O obxectivo de Comprar en Galicia é recuperar a máxima porcentaxe de usuarios para o comercio local que nos últimos anos compraron en “pure players” dixitais sen atopar unha alternativa de proximidade.
Dada a situación que vivimos son moitas as empresas que buscan axilizar os trámites administrativos de forma sinxela e segura, pero sen desprazamentos. A dixitalización de trámites veu para quedarse e nós queremos darche unha boa opción para que o fagas de forma áxil, aforrando tempo e sacando maior rendibilidade os teus recursos.
As Bibliotecas Públicas de Galicia xestionadas pola Xunta súmanse aos actos para renderlle tributo a Ricardo Carvalho Calero, autor ao que este ano a Real Academia Galega (RAG) lle dedica o 17 de maio. A situación actual xerada polo coronavirus motivou que as ferramentas e materiais deseñados pola Consellería de Cultura e Turismo en colaboración coas numerosas empresas, entidades e institucións que participan na Programación Conmemorativa das Letras Galegas 2020, fosen reformuladas para que se poidan acceder a elas de xeito virtual ao abeiro da campaña #aculturasegue. Neste contexto, as bibliotecas ofrecerán durante esta semana diversas actividades a través das súas redes sociais e páxinas web.
A Biblioteca Pública Miguel González Garcés da Coruña pon esta semana a disposición dos usuarios unha guía de lectura con recursos sobre o escritor ferrolán así como outra guía con datos curiosos sobre a súa vida e obra. Esta última será obxecto de concurso nas redes sociais, onde se formularán diversas preguntas.
Pola súa banda, a Biblioteca Pública de Lugo puxo en marcha Carvalho Calero Lucense, a exposición virtual na que, a través dunha liña do tempo, presenta a obra poética, teatral, prosa e ensaio que escribiu durante a súa estadía en Lugo.
Na fin de semana das Letras, a Biblioteca Pública de Ourense une esta celebración coa festa dos maios e compartirá nas súas redes unha creación floral dedicada a Carvalho Calero. Así mesmo, ofrece unha exposición dixital de obras do intelectual titulada Lembrando a Carvalho, e outra mostra virtual na que se lembra a autores que escriben en galego baixo o título As nosas letras, os nosos autores.
A Biblioteca Pública Antonio Odriozola de Pontevedra manterá unha intensa actividade nas súas redes a partir do día 17 de maio a través da iniciativa Letras con moito ritmo a través da cal o público infantil e xuvenil están invitados a escribir e recitar poesía. Ademais, tamén na súa web, ofrecerá a exposición virtual Ricardo Carvalho Calero: compromiso coa lingua que repasa a súa vida e obra.
En Santiago, a Biblioteca Pública Ánxel Casal tamén homenaxeará ao escritor cunha exposición virtual dispoñible ao longo desta semana nas súas redes sociais que conta con infografías sobre o autor homenaxeado este ano e a través da cal, se porán tamén de manifesto os fondos da plataforma dixital GaliciaLe que se poden tomar emprestados.
A Biblioteca Pública de Vigo Juan Compañel súmase á celebración deste día tamén con dúas exposicións virtuais dispoñibles a partir de mañá: Carvalho Calero, Pretérito (im)Perfecto: traxectoria e obra, e As Letras de grandes e pequenos, esta última pensada en clave infantil para que os nenos coñezan aos autores aos que se lle dedicaron as Letras Galegas desde o ano 1963 ata hoxe. Por último, a Juan Compañel animará as redes sociais durante o mes de maio coa iniciativa #FragmentosGalegos, mediante a cal os que desexen tomar parte deberán compartir con dita etiqueta fragmentos de obras de autores galegos.
A Biblioteca de Galicia tamén formará parte das celebracións dixitais do Día das Letras Galegas a través da incorporación no seu portal dun microsite no que se incluirán todos os artigos e poemas, entre outros, que publicou Ricardo Carvalho en diferentes cabeceiras da prensa galega e que se atopan dixitalizados. Deste xeito, darase un acceso máis directo a estas pezas que o escritor foi publicando ao longo da súa vida.
