Primeira entrada da Guía para maiores “Aproveita o tempo na casa coa tecnoloxía“.
Hoxe queremos dirixirnos aos máis de 850.000 galegos e galegas que tedes máis de 60 anos e especialmente aos que vivides en fogares unipersoais. Queremos dicirvos que continuedes coas vosas rutinas diarias desde as vosas casas e vos apoiedes na tecnoloxía para poder mellorar a vosa calidade de vida e estar máis activos, especialmente nestes días de alerta sanitaria.
Os beneficios da tecnoloxía para toda a sociedade son moitos, pero concretamente, para as persoas maiores, poderíamos resumilos en que:
Nesta entrada, presentarémosche como a tecnoloxía pode axudarte nas túas rutinas diarias e a manter o teu corpo e a túa mente activos especialmente mentres non poidamos saír das nosas casas.
A tecnoloxía pode ser un bo aliado para organizar o teu día e no establecemento de rutinas diarias e horarios que van desde levantarse, asearse, almorzar, ler a prensa, facer a cama e recoller a casa, poñer unha lavadora, escoitar música, preparar a comida, comer, escoitar as novas, facer exercicio, ler un libro, retomar algunha afección, falar cos amig@s e familiares, preparar a cea, cear, ver a televisión, unha película ou unha serie e deitarse.
Emprega o teu móbil ou tablet e apunta nunha nota o que vas a facer hoxe, ou mándallo a un familiar por WhatsApp, para que tamén o saiba e dálle os bos días.
Tamén podes aproveitar para crear unha nota no teu móbil coa lista da compra e as cousas que vas precisando para que logo non se che esqueza nada e a poidas enviar facilmente á persoa que che axude con esta tarefa, ou incluso facer a compra por Internet para evitar saír da casa.
Avanzando un pouco máis, tes a túa disposición os asistentes virtuais que cunha simple interacción a través de voz natural, tamén poden axudarte nas pequenas tarefas que che sexan máis custosas, para consultar dúbidas sobre unha receita, o tempo, información, establecer alarmas para tomar as medicinas, realizar compras, etc.
Incluso as actividades domésticas, aínda que sexan actividades menores como facer a cama ou limpar a casa, axudarante a deixar atrás a inactividade, e realizar algo de exercicio ou pasear polas diferentes estancias da casa farán que circule o sangue mellorarán a túa saúde e o teu estado de ánimo.
Neste caso, a tecnoloxía tamén te axudará a manterte activo na casa e a través do teu móbil poderás contar os pasos que realizas ao longo do día ou ter o teu adestrador persoal que che axudará a realizar exercicio segundo o nivel no que te atopes. Tan só terás que descargar a aplicación que máis che interese a través de Google Play Store para Android ou iTunes Apple para sistemas iOS ou visualizar algún dos vídeos dispoñibles en YouTube.
Adicionalmente, ao longo destes días xurdiron moitas iniciativas para realizar exercicio desde a casa, nas que poderás participar xunto con outras persoas, seguindo sempre as recomendacións dos especialistas.
Aproveita o illamento para manter unha boa alimentación e unha dieta equilibrada, isto fará que o confinamento sexa mellor e potenciará o teu benestar físico e emocional.
Este pode ser un bo momento para aprender novas receitas ou trucos para mellorar os teus menús, e Internet pode axudarte nesta labor, xa que existe unha gran variedade de vídeos e titoriais na rede que che darán ideas e técnicas para elaborar os teus almorzos, comidas e ceas.
Ponte mans á obra co apoio do teu móbil ou tablet, sácalle unha foto ao teu resultado e compárteo nas redes sociais ou cos teus amig@s e familiares.
Para os que aínda non empregades os dispositivos electrónicos de forma habitual, (segundo os datos do IGE 2018, en Galicia o 76,54% das persoas de máis de 65 anos), estes son algúns dos exemplos nos que a tecnoloxía che pode abrir unha gran variedade de opcións e oportunidades e nas próximas publicacións, presentaremos outras moitas aplicacións das TIC para facilitar as tarefas do día a día, para manterte en contacto cos teus seres queridos, entreterte, manter a túa mente áxil ou sentirte máis seguro a través de sistemas de teleasistencia.
