O Concello de Ponteceso iniciou 2020 apostando por combater a fenda dixital: o espazo que separa as vantaxes das novas tecnoloxías das persoas que aínda non teñen os coñecementos nin as infraestruturas precisas para tirarlles proveito. Estamos a falar do curso de informática para maiores que comezou esta mesma semana na Biblioteca Municipal de Ponteceso e o luns 13 de xaneiro na Casa do Mar de Corme. A actividade vén da man do departamento local de Servizos Sociais, que recunca coa formación tecnolóxica logo do éxito de participación dos obradoiros previos para familiarizar á veciñanza no uso dos teléfonos móbiles.
O obxectivo da nova andaina formativa é “seguir achegando aos nosos maiores ás novas tecnoloxías e ofrecer así atractivas propostas para encher de diversión e aprendizaxe o seu tempo de lecer”, en palabras do departamento que dirixe Noelia Varela. Na nova actividade porase ao alcance dos asistentes unha oportunidade para “poñerse ao día no uso e manexo dunha das ferramentas máis útiles e imprescindibles no desenvolvemento da nosa vida cotiá”. As persoas interesadas en participar deben achegarse ao departamento de Servizos Sociais ou chamar ao 881 983 045 (Ponteceso) e 981 738 428 (Corme).
O conselleiro de Economía, Emprego e Industria, Francisco Conde, destacou hoxe a necesidade de estimular e desenvolver a figura da profesional 4.0 para anticiparse aos retos do futuro. Durante o encontro Mulleres Protagonistas, que se celebrou en Vigo, o conselleiro sinalou que este tipo de xuntanzas ofrecen unha oportunidade para reflexionar sobre os desafíos que se presentan para mellorar a situación das mulleres no mundo laboral e empresarial e avanzar cara a igualdade profesional plena.
Mulleres protagonistas é unha iniciativa que, de xeito periódico, reúne a mulleres de distintos sectores -neste caso do mundo da enxeñaría con representantes do eido empresarial, asociacións, centros tecnolóxicos e da Universidade- co obxectivo de establecer un diálogo aberto entre a Xunta e este colectivo para escoitar as súas propostas, explicar as medidas do Goberno galego e, deste xeito, realizar unha posta en común sobre os retos e dificultades que afrontan no seu día a día.
En concreto, a xuntanza de hoxe, abordou temas como o papel das mulleres no impulso da Industria 4.0, o fomento das vocacións STEM entre as mozas ou os retos da Galicia de 2030. Así, Conde subliñou que é indispensable contar cun entorno laboral onde a desigualdade non pode nin debe ter lugar e, deste xeito, reducir a fenda que existe, na actualidade, entre os homes e mulleres incorporados á canteira do talento 4.0.
Francisco Conde incidiu en que toda a sociedade se debe implicar no desenvolvemento integral da muller, para avanzar entre todas e todos cara a unha Galicia máis feminina, ofrecendo oportunidades en eidos como a conciliación familiar, a transparencia salarial, a promoción profesional ou a flexibilidade laboral.
Aínda que queda moito traballo por facer, Galicia está demostrando unha evolución favorable e, así, o paro feminino cae un 2,37% no último ano, a mellor ritmo que o desemprego masculino.
Entre outras iniciativas, este ano a Xunta aumentará nun 67% as axudas á contratación e á formación de desempregadas, ata os 4,3 millóns de euros a través do programa Emprega Muller -cuxo prazo de solicitude abre hoxe-, e tamén as axudas ás pemes para facilitar medidas de igualdade, conciliación e flexibilidade medrarán nun 14% (ata os 2,8 millóns de euros). Ademais poñerase en marcha un novo programa, TécnicAs para fomentar unha maior presenza de mulleres na industria e nas TIC.
O Concello de Ames vén de presentar o programa de formación tecnolóxica da rede CeMIT local para este arranque de 2020. Serán, segundo confirmou, trece novos cursos para estes meses de xaneiro e febreiro. Para comezar, hai programados obradoiros sobre o manexo do correo electrónico, o manexo da nube (para o cal xa están cubertas as prazas pero admítense inscricións na lista de agarda) e outro sobre como buscar na Rede. Asemade, durante o mes de febreiro iniciarase un curso de mecanografía para adultos e outro sobre o manexo de aplicacións no móbil.
