O Concello de Baiona, a través do seu departamento de Igualdade, comunicou estes días a apertura do prazo de inscrición para participar nunha iniciativa de alfabetización e capacitación dixital que pon o foco na poboación feminina. Trátase do programa Achégate ás novas tecnoloxías, unha iniciativa que busca equipar ás mulleres dos recursos precisos para afrontar todo tipo de operacións e trámites online (como por exemplo trámites dixitais coas administracións), para mellorar a súa empregabilidade ou para ampliar os seus coñecementos tecnolóxicos.
A actividade, que é cen por cen de balde, foi concedida ao Concello de Baiona no marco do programa de promoción da igualdade e de prevención da violencia de xénero da Secretaría Xeral da Igualdade e co-financiada pola Unión Europea a través do Programa Operativo FSE Galicia 2014-2020. Inclúe catro cursos de 12 horas de duración cada un e desenvolveranse en horario de mañá e tarde do 15 ao 24 de setembro. As mulleres interesadas en participar poden contactar co Centro Municipal de Información á Muller (CIM) no teléfono 986 35 75 54 de luns a venres en horario de 8:30 h a 13:30 h.
Os proxectos relacionados con investigación en robótica asistencial poderían mellorar a calidade de vida daquelas persoas que presenten determinadas dependencias. Así o explicou Carme Torras, unha das principais relatoras da ECAI 2020, quen este martes interveu no panel 'IA de asistencia: retos da investigación, ética e ciencia ficción' desta conferencia organizada polo CiTIUS.
Torras, que é licenciada en Matemáticas e doutora en Informática, traballa como profesora no Instituto de Robótica e Informática Industrial (CSIC-UPC) de Barcelona, onde actualmente están a desenvolver o proxecto 'Clothilde', co obxectivo de deseñar e programar robots que axuden a persoas con mobilidade reducida a vestirse.
Así mesmo, a experta sinalou que estes autómatas tamén poderían dar para comer ás máis vulnerables, mediante unha cámara que detectase esta necesidade.
Aínda que á súa 'fazaña' aínda quedan dous anos e medio de desenvolvemento, ademais de ter que pasar os requisitos de seguridade para comercializarse, Torras espera que en menos de 20 anos existan robots en centros de saúde, hospitais e residencias 'axudando en tarefas que requiran contacto coas persoas'.
Todos estamos afeitos xa á tecnoloxía que recoñece a fala e que se pode controlar mediante a voz, con todo, a identificación da lingua de signos está moito menos avanzada, a pesar de que supoñería unha substancial mellora de vida de millóns de persoas con discapacidade auditiva que son signantes.
Un dos obstáculos que dificulta o desenvolvemento destes sistemas que identifiquen e recoñezan a lingua de signos é a falta dunha base de datos que permita aos creadores de tecnoloxía avanzar nos seus proxectos dunha forma moito máis sinxela.
Por esta razón, dous equipos de investigadores da Universidade de Vigo comezaron a traballar na creación desta base de datos co obxectivo de fomentar a creación desta tecnoloxía que aumentaría de forma exponencial a capacidade de comunicación, a autonomía e a privacidade das persoas con discapacidade auditiva que utilizan a lingua de signos.
O desenvolvemento e madurez desta tecnoloxía permitiría que as persoas signantes se puidesen comunicar con calquera persoa descoñecedora da lingua de signos de forma automática e sen a necesidade dun intérprete.
Os investigadores da Universidade de Vigo fixáronse como obxectivo desenvolver un recoñecedor automático da lingua de signos española (LSE) e o primeiro paso é a creación desta base de datos.
Esta base de datos será útil se conta cunha gran cantidade de exemplos de signos que permitan crear patróns de recoñecemento para cada un deles, polo que é necesaria a participación e achega de persoas signantes.
Para facilitar estas colaboracións, os investigadores crearon unha metodoloxía de gravación dos signos para lograr unha certa uniformidade e facilitar a creación da base de datos.
