Galicia suma un novo piloto 5G que permitirá desenvolver 14 casos de uso con esta tecnoloxía na Comunidade. O Ministerio de Economía e Transformación Dixital publicou este mes de agosto a resolución da adxudicación da segunda convocatoria de axudas para probar esta tecnoloxía que outorga ao operador Orange unha axuda pública de 9 millóns de euros para realizar un piloto 5G que abrangue 14 casos de uso destas redes sen fíos. Trátase do segundo proxecto de maior importe dos oito concedidos en España nesta nova convocatoria
Este piloto súmase ao concedido a Telefónica na primeira convocatoria estatal, cun importe de 11 millóns de euros e aos impulsados pola Administración autonómica desde o Nodo 5G Galicia cos tres operadores, Telefónica, Vodafone e Orange cun investimento de 2 millóns de euros. En total, desenvolveranse na Comunidade máis de 30 casos de uso baseados en tecnoloxía 5G por importe de 22 millóns de euros.
Estes pilotos dan resposta ao requisito marcado por Europa de que os Estados membros realicen casos de uso, é dicir, escenarios nos que se teste e pilote esta tecnoloxía, como paso previo ao seu despregamento. Consciente desta realidade, a Administración pública autonómica apostou por exercer un papel facilitador á hora de abordar o desenvolvemento tecnolóxico de Galicia. Por iso en xullo de 2018 foi a primeira Comunidade en aprobar un Plan para impulsar o ecosistema 5G galego e favorecer o despregamento destas redes no territorio.
En menos dun ano puxéronse en marcha as principais liñas do plan. A primeira, conformar un Nodo 5G co compromiso dos tres principais operadores (Vodafone, Telefónica e Orange) de realizar 9 casos de uso 5G, actualmente en marcha.
Este posicionamento de Galicia no 5G contribuíu a que fose unha das dúas Comunidades en conseguir a subvención estatal para desenvolver un piloto de Telefónica, ao que se engade agora o de Orange nesta segunda convocatoria e que suman 22 casos de uso. En total, e grazas ao impulso de ambas administracións, en Galicia desenvolveranse máis de 30 pilotos de 5G repartidos nas sete grandes cidades en ámbitos de especial interese para a Comunidade como a sanidade, a loita contra os incendios, a industria, o vehículo conectado, o turismo ou a educación.
Ademais, o Plan Galicia 5G aposta tamén pola formación e puxo en marcha o primeiro curso de Especialista Universitario en 5G, en colaboración coa Universidade de Vigo, que vai iniciar a súa segunda edición.
A Rede Eusumo vai organizar entre o 3 e o 24 de setembro unha nova edición (a undécima) do seu obradoiro Impulsa o teu negocio co marketing dixital. Achegarase en formato de teleformación, en liña, e terá unha duración de 20 horas. O obxectivo é facilitar novos métodos e recursos de mercadotecnia nas redes e comunicación ás empresas de economía social.
Vai dirixido sobre todo a grupos promotores, persoas interesadas en emprender e integrantes do noso tecido produtivo con vertente máis solidaria. A inscrición, que é de balde, pode facerse até o 2 de setembro, enchendo un formulario habilitado na web de Eusumo.
A Rede Eusumo é unha rede de colaboración impulsada pola Xunta de Galicia para o fomento e o desenvolvemento da economía social. Con ela procúrase o fomento do espírito emprendedor prestando apoio directo á creación e consolidación de emprego con base na economía social.
A aula CeMIT de Poio vai retomar a súa actividade en setembro, logo das interrupcións motivadas pola crise sanitaria e pola chegada do verán. O espazo de dinamización dixital regresará cunha oferta de nove obradoiros de balde que xirarán arredor da creación e deseño de contidos dixitais en formato revista, da iniciación a Internet, da introdución ao uso do correo electrónico, do manexo das redes sociais, dos servizos de mensaxes instantáneas e presentacións online, do emprego de procesadores de texto e servizos na nube e do deseño de carteis e folletos.
Respecto á dispoñibilidade das instalacións da aula CeMIT de Poio, prolongarase o horario de verán até o 16 de setembro, para pasar logo ao horario de inverno con acceso gratuíto previa inscrición de 9.30 a 12.30 horas. Para participar nos obradoiros, terá prioridade a veciñanza empadroada en Poio. Os cursos están destinados a persoas maiores de 14 anos.
A startup murciana de 'Bemyvega', xunto con 'Park4dis' e 'Supergiz', acaban de asinar senllos convenios coa Fundación ONCE para formar parte de 'espacIA', a iniciativa de aceleración de emprendedores sociais con impacto no colectivo de persoas con discapacidade posta en marcha fai un par de anos pola entidade social.
'Bemyvega' é un sistema de gravación, retransmisión e seguimento de clases, congresos, presentacións ou eventos, que facilita o acceso á información que se difunde neles.
