Ponteareas está a presentar estes días un amplo programa de formación tecnolóxico-dixital para a cidadanía. Trátase dunha serie de obradoiros a desenvolver na aula CeMIT e adaptados, en palabras do Concello, a “todos os niveis e totalmente de balde deseñados en función da demanda que exista”. Impartiranse no mes de decembro e comezarán o día 2, en horario de tarde, con actividades (tres) para iniciar á veciñanza no uso e posibilidades das follas de cálculo, na informática para maiores e na mecanografía.
O día 9 arrincan os cursos para o deseño de currículos, para a procura de información a través de Internet e para formar ás veciñas e veciños, novamente, en mecanografía. O día 12 e 13 impartirase un obradoiro destinado a adestrar aos asistentes na procura de emprego a través de Internet. O día 14 na aula CeMIT mostrarse como tirar proveito da ferramenta Gmail. Do 16 ao 20 de decembro haberá cursos de uso básico das redes sociais, de Scratch 2 (iniciación á informática) e de alfabetización informática para maiores. O 21 de decembro ofrecerase axuda para a utilización do teléfono móbil.
As persoas interesadas poden chamar ao número de teléfono 673 794 883, achegarse ata a aula emprazada no centro social da rúa Oriente ou enviar un correo a cemit.ponteareas@xunta.gal.
O director do Igape, Juan Cividanes, salientou hoxe en Santiago de Compostela, na xornada técnica promovida polo Clúster TIC, que o esforzo deste sector é clave para facilitar a mellora da competitividade das empresas galegas en xeral, facendo máis doado o camiño cara á Industria 4.0, e reforzando os avances na internacionalización do tecido produtivo.
Cividanes interveu na apertura dos encontros que forman parte da misión comercial inversa apoiada polo programa Galicia Exporta que desenvolve a Consellería de Economía, Emprego e Industria, e que dá continuidade á delegación internacional que o pasado mes de maio visitou Galicia. Durante esta semana, seis compañías de México e dúas Chile -punteiras na fabricación e distribución de moda, industria retail e alimentaria e no sector das telecomunicacións- manterán encontros bilaterais e de networking con empresas do sector TIC galego.
Ademais de subliñar que o impulso transversal do sector TIC é clave para adaptar o resto dos ámbitos produtivos estratéxicos galegos á implantación da fábrica intelixente e ás tecnoloxías emerxentes, que a Xunta promove ao abeiro da Axenda 4.0, Cividanes resaltou a boa evolución da presenza exterior das empresas galegas desta industria, e lembrou que accións como esta do sector reforzan a proxección exterior das pemes galegas no seu conxunto.
O director do Igape subliñou que en 2018 exportaron aos dous países participantes na misión comercial 825 empresas galegas por importe de 445,98 millóns de euros, e destacou o incremento que rexistraron as vendas a Chile, cun ascenso do 29% con respecto a 2017. No que respecta a 2019, ata agosto, as exportacións a ese destino e a México acadaron un valor de 269,11 millóns de euros.
Con preto de 18 millóns de euros en exportacións a México, este é actualmente o primeiro país estratéxico de América Latina para as empresas TIC galegas. De feito, hai xa 20 compañías socias do Clúster TIC que teñen sede en ese destino, e outras oito están focalizando as súas vendas cara el. Nos primeiros oito meses de 2019, exportaron ao país centroamericano preto de 399 empresas galegas por importe de 151,91 millóns de euros. Por outra banda, as exportacións do sector TIC galego a Chile acadaron os 8,9 millóns de euros o pasado ano.
Durante a xornada de hoxe as oito empresas mexicanas e chilenas que integran a delegación comercial realizaron exposicións técnicas, ás que seguiron presentacións das pemes que integran o Clúster TIC e dos centros tecnolóxicos galegos que traballan no eido da I+D+i. Finalmente, todas as compañías tiveron oportunidade de establecer encontros bilaterais para propiciar a cooperación e posibles acordos tecnolóxicos e comerciais.
A Área de Persoas Maiores do Concello de Vilagarcía vén de pór en marcha una nova acción formativa para facilitar tirar abaixo as barreiras que separan ás veciñas e veciños de máis de 60 anos das vantaxes e posibilidades informativas e comunicativas das novas Tecnoloxías da Información e a Comunicación (as TIC). O departamento que dirixe Tania García organiza un curso sobre o uso do móbil e o computador coa intención de que a xente de idade poida “sacar o máximo rendemento aos seus dispositivos para a realización de tarefas cotiás”. O obxectivo: contribuír a romper a brecha dixital que afecta especialmente a este sector da poboación. O curso é de balde e as/os interesados poden inscribirse xa nas dependencias da Concellería.
