O estudante de Enxeñaría Informática da UDC, Alejandro López, creou unha aplicación para persoas con parálises celebral, no seu Traballo de Fin de Grao dirixido polo subdirector do CITIC (Centro de Investigación TIC da Universidade da Coruña), Javier Pereira, en colaboración con Adriana Dapena, profesora da Facultade de Informática. Segundo informa o CITIC, o obxectivo desta app é mellorar a atención das persoas con parálise cerebral, integrando diferentes xogos terapéuticos.
Os destinatarios son persoas con parálise cerebral de calquera idade, e especialmente os pacientes de ASPACE na Coruña, entidade coa que o CITIC mantén unha estreita relación. Foi precisamente nas dependencias desta asociación onde o pasado luns 27 probouse a ferramenta por primeira vez e de maneira oficial, nunha xornada na que estiveron presentes, ademais do estudante Alejandro López, Javier Pereira e Adriana Dapena, os fisioterapeutas de ASPACE Coruña Laura Quiroga e Rubén Carneiro. Alejandro López explicou que esta aplicación permitirá extraer parámetros sobre a evolución dos pacientes en canto á súa mobilidade, postura ou equilibrio. E, ademais, pode utilizarse no catro recursos de ASPACE: atención temperá, centro educativo, centro de día e servizo residencial.
As entidades EuroEume e Amigus organizan este mes de agosto dúas actividades para introducir nas vertentes máis creativas e participativas da informática e da robótica a colectivos de argalleiras e argalleiros principiantes. Estamos a falar, por unha banda, do Obradoiro de Modelado e Impresión 3D, que se celebra os días 24 e 25 de agosto e que porá o foco en mostrar ás mulleres os principios e segredos das ditas disciplinas. A actividade, que se celebra de 10.00 a 13.00 horas, vai orientada a makers principiantes que non están familiarizadas coa Impresión 3D, e/ou estudantes que queren introducirse nesta tecnoloxía. Non é necesario ningún coñecemento anterior.
A outra proposta de EuroEume e Amigus é o Obradoiro de robótica en familia. Iniciación a Arduino, que se desenvolve os días 26 e 27 de agosto, en horario de 10.00 a 13.00 horas. Trátase de facer descubrir a crianzas e maiores as aplicacións e ferramentas que lles permitan desenvolver as súas capacidades. Sera unha cita de robótica en familia, unha actividade conxunta e orientada a que impulsar a máxima participación dos pais e nais coas fillas e fillos.
Os cursos son gratuítos, dado que contan con financiamento da Secretaría Xeral de Igualdade e da Consellería de Política Social, respectivamente. As inscricións formalizaranse por orde de rexistro na web dos Labs de Amigus.
Os dous obradoiros celébranse nas Pontes, no número 14 da praza do Hospital.
Visitar un lugar descoñecido supón un gran esforzo e unha situación estresante para as persoas invidentes. Mesmo lugares coñecidos poden resultar problemáticos se os mobles cambian de sitio ou se, simplemente, o cansazo empeora momentaneamente a atención e a memoria. Como axuda a tiflotecnoloxía?
A carencia de información visual impón unha forte carga cognitiva á hora de familiarizarse coa disposición dos obstáculos. É necesario lembrar todo o tempo o lugar do espazo que se ocupa para poder planificar como chegar a onde se desexa ir.
Os desprazamentos causan elevados niveis de incertidume e inseguridade. As estruturas sobresaíntes á altura da cabeza, como letreiros, e algunhas concavidades da contorna provocan situacións de risco. Aínda que o bastón clásico é moi útil para axudar ás persoas invidentes, non basta con esta ferramenta para abordar todos os retos que afrontan.
A solución complementaria tradicional consiste en facer unha visita previa aos lugares coa axuda de mapas táctiles. Outras variantes máis sofisticadas e flexibles inclúen os sistemas computarizados ou de realidade virtual, que permiten a visita desde a comodidade do fogar.