Asemade, iniciarase un novo ciclo de empregabilidade, con actividades formativas sobre creación de currículos e a busca de ofertas de emprego a través de Internet. O primeiro, o dos CV, será o martes 28 e mércores 29 de xaneiro de 18.00 a 20.00 horas. O segundo, que afondará na busca de emprego a través de Internet, será o 30 de xaneiro no mesmo horario. Por outra banda, en 2020 continuarase coas sesións para introducir á veciñanza na suite ofimática de LibreOffice. Desenvolveranse dous cursos no mes de febreiro sobre o uso do procesador de textos LibreOffice Writer. O primeiro será dun nivel básico e o segundo realizará un maior afondamento.
Para a rapazada, a aula CeMIT que xestionan o Concello e axencia autonómica AMTEGA achegará un curso de presentacións para estudantes ao abeiro do cal coñeceranse programas como o PowerPoint e o Impress. Ademais, a partir de febreiro desenvolveranse un curso de informática para nenas/os nivel básico e dous de mecanografía, un para menores de 10 anos e outro para os maiores desta idade.
O luns 13 de xaneiro, de 12.00 a 13.00 horas, levarase a cabo unha videoconferencia sobre obradoiros de reparación de vehículos, na que se darán a coñecer os dereitos e deberes dos cidadáns usuarios destes servizos así como unha serie de recomendacións a ter en conta.
Os exames EMA son un tipo de exame presencial necesario para acadar o diploma en determinados cursos de teleformación do Espazo Multimedia de Aprendizaxe do CeMIT. Haberá dúas quendas, unha o 17 de xaneiro de 12.00 a 13.00 horas e outra o 14 de febreiro de 17.30 a 18.30 horas.
Para obter máis información ou para reservar praza en calquera destas actividades, as persoas interesadas pódeno facer a través da páxina web da CeMIT, achegándose á aula da Casa da Cultura de Bertamiráns, chamando ao número de teléfono 682 373 753, ou enviando un correo ao enderezo electrónico cemit.ames@xunta.gal.
Quen queira comezar o ano de maneira tecnolóxica, dando os primeiros (pero firmes) pasos en materia de navegación, uso de computadores e comunicación dixital, vai poder facelo na coruña a partir do 10 de febreiro, na Biblioteca do Centro Ágora da Coruña. Segundo informa o Concello, até o día 21 desenvolverase no dito emprazamento o Curso de iniciación á informática, Internet e correo electrónico, aberto a todo tipo de público (maiores de 14 anos) en horario de mañá (de 9.00 a 12.00 horas). O prazo para inscribirnos comeza o día 3 do vindeiro mes e remata o día 8. Serán 30 horas de formación.
Trátase dunha actividade de alfabetización e dinamización dixital destinada a combater a falta de oportunidades formativas para introducir nas tecnoloxías a quen non tivo aínda unha oportunidade para facelo, ben sexa por razóns de idade, por falta de tempo ou por desconfianza con respecto ás TIC. Segundo informou o Concello, “neste curso adquiriremos as habilidades básicas para o manexo do teclado e do rato, para a administración e uso de arquivos e cartafoles, para a procura de información na Internet, para o acceso a servizos e trámites en liña e para a creación e xestión dunha conta de correo electrónico”. O programa inclúe unha introdución á Rede e aos conceptos básicos da mesma, aos elementos dun computador, aos diferentes tipos de arquivos, ás páxinas web de meirande interese ou a como converternos en expertas e expertos no envío e recepción de e-mails.
A Xunta de Galicia abre mañá o prazo de solicitude para as catro liñas do programa Galicia Emprega, tras a publicación hoxe das convocatorias no Diario Oficial de Galicia (DOG). O obxectivo é favorecer a formación e a contratación de máis de 1100 mulleres, parados de longa duración, mozos e mozas, e persoas discapacitadas ou en risco de exclusión, para impulsar, deste xeito, o traballo nos colectivos con máis dificultades para atopar un emprego.
Galicia Emprega conta cun orzamento global de 10,5 millóns de euros -un 12% máis que na convocatoria de 2019- para fomentar o traballo na Comunidade. Trátase de favorecer os contratos asociados á posibilidade de mellorar a formación. Inclúe catro liñas de axudas
-Emprega Muller, Emprega Persoas con Discapacidade ou en Risco de Exclusión Social, Emprega Parados de Longa Duración e Emprega Xuventude-. Impúlsase, deste xeito, a contratación dual en catro dos colectivos prioritarios da Xunta á hora de acceder ao mercado laboral.
Por unha banda, apóiase cun bono formación aos traballadores e traballadoras para que poidan responder ás necesidades formativas do tecido empresarial e, por outra, ofrécense incentivos á contratación ás empresas impulsando a contratación indefinida ou inicial cunha duración mínima de 12 meses a xornada completa.