Segundo informa a Área de Maiores, a través deste obradoiro as persoas asistentes aprenderán cuestións básicas sobre o uso dos seus dispositivos móbiles, que lles permitirán relacionarse e comunicarse a nivel persoal e coas administracións, así como realizar trámites relacionados co ocio ou a vida cotiá, como comprar unha entrada para ir ao cine por Internet ou pedir a compra a domicilio a un supermercado. “No curso aprenderán cousas tan sinxelas como axustar o volume do teléfono, usalo para escoitar a radio, empregar os auriculares, gardar números na axenda e a comunicarse por mensaxe ou a través do servizo Whatsapp”, explica a Concellería, engadindo que tamén se achegarán recursos para a identificación de iconas, o acceso á Rede ou para sacar, gardar e enviar fotos e audios. O obradoiro tamén fará unha introdución ao uso do computador para que os maiores “saiban abrir e usar unha conta de correo electrónico, usar os buscadores de Internet para procurar información, e mesmo facer algún trámite online, como pedir cita no médico”.
O curso comeza o 25 de novembro e se impartirá no Auditorio en horario de mañá en días alternos do 25 de novembro ao 20 de decembro. Os interesados poden inscribirse nas dependencias da Concellería ata o día 22 de novembro ou ata que se cubran as 20 prazas dispoñibles, que se adxudicarán por rigorosa orden de inscrición.
Os obradoiros itinerantes Crea R da operadora de cable van recalar este sábado 23 de novembro en Cambre, e farano cun novo obradoiro sobre robótica e máis unha charla didáctica sobre Internet e as novas tecnoloxías. No taller as nenas e nenos da cidade poderán potenciar a súa creatividade e facer voar o seu espírito emprendedor, ao tempo que adquiren nocións básicas sobre programación da man da escola de emprendemento xuvenil Líbolis. A sesión terá un formato didáctico á par que divertido, sendo o obxectivo contribuír a que a as rapazas e rapaces saiban o doado que é pasaren de simples usuarios de tecnoloxías a facérmolas nós mesmos.
Entre as cousas concretas que poderán facer atópanse un coche de plastilina condutiva con luz propia, unha maqueta urbana na que se incluirá un semáforo programado por eles/as mesmos/as, ou mesmo unha barreira de acceso tamén dentro dunha maqueta. A cita será na Casa da Cultura Vila Concepción (praza Vila Concepción 1) de Cambre, A Coruña, en horario 11:00 h a 13:00 h para un máximo de 30 nenas/vos. A sesión completarase cun recanto para os maiores: no mesmo edificio, as nais, os pais e as docentes poderán recibir consellos dun pedagogo especializado, que lles resolverá dúbidas sobre a educación dos que si naceron na era dixital; e sobre o bo uso que adolescentes e millennials poden facer de internet, das redes sociais e das novas tecnoloxías en xeral. “A través de casos prácticos e de dinámicas”, sinala R, “pais, titores, avós ou educadores atoparán respostas a inquietudes como, por exemplo, a que idade deben ter móbil os rapaces ou que límite de horas débeselle pór ao uso das pantallas”. Asemade, falarase da nova terminoloxía neste campo (cyberbulling, sexting, grooming...) e de como nos afecta a todas/volo cambio dixital.
Pilotando a sesión, pensada para un máximo de 40 persoas, contarase coa presenza dun experto de Sherpa Dixital, que tentará guindar luz a esas dúbidas dos adultos sobre a contorna dixital e a xente nova. Os talleres Crea R proseguirán o seu periplo até final de ano visitando Santiago o mes que vén, tras percorrer Ourense, A Coruña, Pontevedra, Ferrol, Carballo, Viveiro, Vilanova de Arousa, Lugo e Cambre. En todos os casos, os obradoiros están abertos ao público xeral, clientes e non clientes do operador galego. Toda a información para participar témola no blog de R Digitalent 2020, o programa de AMTEGA ao que se abeiran estas actividades da operadora.
A directora da Axencia para a Modernización Tecnolóxica de Galicia (Amtega), Mar Pereira, sinalou hoxe que Galicia ten capacidades para estar na liga dixital europea. A responsable da Axencia autonómica inaugurou hoxe o Encontro Presentación do Capítulo Galego da Asociación Española para o Fomento da Seguridade da Información ISMS Forum, que se celebra en Santiago de Compostela
Pereira destacou que a Comunidade aproveitou ben os fondos europeos para impulsar a transformación dixital e que a nova Estratexia Dixital de Galicia 2030, en proceso de elaboración, quere atraer máis financiamento para impulsar tecnoloxías de futuro, como a tecnoloxía dos datos, a nova conectividade ou a ciberseguridade como marco indispensable da economía dixital. A directora da Amtega fixo fincapé na importancia da colaboración público privada neste ámbito e na necesidade de atraer talento para poder desenvolver todas as iniciativas en marcha.