Con todo, estas ferramentas seguen supoñendo un esforzo, xa que esixen lembrar o sitio e non son fáciles de consultar en tempo real mentres se está visitando fisicamente o lugar.
A tiflotecnoloxía engloba as ferramentas para axudar a persoas con cegueira ou discapacidade visual a utilizar a tecnoloxía. Un dos seus principais retos é proporcionar información distante, é dicir, aquela que está máis aló do alcance da man ou do bastón.
No Centro de Tecnoloxía Biomédica (CTB) da Universidade Politécnica de Madrid, un equipo de investigadores pertencentes ao Grupo de Investigación en Tecnoloxías de Apoio á Vida (LST), ao Centro de Investigación Biomédica en Rede (CIBER-BBN) e á Universidade das Forzas Armadas de Ecuador traballan desde anos no proxecto eGLANCE.
Nas súas investigacións utilizan conceptos da realidade virtual e a realidade aumentada para facilitar máis información ás persoas invidentes sobre a súa contorna.
Un dos resultados máis relevantes de eGLANCE ata a data é un modelo de interacción para realidade virtual adaptado ás necesidades dos cegos ou, o que é o mesmo, unha ferramenta de realidade virtual tiflointeractiva.
Este sistema permite dirixir a atención a calquera punto dunha sala virtual (interacción cognitiva) e informar dos obxectos, persoas e outros elementos presentes en cada rexión do espazo (interacción sensitiva).
Os cegos levan a súa atención, ou a súa mirada, controlando o movemento dun elemento virtual inédito ata a data: o foco de atención. Este só existe no mundo virtual. Contrólase mediante xestos e vai chocando coas representacións virtuais dos obxectos reais a medida que se move pola sala virtual.
Outro dos retos aos que se enfronta a tiflotecnoloxía é como informar dos obxectos, persoas e outros elementos presentes. A principal dificultade estriba en que a vista proporciona información continua, en paralelo e de gran largura de banda. Pero as canles alternativas, como o oído ou o tacto, non teñen as mesmas características.
Neste modelo de interacción, infórmase os cegos a través de información multisensorial cunha combinación de voz, sons, e vibracións.
Do mesmo xeito que as solucións tradicionais, eGLANCE permite familiarizarse con antelación -por exemplo desde a casa- cun lugar descoñecido. Posibilita, por unha banda, coñecer os obxectos, persoas e outros elementos dunha sala sen necesidade de desprazarse. E por outro, pode guiar a través do mellor camiño entre dous puntos, evitando os obstáculos.
Con esta información, as persoas invidentes poden tomar decisións eficientes en situacións onde os obxectos do seu interese están especialmente lonxe. Así, diminúe o esforzo físico e mental extra ao que ven sometidas nas súas decisións cotiás.
Ademais, o uso do noso modelo reduce as diferenzas cos individuos que poden ver. A final de contas, proporciona información similar á que estes últimos obteñen ao observar a súa contorna.
eGLANCE contribúe desta maneira para evitar a discriminación sensorial que sofren os invidentes. Permítelles ser moito máis autónomos e, por tanto, manexarse en maior igualdade co resto de persoas en situacións correntes de convivencia na sociedade.
O modelo de interacción probouse experimentalmente con éxito no propio CTB. Implementaron o modelo de tiflointeracción nunhas interfaces para móbiles e desenvolveron, a modo de videoxogo, os modelos virtuais dalgunhas das salas do centro.
Os investigadores contaron coa colaboración dun grupo de voluntarios cegos composto por afiliados á ONCE, traballadores da Fundación ONCE e alumnos adscritos ao servizo de apoio da UPM.
Os participantes utilizaron os videoxogos para aprender a disposición de cada sala. Posteriormente mediuse a calidade dos seus mapas cognitivos e a súa capacidade para desenvolverse nos correspondentes espazos reais.