Con respecto ao bono formación, nos catro programas incentívase con 2000 euros a cualificación dos traballadores que son contratados de xeito inicial por 12 meses para que reciban unha formación mínima de 50 horas. Se o contrato é indefinido, o bono increméntase ata os 4000 euros e a formación mínima terá que acadar as 70 horas.
En canto aos incentivos á contratación, as contías varían segundo o programa e poden alcanzar os 16.000 euros. Ademais, aumentan nun 25%, segundo a liña, para aquelas empresas de máis de 50 traballadores e traballadoras pertencentes a sectores estratéxicos que teñan unha taxa de estabilidade nos seus cadros de persoal do 70%; no caso de que o centro de traballo estea situado nun concello rural; ou se as persoas incorporadas son mulleres; maiores de 45 anos; ou emigrantes retornados.
Emprega Muller é a liña dotada cun maior orzamento dentro do Galicia Emprega, con 4,3 millóns de euros -un millón máis que na pasada edición- para impulsar a formación e a contratación de 405 persoas. As axudas mínimas para os contratos indefinidos son de 12.000 euros.
A Consellería de Economía, Emprego e Industria activará Emprega Persoas con Discapacidade ou en Risco de Exclusión Social con incentivos de 8000 euros para a contratación inicial deste colectivo e de 16.000 euros para os contratos indefinidos. A previsión de beneficiarios é de 185 persoas. O orzamento deste programa ascende a máis de 2,2 millóns de euros.
No caso de Emprega Parados de Longa Duración (2M€), as axudas para a contratación de 12 meses suman como mínimo 5000 euros, incrementándose ata os 10.000 euros se se trata dun contrato indefinido. O obxectivo é contratar a 175 persoas.
En Emprega Xuventude (2M€), as contías para os contratos dun ano de duración serán de 3000 euros e acadarán o dobre (6000€) no caso de contratos indefinidos. Estímase un número de beneficiarios de 365 menores de 30 anos.
Os incentivos á contratación constitúen un dos mecanismos da Administración autonómica para estimular a incorporación de novas persoas traballadoras aos cadros de persoal das empresas galegas. Galicia Emprega enmárcase dentro da Axenda 20, a folla de ruta que está impulsando na Comunidade o emprego estable e de calidade con medidas, como este programa, que favorecen o incremento das oportunidades laborais e a redución do desemprego. Desde o ano 2015, este tipo de medidas permitiron apoiar a contratación de máis de 7300 traballadores destes catro colectivos prioritarios cun investimento de 29,3M€.
A Consellería de Educación, Universidade e Formación Profesional vén de convocar os premios para o desenvolvemento de proxectos de innovación tecnolóxica ou científica e proxectos de innovación didáctica no ámbito da formación profesional. O obxectivo destes galardóns, que teñen unha dotación económica de 800.000 euros, é potenciar as iniciativas innovadoras, o traballo colaborativo e a transferencia de coñecemento entre centros educativos, empresas e outras entidades, procurando a calidade e a excelencia na formación profesional, e o fomento do emprendemento.
O departamento educativo da Xunta aposta nas súas políticas de FP a transformar os ciclos en ensinanzas que se adapten ao contorno produtivo e ao novo modelo económico baseado no coñecemento como forza impulsora. Deste xeito estase a camiñar cara a un sistema de formación profesional máis áxil, flexible e eficiente, estreitamente vinculado ás demandas formativas da poboación e ao impulso de valores como a creatividade, a innovación e o traballo en equipo, así como á estimulación do espírito emprendedor.
A convocatoria segue as directrices marcadas pola Estratexia Europa 2020, que incorpora como obxectivo o impulso dunha formación profesional que propicie novas experiencias nos campos da innovación, da calidade, da creatividade e do emprendemento.
Os proxectos poden presentarse a dúas modalidades. A primeira delas, de Innovación tecnolóxica ou científica, está dirixida ás iniciativas que teñan como obxectivo a xeración de innovación tecnolóxica ou científica que redunde na mellora de procesos de produción ou de prestación de servizos e que estean orientadas a impulsar a transferencia tecnolóxica entre os centros educativos e o contorno produtivo. Ademais, estes proxectos deben ter unha incidencia significativa na futura inserción laboral do alumnado e na súa empregabilidade, favorecendo a aparición de oportunidades laborais e iniciativas empresariais.
