O Centro Ágora será en decembro unha cita para os seareiros e profesionais das ferramentas tecnolóxicas que conflúen e interactúan co social, o xeográfico, o participativo e o cartográfico. Estamos a falar do obradoiro Mapeo, cartografía de colectivos e iniciativas cidadás, que se celebra os días 14 e 15 no devandito centro coruñés. Trátase, en palabras do Concello, dun taller de balde e aberto que busca poñer no mapa (e nos móbiles) e mostrar as iniciativas de innovación impulsadas a día de hoxe pola veciñanza do termo municipal.
O taller, promovido polo proxecto Innovación Ciudadana da Secretaría General Iberoamericana, conta co apoio da Concellería de Participación e Innovación Democrática a través do Laboratorio Cidadán da Coruña. Segundo explicou a concelleira Claudia Delso, a actividade prosegue a amplia liña de traballo do Co-Lab, o laboratorio cidadán coruñés, e pretende salientar as experiencias, espazos e iniciativas urbanas de innovación que nacen da propia acción dos residentes da Coruña.
Segundo explicou, o obradoiro tamén abordará a aplicación dos obxectivos de desenvolvemento sustentable na cidade a través das propostas veciñais. Isto farase tanto no plano analóxico (mediante o taller de mapeo) e no dixital (incluíndo os proxectos na plataforma interactiva CIVICS, que pretende xerar unha cartografía global destas prácticas para artellar colaboracións internacionais e que acubilla xa máis de 4.000 accións sociais localizadas en 30 concellos de toda Iberoamérica).
O Taller de Mapeo desenvolverase na tarde do venres 14, de 16.00 a 20.00 horas, e o sábado 15 de 10.00 a 14.00 horas. Para máis información e inscricións, pódese visitar a web de Innovación Cidadá.
Odismet, o Observatorio sobre Discapacidade e Mercado de Traballo, da Fundación ONCE, converteuse na ferramenta máis útil e integradora de toda a información relativa ás persoas con discapacidade e a súa relación co emprego, e nun referente para o mundo académico, asociativo, institucional e empresarial.
Así o dan a coñecer a Fundación ONCE e Inserta Emprego, coincidindo coa celebración do Día Internacional das Persoas con Discapacidade hoxe 3 de decembro.
O observatorio de Odismet nútrese das principais estatísticas oficiais sobre discapacidade e ofrece unha descrición detallada e exhaustiva sobre o colectivo e o seu contexto socio laboral.
Ademais Odismet, conta cun banco de datos con case cen indicadores, 14 dos cales son interactivos de forma que o usuario pode xerar consultas a medida, e con máis de 130 títulos na súa biblioteca virtual.
Así mesmo Odismet dispón de epígrafes específicos para xénero, idade e comunidades autónomas e ofrece información segmentada por distintas variables que proporcionan datos para subgrupos concretos. As análises evolutivas de cada indicador posibilitan un seguimento sinxelo e continuado dos avances alcanzados en materia de integración e os arquivos adxuntos descargables en Excel e PDF de cada indicador facilitan a accesibilidade á información.
En definitiva, Odismet é unha plataforma que se conforma como o principal referente para a análise do emprego das persoas con discapacidade a nivel estatal xa que procura simultaneamente a xestión do coñecemento e a sensibilización cara ás persoas con discapacidade e as súas circunstancias desfavorables en numerosos ámbitos.
En España rexístranse un total de 1.840.700 persoas con discapacidade en idade laboral, un colectivo que crece de maneira constante e este ano rexistra 65.900 persoas máis que no anterior exercicio.
En canto á súa idade, o 70% ten entre 45 e 64 anos. Só unha de catro persoas con discapacidade ten emprego ou, dito doutro xeito, máis de 140.00 delas son parados, o 56% de longa duración. Con todo, durante o ano 2017 realizáronse 308.376 contratos a persoas con discapacidade. As mulleres acumularon o 38,4% e os mozos o 6,8%, datos que evidencian a multidiscriminación dentro do colectivo. Ademais, a pesar da existencia de contratos indefinidos bonificados, o 90,3% foron de temporais e a contratación en centros especiais de emprego aglutina o 25% do total.