Os resultados que obtiveron con este traballo podería ser unha referencia no desenvolvemento de interfaces sensibles utilizadas en realidade virtual aumentada para persoas cegas, para proporcionar unha maior eficiencia e eficacia durante a aprendizaxe de novas contornas.Con todo, existen algúns retos tecnolóxicos de carácter máis xeral (non son específicos da tiflotecnoloxía) que dificultan o escalado dun sistema destas características para o seu uso cotián. O principal escollo é capturar o dinamismo dos escenarios cotiáns reais. Por unha banda, require facer un seguimento dos cambios de posición da persoa cega. Por outro, facer un seguimento dos elementos móbiles presentes nos seus arredores.
José Javier Serrano Olmedo, Profesor Titular de Universidade, Laboratorio de Bioinstrumentación, Universidade Politécnica de Madrid (UPM); Antonio Cobo Sánchez de Rojas, Investigador senior en tiflotecnoloxía e tecnoloxía xeriátrica, Universidade Politécnica de Madrid (UPM) e Nancy Enriqueta Guerrón, Profesora, Universidade das Forzas Armadas (Ecuador)
Este artigo foi publicado orixinalmente en The Conversation. Lea o orixinal.
A Axencia para a Modernización Tecnolóxica de Galicia (Amtega) presenta o vindeiro 30 de xullo o programa formativo “AceleraTech, impulsando a transición dixital”, que comezará en outubro. AceleraTech diríxese tanto ás pemes galegas como ao seu persoal directivo para que as tecnoloxías disruptivas máis relevantes e os beneficios e condicionantes necesarios se integren na súa estratexia, estrutura e modelo de negocio.
O programa, que se desenvolverá a partir de outubro en colaboración coa IESIDE, abrangue diferentes xornadas formativas e prácticas específicas para persoal directivo e xerentes de empresas galegas.
A presentación de AceleraTech terá lugar o vindeiro 30 de xullo por streaming e nel realizarase unha exposición do programa así como unha aproximación a unha das tecnoloxías que se van abordar neste, o blockchain.
Para asistir á xornada de presentación de AceleraTech é preciso inscribirse a través da páxina web do CDTIC, https://cdtic.xunta.gal/aceleratech-blockchain, no correo electrónico cdtic@xunta.gal ou no teléfono 881 995 200.
A iniciativa está dirixida principalmente a persoal directivo, xerentes e propietarias/os de empresas, xa que estas son as persoas con capacidade de decisión e as que poden impulsar e liderar unha transformación tecnolóxica real destas.
O programa desenvolverase a partir de outubro e estenderase ao longo de cinco sesións formativas e un taller final. As temáticas das sesións versarán sobre os seguintes aspectos: A competencia na era dos negocios dixitais; Big data, data science e intelixencia artificial; Internet of the things e 5G; Blockchain; Ciberseguridade; Construíndo a transformación dixital da peme: taller Lego® Serious Play®.
As prazas para participar neste programa formativo son limitadas e o prazo de preinscrición estará aberto desde o 1 de agosto ata as 18:00h do 1 de outubro.
O Centro de Investigación AtlantTIC organizou este 22 de xullo un webinar dirixido a afondar nas posibilidades das novas tecnoloxías para fortalecer o achegamento entre persoas xordas e ouvintes. A sesión, desenvolvida baixo o epígrafe As tecnoloxías e a comunicación sen barreiras, xuntou representantes de asociacións de persoas xordas, investigadores e empresas. A catedrática da UVigo Carmen García Mateo, foi a encargada de presentar a sesión, na que se trataron os posibles casos de uso accesible e integrador das novas ferramentas ao tempo que se deixou a porta aberta para futuras xornadas de traballo con semellantes obxectivos.