E por último, lembra, a tecnoloxía é de gran utilidade para toda a cidadanía e tamén para as persoas maiores. Pide axuda sempre que o precises.
O blog A escola infantil na casa posto en marcha pola Xunta rexistrou máis de 33.000 visualizacións na súa primeira semana de funcionamento nos 90 vídeos publicados con actividades para as nenas e nenos de 0 a 3 anos.
Os máis de 1500 profesionais das 172 escolas infantís da Rede Autonómica están a desenvolver un traballo importante para xerar material educativo que permita ás familias acompañar aos máis pequenos en xogos educativos que dean continuidade ás dinámicas que se levan a cabo dentro das escolas infantís.
Dada a boa acollida do blog, que foi moi eloxiado por Unicef Galicia o mesmo día do seu lanzamento, todos os profesionais seguen traballando na elaboración de novos materiais que segan aportando novidades en canto aos contidos e permita manter ese fío condutor entre as escolas e as familias.
A estas actividades didácticas teñen acceso todas as nenas e nenos de Galicia, non só aqueles matriculados nalgunha das escolas infantís autonómicas no enderezo electrónico: https://www.escolasinfantisdegalicia.es/aescolainfantilnacasa/.
O Centro Demostrador TIC (CDTIC) da Axencia para a Modernización Tecnolóxica de Galicia (Amtega) continúa a súa actividade divulgativa e formativa para pemes e autónomos con diversas actividades en streaming, que nestes días están rexistrar notables incrementos de participación. Con estas sesións, en colaboración con diversos axentes tecnolóxicos da Comunidade e que teñen o formato #DemosXweb, búscase fomentar o teletraballo e tratar diversos aspectos de utilidade á hora de adoptar esta modalidade de traballo na casa.
Para as vindeiras semanas de confinamento, o CDTIC ten máis actividades por streaming programadas, todas de balde, e nas que animan a participar, coma sempre, mediante inscrición na súa web ou a través da aplicación dispoñible para plataformas Android e iOS.
Para esta mesma semana están programadas unha sesión sobre comercio electrónico para hoxe, día 14, que impartirá Hacce; outra de fomento do teletraballo con Microsoft Teams, mañá, día 15, a cargo de Captology; e, por último, unha sobre recomendacións de ciberseguridade e privacidade para o xoves 16 da man da consultora APDTIC. Todas elas están previstas en horario de 10:00 a 10:45.
Ademais, desde o CDTIC xa se está a traballar para ofrecer, ao longo do mes, máis sesións por streaming para axudar durante o período de confinamento: unha sesión de xestión documental con Docuten para o 22; outra de ciberseguridade con Computer-3, o día 23; e outra de marketing automático o 29.
Desde a entrada en vigor do estado de alarma celebráronse cinco actividades que tiveron unha grande acollida e nas que se bateron récords de inscrición neste tipo de demostracións por streaming.
En todas elas destacou a elevada participación das persoas que seguiron a sesión e a interacción con elas, que se traduciu na formulación de numerosas preguntas polo chat que foron atendidas no momento, coma se se tratase dunha sesión presencial, por parte dos relatores. Para quen non puido seguir en directo estes seminarios, na web do CDTIC están dispoñibles para a súa visualización na ligazón: https://cdtic.xunta.gal/en-diferido.
A última destas sesións antes da Semana Santa foi “Mellora a túa comunicación corporativa con Rocket.Chat”, retransmitida o 8 de abril e impartida por Queres Tecnologías.
Un día antes, o 7 de abril, Christian Delgado falou do uso de WhatsApp na empresa e no comercio, unha sesión na que se afondou no emprego profesional ou mesmo comercial e as boas prácticas desta rede social e na que se alcanzou unha participación récord.