A Asociación Española para o Fomento da Seguridade da Información, ISMS Forum Spain, é unha organización sen ánimo de lucro fundada en xaneiro de 2007 para promover o desenvolvemento, coñecemento e cultura da Seguridade da Información en España e actuar en beneficio de toda a comunidade implicada no sector. ISMS Forum Spain ten xa a máis de 230 empresas asociadas e máis de 1.200 profesionais asociados.
A Asociación de Enxeñeiros de Telecomunicacións de Galicia (AETG) organiza o vindeiro 28 de novembro unha xornada informativa sobre a adaptación das antenas de recepción da televisión que será preciso levar a cabo como consecuencia do denominado “Segundo Dividendo Dixital". A sesión, de carácter informativo e de asesoramento, terá lugar no Centro Demostrador TIC de Santiago con conexión directa con diversas aulas CeMIT do noso territorio e está dirixida á cidadanía en xeral, asociacións, administradores de fincas, antenistas, instaladores de telecomunicacións e tamén aos concellos e deputacións.
Segundo informa o Concello de Vilagarcía, unha das entidades participantes na actividade (dende a aula CeMIT do Centro de Matosinhos) a participación é de balde pero é preciso inscribirse previamente antes do 20 de novembro a través do enderezo segundodividendodixital@aetg.gal, indicando nome, apelidos, teléfono e correo electrónico de contacto. Amais da aula de Vilagarcía tamén se sumarán á xornada, dando conta dela, as aulas de Abegondo, Celanova, Santa Comba e Valga.
Esta actividade lévase a cabo no marco do Plan de Comunicación e Divulgación sobre a liberalización do Segundo Dividendo Dixital que está a desenvolver a AETG. O proceso, segundo informa a asociación, supón “un cambio significativo para a sociedade na área do desenvolvemento das telecomunicacións, con melloras nas redes e capacidade das mesmas, e que implicarán modificacións dos sistemas de cobertura da televisión dixital, de aí a necesidade das adaptacións dos equipos técnicos”. A sesión desenvolverase entre as 12.00 e as 13.30 horas na aula CeMIT mediante videoconferencia impartida dende o Centro Demostrador TIC de Santiago de Compostela.
A través desta sesión, a AETG ofrecerá asesoramento individualizado en relación coa liberación do segundo dividendo dixital e as súas implicacións, ademais de informar sobre as liñas de subvención existentes para a adaptación das instalacións de recepción do sinal da TDT.
O vindeiro 29 de novembro non só será unha cita para o consumismo por mor do Black Friday, senón que a data tamén foi a elixida por Coruña Bloggers para celebrar unha nova edición no salón de actos da Fundación Barrié a partires das 19:30 horas, estando xa dispoñible o formulario de inscrición ao evento de asistencia de balde, aínda que prégase aos que acudan que leven un mínimo de 1 quilogramo de alimentos non perecedoiros para a súa doazón á Cociña Económica local, como vén a ser habitual nesta cita que en anteriores edicións achegou 2.520 quilos de comida.
Nesta ocasión o encontro botará a andar cun relatorio de Edu Rubianes de Refrescando Negocios, quen ilustrará sobre «como potenciar o teu negocio grazas á túa marca persoal»; completará a cita Santi Rey, un dos responsables do programa de radio da Asociación AtlanTICs para CUAC FM que tamén pode seguirse en formato podcast, e que explicará como gravar un podcast sen contar cun grande investimento económico.
A Asociación TADEGa e Coruña Dixital (a fronte común do Concello e as comunidades locais de desenvolvemento e divulgación tecnolóxica), van celebrar esta semana unha das grandes actividades da tempada en materia de TIC e accesibilidade, dous conceptos (as tecnoloxías e a accesibilidade) que, segundo sinalan as súas entidades organizadoras, deberan camiñar sempre xuntos.
O sexto congreso TADEGa, que se desenvolve o 22 e o 23 de novembro, é un foro de referencia de profesionais (principalmente da nosa terra) da educación, co foco na tecnoloxía e a atención á diversidade, en aspectos como a diversidade funcional (discapacidade), a multiculturalidade, o mundo do maior, o do rural, o ámbito das altas capacidades ou a marxinalidade social.