Así mesmo, a Biblioteca de Galicia, como centro de conservación e difusión do depósito legal electrónico, quere destacar todos os recursos web que se están a xerar en internet con motivo da conmemoración das Letras Galegas este ano. Neste sentido, publicará unha relación de todos estes recursos cun pequeno resumo da información que conteñen.
A Axencia para a Modernización Tecnolóxica de Galicia mantivo no mes de marzo unha xuntanza de traballo con representantes da Federación Galega de Municipios (FEGAMP), das deputacións provinciais, do Instituto Nacional de Ciberseguridade (Incibe) e do Centro Criptolóxico Nacional (CCN) para darlles conta dos pasos que está a dar a Xunta para crear o Nodo de Ciberseguridade de Galicia, CIBER.gal e convidalos a sumarse á iniciativa.
Coa creación de CIBER.gal, a Xunta busca poñer en marcha un modelo de cooperación que, de forma conxunta con outros axentes públicos e privados, impulse a concienciación e a formación de cidadáns e empresas en materia de ciberseguridade; que dea resposta coordinada a retos complexos; que promova a xeración, atracción e retención de talento especializado e que contribúa ao posicionamento de Galicia neste ámbito a nivel estatal e europeo.
Tras esta primeira posta en común, a Amtega remitiu esta semana a proposta concreta de acordo á Fegamp e ás deputacións para a súa posterior sinatura. A Amtega xa asinou sendos acordos de colaboración en materia de ciberseguridade co Incibe e co CCN.
No encontro do pasado mes de marzo presentouse o Informe de Situación da Ciberseguridade en Galicia, no que se identifican os axentes implicados neste ámbito na Comunidade, púlsase a súa opinión sobre os retos e necesidades e sinálase a folla de ruta inicial para a posta en marcha do Nodo e a súa carteira de servizos.
O informe identifica ata 167 entidades relacionadas coa ciberseguridade en Galicia, das que 103 son empresas que ofrecen produtos e servizos de ciberseguridade. Os consultados coinciden na necesidade de incrementar as accións de formación e concienciación á cidadanía.
Desde o sector público sinalan a importancia de impulsar proxectos de colaboración público-privada e promover eventos, formación e certificacións no ámbito da ciberseguridade. Desde o sector privado demandan o acceso a instalacións e infraestruturas comúns e a posibilidade de facilitar o contacto entre os diferentes axentes.
O 80% dos axentes entrevistados consideran que a iniciativa da Xunta de crear un Nodo de Ciberseguridade é unha necesidade e unha proposta moi acertada. Os axentes consultados apuntan que a posta en marcha do Nodo CIBER.gal contribuirá ao crecemento do sector da ciberseguridade na Comunidade, incrementará a concienciación en empresas e cidadáns, facilitará a xeración dunha rede de colaboración e aumentará o investimento na I+D+i en ciberseguridade.
O Incibe, segundo se recolle no informe, sinala que Galicia rexistra un 4,3% dos incidentes de ciberseguridade identificados no ámbito nacional. Esta porcentaxe sitúa á Comunidade no sexto posto da clasificación estatal, liderada por Madrid, Andalucía e Cataluña, con porcentaxes próximas ao 20%.
O inicio da actividade do nodo CIBER.gal focalizarase na formación e concienciación da cidadanía, as empresas, en especial ás pemes, e ás Administracións públicas, dando resposta ás inquedanzas e necesidades sinaladas polos axentes consultados.
Para a cidadanía os servizos centraranse en accións de formación a estudantes e eventos participativos para os diferentes niveis educativos (secundaria, bacharelato, formación profesional e universidade). Ademais, desenvolveranse accións de capacitacións básica no uso seguro das tecnoloxías para persoas maiores.
Para as pemes e autónomos a concienciación e a difusión tamén serán eixos prioritarios dos servizos de CIBER.gal, a través de xornadas, en colaboración con outros axentes do Nodo.
