garantida unha presenza de 4 anos en Galicia.
Vinte e cinco vigueses formaranse no itinerario Desenvolvemento web con Java no marco do programa Conecta Emprego da Fundación Telefónica que, xunto co Concello de Vigo, están a levar a cabo ambas as institucións para formar en competencias dixitais de carácter profesional aos veciños da cidade.
Calquera vigués que teña de 18 anos en diante e estudos básicos ou medios (ESO, Bacharelato, FP Básica, FP Grao medio) ou superiores pode ter así unha oportunidade de emprego tras formarse nestes cursos de Conecta Emprego. Buscando un cambio importante na súa vida, os vigueses seleccionados tras un test de aptitude lóxico-matemática e unha entrevista poderán reinventarse e formarse nun campo moi demandado na revolución dixital como é a programación Java, de cara a conseguir un traballo no ámbito tecnolóxico.
Durante o itinerario de formación, que se celebrará ao longo de tres meses, do 10 de decembro ao 7 de marzo de 2019, no Auditorio Pazo de Congresos Mar de Vigo, os alumnos irán adquirindo os coñecementos e habilidades necesarios que lles permitirán desenvolver aplicacións web multiplataforma, utilizando unha das linguaxes de programación con máis demanda dentro do sector TI: Java. De feito, hoxe en día programar nesta linguaxe está a converterse nun valor engadido para calquera programador.
Itinerarios dixitais especializados Conecta Emprego é unha plataforma de formación en competencias dixitais que supón unha gran oportunidade polas alianzas establecidas con empresas e organizacións que precisan incorporar ao seu cadro de persoal persoas formadas en tecnoloxía e desenvolvemento web. Para os cursos, os alumnos contarán coa colaboración das empresas tecnolóxicas da rexión.
O plan de estudos consiste nunha formación troncal, centrada en arquitectura de aplicacións web, que inclúen o seu deseño e integración web, o desenvolvemento da capa cliente, coñecementos sobre o sistema de xestión de datos MySQL e metodoloxías áxiles.
Tras realizar os cursos específicos, os alumnos reciben formación en habilidades para a empregabilidade ao longo de todo o itinerario formativo, como o desenvolvemento da intelixencia emocional, o traballo en equipo, a marca persoal, a procura de emprego 2.0 ou como realizar unha entrevista de traballo de maneira efectiva.
Durante os tres meses de duración, os candidatos seleccionados reciben tamén unha formación teórico-práctica sobre tecnoloxías e metodoloxías de programación utilizadas na industria e validadas polas empresas colaboradoras. A formación conta coa participación de expertos e referentes no sector da programación.
Como broche final, os alumnos repartidos en equipos desenvolverán proxectos que parten da necesidade real dunha empresa rexional, coa que colaboran activamente para a súa realización. Todos os módulos formativos son presenciais e ademais os alumnos poden seguir formándose fóra da aula. Así, o programa traballa en tres ámbitos: selección, formación e incorporación nas empresas e conta cunha plataforma web.
A Cámara de Santiago organiza mañá no viveiro de Costa Vella, a partir das 10.00 horas, unha xornada de balde sobre redes sociais e mercadotecnia dixital para emprendedoras e empresarias. A cita, que se estenderá até as 14.00 horas, servirá para mostrar ante as persoas asistentes ferramentas e recursos básicos, de utilidade, para elaborar un plan de marketingactual e eficiente que, en palabras da Cámara, contribúa a enriquecer cadansúa estratexia de negocio. A xornada contará coa presenza de Javi Rocamora, experto en actividade empresarial ligada ás redes.
A actividade forma parte do programa de Apoio Empresarial ás Mulleres (PAEM), que desenvolve a Cámara compostelá co co-financiamento do Fondo Social Europeo (FSE), o Instituto da Muller e para a Igualdade de Oportunidades e a Cámara de Comercio de España.
O formador de mercadotecnia dixital Javier Rocamora impartirá a sesión, explicando a importancia de contarmos cunha estratexia definida para redes sociais, a elaboración dun plan de promoción en liña, o uso profesional e a xestión de contidos nas redes sociais, as claves do posicionamento SEO ou a publicidade nas novas canles e plataformas.
Os premios foron entregados polos actores de Campións, película candidata aos Óscar 2019; Antonio Garrigues, presidente da Fundación Garrigues; Rafael Matesanz, fundador da Organización Nacional de Transplantes; Araceli Pereda, presidenta da Asociación Hispania Nostra; e a nadadora paralímpica Teresa Perales. Lucila Ballarino, responsable Global Transformación Dixital da Fundación Telefónica, subiu a recoller o galardón.
O xurado formárono Antonio Garrigues, presidente da Fundación Garrigues, Avogados e Asesores Tributarios; Ana María Llopis, fundadora e conselleira delegada de Global ideas4all SL.; Rafael Matesanz, fundador da Organización Nacional de Transplantes e Premio Príncipe de Asturias; Teresa Perales, nadadora paralímpica; Araceli Pereda, presidenta da Asociación Hispania Nostra; Bieito Rubido, director do diario ABC; e Eva Saiz, subdirectora do diario El País.
