O Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega), coa colaboración das tres universidasdes galegas, iniciaron hoxe os talleres do programa Mática, destinado a crear unha comunidade de rapazas de entre 12 a 18 anos en Galicia que permita desenvolver as súas competencias no eido das TIC. Mática forma parte das iniciativas previstas no marco do programa Tech Kids, froito do convenio de colaboración asinado polo CPEIG e a Amtega para a posta en marcha de actividades de formación, capacitación e promoción no ámbito das tecnoloxías en Galicia. Os talleres de Mática foron inaugurados hoxe telematicamente polo presidente do CPEIG, Fernando Suárez, e a directora de Amtega, Mar Pereira.
Segundo explica a vicepresidenta do CPEIG, Susana Ladra, Mática xorde co obxecto de aumentar a presenza de rapazas nos estudos de Enxeñaría en Informática, en parte debido a falta de referentes femininos, o descoñecemento da profesión de enxeñaría informática e a existencia de estereotipos afastados da realidade do sector. “O programa Mática non é só formativo, senón que ten o obxecto de crear unha rede entre todas as rapazas con intereses nas TIC como creadoras e desenvolvedoras de tecnoloxía e as súas aplicacións na sociedade. En particular, permitirá coñecerse a estudantes de puntos moi distantes de Galicia que queiran estudar estas titulacións no futuro, creando lazos de amizade e colaboración” –explica Susana Ladra–.
O primeiro grande evento deste programa é un campamento tecnolóxico que se desenvolve hoxe luns, mañá martes e o mércores 30 de xuño, de forma presencial en tres sedes diferentes en horario de 9:30 a 14:30 horas. Participan un centenar de rapazas na Facultade de Informática da Coruña (FIC) da Universidade da Coruña (UDC), na Escola Técnica Superior de Enxeñaría (ETSE) da Universidade de Santiago (USC) e na Escola Superior de Enxeñaría Informática (ESEI) de Ourense da Universidade de Vigo (Uvigo), así como de forma telemática para aquelas que non poidan desprazarse.
As actividades do campamento estarán dirixidas por profesoras e investigadoras das universidades, xunto con estudantes de últimos cursos das titulacións de enxeñaría en informática. Impartiranse talleres de iniciación ao pensamento computacional, programación móbil, robótica e intelixencia artificial, así como charlas con profesionais de recoñecido prestixio ou visitas aos centros de investigación das universidades. Todas as actividades estarán adaptadas á idade das participantes, que estarán dividas en grupos de quince nenas, é dicir, dous grupos dun total de 30 rapazas por sede presencial.
Mática regresará con novas actividades en setembro, polo que se recomenda a todas as rapazas interesadas que estean atentas ao calendario de eventos do programa. Inscricións: https://matica.gal.
Unha nova edición do programa de cualificación dixital Formadores Dixitais estará dispoñible do 1 de setembro ao 28 de outubro deste ano cunha aprendizaxe completamente en liña, en consonancia cunha formación que avanza na dixitalización e que quere ser accesible para todas e todos.
Este programa que renova o Goberno galego está dirixido a todo aquel persoal formador para o emprego interesado en profundizar e avanzar nos seus coñecementos sobre aprendizaxe na rede e estará dispoñible para 100 persoas.
Serán, en total, 90 horas de curso coa suma de vídeos formativos, sesións en directo e titorizacións realizadas por un equipo de 15 persoas de prestixio no ámbito da capacitación dixital. Os e as participantes deberán entregar, ao final do curso, un proxecto final onde reflictan os coñecementos adquiridos. As persoas interesadas poderán inscribirse ata o 23 de xullo a través dun formulario web na páxina http://www.formadoresdixitais.com
Esta iniciativa inscríbese dentro da estratexia do Executivo galego dunha formación para o emprego accesible e dixitalizada con medidas pioneiras como a creación dun Campus Virtual que recollerá toda a oferta formativa da Xunta para persoas empregadas e desocupadas. Serán usuarias destes 1.700 cursos un total de 15.000 alumnas e alumnos ao ano. Este Campus estará ao dispor das preto de 1.100 entidades formativas acreditadas en Galicia e dos trece centros de formación da Consellería de Emprego e Igualdade
Nesta vía a Xunta traballa por satisfacer unha demanda da sociedade galega nun ecosistema que permitirá a adaptabilidade e a liberdade na impartición e recepción dos cursos, favorecendo así valores e eixos de cambio como pode ser a conciliación no traballo.