Por outra banda, organizáronse tres sesións dedicadas a temas relacionados co teletraballo: Anubía Soluciones en la Nube impartiu, o día 3 de abril, o seminario “Xestión de proxectos integrada en OdooERP teletraballando”; o 2 de abril, Sistemius abordou os aspectos legais do teletraballo; e o 24 marzo foi a quenda da empresa Dotcom Factory con “Teletraballo simple e xa con G-Suite de Google”.
A emerxencia sanitaria do coronavirus forzou a moitas empresas a recorrer ao teletraballo. A Axencia para a Modernización Tecnolóxica de Galicia, a través do CDTIC, quere servir de guía para favorecer esta modalidade de traballo publicando, cada día, unha entrada sobre diferentes ferramentas que poden ser de utilidade a todas as persoas que, na actualidade, están recorrendo a esta práctica.
Podes acceder a todas estas publicacións a través da seguinte ligazón: https://cdtic.xunta.gal/node/9138.
O CDTIC, impulsado pola Axencia para a Modernización Tecnolóxica de Galicia, promove a transformación dixital das pemes de Galicia como factor clave para mellorar a súa eficiencia e competitividade. Así, a través de distintos servizos e actividades, o CDTIC amósalles ás empresas a importancia de impulsar o talento dixital dentro destas, para desenvolver unha nova organización do traballo e unha cultura dixital na que o persoal e a clientela se sintan cómodos ante a incorporación das tecnoloxías.
As novas ferramentas tecnolóxicas de loita contra o COVID-19 que o Goberno puxo en marcha son accesibles para as persoas con discapacidade grazas á participación da Fundación ONCE no proxecto.
Trátase da aplicación oficial de AsistenciaCOVID-19, impulsada polo Goberno para que a poboación poida facerse un autodiagnóstico do coronavirus, e do Hispabot-Covid19, unha canle de consulta sobre o COVID-19 a través de WhatsApp.
O Goberno informou este mércores da posta en marcha do asistente conversacional Hispabot-Covid19. É unha canle de consulta automática que utiliza a intelixencia artificial e a linguaxe natural para responder as inquietudes da cidadanía sobre o COVID-19 con información oficial, precisa e actualizada.
Hispabot-Covid19 é un servizo "chatbot" que permitirá aos cidadáns obter respostas inmediatas ás preguntas máis comúns sobre o coronavirus durante as 24 horas do día.
Ambos os servizos son accesibles para as persoas con discapacidade grazas á participación da Fundación ONCE no proxecto destas ferramentas tecnolóxicas.
O obxectivo desta aplicación, posta en marcha o pasado luns pola Secretaría de Estado de Dixitalización e Intelixencia artificial, é desconxestionar os teléfonos de atención sanitaria das diferentes comunidades autónomas, á vez que ofrecer información oficial e de confianza.
Técnicos do departamento de Accesibilidade Universal e Innovación da Fundación ONCE traballaron para que as persoas con discapacidade poidan acceder ao autodiagnóstico, ben sexa a través da aplicación, da web ou usando o chatbot desenvolvido para o proxecto.
Así, traballouse no correcto uso do idioma nalgúns elementos como, por exemplo, a lectura dos emojis ou iconas, a boa contextualización da cantidade de ligazóns e referencias que o chatbot prové, sendo fontes de recursos que complementan a información do propio compoñente, así como a correcta orde de lectura para persoas con discapacidade, que usan como ferramentas tecnolóxicas de apoio un lector de pantalla
A aplicación permite ofrecer recomendacións e pautas de actuación a través da solicitude dunha serie de datos de identificación e de saúde relacionados cos síntomas experimentados. Ademais, a través do sistema de xeolocalización vía GPS do teléfono móbil, con permiso do usuario, validará a comunidade autónoma na que se atopa para personalizar as respostas en función dos protocolos de cada unha delas.