A xornada inaugural de DEMOS contou con Javier Nadal, presidente da AEF; Rosalía Arteaga, expresidenta de Ecuador; Michael Hastings, membro da Cámara dos Lores e xefe global de Cidadanía de KPMG Internacional; e Federico Buyolo, director xeneral Alto Comisionado Axenda 2030 en España. Máis de 80 expertos en sectores como o tecnolóxico, educativo, científico, deportivo ou filantrópico explicaron como superar os retos actuais e activar aos cidadáns. Todos eles puxeron de manifesto o papel protagonista da sociedade civil como motor de cambio e o optimismo como mellor saída: só os optimistas son capaces de afrontar os retos futuros e aproveitar as oportunidades para crear un mundo mellor.
A Fundación Telefónica puxo en marcha en 2017 a estratexia global de Transformación Dixital co obxectivo de combinar intelixentemente a tecnoloxía dispoñible coa súa experiencia en acción social. Deste xeito, é posible conseguir un maior impacto social nos proxectos, ademais dunha maior eficiencia operativa e un incremento do beneficio e a capacidade de acción. Esta área estratéxica transversal envolve a toda a institución cun dobre alcance: un interno, en canto á transformación dos perfís, os procesos, as ferramentas de traballo que se utilizan, os sistemas e o ADN como organización; e, doutra banda, mirando cara fóra, a través dos proxectos que achega á sociedade. Á súa vez, está estratexia está a aplicarse a todos os proxectos nas catro liñas de intervención onde actúa a Fundación Telefónica: educativos, de emprgeabilidade, de voluntariado corporativo e de arte e cultura dixital.
Grazas á Transformación Dixital, a Fundación Telefónica está a evolucionar como organización cara a unha organización áxil, que realiza proxectos innovadores con persoas innovadoras, onde a tecnoloxía mellora a capacidade de achegar valor social, que toma decisións baseadas en datos e que aproveita as ferramentas tecnolóxicas para maximizar a eficiencia de procesos. O seu plan estratéxico baséase en tres alicerces principais: unha unidade de tecnoloxía e sistemas; unha unidade de innovación e dixitalización; e unha última de big data e analítica avanzada aplicada a todos os programas. Con estes tres alicerces e un forte compoñente de dixitalización, tanto de proxectos como de procesos e as persoas, conseguiuse este triplo impacto de máis eficiencia, máis impacto social e mellor posicionamento.
Abanca e a súa Obra Social, Afundación, organizaron a terceira edición do Campus Abanca, iniciativa para estimular o emprendemento, a innovación social e as competencias persoais entre a mocidade, integrándose nesta ocasión na I Feira de Innovación USC-Abanca no edificio CINC da Cidade da Cultura.
Durante a xornada desenvolveuse o congreso Campus Abanca, que tivo como máximo expoñente un par de mesas redondas nas que se achegaron moitas das novas oportunidades profesionais que poden xurdir na actualidade, que se afastan dos empregos tradicionais, pero que poden ser un exemplo inspirador para a orientación do futuro laboral da mocidade actual. Na primeira mesa redonda da mañá participaron exemplos de profesionais que souberon dedicarse ao que lle apaixona, como o bicampeón de España de kickboxing Manu Míguez, os artistas Marcos M. Puhinger, Álex Rivas de Gamerswalk e o localizador de videoxogos Ramón Méndez. Precisamente estes dous últimos, ao dedicarse ao sector dos videoxogos, foron os que captaron a maior atención do público, entre o que non faltaban estudantes que querían orientar a súa carreira a ese sector, con dúbidas de se en Galicia habería industria que puidese acollelos.
A segunda mesa redonda, coa que completáronse as actividades da mañá, xuntou a profesionais que chegaban de ámbitos moi dispares, pero que actualmente viven en boa medida da súa reputación pública e do público que congregan, o que nuns casos lévalles a conseguir patrocinios e noutros contratacións, pero que finalmente podemos dicir que é xente que vive de traballos que até hai poucos anos parecería imposible.
Por exemplo, María Olveira explicou como puido orientar a súa actividade ao mundo da moda na Internet, aproveitando a ocasión para advertir dos riscos que supoñen o uso de plataformas de comunicación globais como Instagram (xa que hai poucas semanas a súa conta de usuario foi secuestrada); por outra banda Luzía Piñero explicou como orientou a súa carreira profesional de educación física ao personal training e á nutrición grazas á Rede, en vez de seguir as canles tradicionais e dedicarse á docencia; o emprendedor Marcos Pérez explicou como a través dos seus traballos pode tecer unha rede que o leva a establecer comunicacións coas persoas e empresas que rematan contratándoo para atender as súas necesidades; e finalmente os youtubeiros FatiVazquez e TOBBALink, con máis de 600.000 e 1,5 millóns de subscritores respectivamente, serviron de exemplo de como abandonar traballos tradicionais para realizarse cunha actividade coa que gozan máis, como é a produción de contidos para plataformas en liña como YouTube.
Completouse así unha xornada que para os mozos foi principalmente un xeito de ver como hai profesionais que viven de actividades que na súa meirande parte nin sequera existían hai unha década, polo que cómpre ter iso en consideración á hora de explorar oportunidades de cara ao futuro laboral.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...