O congreso, que terá a súa sede na Facultade de Ciencias da Educación da Coruña, artéllase en dezaseis obradoiros que se desenvolven de maneira simultánea e nos que as persoas participantes traballarán en función dos seus intereses, que serán comunicados á organización uns días antes do evento. As actividades (que podemos consultar ao detalle en formato PDF) comezarán o venres 22 ás 17.00 horas, coa benvida e a inauguración e, posteriormente, o comezo do primeiro dos obradoiros. Estes son:
A directora da Axencia Galega de Innovación (Gain), Patricia Argerey, participou esta mañá nun encontro con alumnado de 4º da ESO do instituto vilalbés Santiago Basanta Silva. Este encontro enmárcase na iniciativa Referentes Galegas nas Aulas, organizado pola Asociación de Executivas de Galicia en colaboración coa Deputación de Lugo, co obxectivo de visibilizar o traballo de mulleres profesionais galegas de diferentes sectores.
Patricia Argerey atendeu ás preguntas do alumnado e falou da súa traxectoria profesional e das súas responsabilidades actuais á fronte da Axencia Galega de Innovación e explicou que unha das prioridades do seu departamento é espertar o interese e a motivación da mocidade galega, especialmente das rapazas, pola ciencia e a innovación, co obxectivo de contar cos mellores profesionais do futuro en áreas con grande potencial para a economía galega e a economía global.
Con este obxectivo, a Axencia Galega de Innovación ten en marcha un programa de fomento das vocacións científico-tecnolóxicas que inclúe, ademais de actividades consolidadas como a feira Galiciencia, as Aulas Tecnópole ou as Aulas Isidro Parga Pondal, novas actuacións como o Programa D´tec, para fomentar o deseño, a ciencia e a tecnoloxía entre a comunidade educativa galega que está a desenvolver talleres e espectáculos no CIS Tecnoloxía e Deseño de Ferrol.
Tamén se está desenvolvendo o Programa de Fomento de Vocacións da Civil UAVs Initiative, unha iniciativa estratéxica para desenvolver o sector dos avións non tripulados (drons). Co obxectivo de conseguir o achegamento da ciencia e da tecnoloxía aos máis novos e o fomento de novas vocacións especialmente vinculadas ao sector aeronáutico e aeroespacial, inclúe talleres, charlas e visitas ao Aeródromo de Rozas, e iniciativas como as Aulas Newton ou os Drone Day en colaboración coa multinacional aeronáutica Boeing.
A Axencia para a Modernización Tecnolóxica de Galicia (Amtega) e o Instituto Nacional de Ciberseguridade (INCIBE) veñen de asinar un acordo de colaboración que, ademais da cooperación institucional neste ámbito, permitirá a posta en marcha de accións de capacitación e concienciación destinadas a cidadáns e empresas.
A sinatura deste acordo enmárcase dentro das medidas do Plan Director de Ciberserguridade da Xunta, que ten entre os seus obxectivos principais protexer os servizos públicos dixitais fronte a este tipo de ameazas e crear un clima de confianza para xeneralizar o seu uso por parte de cidadáns e empresas.
Grazas ao acordo, a Amtega e o Incibe colaborarán na transferencia e intercambio de coñecemento e experiencias ou proxectos de ciberseguridade, tanto a nivel estratéxico como a nivel operativo ou técnico.
Ademais, impulsarán actuacións de sensibilización, concienciación e capacitación dirixidas a pemes e cidadáns, neste caso especialmente no ámbito de menores, familias, educadores e centros educativos.
Tras a sinatura do acordo, o seguinte fito será a xuntanza da comisión de seguimento, integrada por representantes de ambas as entidades para concretar as actuacións e servizos que se desenvolverán.
A ciberseguridade é un elemento clave no proceso de transformación dixital que estamos a vivir e un tema de vital importancia a nivel empresarial. Os últimos datos do Osimga sobre as TIC nas empresas sinalan que no ano 2018 o 85,3% das empresas de 10 ou máis traballadores e o 41,6% das microempresas galegas empregan sistemas de seguridade. Entre as microempresas este indicador increméntase en 2 puntos porcentuais con respecto ao ano anterior.
Por outra banda, respecto a percepción dos cidadáns sobre os riscos no mundo dixital, un estudo do Osimga sinala que o 90% dos galegos considera recomendable ter máis información para navegar de xeito seguro pola rede
O INCIBE é unha sociedade estatal adscrita ao Ministerio de Economía e Empresa a través da Secretaría de Estado para o Avance Dixital que se ocupa do desenvolvemento de actuacións de ciberseguridade e de promover a confianza dixital de cidadáns, e empresas, especialmente para sectores estratéxicos.
Esta entidade estatal coordina actuacións e esforzos co resto de organismos públicos e privados, nacionais e internacionais, que traballan nesta materia.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...