Para os concellos e deputacións deseñaranse actividades de capacitación e concienciación para axentes clave destas entidades e formación técnica avanzada para os seus profesionais dos servizos tecnolóxicos. Ademais, prevese a creación dun Observatorio galego da Ciberseguridade.
A ciberseguridade é unha das tecnoloxías disruptivas sobre as que pivota a futura Estratexia Dixital de Galicia 2030, en proceso de elaboración. A creación do Nodo de Ciberseguridade de Galicia enmárcase tamén nas directrices europeas para incrementar as competencias da UE nesta materia.
A Xunta de Galicia conta cun Plan Director de Seguridade 2015-2021, que permitiu incrementar a súa capacidade de prevención, detección, resposta e recuperación ante incidentes de ciberseguridade. Entre as últimas medidas do Plan está a posta en marcha do Centro de Servicios de Ciberseguridade, CSIRT.gal, que dá servizo ao sector público autonómico e forma parte da plataforma CSIRT.es, integrada por 42 centros, entre os que está o Centro Criptolóxico Nacional, o Incibe, a Policía Nacional, Garda Civil e outros organismos, ademais dalgunhas comunidades.
A Xunta de Galicia pon en marcha Autónomos dixitais, un novo programa formativo que pretende reforzar o tecido produtivo galego facilitando a 1200 alumnos o desenvolvemento de competencias en comercio electrónico e novas canles online co obxectivo de mellorar tanto a comunicación cos clientes como o coñecemento dos seus produtos e servizos.
A medida, que xa foi presentada ás asociacións de autónomos máis representativas en Galicia (Agtamar-UPTA, APE e ATA), enmárcase nas accións que o Goberno galego está deseñando dentro do Plan de reactivación económica e complementa tanto as axudas para compra de equipamento dixital como os servizos para facilitar as ferramentas necesarias para impulsar un cambio de tendencia no colectivo autónomo.
O programa ofrecerá dúas accións formativas online de 50 horas lectivas cada unha centradas na mellora de habilidades no eido da xestión loxística, o márketing, a venda online e a creación de tendas virtuais. En concreto, Fundamentos para a creación dun proxecto de comercio electrónico e Especialista en e-commerce.
As persoas que realizan unha actividade económica por conta propia interesadas nestes cursos poden solicitar a súa praza ata o 22 de xullo cubrindo un formulario web na páxina https://www.autonomosdixitais.com. Os cursos iniciaranse todos os xoves a partir do 21 de maio e o último comezará o 23 de xullo.
Con este novo programa a Xunta mantén a súa aposta pola formación como a mellor ferramenta para avanzar nun emprego de calidade e na mellora competitiva das empresas galegas e responde ao compromiso asumido co colectivo autónomo para achegar ferramentas que posibiliten a transformación dixital dos seus negocios.
O Data Management Group (DAMA-UPC) da Universidade Politécnica de Cataluña (UPC) e a spin-off Sparsity desenvolveron a aplicación "SafeWalkNearby" para axudar a monitorar o tempo e a distancia das saídas con menores de 14 anos no espazo público durante o período de confinamento.
A app "SafeWalkNearby" foi deseñada pola spin-off Sparsity Technologies, fundada polo grupo DAMA da Universidade Politécnica de Cataluña, co obxectivo de dar unha resposta inmediata a consultas complexas en bases de datos inmensas.
Trátase dunha app gratuíta, xa dispoñible en Google Play, que garante a privacidade dos datos, pois só funciona no dispositivo móbil do usuario e non está conectada a ningún servidor.
"SafeWalkNearby" sinala a área dun quilómetro con respecto ao domicilio na que están permitidos os paseos con menores de 14 anos e monitora a distancia a través dun mapa interactivo en todo momento.
Así mesmo, a aplicación permite rexistrar o tempo que duran os paseos e envía avisos para alertar de que se superou o tempo máximo dunha hora ou a distancia dun quilómetro percorrida, así como indica cando hai que emprender o camiño de volta a casa.