Por agora, os investigadores crearon unha primeira base de datos centrada en 40 signos de distinto tipo, algúns estáticos como números, outros monomanuais como 'ben', outros bimanuais simétricos como 'bicicleta' e, por último, bimanuais asimétricos como 'arroz'.
Agora, a súa intención é ampliar o número de colaboradores para cubrir cada vez unha maior cantidade de signos e lograr que esta base de datos sexa a base sobre a que medren proxectos que melloren a comunicación de millóns de persoas.
A Concellería de Mocidade da Pobra do Caramiñal e Tecelán organizaron para este remate de verán un curso de deseño e impresión en 3D co fin de introducir á xuventude local nalgunhas das tecnoloxías dixitais máis creativas e de meirande proxección profesional de cantas están a abrollar nos últimos anos.
Se ben foi convocada nun principio un único obradoiro, a desenvolver os días 5, 12 e 19 de setembro no Fab Lab da Casa da Mocidade (no antigo Restaurante Lagar), finalmente, dado o éxito da iniciativa (cuxas prazas foron esgotadas axiña), a Concellería decidiu argallar unha segunda convocatoria, que terá lugar no dito emprazamento os días 26 de setembro e 3 e 10 de outubro.
O edil da Mocidade, José Andrés Lojo, explicou que esta proposta naceu “baixo a demanda existente de coñecemento sobre estas novas tecnoloxías”, polo cal o Fab Lab da Casa da Mocidade converteuse, dixo, “no lugar idóneo para impartir a formación ao contar con tódalas ferramentas necesarias”. Trátase, engadiu, dunha actividade formativa de nivel básico que “toca os ámbitos do deseño, da laminación e do manexo da impresora 3D, divididos en tres días”. Pola súa parte, o alcalde Xosé Lois Piñeiro lembrou que esta actividade se engloba nunha programación (música, audiovisual, etcétera) que está ultimándose e que se focaliza no Fab Lab, así como na propia Casa da Mocidade en xeral; “unhas instalacións dispoñibles para uso e desfrute da veciñanza, así como para a súa formación”.
A primeira edición deste curso, organizado polo Concello e Tecelán, xa está completo e transcorrerá como dixemos nos días 5, 12 e 19 de setembro, en horario de 10.00 a 14.00 horas. Para a segunda edición tan só quedan catro prazas vacantes, pois as restantes están ocupadas polas persoas que non lograron entrar na primeira quenda. A inscrición é de balde e pódese formalizar a través do teléfono de contacto 981843281 ou dos enderezos electrónicos alcaldia@apobra.gal e correo@apobra.gal.
O Parque Tecnolóxico de Galicia (San Cibrao das Viñas, Ourense) ten aberto o prazo de inscrición en Aulas Tecnópole e STEAM Kids Tecnópole, os cursos de formación en habilidades científicas e innovadoras para estudantes de 8 a 18 anos. A matrícula poderá realizarse ata o 30 de setembro. O obxectivo é ofrecer ás novas xeracións, por sexto ano consecutivo, “unha aproximación innovadora ao mundo da ciencia e a tecnoloxía desde unha óptica artística e creativa”. Haberá un límite de 25 asistentes.
O programa consta dun conxunto de actividades que xiran arredor de diferentes eidos do coñecemento e que requiren, segundo informa a Tecnópole, “do uso de todo tipo de habilidades, tal como acontece na vida real”. Os participantes levarán a cabo pequenas investigacións, construirán robots programables, aprenderán a crear aplicacións e funcionalidades informáticas, terán a oportunidade de voar drons, deseñarán instalacións artísticas de base tecnolóxica, superarán retos interdisciplinares e descubrirán a maxia das matemáticas. Estas sesións celebraranse os mércores de 18.10 a 19.40 horas durante os meses de outubro de 2020 a maio de 2021. A cota mensual é de 50 €, que inclúe o transporte desde varios puntos da cidade de Ourense. As inscricións poden facerse a través da web da Tecnópole.