A formación empresarial e profesional está a superar os obstáculos do COVID-19 e desenvólvese plenamente no plano virtual, de man de entidades como a Cámara de Comercio de Santiago, que presentou este luns 13 de abril os programas Constrúe o teu futuro: cursos axeitados para facer voar o emprendemento xuvenil cando a situación económica e social se normalice. A actividade colle corpo con dúas contribucións tecnolóxicas, cuxo inicio en streaming está previsto para o 20 de abril: Tendas virtuais e emprendemento e máis Formación de Social Media, Marketing Dixital e Emprendemento. Celébranse en colaboración coa Fundación INCYDE e co apoio económico do Concello de Santiago e do Fondo Social Europeo. Os cursos están dirixidos a mozos e mozas menores de 30 anos e inscritos en Garantía Xuvenil.
O obxectivo das accións pasa por achegar aos participantes coñecementos e habilidades empresariais esenciais como a creatividade e o traballo en equipo, amais de recursos para xestionar o risco.
O programa sobre redes sociais e mercadotecnia dixital está dirixido a persoas emprendedoras e profesionais que desexen especializarse en competencias de marketing dixital e no aproveitamento efectivo das redes sociais e a chamada Web 2.0, “permitíndolles incrementar a súa calidade profesional e mellorar a súa empregabilidade”. A idea é axudalas a definir a súa propia estratexia de comunicación nos novos medios sociais (redes sociais, blogs, buscadores, etc.), o plan online de promoción empresarial-profesional e a execución de accións para mellorar a reputación dos seus produtos e servizos na Internet.
Polo que se refire ao programa sobre tendas virtuais, estará dirixido a mozos e mozas interesadas en mellorar ou consolidar á actividade comercial a través da programación e creación de tendas en liña. Con este programa achegarase formación en deseño de tendas online con Wordpress, sobre o contexto que rodea o sector da venda na Internet, sobre como facer plans de mercadotecnia en liña e sobre como acceder a provedores e recursos valiosos para seguir a aprendizaxe unha vez terminado o curso.
Os programas formativos en streaming son de balde previa inscrición na páxina web da Cámara de Comercio de Santiago.
A Asociación Compostela Monumental segue adiante coa súa intensa actividade de formación para favorecer a empregabilidade das mulleres con contidos tecnolóxicos e, tamén, con recursos que axuden a superar con información avanzada o parón produtivo, económico, social e docente da crise sanitaria. Segundo informa a entidade, esa semana inícianse dous novos cursos online: por unha banda TIC, redes sociais e marca persoal e, pola outra, Manipulación de alimentos.
O primeiro, o que se centra nas comunidades dixitais e nas Tecnoloxías da Información e a Comunicación (TIC), ten como obxectivo “dar a coñecer ás alumnas as distintas redes sociais existentes de face á procura de emprego e aprender a xestionar a marca persoal de cada unha delas”. Teresa Hernández, técnica orientadora de Compostela Monumental será a encargada de impartir esta acción formativa de 15 horas e que está prevista que finalice o próximo día 24 de abril.
Ao mesmo tempo, levarase a cabo dixitalmente o Curso de Manipulador de Alimentos, impartido por Recursos Galicia e cunha duración de 10 horas, estando previsto o seu remate para o día 20 de abril. As alumnas participantes no mesmo adquirirán os coñecementos básicos en materia de hixiene e seguridade alimentaria.
Estas accións forman parte do itinerario formativo de turismo e comercio do programa integrado de emprego de Compostela Monumental en colaboración coa Dirección Xeral de Orientación e Promoción Laboral da Xunta de Galicia. Nestes momentos Compostela Monumental ten activo un terceiro curso virtual, Prevención de Riscos Laborais, que remata o día 27 deste mes.
Para achegar información oficial á cidadanía, e seguindo os pasos da OMS e outras organizacións, o Goberno estreou o asistente conversacional Hispabot-Covid19, que a través de WhatsApp responde de xeito automático as preguntas que faga a cidadanía, para o que válese dun sistema baseado en intelixencia artificial que extrae as súas respostas de información oficial actualizada coa vantaxe de que este chatbot responde automaticamente durante as 24 horas do día.