O uso de internet entre as persoas de entre 16 e 44 anos en 2020 foi practicamente universal en Galicia, con porcentaxes moi similares aos da media española e europea. Entre os 16 e os 74 anos, cerca do 88 por cento da cidadanía galega usa internet, a mesma porcentaxe que na Unión Europea e lixeiramente por debaixo da media española, que é dun 93,2%.
Galicia situouse na media europea no uso de internet grazas ao incremento experimentado entre 2017 e 2020, que foi dun 11,9 por cento, fronte ao 10,2 por cento da media española e o 7,3% da UE.
Os datos corresponden ao estudo “Galicia. A nosa vida en dixital. A Sociedade da Información nos fogares galegos. Edición 2020” elaborado polo Observatorio da Sociedade da Información en Galicia (Osimga), da Axencia para a Modernización Tecnolóxica de Galicia (Amtega).
Segundo o estudo, nove de cada dez fogares galegos (90,3%) ten un servizo de internet contratado. Esta porcentaxe supón un incremento dun 7,4% respecto ao ano 2017 fronte ao 4,6% de aumento da media europea nese mesmo período.
O informe, confirma que, no ano 2020, o proceso de dixitalización da poboación galega consolídase no contexto da pandemia provocada pola COVID-19, impulsada por novos comportamentos e hábitos da cidadanía.
As videochamadas, a procura de información sobre as circunstancias sanitarias, compras on line ou o ocio a través de Internet impulsan os indicadores de dixitalización, e fano máis intensamente entre os colectivos que, tradicionalmente, presentaban unha menor inclusión dixital (persoas maiores ou residentes no rural).
O crecemento na contratación a internet rexístrase especialmente nos núcleos de menos habitantes. Nas entidades de poboación con menos de 5.000 persoas, a contratación de Internet sitúase no 84% e o incremento rexistrado no período 2017-2020 foi do 14%. Nos concellos que teñen entre 5.001 e 10.000 habitantes, a porcentaxe elévase ao 88,4% e o incremento nese mesmo período supera o 18%.
O 58,4% dos fogares galegos que ten contratado Internet conta cunha conexión á rede superior a 30 Mbps, o que supón un incremento do 14,5% respecto ao ano anterior. Así se recolle no estudo que destaca tamén que a porcentaxe de fogares con velocidade de conexión a Internet contratada superior a 100 Mbps triplicouse no período 2017 a 2020, situándose no 27,2% fronte ao 9,9% que rexistraba no ano 2017.
Nos últimos anos, os despregamentos de novas infraestruturas de telecomunicacións ou as iniciativas de capacitación dixital como a que ofrece a Rede de aulas CeMIT contribuíron notablemente ao incremento do uso das tecnoloxías na cidadanía galega.
O dispositivo máis estendido entre a cidadanía de Galicia é o teléfono móbil con capacidade de acceso a Internet –smartphone-, do que dispón o 90,8% da poboación. No caso de convivir con nenos e nenas en idade escolar obrigatoria, a porcentaxe de uso de internet ascende ao 95,9%.
En termos absolutos, máis de 1.737.900 persoas de 16 a 74 anos utilizaron Internet nos últimos tres meses, o que representa un incremento de máis de 169.015 internautas nos últimos catro anos.
Entre os galegos/as que utilizaron Internet nos últimos tres meses, un 89,8% faino a diario, dato que supera lixeiramente a media estatal (89,1%).
Estudantes, ocupados e persoas con nivel formativo secundario ou superior acadan un uso practicamente universal de Internet. Non obstante, cabe salientar que os colectivos que máis aumentan o seu nivel de dixitalización no último ano son as persoas con algún tipo de discapacidade (+17,8%), as persoas xubiladas (+11,4%) e as que realizan tarefas do fogar (+7,5%).
O ano 2020 supuxo un punto de inflexión no que se refire ás compras on line e as xestións coas Administracións Públicas a través de Internet. O impacto da pandemia da COVID-19, as limitacións á mobilidade e as medidas sanitarias aumentaron as compras de produtos e servizos a través de Internet e o uso da Administración electrónica.
No ano 2020 as compras por Internet incrementáronse un 12,5%, acadando unha porcentaxe do 58,5%. Os mozos/as con idades comprendidas entre os 25 e 34 anos acadan a maior porcentaxe de compra a través de Internet (88,6%).
No referente á administración electrónica, a porcentaxe de internautas galegos que interactuaron coas AAPP a través de Internet nos últimos doce meses para obter información foi do 75% no ano 2020, o que supón un incremento do 6,2% no último ano e sitúa a Galicia por riba dos valores estatais e europeos.