As Aulas Tecnópole, que este ano alcanzan a súa undécima edición, están pensadas para espertar vocacións científicas e incentivar o espírito emprendedor entre o alumnado de 12 a 18 anos. As prazas están limitadas a 40 asistentes. Os estudantes, procedentes de centros de toda a provincia de Ourense, trasládanse unha tarde por semana a Tecnópole, os xoves de 17.00 a 19.00 horas, durante os meses de outubro de 2020 a maio de 2021. Unha vez alí dispoñen das instalacións e recursos do Parque Tecnolóxico de Galicia para levar a cabo os seus proxectos, axudados por un equipo de formadores con ampla experiencia docente e de desenvolvemento de programas destas características. Os estudantes, todos eles de Secundaria e Bacharelato, reciben formación sobre as pautas que debe seguir unha investigación científica rigorosa e a estrutura que debe ter a memoria escrita na que se recolla o proxecto. Os seus ámbitos de traballo abranguen todas as áreas do coñecemento, desde as novas tecnoloxías e a informática ata as ciencias ou as humanidades. Os participantes no curso terán ocasión de presentar os seus proxectos en Galiciencia (Tecnópole) e noutros certames nacionais como Jóvenes Investigadores do Ministerio de Ciencia e Innovación. A cota mensual é de 15 €, que inclúe o transporte desde varios puntos da cidade de Ourense. Os pasos da inscrición tamén poden facerse dende a web da Tecnópole.
O Concello da Bola e a aula CeMIT local organizaron este 27 de agosto unha xornada tecnolóxica dirixida á rapazada e co obxectivo de introducir ás nenas e nenos do termo municipal ourensán, dun xeito divertido, nos usos e vantaxes creativas das novas tecnoloxías da información.
Máis en detalle, a sesión (que se desenvolveu pola mañá, de 10 a 13.00 horas) puxo o foco nas posibilidades lúdicas e educativas da ferramenta PowerPoint de Microsoft, poñendo en xogo recursos para familiarizar aos rapaces (de idades comprendidas entre os 3 e os 12 anos) con este programa e permitíndolles que o empreguen no futuro dunha maneira interactiva e dinámica, ao tempo que “axeitada para a súa idade”. Pablo Vázquez, o técnico da aula CeMIT da Bola, foi o encargado de transmitir todos estes coñecementos aos pequechos e pequechas.
A Maker Faire Galicia chega en 2020 á súa sexta edición nun formato 100% en liña, desenvolvendo unha potente plataforma online que permitirá aos participantes vivir unha experiencia única desde calquera punto do planeta. Desta forma convértese nunha das primeiras Maker Faire a nivel mundial que se celebra integramente a través de Internet.
Ademais desta novidade, o encontro incluirá esta edición unha xornada dedicada exclusivamente ao ámbito educativo, que se suma ás dúas xornadas profesionais e ás dúas xornadas abertas a público xeral. Deste xeito a Maker Faire Galicia convértese nun referente na innovación 360º, compartindo contidos e proxectos relacionados coa innovación social e cultural, a innovación educativa e a innovación empresarial.
Se es unha empresa de recente creación, un centro educativo, unha asociación ou un/unha maker, non esperes máis e presenta o teu proxecto! O call for makers está aberto desde o 2 de setembro ata o 15 de outubro. Podes optar a impartir unha charla, un taller ou expoñer teu proxecto e compartir coñecemento coa comunidade maker. Non perdas o evento de innovación máis importante do ano!
A sexta edición da Maker Faire Galicia celébrase unha vez máis no Museo Gaiás, aínda que este ano de forma virtual, e conta co apoio da Xunta de Galicia, o Concello de Santiago e a Fundación Cidade da Cultura.
Este ano a Maker Faire Galicia presenta un novo formato 100% online, para o que desenvolvemos unha potente plataforma online que permitirá aos participantes vivir unha experiencia única desde calquera punto do planeta. Desta forma convértese nunha das primeiras Maker Faire a nivel mundial que se celebra integramente a través de Internet.