Salario
O salario medio bruto anual das persoas con discapacidade sitúase en 19.298 euros, 3.976 menos que a poboación sen discapacidade e desde 2010 reduciuse en 1.265 euros. No caso das mulleres, os mozos e aqueles con discapacidade intelectual, a redución salarial é aínda maior. A taxa de autoemprego do colectivo sitúase no 12%, o que supón 4,7 puntos porcentuais menos que o resto da poboación. O 30,9% das persoas con discapacidade atópanse en risco de pobreza ou exclusión social. O feito de ter un emprego remunerado non garante unha situación económica solvente como lle ocorre ao 14,5% das mesmas.
Formación
Atendendo aos niveis de formación, o 56,2% contan con estudos de nivel secundario, o cal apunta a unha mellora relevante na súa cualificación, debido a que en 2008 o dato era do 38,4%. Segmentando por xénero, as mulleres teñen estudos superiores en maior proporción que os homes (16,8% fronte a 13,6%).
Así mesmo, hai 206.493 alumnos con necesidades educativas especiais e un 83% deles, cursan os seus estudos en centros de carácter integrado. Odismet enmárcase nos programas operativos de Inclusión Social e da Economía Social (Poises) e de Emprego Xuvenil (POEJ), que está a desenvolver a Fundación ONCE a través de Inserta, coa cofinanciación do Fondo Social Europeo e a Iniciativa de Emprego Xuvenil, para incrementar a formación e o emprego das persoas con discapacidade.
Nin un avó sen neto nin un neto sen avó. Podería ser o slogan da plataforma dixital "Quero un avó" coa que a granadina Leticia Jiménez une desde Galicia (Narón) o destino de maiores de todo o país dispostos a asumir o reto e de familias desexosas de que os seus pequenos conten con esa figura de referencia, pero ou carecen dela ou non a teñen preto. Por agora, animáronse a dar o paso e a anotarse como potenciais aspirantes a exercer de avós ao redor de 450 persoas de toda España, aínda que a demanda supera á oferta: 700 familias esperan por un.
Os requisitos dos aspirantes a avós son simples: ter 50 ou máis anos, que lles gusten os nenos e tempo dispoñible, como explica Jiménez na súa web, onde aclara que a filosofía de "Quero un avó" non ten nada que ver cun canguro, senón con "fomentar" unha "relación sentimental a longo prazo de respecto e agarimo". Con todo, en Galicia a súa plataforma aínda non logrou demasiados candidatos, non chegan a 20, cando as familias roldan o centenar. Atribúeo a unha fenda dixital entre os maiores, pero tamén a algo cultural.
A promotora destes encontros aínda non atopou ao seu candidato ideal, iso que a idea xurdiu ao detectar na súa vida a necesidade. "Son de Granada e vivo en Narón. Aquí tiven á miña filla e por propia experiencia empecei a botar moito de menos e a valorar o que significa un avó na vida dun neno", explica.
O seu proxecto é un dos cinco seleccionados na terceira edición de "Vodafone Connecting for Good Galicia", unha iniciativa na que a Xunta, a través da Axencia para a Modernización Tecnolóxica de Galicia (Amtega) e GAIN, e a Fundación Vodafone van da man para apoiar proxectos emprendedores que contribúan á innovación social con uso da tecnoloxía.
A selección do proxecto implica beneficiarse dun plan de formación de medio ano, no que Leticia espera que a axuden a buscar "rendibilidade" á súa iniciativa para poder mantela, e dous mil euros de apoio para a súa posta en marcha, que poden ser 25.000 máis, se consegue alzarse como o "mellor".
Os outro catro proxectos elixidos, segundo a Amtega, repártense de forma proporcional no campo de acción do rural e da sanidade. No primeiro caso estarían CropDeal e feedcoo. CropDeal é unha plataforma de oferta e demanda por volume que garante a calidade e optimiza a venda das materias primas agrarias sen intermediarios. Tamén sería unha plataforma dixital feedcoo pero buscaría favorecer o asociacionismo dos pequenos produtores rurais para crear un colectivo dixitalizado que lles permita acceder aos servizos necesarios para producir "a unha escala global e cun custo mínimo". Inclúe micromecenazgo para produtos novos.
No ámbito da sanidade, estarían Atlante Medical, que sería unha plataforma online de xestión de medicina dixital e funcionaría como fonte de comunicación entre hospitais, laboratorios e outros axentes do sistema, e FisioAdvisor, que plante unha plataforma online de procura de fisioterapeutas colexiados na que o usuario pode consultar a reputación derivada dos seus tratamentos con outros pacientes.