SemanticBots, empresa de base tecnolóxica de Castelló instalada no Parque Científico, Tecnolóxico e Empresarial da Universidade Jaume I e formada por profesores e investigadores do Temporal Knowledge Bases Group (TKBG), ofrece o seu chatbot COVID-19 de maneira gratuíta co obxectivo de diminuír a fenda dixital da poboación con discapacidade visual.
Desta maneira, pode ser instalado nos sitios web de entidades públicas e privadas, así como asociacións que busquen mellorar a accesibilidade e facilitar a información online sobre o COVID-19 ou a realización de xestións a través de canles dixitais aos usuarios con discapacidade visual. Xa comezou a incorporarse ás webs oficiais de diversas asociacións de persoas con discapacidade da Comunidade Valenciana, como CERMI e COCEMFE.
SemanticBots comezou a desenvolver a finais de 2019 SayOBO, un sistema de intelixencia artificial inclusivo de tecnoloxía propia que facilita o acceso á información online e mellora a provisión de servizos aos usuarios. Neste sentido, o chatbot COVID-19 nace da problemática que experimentaban algúns colectivos para acceder a información dixital relacionada coa situación de crise sanitaria orixinada pola pandemia.
O chatbot COVID-19 é accesible en múltiples plataformas desde as páxinas web onde está instalado, é capaz de atender a todos os usuarios ao mesmo tempo e está dispoñible tanto en castelán como en valenciano.
Este asistente virtual inclúe máis de 400 consultas relacionadas con síntomas, medidas de hixiene, laborais e dereitos sociais, ademais de medidas derivadas do estado de alarma. A base de información que posúe procede de fontes oficiais nacionais, autonómicas e internacionais, así como da Organización Mundial da Saúde, artigos científicos e datos dixitais contrastados.
Na volta á “nova normalidade” trala pandemia da COVID-19, un dos retos que se afronta é a desinfección das zonas que volverán a ser usadas pola cidadanía, desde centros educativos ata parques. Investigadores da Universidade de Vigo levarán a cabo un proxecto que ten como obxectivo o desenvolvemento dun sistema de desinfección empregando dispersión de líquidos mediante sistemas aéreos non tripulados. Aproveitando a “madurez” que xa ten a tecnoloxía de limpeza con drons, o seu traballo centrarase no desenvolvemento dun sistema de información xeográfica a nivel galego e dunha metodoloxía que permita optimizar o seu uso nesta crise.
A iniciativa, que será financiada con 55.000 euros pola Axencia Galega de Innovación da Xunta de Galicia, é unha das oito solucións elixidas, entre as 160 recibidas, na convocatoria feita pola Consellaría de Economía, Emprego e Industria para o desenvolvemento de proxectos innovadores fronte á COVID-19. O seu investigador principal será Higinio González, profesor titular da Escola de Enxeñaría Aeronáutica e do Espazo do campus de Ourense, complentado o equipo os profesores Fermín Navarro, do mesmo centro, e Joaquín Martínez, da Escola de Enxeñaría de Minas; e o persoal investigador Luis Miguel González; Noelia Fariñas; Lorena Docasar e Alejandro Gómez. A finalidade do traballo, que se desenvolverá de xuño a decembro de 2020, indican os seus responsables, será “desenvolver e validar operativas de voo con sistemas aéreos non tripulados para efectuar tarefas de desinfección”.
Concretamente, as e os investigadores da Universidade de Vigo márcase tres obxectivos. O primeiro deles é o desenvolvemento dun sistema de información xeográfico a nivel galego que determine zonas na que se prevé unha elevada afluencia de xente e son susceptibles de desinfección con drons. O segundo é determinar horas necesarias de operación e restricións de índole legal para esta desinfección, así como recursos necesarios a nivel económico, de equipos e empresas operadoras. O terceiro é o desenvolvemento e verificación de metodoloxías de desinfección específicas para estes sistemas para garantir o seu correcto resultado.