A segunda modalidade, de Innovación Didáctica, céntrase nas iniciativas que teñen como obxectivo a creación de materiais ou recursos didácticos que supoñan unha clara innovación nalgunha das familias profesionais. Estarán orientadas á introdución e á aprendizaxe de novos contidos, tecnoloxías avanzadas, e instrumental ou maquinaria na aula ou no taller, potenciando o deseño de materiais didácticos, deseño de prototipos ou simuladores, laboratorios para prácticas ou maquetas, aplicacións informáticas, etc. Ademais, eses materiais deben ser doadamente trasladables a outros centros onde se impartan as ensinanzas para as que foron deseñados.
Entre os criterios para escoller os proxectos premiados valoraranse, en especial, aqueles nos que se fomente a colaboración do profesorado e do alumnado de formación profesional con empresas e institucións do seu contorno, e con outros centros educativos; así como os que fomenten a aparición de novas iniciativas empresariais, especialmente aquelas que sexan susceptibles de pórse en marcha na Rede galega de viveiros de empresa.
Tamén se terá en conta que impliquen unha mellora na calidade da formación e na empregabilidade e a inserción laboral do alumnado, o nivel de impacto do proxecto no contorno produtivo desde o punto de vista tecnolóxico e ambiental ou o grao de transferencia e resposta a un reto empresarial.
Así mesmo darase prioridade ás iniciativas que favorezan o acceso da muller aos perfís relacionados con profesións STEAM e actividades industriais, así como o acceso dos homes a sectores que contan con escasa representación masculina.
O prazo de presentación de solicitudes, que deberá facer un centro educativo de formación profesional dependente da Consellería, está aberto ata o 31 de xaneiro de 2020. O proxecto ten que ser colaborativo e contar cun mínimo de dous participantes. Deberán figurar como socios outros centros educativos de formación profesional, entidades ou empresas, a nivel autonómico.
O centro solicitante actuará como coordinador da iniciativa e un dos seus docentes asumirá as funcións de coordinación do proxecto, co fin de asegurar o contacto e a comunicación regulares entre os participantes, promover unha colaboración eficaz e facilitar a distribución e a realización do traballo en equipo.
As solicitudes poderanse presentar no Rexistro Xeral da Xunta de Galicia, nos rexistros provinciais dos departamentos territoriais da Xunta de Galicia ou en calquera dos lugares previstos no artigo 16 da Lei 39/2015, do 1 de outubro, do procedemento administrativo común das administracións públicas.
Máis de 600 profesionais dos servizos sociais locais e da Administración autonómica empregan a Historia Social Única Electrónica (HSUE), no seu labor cotiá. A plataforma, que puxo en marcha a Xunta en 2016, e integra nun mesmo sistema todos os datos relativos a historia social do individuo e facilita a coordinación de todos os axentes que participan na prestación dos servizos sociais.
O colectivo de usuarios que teñen en HSUE unha ferramenta clave na súa labor profesional cotiá segue a medrar. A día de hoxe xa son 307 os concellos que asinaron o convenio de adhesión a Historia Social Única Electrónica, o que posibilita que máis de 500 profesionais dos servizos sociais comunitarios, tanto básicos como especializados, accedan a plataforma.
A estes hai que sumar os máis de 104 profesionais da Xunta de Galicia que empregan HSUE como una ferramenta de apoio na xestión de prestacións no eido social tanto de dependencia, como discapacidade, inclusión social, atención e protección de menores, pensións non contributivas, RISGA/AIS etc.
Desde o seu arranque, a Axencia para a Modernización Tecnolóxica de Galicia (Amtega) e a Consellería de Política Social traballan de forma continuada na súa evolución e mellora coa incorporación de novas funcionalidades, novos ámbitos de información, servizos e a integración con outros sistemas.
Entre as melloras incorporadas para facilitar o traballo dos profesionais e reducir o tempo de tramitación, cómpre destacar a funcionalidade que permite aos traballadores sociais de referencia presentar solicitudes de prestacións sociais, como a Risga, directamente dende HSUE, aproveitando a información do usuario existente na mesma e de xeito integrado coa sede electrónica da Xunta de Galicia.
A integración da plataforma con outros sistemas como os de emprego permite o traballo colaborativo e coordinado entre ambos departamentos, o que facilita as actividades de orientación e formación para os beneficiarios da Risga de cara a optar un emprego.
Ademais, púxose en marcha un módulo de Atención Temperá, unha ferramenta de HSUE que facilita aos profesionais da área de menores a xestión integral dos expedientes deste ámbito. Na actualidade 18 Servizos de Atención temperá de diversas mancomunidades, agrupacións ou concellos individuais empregan esta facilidade.