O sistema 'Bemyvega' permite que quen queira seguir unha clase, xa sexa de forma presencial ou en streaming, dispoña do sinal da imaxe con seguimento do docente, da imaxe da lousa (se a hai), do sinal da pantalla e do audio do discurso do relator en calquera dispositivo intelixente propio do que dispoña (teléfono móbil, Tableta ou PC) en tempo real.
Con este equipo, certas persoas con discapacidade visual ou auditiva poden ter acceso completo en tempo real a toda a información necesaria para o seguimento da sesión, co que pode facilitar a volta ao cole dalgúns nenos con discapacidade.
Pola súa banda, 'Park4dis' naceu como solución ás dificultades que atopan as persoas con mobilidade reducida (PMR) en España cando se desprazan en coche. É unha única plataforma (web e App) que agrupa información sobre a localización de máis de 23.000 prazas PMR, e sobre a normativa aplicable en máis de 60 municipios.
Por último, 'Supergiz' é un proxecto deseñado e producido por Autofabricantes. Concibido inicialmente como un sistema de prótese para nenos con ausencia ou certas parálises de man ou parte do brazo, aínda que actualmente estase utilizando tamén en adultos. É un programa de código aberto e fabricado en impresión 3D con máis de 2.000 descargas.
Con estes tres emprendedores, xa son seis os que integran o proxecto 'espacIA'. Cada un deles conta cun servizo de aceleración a medida e un mentor, ademais de recibir asesoramento e consultoría. Neste sentido, a carteira de servizos de 'espacIA' é ampla e inclúe desde un asesoramento en materia legal, fiscal ou de desenvolvemento de negocio na fase de empresas, ata a preparación dun plan de negocio, discurso ante investidores ou identificación de aspectos claves na posible incorporación de talento para fases máis iniciais, entre outros.
Os emprendedores seleccionados dentro do proxecto de aceleración 'espacIA' deben dedicar, durante o exercicio seguinte ao comezo da explotación comercial do seu proxecto, polo menos 20 horas anuais ao desenvolvemento de labores de mentorización dos proxectos beneficiarios das seguintes edicións.
Ademais, terán que destinar o 5% dos beneficios que obteñan durante os cinco primeiros anos como consecuencia da explotación comercial do proxecto seleccionado a dotar un fondo económico que se dedicará a novas iniciativas con impacto na mellora das condicións de vida das persoas con discapacidade.
Os ascensores moitas veces son a porta de entrada a vivendas e oficinas, polo que a súa accesibilidade é clave para facilitar a mobilidade e autonomía de moitas persoas con discapacidade e persoas maiores. Unha mellor accesibilidade para a que a tecnoloxía é clave.
Conscientes disto, a Fundación ONCE asinou un convenio de colaboración coa compañía Nayar Systems para buscar fórmulas para mellorar a accesibilidade dos ascensores a través da tecnoloxía.
Desta forma, as dúas entidades traballarán conxuntamente no desenvolvemento de actuacións para promover a accesibilidade dos ascensores e a adopción de tecnoloxía que facilite o uso destes elementos por todas as persoas.
Os ascensores son elementos fundamentais para a accesibilidade de moitas vivendas e edificios, pero débese garantir que todas as persoas os poidan utilizar para o que é fundamental o uso adecuado da tecnoloxía.
Ademais de que a tecnoloxía debe estar dispoñible, é tamén moi importante a concienciación dos propietarios sobre a necesidade de que o acceso ao seu edificio ou local sexa accesible para as persoas con discapacidade e as persoas maiores.
A aula CeMIT de Boiro, o punto neurálxico da formación tecnolóxica local, retoma este mes de setembro a formación presencial, seguindo rigorosas medidas de seguridade e distanciamento. Ao abeiro desta recuperación da actividade tradicional o Concello e a asociación ComparTIC desenvolverán unha serie de cursos de informática. Haberá obradoiros de formación presencial, que se suspenderon durante o confinamento, cun total de catro cursos. A aula CeMIT boirense está situada nas dependencias do Centro Social de Boiro.
O primeiro dos cursos que se vai impartir é o de Inicio á Informática, os días 7, 8, 9, 10 e 11 de setembro. Vaise impartir tamén un de Inicio a Internet, os días 14, 15, 16 e 17. O de Trámites online, co que se van achegar as directrices básicas para facilitar xestións en Internet, será os días 28 e 29 de setembro, e tamén se vai impartir un obradoiro de Sistema de videoconferencias que será os días 30 setembro e 1 de outubro.
O horario de todos os cursos vai ser de 10:00 a 12:30 horas. As inscricións para todos os cursos de setembro están xa abertas e poden facerse no enderezo electrónico axentetic@boiro.org ou no teléfono 981 84 26 35. Ademais dos cursos presenciais, desde a aula CeMIT séguense a impartir cursos online de diversas modalidades.