No seminario web participaron máis de medio cento de persoas, que tiveron ocasión de interactuar cos relatores ao remate das súas intervencións a través da plataforma. A primeira intervención correou a cargo do investigador José Luis Alba Castro, que deu a coñecer o proxecto Speech&Signs que están a desenvolver conxuntamente o Grupo de Tecnoloxías Multimedia (GTM) de AtlantTIC e o grupo Grades da Facultade de Filoloxía e Tradución. Este proxecto, financiado polo Ministerio de Ciencia, céntrase na investigación do procesamento de imaxe e visión artificial, o recoñecemento automático da linguaxe de signos, e o desenvolvemento de novos sistemas e algoritmos para mellorar as canles de comunicación verbal e non verbal de linguaxes falados e de signos. Alba afondou nos desafíos aos que se enfrontan estes grupos á hora de codificar e automatizar as secuencias de vídeo de alta calidade, que permitirán crear unha base de datos con vídeos en LSE. Pola súa banda, Teo Atienza Cañada, co-fundador e director executivo da nova firma Showleap Technologies, debullou o seu dispositivo de tradución automática de lingua de signos a voz e fixo fincapé na importancia de conseguir que “o mundo oínte conviva coa comunidade xorda para coñecer os seus problemas e construír solucións reais”.
Tras a súa presentación, foi a quenda de Iker Sertucha Lista, presidente da Federación de Asociacións de Persoas Xordas de Galicia (FAXPG), quen afirmou que as novas tecnoloxías “son fundamentais para facilitar a calidade de vida da comunidade xorda, e que ningunha tecnoloxía substitúe a outra, senón que todos os recursos veñen a sumar”. Sertucha abordou na súa intervención aspectos como a fenda dixital, as diferencias xeracionais, o sobre-custe de moitos servizos que sofren as persoas xordas, a necesidade de máis formación en lingua de signos (que continúan a provocar dificultades e exclusións na vida diaria da comunidade xorda), ademais de destacar o papel “salvadoras” que tiveron e están tendo as TIC durante a pandemia. O último relatorio foi o de Isabel Cabo Guerra, responsable de accesibilidade da Confederación Estatal de Personas Sordas (CNSE), que se centrou nas dificultades que continúan existindo na accesibilidade á información destes colectivos en España e deu a coñecer os principais programas que teñen en marcha actualmente na CNSE, como o servizo de vídeo interpretación SVisual ou a plataforma de atención e información sobre a violencia de xénero ALBA.
V-Talent é o programa co que a Fundación Vodafone quere impulsar a inclusión dixital das persoas con discapacidade a través da tecnoloxía e nel conta coa participación das principais entidades que representan a estas persoas, como a Fundación ONCE, Down España ou Plena Inclusión.
O plan V-Talent ten liñas principais de actuación baseadas nos convenios que a Fundación Vodafone leva anos mantendo con estas entidades, como 'Yomeprep@ro', que dá continuidade ao traballo que desde 2014 realiza a fundación con Down España para facilitar a inserción laboral de persoas con síndrome de Down.
Este programa terá, na súa edición para 2020 e 2021 unha primeira fase de iniciación no uso da tecnoloxía e unha segunda, cun nivel avanzado de profesionalización, para impulsar a inserción laboral en postos de traballo específicos.
Nunha liña similar, a Fundación Vodafone e a Fundación ONCE únense no programa 'Por Talento Dixital' para ofrecer formación especializada en conceptos e tecnoloxías de programación web dirixido a alumnos sen experiencia nin formación neste ámbito.
Ademais, o programa prevé a concesión de distintas bolsas para a formación en contidos dixitais e tecnolóxicos en másteres, cursos especializados ou programas superiores en áreas ligadas á tecnoloxía.
Pola súa banda, xunto a Plena Inclusión, a fundación poñerá en marcha o proxecto 'Líderes Dixitais' para acompañar a persoas con discapacidade intelectual ou do desenvolvemento nas actividades laborais a través da tecnoloxía.
Por último, da man da Asociación Española de Expertos en Relación con Clientes renovou o proxecto Discatel para mellorar a empregabilidade das persoas con discapacidade en contact center.