Para o 2020 o obxectivo é estender a Historia Social Única Electrónica aos dispositivos móbiles como axuda na atención ás persoas maiores, familias e coidadores para o que se porá en marcha a plataforma Asiste. Integrada na HSUE, Asiste facilitará aos profesionais sociais, coidadores e familiares, o seguimento das actuacións sociais, así como outros servizos de valor promovidos desde a Administración.
Asiste contará cun asistente virtual, que a través de pictogramas e ferramentas de recoñecemento de voz facilitará a comunicación de xeito intuitivo. Esta plataforma, que estará dispoñible para todos os cidadáns que teñan aberta unha historia social na Comunidade e se rexistren nela, facilitará a monitorizacion dos parámetros da súa actividade, biomedidas e xeolocalización. Os familiares e os coidadores autorizados terán acceso seguro a esta información e recibirán avisos e alertas en tempo real ante calquera anomalía nos patróns de actividade da persoa.
A día de hoxe a plataforma HSUE ten dispoñibles as historias sociais preto de 670.000 cidadáns en formato electrónico. A plataforma proporciona unha identificación unívoca dos cidadáns e garante a seguridade no acceso á información a través do uso de certificado electrónico por parte dos profesionais, que acceden só aos datos e información necesarios para o desenvolvemento do seu labor.
A extensión da Historia Social Única Electrónica (HSUE) supuxo un fito no eido dos servizos sociais, similar á posta en marcha da Historia Clínica no eido sanitario, ao integrar nun mesmo sistema todos os datos relativos a historia social do individuo, incluíndo a situación persoal, social e familiar; as súas demandas, prestacións, servizos e recursos, así como as valoracións, intervencións, seguimento e avaliación por parte do sistema de Servizos Sociais, ademais de información referente a profesionais e a institucións e organizacións que interveñen nas mesmas. Isto permite, en base a análise e explotación dos datos, e poder desenvolver políticas de prevención e posibilitar ó cidadán o acceso a súa historia.
Este sábado celébrase o Día Mundial do Braille, un sistema que permitiu ás persoas con discapacidade visual acceder ao coñecemento, á educación e á tecnoloxía, e que se converteu no vehículo principal polo que millóns de persoas en todo o mundo comunícanse co mundo que os rodea.
Así o celebra a ONCE, que afirma que este sistema de lectoescritura permitiu que as persoas cegas saísen da "escuridade" e abríranse "ao mundo do coñecemento, a tecnoloxía, a educación, o emprego e a vida, en definitiva, tal e como a coñecemos hoxe".
Sen dúbida, o sistema Braille foi fundamental para a inclusión das persoas con discapacidade visual en infinidade de ámbitos da vida e agora convértese nun aliado clave para que moitas destas persoas poidan acceder á tecnoloxía.
Así mesmo, a ONCE reivindica un uso máis activo do braille en bens e servizos para que sexan máis accesibles para as persoas cegas e para facilitar a súa autonomía persoal.
Este 4 de xaneiro conmemórase o nacemento do creador deste sistema, o francés Louis Braille, que "recuperou aos cegos da prehistoria no acceso ao coñecemento, como fixera apenas uns séculos antes a imprenta co resto da humanidade".
Desde entón o braille seguiu evolucionando e agora únese á tecnoloxía para facilitar o acceso á información e o coñecemento ás persoas con discapacidade visual a través de distintos dispositivos, como as liñas braille.
O visor do Expediente Xudicial Electrónico rexistrou no último ano un incremento de uso do 130%, pasando de preto de 40.000 consultas en novembro de 2018 a máis das 92.000 visitas rexistradas en novembro deste pasado ano. O visor é unha solución única e multidispositivo, que permite a maxistrados, letrados, fiscais e funcionarios a consulta online de calquera expediente xudicial.
O visor, implantado desde 2018 na totalidade dos órganos xudiciais galegos, é unha das mediadas para a implantación do Expediente Xudicial Electrónico en Galicia, que están a levar a cabo a Axencia para a Modernización Tecnolóxica de Galicia (Amtega) e a Vicepresidencia e Consellería de Presidencia, Administracións Públicas e Xustiza en colaboración cos profesionais do ámbito xudicial galego.
Por outra banda, avogados e procuradores xa poden descargar as gravacións das vistas das que son parte a través da sede electrónica xudicial. É unha das novas funcionalidades da sede, que se vén probando desde o pasado mes de abril en xulgados de Lugo e Pontevedra.