Para poder conversas con este novo chatbot temos que engadir á axenda do noso móbil o número de teléfono +34 600 802 802, que é dende o que podemos expor as nosas dúbidas para recibir resposta ao instante. Esta ferramenta desenvolvida para o Ministerio de Sanidade e impulsada pola Secretaría de Estado de Dixitalización e Intelixencia Artificial adscrita ao Ministerio de Asuntos Económicos e Transformación Dixital probouse con máis de 200 preguntas formuladas de mil xeitos diferentes, e achega dende as cifras actuais sobre o COVID-19 até información sobre síntomas da enfermidade achegada polo Ministerio de Sanidade. Deste xeito búscase reducir a presión sobre as liñas de atención telefónica sanitarias.
A Consellería de Política Social vén de ampliar ata as 24 horas ao día, sete días á semana, o servizo de videointerpretación que ofrece a Federación de Asociacións de Persoas Xordas de Galicia (FAXPG). Esta ferramenta permite que as persoas xordas poidan obter información ou comunicarse cos teléfonos de emerxencia, coma 112, 061, 012 ou o teléfono de información sobre o coronavirus 900 400 116.
Ata este momento, o servizo funcionaba de luns a venres de oito da mañá a oito da tarde. Agora pasará a funcionar de xeito ininterrumpido durante o estado de alarma. Esta ampliación garante o acceso das persoas xordas aos teléfonos de emerxencia durante o confinamento.
Tamén se ampliou o directorio de teléfonos aos que se pode chamar desde a aplicación de videointerpretación, para incluír tamén o teléfono gratuito do coronavirus (900 400 116), dedicado a resolver dúbidas e consultas relativas á pandemia, e outros servizos de emerxencia habilitados para calquera xestión.
A Xunta de Galicia amplía as accións do seu plan de teleformación para o sector turístico, a través do Centro Superior de Hostelería de Galicia (CHSG), que programa este mes de abril cinco novos cursos gratuítos online tras celebrar outros tantos nas últimas semanas. O obxectivo desta iniciativa, a cargo de especialistas na materia e con capacidade para chegar ata a 2.000 usuarios da Comunidade, é facilitar aos traballadores á mellora en diferentes competencias como a xestión dixital, a comunicación e o márketing en liña.
Os dous novos cursos da vindeira semana impartiranse polo experto en transformación dixital e desenvolvemento de negocio online Tirso Maldonado. O primeiro deles, o luns 13, abordará a Implantación de CRM e email márketing para empresas turísticas, mentres que o segundo, previsto para o xoves 16, centrarase no Márketing dixital para restaurantes. En ambos casos comezarán ás 11:00 horas.
O luns 20 será a queda do emprendedor Celso Gómez, co faladoiro Como comunicar cos clientes das empresas turísticas superada a crise. O xoves 23 impartirá o curso Boas prácticas no márketing dixital para saír da crise. O programa actual, que poderá ampliarse en función da demanda, leva por título Google Analytics para hoteis e restaurantes e terá lugar o luns 29 a cargo de Tirso Maldonado. Sempre ás 11:00 horas.
Os docentes imparten formación específica e, ao realizarse en directo, responden ás dúbidas dos participantes. Así mesmo, ofrécese material informativo e documental e realízanse actividades de avaliación e ampliación dos coñecementos. A duración da actividade é de catro horas, das que ata dous corresponden a faladoiros en directo.
O programa completo de accións formativas está dispoñible no Espazo Profesional da web de Turismo de Galicia, onde os interesados poden acceder ao formulario de matrícula. Teñen participación prioritaria os propietarios de pequenas e medianas empresas, traballadores de bares, cafeterías, restaurantes, aloxamentos e outros establecementos hostaleiros así como outros profesionais do sector turístico.