A aplicación para dispositivos electrónicos Close2U, desenvolvida por investigadores da Universidade Complutense (UCM) e a Universidade de Zaragoza, monitora o estado de saúde físico e mental dos pacientes con cancro a través da gamificación.
Os usuarios enchen unha serie de enquisas diarias sobre o seu estado emocional e as zonas de dor. A cambio, a aplicación devólvelles recompensas en forma de consellos ou cancións, recursos que aumentan a súa motivación.
'O uso da gamificación permitiu que se poida seguir aos pacientes de cancro de maneira máis continuada, obtendo información frecuente acerca do seu estado de ánimo. Isto permite detectar se están a sufrir depresión, tensión ou dor entre outros', explica Iván García-Magariño, investigador do departamento de Enxeñería do Software e Intelixencia artificial da UCM.
Este estudo levouse a cabo en colaboración coa Asociación Española Contra o Cancro (AECC), principalmente coa súa sede de Teruel, na que pacientes da asociación probaron a app.
Os investigadores de ambas as universidades analizaron os resultados destas probas e describiron o desenvolvemento da aplicación en Journal of Biomedical Informatics e en Journal of Healthcare Engineering.
Por exemplo, na pregunta 'Como durmiches?', o usuario ten que marcar o punto nunha liña horizontal na que os extremos son moi mal e moi ben, mentres que en 'Que partes do teu corpo che doen?', a pantalla mostra unha figura humana na que o paciente marca os puntos de dor.
A información derivada das súas respostas é recibida polo profesional médico de hospitais ou asociacións.
A cambio, os consellos e as cancións das recompensas 'permiten que os usuarios teñan momentos divertidos e agradables que tamén poden compartir con outros pacientes de cancro para apoiarse uns a outros', destaca García-Magariño.
O investigador da UCM adianta que están a traballar na integración con outros dispositivos como mobles e pulseiras intelixentes. 'Non sabemos exactamente cando teremos dispoñibles os nosos produtos para o público en xeral, e dependerá dos medios que teñamos e o interese dos potenciais usuarios', conclúe.
Close2U enmárcase dentro das accións da e-Health, cumprindo obxectivos como a captura de información automático sen depender de accións explícitas por parte dos usuarios ou a análise intelixente da información, alertando ao persoal sanitario en casos necesarios.
A tecnoloxía democratizouse. Deixou de ser un ámbito pechado ás grandes corporacións para converterse nunha ferramenta ao alcance de practicamente calquera empresa, independentemente do seu tamaño e sector.
Con todo, e a pesar da accesibilidade e as vantaxes que ofrecen os diversos avances tecnolóxicos, estes seguen sendo grandes descoñecidos para moitas empresas. E mesmo moitas delas, aínda coñecendo estes avances, continúan a ser reticentes á súa adopción.
Para contribuír a paliar esta situación a Amtega, da man do IESIDE, presenta o Programa de Inmersión Tecnolóxica para Pemes, unha iniciativa de difusión, sensibilización e formación orientado a que as pemes galegas e o seu persoal directivo coñezan algunhas das novas tecnoloxías máis relevantes, así como os beneficios e os condicionantes necesarios para a súa translación á estratexia, estrutura e modelos de negocio. Todo iso cunha perspectiva moi experiencial, mostrando casos concretos e próximos de éxito que actúen como elemento motivador.
Todas as sesións formativas desenvolveranse en xornadas de día completo (de 10:00 a 19:30) nas instalacións do GaiásTech, no Centro de Emprendemento da Cidade da Cultura, en Santiago de Compostela.
O Diario Oficial de Galicia (DOG) publica hoxe a orde da Consellería de Sanidade pola que se regula o sistema de información ‘Passcovid’, que desenvolve a Xunta de Galicia, como medida complementaria na xestión da crise sanitaria ocasionada pola covid-19.
A aplicación ‘Passcovid’ actuará como canle telemática e preferente de contacto con residentes e transeúntes en Galicia, conectada co Servizo de Saúde e a Central de Rastrexo de contactos e a aplicación estatal RadarCovid, como un complemento para o traceo automático de contactos. A través de “Passcovid” recibirase o código alfanumérico que debe introducirse en RadarCovid no caso de que, de forma voluntaria, a persoa desexe reportar o positivo.
Así mesmo, entre as funcionalidades que integran a aplicación galega tamén se atopan a de achegar información relevante e consellos sobre a evolución da covid-19 en Galicia, anunciar a adopción de medidas ou os protocolos vixentes, e mesmo trasladar recomendacións sobre o xeito de como afrontar a actual situación sanitaria.
Coa intención de optimizar ao máximo a xestión e control da expansión do virus na comunidade, a axilidade da nova ferramenta de participación cidadá, permitirá adoptar medidas axeitadas cunha maior celeridade e precisión segundo evolucione a situación epidemiolóxica.