O CEI Nodus de Lugo rebordou o venres de capacidades innovadoras en feminino: tanto entre as relatoras da Mesa Talento en Feminino como entre o público. A cita veu da man da Concellería de Economía, Emprego e Desenvolvemento Económico, xunto coa Asociación de Mulleres Empresarias, co obxecto de mostrar e fomentar o espírito innovador das nosas emprendedoras. A inauguración correu a cargo de Ana Prieto, que deu paso á presentación de tres proxectos de éxito postos en marcha por outras tantas mulleres.
Trátase de Mónica Pérez, fundadora de Triesfera, unha empresa de deseño e impresión en 3D que saíu do plan de apoio ao emprendemento Inicia Coworking do Concello; Noemí Bellas, fundadora de Libolis, a primeira escola de emprendemento para nenas e nenos de Galicia (e un dos principais puntais dos obradoiros de tecnoloxías e robótica Crea R); e Maruxa García, xerente e cofundadora de Tastelab, a primeira empresa de tecnoloxía de análise sensorial de España, spin-off do Campus Terra.
No acto, Prieto amosou o apoio do Goberno local a todas aquelas iniciativas, actividades e ideas que impulsen o emprendemento, en especial o feminino, ao tempo que destacou o papel de visualización que se consegue con este tipo de xornadas, coas que se lembra e homenaxea a todas aquelas mulleres innovadoras, que axudaron e axudan co seu talento ao avance da sociedade.
A Deputación da Coruña vén de dar un paso importante para facer medrar na provincia o traballo cooperativo e, en consecuencia, o emprendemento, a innovación, o pulo ao talento e a chegada de novas tecnoloxías ao mercado. En termos máis concretos, a entidade provincial aprobou a posta en marcha dunha rede provincial de centros traballo colaborativo para emprendedores, unha rede que xa comezou a fraguarse coa recente rehabilitación do Pazo de Arenaza (Oleiros) pero que agora estende as súas pólas cara a novos concellos (Boiro, Brión e Carballo) e, por suposto, novos horizontes. A iniciativa, incluída no Plan de Emprego Local (PEL) da Deputación, foi aprobada por unanimidade no pleno do venres. O centro de Carballo dará acubillo a 18 empresas do ámbito tecnolóxico.
O obxectivo a curto prazo, é que os ditos concellos coruñeses conten con centros de características semellantes ao de Oleiros, definidos por sectores e con cobertura comarcal, nos que a Deputación investirá máis de 305.000 euros. “O noso obxectivo é acompañar aos emprendedores na posta en marcha dos seus proxectos, prestarlles servizos e permitir que compartan experiencias, creando sinerxías e transferencias de coñecemento que impulsen o desenvolvemento dos seus proxectos”, afirmou o presidente da Deputación, Valentín González Formoso. Polo que respecta aos obxectivos a medio e longo prazo, o que se busca é crear unha extensa rede integral de espazos de traballo cooperativo e innovador, fixando “uns mecanismos de coordinación e colaboración comúns para a prestación de servizos ás empresas e emprendedores, que estará dotada con recursos suficientes para que estes servizos sexan eficientes e de calidade”. A Rede Provincial de Espazos de Traballo aglutinará tanto espazos de traballo existentes coma de nova creación, con independencia da súa tipoloxía (viveiros de empresas, centros de negocio e coworking).
Emprende LAB-Barbanza
Polo que se refire ao centro de Boiro, trátase do proxecto Emprende-LAB Barbanza, un espazo para o fomento e a creación e aceleración de novas empresas relacionadas con sectores estratéxicos para a comarca coma o conserveiro e de transformación de produtos do mar, o hostaleiro e o turístico. O espazo emprazarase nun local do polígono industrial de Espiñeira propiedade do Concello de Boiro, con 283 metros cadrados de superficie útil, que contará con 5 oficinas, sala de recepción, servizo de reprografía e sala para xestión e presentación de proxectos, así coma aseos e zonas comúns. O convenio coa Deputación para este centro inclúe asistencia técnica para a dinamización empresarial (EmprendePoint), sostemento dos gastos correntes da instalación e actividades formativas que incluirán obradoiros, traballo en rede, programas de mellora de xestión empresarial e de asesoramento e seguimento e apoio para proxectos emprendedores.