A Xunta entregou en menos dunha semana a práctica totalidade dos 1.000 portátiles con conexións a Internet gratuítas, destinados a familias con menos recursos e cuxos fillos cursen Educación Secundaria Obrigatoria, Bacharelato ou Formación Profesional. A entrega dos restantes completarase a volta das vacacións escolares de Semana Santa ante a petición dos propios centros. Esta medida, aprobada no último Consello da Xunta, realízase en colaboración cos operadores R, Vodafone e Orange. A familias recibirán os equipos e a conectividade como préstamo persoal para facilitarlles aos seus fillos o seguimento da actividade educativa, mentres dure o estado de alarma.
Os portátiles entréganse ás familias a través dos seus centros de ensino, grazas á colaboración dos equipos directivos, cos que se contacta previamente para pechar a entrega do equipamento. Todos os centros públicos que imparten Educación Secundaria Obrigatoria, Bacharelato ou Formación Profesional recibiron tres equipos con conectividade, que distribúen entre as familias atendendo á súa situación socioeconómica, priorizando o alumnado dos cursos de final de etapa que titulen (4º da ESO, 2º de Bacharelato e 2º de FP) e a aquelas familias que non dispoñan nos fogares de ordenador nin de conexión a internet.
A dotación deste equipamento forma parte do paquete de medidas que puxo en marcha a Xunta para facilitar o seguimento en liña da actividade educativa. Entre as últimas actuacións está a posta a disposición dos docentes a pasada semana dunha plataforma de videoconferencia que permitiu na primeira semana activa máis de 30.000 reunións virtuais, nas que participaron máis de 100.000 docentes e alumnos.
Ademais, desde o 30 de marzo os provedores de contidos da plataforma E-Dixgal: aulaPlaneta, Edebé, Netex e Pearson, permiten o acceso ao seus contidos aos centros que non están integrados na iniciativa, unha medida da que se poden beneficiar ata 95.000 rapaces.
Por outra banda, as plataformas coas que xa contaba a comunidade educativa galega incrementaron o seu uso desde a entrada en vigor da emerxencia sanitaria en Galicia. Ata o 4 de abril, último día lectivo, a aplicación abalarMóbil triplicou os usuarios diarios, e fronte aos 28.000 de media diaria antes da crise, a semana pasada rexistráronse diariamente máis de 80.000 usuarios, chegando a máis de 217.000 o venres.
Tamén as Aulas Virtuais dos centros triplicaron o número de usuarios, pasando duns 18.000 de media diarios antes da emerxencia sanitaria a rexistrar máis de 58.000 ao comezo da semana pasada, triplicando tamén o uso da plataforma, que pasou de 1 millón de interaccións diarias a máis de tres millóns. Na plataforma de E-Dixgal rexistráronse incrementos de uso diario entre o 90% e o 110% sobre os habituais anteriormente.
Para facilitar o acceso a todos os servizos dixitais educativos dispoñibles para toda a comunidade educativa, habilitouse un espazo tanto no portal educativo, https://www.edu.xunta.gal/espazoAbalar/espazo/servizos-dixitais) como na canle do espazoAbalar en Youtube (https://www.youtube.com/espazoAbalar), nos que se indica como acceder a eles, manuais de uso, e videotitoriais dos servizos e funcionalidades máis demandadas das aulas virtuais, o sistema de videoconferencia, e da plataforma de comunicación coas familias.
A día de hoxe están dispoñibles oito videotitoriais sobre as cuestións máis demandadas: cinco sobre o uso das aulas virtuais por parte do profesorado; dous sobre o uso do servizo de videoconferencia por parte do profesorado e do alumnado e un sobre o uso do servizo de comunicación ás familias e alumnado por parte do profesorado.
Nestes dez días que levan dispoñibles, os videotitoriais recibiron unhas 14.000 visualizacións, destacando o de uso do servizo de videoconferencia por parte do profesorado con máis de 4.100 visualizacións.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...