O acceso ás gravacións das vistas está restrinxida aos profesionais que interveñen neses procedementos e que poderán descargalas identificándose con certificados dixitais compatibles coa sede electrónica xudicial e cun sistema de códigos facilitado polo órgano xudicial no que ten lugar o procedemento. A posta en marcha deste novo servizo online evita aos profesionais ter que acudir ao xulgado para recoller a gravación nun soporte físico. Cómpre destacar, que ata novembro do ano pasado realizáronse máis de 76.800 gravacións de vistas nos xulgados galegos
A sede electrónica xudicial entrou en funcionamento a finais de 2016 e desde entón foi incrementando os servizos dispoñibles co obxectivo de consolidarse como canle única para todas as actuacións, procedementos e servizos en liña do ámbito xudicial.
Unha das últimas funcionalidades habilitadas foi a presentación dos procedementos monitorios, unha fórmula xudicial para reclamar impagos, que non precisa da intervención dun avogado ou dun procurador. Ata novembro, xa se presentaron un total de 1.372 escritos en liña.
Ademais, a través de https://sede.xustiza.gal os cidadáns tamén poden facer un seguimento do procedemento e consultar os expedientes xudiciais dos que son parte a través do espazo “a miña carpeta”.
Na sede tamén se pode comprobar a autenticidade e integridade de documentos electrónicos emitidos pola Administración de Xustiza en Galicia, e dar de alta un aproderamento de xeito electrónico (rexistrar un apoderamento apud acta). O obxectivo é que a sede se consolide como canle única para todas as actuacións, procedementos e servizos do ámbito xudicial.
Cómpre lembrar que a sede está accesible tamén a través do portal xustiza.gal, no que están dispoñibles a axenda de sinalamentos de vistas, o calendario de gardas, a calculadora de taxas xudiciais ou o censo de letrados
A posta en marcha da sede xudicial electrónica foi un dos fitos previstos no Plan Senda 2020, que está a desenvolver a Axencia para a Modernización Tecnolóxica de Galicia (Amtega) en colaboración coa Vicepresidencia e Consellería de Presidencia, Administracións Públicas e Xustiza e os profesionais do eido xudicial.
Cun orzamento de máis 26,6 millóns de euros o Plan Senda 2020 é a estratexia para consolidar o traballo previo realizado no Plan Senda 2014 e que sentou as bases do Expediente Xudicial Electrónico en Galicia, onde están en marcha todas as pezas que permitirán unha xustiza integramente dixital.
A aplicación "Alertcops" facilitará a partir de agora o acceso das persoas con discapacidade auditiva aos servizos de emerxencia, xa que permitirá xeolocalizar ao usuario e garantir unha comunicación bidireccional en todo o territorio nacional mercé a unha nova versión lanzada polo Ministerio do Interior.
Segundo lembrou onte luns o departamento que dirixe Fernando Grande-Marlaska a través dun comunicado, "Alertcops" é un servizo gratuíto que permite a xeolocalización do usuario para a súa atención máis inmediata e permite aos cidadáns enviar todo tipo de información, incluídos fotos e vídeos, ao centro de chamadas máis próximo.
O menú principal de "Alertcops" incorpora agora a icona "persoas xordas", desde o cal se poderá acceder a asistencia médica, asistencia policial ou dos servizos de bombeiros, entre outros.
Dispón tamén dun sistema de difusión de avisos aos dispositivos que se atopen nunha zona afectada por unha emerxencia e complementa así o acceso de persoas con discapacidade auditiva aos servizos de emerxencia que habitualmente realiza a través doutras aplicacións xestionadas polas comunidades autónomas ou do sistema S-Visual, do Ministerio de Sanidade, Consumo e Benestar Social.
Para Interior, dada a "heteroxeneidade" de aplicacións existentes nas diferentes comunidades autónomas, este sistema será "especialmente útil" para aqueles usuarios con discapacidade auditiva nos seus desprazamentos fóra da súa rexión de residencia. Con todo, este novo servizo de "Alertcops" pode ser tamén de "gran utilidade" para persoas con trastornos do espectro autista (TEA) e que se "manexen mellor" coa linguaxe pictográfica.
A última versión da aplicación (4.0.18) atópase dispoñible para Android e IOS, a súa descarga é gratuíta e só require o rexistro previo.
A continuación de pode acceder a un vídeo explicativo da aplicación na Canle Youtube.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...