A COVID-19, explican os responsables do proxecto, ten provocado unha pandemia global aínda en fase de contención e na volta á normalidade que comezou, indican, “un aspecto clave será continuar extremando a desinfección das superficies que poden actuar como favorecedoras para a transmisión do virus”. A medida que as restricións existentes se vaian levantando, detallan, “as tarefas de desinfección terán que estenderse con máis intensidade a lugares que actualmente non se están utilizando pero que no futuro si volverán a utilizarse, por exemplo colexios e universidades, instalacións deportivas ou lugares de lecer ao aire libre”. Neste contexto, comenta Higinio González, a crise da COVID-19 “non permaneceu allea á utilización dos sistemas aéreos non tripulados en tarefas de desinfección”, citando exemplos de uso en países como China e Francia. “Ante o escenario de volta cautelosa á normalidade cara ao que nos encamiñamos nos próximos meses, pódese observar como os sistemas aéreos non tripulados poden ser de utilidade para completar tarefas de desinfección en lugares como bancadas de instalacións deportivas, patios de colexios, parques infantís, zonas de lecer como xardíns, contornas de piscinas, ríos e praias, etc”, indica o investigador.
Neste contexto, explica Higinio González, a tecnoloxía para dispersión de líquidos mediante vehículos aéreos non tripulados atópase “xa madura e accesible no mercado”. Dado que esta tecnoloxía “non necesita un desenvolvemento específico” pola súa madurez, detalla, o proxecto proponse “centrar os esforzos na planificación dun adecuado despregamento desta tecnoloxía, que complemente de forma sinérxica as tecnoloxías de limpeza xa existentes”. Se esta tarefa se acomete de forma correcta, engade o investigador, “máis aló de atender a actual emerxencia da COVID-19, o proxecto pode sentar as bases para estender as aplicacións dos drons noutras tarefas que requiran a dispersión de líquidos, como a aplicación de fitosanitarios en explotacións agrícolas de orografía complexa, como por exemplo a viticultura en zonas como a Ribeira Sacra”.
O primeiro obxectivo ao que se enfronta o proxecto, comenta o seu responsable, consiste en desenvolver un sistema de información xeográfica a nivel galego que integre todas as zonas de aplicabilidade da tecnoloxía de desinfección con drons e que presente os lugares de potencial afluencia de xente que poderían á súa vez ser desinfectados por este método. Unha vez determinada a superficie sobre a que actuar, detalla o profesor da Escola de Enxeñaría Aeronáutica e do Espazo, “é necesario integrar no devandito sistema de información xeográfica as restricións legais de voo existentes e definir diferentes tipos de operacións en función disto”. Para a xeración de metodoloxías de operación específicas para a desinfección, así como a verificación das mesmas, o proxecto, indica Higinio González, parte do “extenso coñecemento que ten o equipo de traballo na operación de diferentes tipos de sistemas non tripulados”, xa que está integrado por tres pilotos de drons, dous doutores enxeñeiros aeronáuticos e unha graduada en Enxeñaría Aeroespacial.
Outro dos retos do proxecto será, segundo explica o seu responsable, “definir a cantidade de líquido desinfectante e en que concentracións se debe dispersar para garantir a correcta eliminación do virus sobre as superficies a tratar, sempre atendendo a unha operación segura da aeronave”. Outros aspectos pendentes de definición que se abordarán no estudo, engade Higinio González, serán a velocidade de traballo recomendada, as alturas de voo e frecuencias de desinfección. Unha vez coñecido o despregamento necesario para acometer os labores de limpeza e as metodoloxías adecuadas para a operación, sinala o investigador, será necesario realizar un acompañamento das primeiras operacións para detectar usos deficientes e posibles melloras. O obxectivo que se marca o proxecto, detalla, sería que en setembro de 2020 puidesen arrancar as primeiras tarefas de desinfección con drons acompañando o inicio de actividades como o curso escolar ou ligas deportivas. “Nese momento arrancaríanse as actividades de verificación nas primeiras operacións, que actuarían a modo de piloto e que se poderían estender a partir de novembro a todo o territorio”, apunta por último o profesor da Universidade de Vigo.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...