O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega) organizan nestes meses de verán -xullo, agosto e setembro- uns campamentos tecnolóxicos sobre deseño de videoxogos, robótica, programación, creación de aplicacións para móbil ou presentación dos traballos escolares. Enmárcanse no programa “TechKids”, actividade do Plan DigiTalent de Amtega destinada a fomentar o interese pola ciencia e a tecnoloxía entre a mocidade galega, a partir dos 6 anos de idade.
Esta nova edición do TechKids celébrase en liña co campamento tecnolóxico “Constrúe na Casa”, que engloba cinco actividades a elixir en función da idade dos rapaces. Celebraranse do 30 de xullo ata o 9 de setembro e están dirixidos a nenos e nenas de 1º e 2º ciclo de Primaria e Secundaria. O prazo de inscrición, que remata o 27 de xullo as 12.00 horas pódese realizar en https://digitalent.xunta.gal/gl/content/tech-kids-2020 e poderán participar ata 200 familias.
Para participar nestes campamentos non son necesarios coñecementos previos pero si cumprir os requisitos técnicos indicados en cada proposta. Terán preferencia os usuarios das Aulas CeMIT, cun máximo de 20 alumnos por grupo.
Cada familia pode anotarse a cada proxecto e terá a posibilidade de ver o seguimento do mesmo nunha charla (videoconferencia ou telefónica) cun colexiado que os asesorará e titorizará. Os proxectos realizados pódense documentar en vídeo ou fotos e presentalos a un concurso entre todos os participantes.
Os participantes poderán elixir entre os cinco proxectos. Así, poden optar por aprender a deseñar e construír diferentes tipos de xogos de plataformas en 2D e 3D, xogos de rol completos, xogos de avance liñal e xogos baseados na física.
Tamén se poderán aprender os fundamentos da robótica e programación básica con contornas virtuais, o funcionamento básico dun robot e a lóxica computacional.
Outra das opcións é a creación de aplicacións para móbil ou tablet, empregando unha linguaxe de programación visual moi fácil de usar.
Así mesmo, poderase aprender todo o necesario para os traballos de clase dos rapaces, coñecendo os compoñentes dun computador e os seus periféricos, sabendo como crear e organizar os traballos no ordenador e na nube; así como ferramentas para a edición de textos, imaxes, vídeos e presentacións; ademais de obter información da Internet de forma segura e saber como compartir os traballos.
Nas actividades centradas no videoxogo Minecraft, os alumnos desenvolveranse nunha contorna de programación baseada en bloques. Dentro desta plataforma os rapaces tamén poderán crear bloques e texturas personalizadas completamente funcionais dentro do xogo. Desenvolverán así a súa creatividade e aprenderán a cooperar e a traballar en equipo.
A AMTEGA vén de publicar na súa web o vídeo no que os seis gañadores dos concursos de microrrelatos e debuxos da Estratexia Dixital de Galicia 2030, explican como ven a Galicia do futuro e como a plasman nos seus traballos. Este vídeo realizouse como recoñecemento aos seus traballos, ante a imposibilidade de celebrar o acto de entrega dos premios (unha tableta) por mor da crise sanitaria.
A través destes certames, nos que participaron máis de 300 rapaces e rapazas, quíxose recoller a achega dos máis novos a elaboración desta folla de ruta para a vindeira década, unha estratexia en proceso de elaboración na que están a colaborar axentes económicos e sociais, académicos e tamén os galegos do futuro, rapaces e rapazas de 5 a 18 anos .
Neste certame debuxo, no que participaron 213 alumnos e alumnas de Educación Primaria, de entre 5 e 12 anos, resultaron gañadoras tres composicións que representan as necesidades, novos hábitos e solucións que as novas tendencias dixitais poden proporcionar á nosa sociedade.
No concurso de microrrelatos, no que participaron 120 estudantes de ESO ou Bacharelato, de entre 11 e 18 anos, resultaron gañadoras tres obras que mostran como os avances tecnolóxicos e o uso das TIC poden mellorar o noso día a día.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...