Transformando en Brión
O Concello de Brión, co proxecto Espazo Colaborativo Transformando en Brión, aposta por “un ambicioso proxecto que contribuirá á mellora e modernización do sector primario”. Este espazo, en palabras da Deputación, será “pioneiro en Galicia e a súa actividade principal será a transformación de alimentos do sector primario de produtores locais dos municipios da comarca de Santiago”. O espazo, que se instalará na área comercial Monte Balado, contará cunhas instalación específicas para todo o proceso de transformación e contará co seu propio rexistro sanitario.
Carballo e o sector tecnolóxico
Pola súa banda, o centro de Carballo estará orientado ao sector tecnolóxico e as empresas innovadoras. Emprazarase no complexo do Fórum Carballo, que abrangue cinco inmobles enfocados á prestación de servizos relacionados coa formación e o emprego nas comarcas de Bergantiños e Costa da Morte. O espazo da Deputación localizarase nun área de 156 metros cadrados do segundo andar do edificio 1. Terá capacidade para a instalación de 18 emprendedores, ademais de dispor de recantos para un/unha técnico de dinamización e un/unha auxiliar administrativo/a. Por outra banda, o espazo de traballo cooperativo tirará proveito das infraestruturas do Fórum Carballo que sexan precisas para desenvolver as súas actividades (salas de formación, auditorio, salas de reunións, despachos...) Nesta primeira fase levaranse a cabo accións de adecuación das instalacións do Fórum para acoller o centro, contratación do persoal encargado da xestión do centro e elaboración do regulamento de funcionamento do centro. Nunha segunda fase levarase a cabo o proceso de captación e selección dos usuarios, a implantación da imaxe corporativa e accións de promoción e difusión. No último treito do proceso, o equipo técnico avaliará as necesidades específicas dos proxectos empresariais implantados e “desenvolverá un programa formativo e traballos de mentoring para a consolidación e desenvolvemento dos proxectos empresariais”, informou a Deputación da Coruña.
A Axencia para a Modernización Tecnolóxica de Galicia (Amtega) vén de publicar o Mapa de Demanda Temperá para deseñar unha plataforma de contidos interactivos para a Televisión de Galicia, que ofrecerá aos máis novos novas experiencias didácticas adaptadas aos hábitos de consumo actuais.
Este documento, dispoñible na web da Amtega, é o resultado das consultas preliminares ao mercado dentro do proceso de Compra Pública Innovadora lanzado este ano por ambas entidades. O Mapa recompila as ideas achegadas polas 20 entidades (empresas e agrupacións de empresas) que participaron no proceso. Coa súa publicación anticípase ao mercado o plan de contratación previsto pola Amtega á hora de licitar este proxecto.
O seguinte paso será a publicación da licitación que está prevista para o primeiro trimestre do ano 2019 por un importe máximo de 1.780.000 euros.
Contidos dixitais interactivos
Con esta iniciativa a televisión pública autonómica contará cunha plataforma que lle permitirá ofrecer contidos divulgativos de ámbito científico e tecnolóxico para rapaces en idade escolar.
Empregará técnicas de Big Data e Intelixencia Artificial que permitirán analizar os comportamentos da audiencia e crear experiencias personalizadas.
Ademais, para mellorar a experiencia de usuario incorporaranse as segundas pantallas, así como a creación de contidos específicos baseados nas últimas tendencias tecnolóxicas como a realidade aumentada, realidade virtual, hologramas etc...
Plan DicoMindset
Esta iniciativa enmárcase no Plan de impulso ao sector dos contidos dixitais, DicoMindset, que está a desenvolver a Amtega, en colaboración con distintas entidades do ámbito público (Igape, CRTVG, Agadic, etc.), que se estende tamén aos actores do ámbito privado (Clúster TIC, Clúster Audiovisual, empresas tractoras, etc.). En total, DICO Mindset conta cun investimento de máis de 13 millóns de euros, dos que máis de 1,6 millóns de euros se corresponden con capital privado, no período 2018-2020.
A convocatoria deste ano permitirá o desenvolvemento de 37 iniciativas na área coruñesa cun investimento público de 4M€
O delegado territorial da Xunta de Galicia, Ovidio Rodeiro, visitou, está mañá, a empresa Health in Code unha das beneficiarias da cuarta edición do programa Conecta Peme que, nesta convocatoria, mobilizará en Galicia máis de 47M€ en 54 proxectos de innovación empresarial. Na comarca da Coruña financiaranse 32 empresas para desenvolver 37 proxectos cun investimento público de 4M€ que suporán unha mobilización total de 7,3M€.