O novo sistema de información, en fase de pilotaxe actualmente, estará dispoñible para as persoas usuarias a través dunha aplicación para dispositivos móbiles, e poderá ser utilizado por calquera persoa, maior de idade, que resida ou se atope temporalmente na nosa comunidade. Neste senso, o acceso e uso da aplicación por menores de idade está limitado a aquelas funcionalidades do sistema que non requiran do tratamento dos seus datos persoais. Nestes casos, e de acordo co artigo 7 da Lei Orgánica de Protección de Datos, será necesario o consentimento, ben do menor cando sexa maior de 14 anos, ou ben do seu pai/nai, titor/a, cando se trate dun menor de 14.
Cómpre subliñar que tanto a instalación da APP como a habilitación de cada unha das súas funcionalidades e o seu uso, serán sempre voluntarias, garantindo a privacidade e confidencialidade dos datos que se insirán na mesma.
Deste xeito, a Xunta de Galicia agrupa nunha única app un conxunto de utilidades para a cidadanía, que servirán de soporte e axuda para os profesionais sanitarios.
As persoas que descarguen a aplicación ‘Passcovid’, poderán optar por facelo mediante un perfil personalizado, ou ben, por un perfil anónimo. No primeiro dos casos, os usuarios que desexen rexistrarse poderán facelo por medio da identificación segura Chave365, recibindo alertas, mensaxes e consellos prácticos, en función das súas características en relación con la covid-19. Se deciden optar por un perfil anónimo, as mensaxes e alertas gozarán dun carácter moito máis xenérico, e incidirán nos protocolos sanitarios vixentes en Galicia.
En ámbolos dous casos, se a persoa usuaria decide, de xeito voluntario, activar a súa xeolocalización, as mensaxes e alertas estarán referenciadas de acordo á ubicación da persoa en cada intre. Así, ‘Passcovid’ facilitaralle datos moito máis específicos, como poden ser os brotes activos nese concello, os protocolos vixentes no municipio ou as medidas sanitarias que debe adoptar.
O sistema de información ‘Passcovid.gal’ estará vixente até a finalización da situación de crise sanitaria, que será declarada polo goberno estatal, ou, de ser posterior, até o momento da declaración polo goberno autonómico da finalización da situación de emerxencia sanitaria.
O fin da vixencia do sistema de información será publicado no DOG, e implicará a inmediata desactivación da APP, sen prexuízo de que os datos deban conservarse en cumprimento da normativa sanitaria, ou polo seu valor científico e epidemiolóxico, en cuxo caso se conservarán de forma anónima.
A información acerca do sistema e da APP estarán dispoñibles no portal informativo https://passcovid.xunta.gal
O Comité Español de Representantes de Persoas con Discapacidade (Cermi) denunciou ante a Oficina da Atención á Discapacidade (Oadis) do Ministerio de Dereitos Sociais e Axenda 2030 "graves deficiencias de accesibilidade" da app Radar Covid, ao entender que "exclúe do seu uso a determinadas persoas con discapacidade".
A secretaria de Estado de Dixitalización, Carme Artigas, recoñeceu nas redes sociais que 'é certo" que a versión que se puxo en marcha da app Radar Covid para a proba piloto da Gomera "non cumpre o cento por cento dos requisitos de accesibilidade porque era un beta dun piloto".
Con todo, garantiu que no desenvolvemento que se está realizando actualmente, "como xa fixemos noutros desenvolvementos tanto da app AsistenciaCovid como do 'chatbot', vai ter en conta os niveis que se requiren polos usuarios con discapacidade'.
A escalada nacional de implantación da app será para mediados de setembro, aínda que algunhas rexións poden empezar a integrala de forma acelerada en breve se Sanidade o estima oportuno.
O Cermi sinalou nun comunicado o pasado venres que recibiu en poucos días queixas de persoas e de organizacións da discapacidade que sinalan "relevantes carencias de accesibilidade, que a converten en inutilizable para grupos específicos deste sector social".
O comité denunciou que na súa realización da app Radar Covid "ignoráronse inescusablemente os criterios xerais de accesibilidade universal establecidos para este tipo de solucións dixitais". Por iso, pediu á Oadis que abra unha investigación á Secretaría de Estado de Dixitalización e Intelixencia artificial "por proporcionar unha aplicación inaccesible e lle inste a liquidar as deficiencias detectadas coa maior urxencia".
O Cermi lembrou que "non deseñar produtos tecnolóxicos accesibles vai en contra da normativa vixente e supón unha infracción legal sancionable, pero agrávase como neste caso cando a falta de accesibilidade deixa desprotexidos ou en peor situación ás persoas con discapacidade ante o impacto da pandemia causada polo coronavirus, comprometendo o seu dereito á saúde sen discriminacións".
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...