Ademais desta novidade, ás dúas xornadas dedicadas ao ámbito profesional, e ás dúas xornadas abertas a todo o público, súmase este ano unha nova xornada exclusiva sobre educación. Deste xeito a Maker Faire Galicia convértese nun referente na innovación 360º, compartindo contidos e proxectos relacionados coa innovación social e cultural, a innovación educativa e a innovación empresarial.
Se es unha empresa de recente creación, un centro educativo, unha asociación ou un/unha maker, non esperes máis e presenta o teu proxecto! Desde hoxe e ata o 15 de outubro temos aberto o call for makers.
Ofrece unha charla, un taller ou expón o teu proxecto e comparte coñecemento coa comunidade maker. Non te perdas o evento de innovación máis importante do ano!
A sexta edición da Maker Faire Galicia celébrase unha vez máis no Museo Gaiás, aínda que este ano de forma virtual, e conta co apoio da Xunta de Galicia, o Concello de Santiago e a Fundación Cidade da Cultura.
Trátase dunhas lentes que integran distintos sensores capaces de medir desde o movemento do ollo ata os sinais do cerebro mediante un electroencefalograma.
Estes sensores axudarían a mellorar a saúde do usuario adiantando problemas ou monitorando a súa evolución. Tamén incorpora tecnoloxía útil para detectar caídas ou para a detección rápida de ataques de epilepsia, por exemplo.
Pero a utilidade destas lentes non se limita á saúde, xa que, ademais, están pensadas para mellorar o lecer de persoas con discapacidade física utilizando o movemento dos ollos.
Segundo o texto publicado na revista da American Chemical Society (ACS), este prototipo está pensado para conectarse a outros sistemas e permitir manexar videoxogos.
Por agora, nas probas estes videoxogos limítanse a accións sinxelas como o movemento de obxectos dun lado a outro, pero o obxectivo é ir mellorando para facilitar a participación en videoxogos máis complexos.
Outra función que incorporan estas lentes, cuxa moldura está fabricada mediante unha impresora 3D, é a capacidade de cambiar a tonalidade do cristal en función de se lle chegan raios ultravioletas ou non, converténdose nunhas lentes de sol e axudando a protexer os ollos.
A directora xeral de Xuventude, Participación e Voluntariado, Cristina Pichel, visitou esta tarde ás mozas e mozos que participan nos catro campamentos de verán que nestes momentos están a ter lugar de maneira simultánea en diferentes espazos do albergue xuvenil de Gandarío. A temática dun destes campamentos é a náutico-deportiva e a aventura, e a dos outros tres é a tecnolóxica.
O náutico-deportivo, que comezou o pasado 26 de agosto e rematará pasadomañá venres, desenvolve a última das súas catro quendas. As actividades desta iniciativa están centradas no mar, o que permite aos participantes facer deporte ao mesmo tempo que desfrutan da praia situado ao pé das instalacións xuvenís.
Outro grupo de rapazas e rapaces participan nos campamentos tecnolóxicos Digitalia, nos que adquiren novas habilidades dixitais dun xeito lúdico. A través desta iniciativa, as mozas e mozos coñecen ao videomaping, que consiste en compoñer vídeos e crear animacións; aprenden os coñecementos necesarios para crear, controlar e voar drons; e adquiren os coñecementos sobre a construción, funcionamento e control de robots sinxelos.
En total, esta Campaña de Verán, que leva por título O verán que necesitas, pon á disposición da mocidade 6872 prazas en diferentes actividades e campamentos, que se prolongarán ata comezos do mes de setembro. Todas as actividades desta campaña seguen as medidas de prevención fronte ao covid-19 fixadas polas autoridades sanitarias co fin de garantir a seguridade de todas as persoas participantes.
Ademais, a Consellería de Política Social oferta neste verán 348 prazas nun total de 29 campos de voluntariado (incluíndo as tres quendas de Cíes) para maiores de 18 anos por todo o territorio galego.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...