Segundo informou o representante do goberno autonómico, “este entidade puido levar a cabo un proxecto orientado á creación dunha plataforma de xestión global para a análise de estudios xenéticos e interpretación clínica dos seus resultados”.
Ovidio Rodeiro, sinalou que “o obxectivo desta iniciativa é incrementar a I+D+i empresarial en Galicia para o que se primou na selección dos proxectos o novidoso das tecnoloxías xeradas e a súa capacidade para poñer no mercado novos produtos e solucións que supoñan un avance significativo ou un alto impacto económico”. Na provincia da Coruña esta orde de axudas chegará a 90 empresas cun investimento público de 11,4M€ para mobilizar un total de 20,3M€.
A Consellería de Economía, Emprego e Industria, a través da Axencia Galega de Innovación (Gain), destina nesta convocatoria un 8% máis de orzamento que na anterior. Os proxectos están relacionados co desenvolvemento experimental, con potenciar a Industria 4.0 a través de proxectos de innovación en materia de organización e proxectos, e coa investigación industrial. As iniciativas aprobadas desenvolveranse ata o 2020 e executaranse nun prazo de 2 ou 3 anos.
Entre as novidades desta convocatoria destacaron, ademais do incremento do orzamento, a simplificación de trámites, a especial valoración da contratación de persoal e do potencial en canto a viabilidade e rendibilidade dos proxectos, así como o fomento dunha maior concorrencia para evitar a concentración de axudas nunha mesma empresa.
O delegado territorial puntualizou que “esta orde de axudas está dirixida a proxectos que contan cun orzamento de entre 500.000 euros e 1,5 millóns e que pretende estimular a innovación das pemes galegas para fortalecer a competitividade do tecido empresarial galego”. Este obxectivo se acada “a través da cooperación entre os diferentes axentes, xa que cada proxecto conta coa participación de entre tres e seis empresas e pode incluír unha grande empresa”, puntualizou. Ademais, optimízase o acceso ao financiamento ás pemes galegas, favorécese a transferencia de coñecemento ao mercado e foméntase a creación de emprego cualificado.
Desde a súa posta en marcha, no ano 2013, este programa está a mobilizar 150M€ en 187 proxectos de cooperación nos que están a participar 433 empresas –o 95% pemes– e 81 centros tecnolóxicos e de investigación que están xerando a creación de 530 empregos. Este programa compleméntase con Interconnecta que, desde 2011, tamén está a favorecer o desenvolvemento de 172 proxectos –que contan cun orzamento superior aos 1,5 millóns de euros– entre grandes consorcios de empresas e centros de coñecemento coa participación de 565 empresas galegas.
A conselleira de Política Social, Fabiola García destacou durante a clausura do XX Congreso Estatal do Voluntariadoo éxito deste evento que permitiu “difundir, fomentar e prestixiar o labor solidario e desinteresado de persoas e entidades”.
A conselleira de Política Social, Fabiola García, destacou esta tarde, durante a clausura do XX Congreso Estatal do Voluntariado, que se celebrou onte e hoxe en Expourense, o éxito deste evento que permitiu “difundir, fomentar e prestixiar o labor solidario e desinteresado de persoas e entidades”. Tamén apuntou que este congreso fixo da comunidade “a capital do voluntariado en España” e puxo de novo de manifesto o “selo solidario dunha Galicia aberta, hospitalaria e sempre disposta a botar unha man”.
Na súa intervención, Fabiola García subliñou o feito de que en Galicia a participación do voluntariado sexa cada vez maior, con máis de 7700 persoas activas neste ámbito na actualidade, o que supón un incremento do 35% no último ano. Nesta liña, garantiu o apoio da Xunta a todas aquelas accións que signifiquen máis benestar como é o caso dos programas de voluntariado social, ambiental ou cultural que están en marcha nestes momentos.
A conselleira fixo fincapé en que Galicia é a única Comunidade Autónoma e a única rexión europea que acredita a acción voluntaria, un recoñecemento homologado pola Unión Europea útil para completar o currículo. Así mesmo, avogou pola colaboración entre administracións, entidades e voluntariado para seguir a avanzar na construción dunha sociedade mellor.
Fabiola agradeceu aos voluntarios, entidades e institucións de toda España a súa participaron neste congreso, así como ao comité científico, técnico e de expertos do mesmo, que estivo formado pola Plataforma do Voluntariado en España, as tres universidades galegas e entidades sociais.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...