Ademais, o 70,6% das persoas que utilizaron Internet nos últimos 12 meses tamén enviaron formularios cumprimentados ás Administracións Públicas a través da Rede, cun crecemento do 5,7% respecto á edición anterior. Aínda así, o tipo de interacción coas AAPP que máis se incrementou no último ano foi a descarga de documentos xerados polas propias administracións a petición da cidadanía, que experimentou un crecemento do 18,8% e se sitúa no 61,8%.
A novena edición do campionato internacional D3Mobile Metrology World League, impulsado dende o Campus de Lugo (USC) para mostrar o talento da nosa mocidade en materia de deseño e escaneado 3D de precisión co tabletas e teléfonos móbiles, xa ten palmarés. O equipo que tivo unha máis sobranceira actuación nesta edición do certame foi o NIIDEA3D do IES Muralla de Lugo, que se proclamou campión cun modelo 3D dun globo terráqueo. Tamén houbo grandes actuacións dende Italia (o equipo do Istituto Calasanzio de Empoli, Florencia) e dende A Pobra do Caramiñal (o equipo YAG do Instituto de Educación Secundaria da Pobra).
O equipo NIIDEA3D do IES Muralla Romana de Lugo vén de gañar coa elaboración dun globo terráqueo a novena edición da D3Mobile Metrology World League, campionato convocado polo grupo de investigación CIGEO da EPS de Enxeñaría da USC e que conta con financiamento da Xunta de Galicia, a Deputación de Lugo, o Concello de Lugo e a Sociedade Internacional de Fotogrametría e Teledetección (ISPRS). Así, tras avaliar a calidade de medida e visual dos modelos 3D elaborados polos 44 equipos que acadaron a final, o xurado acordou proclamar vencedores da categoría Metrólogos aos alumnos Adrián López Montouto, Nahir Armesto Pallares e Juan Carlos Amedo López, coordinados pola profesora Marta Goy López. Na segunda proba, este equipo de Lugo elaborou un globo terráqueo mentres na terceira proba, conseguiu un erro medio inferior a 0,05 mm nas medicións realizadas nun modelo 3D de 350 mm de diagonal maior.
Os italianos Giovanni Spinelli e Arianna Cioni, coordinados polo profesor Matteo Batistini, obtiveron a segunda mellor puntuación tras escanear en 3D un ave zancuda disecada cun erro medio inferior a 0,09 mm.
Na categoría Artistas 3D resultou gañador o modelo dun transformer escaneado en 3D, elaborado polo equipo YAG, do IES Pobra do Caramiñal, formado polos alumnos Yeray Mariño Gómez, Antía Gómez Rego e Gabriel González González, que estiveron coordinados pola profesora Margarita Saborido Ojea.
Outro dos premios establecidos polos promotores da D3Mobile fomenta as competencias do alumnado para realizar unha campaña de difusión dos seus resultados, a fin de conseguir que o público do campionato valore e vote o seu modelo 3D. O equipo da categoría de metrólogos máis respaldado polo público de todo o mundo foi o do IES Aguilar e Cano, de Estepa (Sevilla), formado por Javier Frochoso García, Andrea García Casín e Patricia Martín, coa coordinación do profesor Salvador Páez Díaz. Este grupo conseguiu dar a coñecer o modelo 3D dunhas zapatillas co que obtivo unha gran cantidade de votos.
O galardón á difusión do labor científico da USC, unha distinción que requiría que os participantes seleccionaran un obxecto representativo dos resultados de investigacións desenvolvidas por científicos da USC, recaeu no equipo B&W, do IES Poeta Díaz Castro de Guitiriz, formado por Isabela Vélez Galego e Brais Lorenzo Uriz. O profesor Miguel Anxo Barreiro Díaz actuou como coordinador deste equipo, que elaborou un modelo 3D da figura dun animal relacionado co Grupo de Investigación Análise e Conservación da Biodiversidade (ACBiodiv).
O premio á difusión da Sociedade Internacional para a Fotogrametría e a Teledetección foi para o equipo Pataqueiros, do IES Poeta Díaz Castro, formado por Raúl Paredes Rodríguez, Abel Pena Bondelle e Daniel García Cordeiro. Coordinados polo profesor Miguel Anxo Barreiro Díaz, estes estudantes de Guitiríz realizaron un modelo3D representativo do relevo de Galicia.
A IX D3Mobile Metrology World League , en cuxa organización colaboraron a Universidade de Florencia, o Centro Español de Metrología (CEM) e o Instituto Xeográfico Nacional (IGN-CNIG), tamén contribuíu a sensibilizar a todos os participantes no papel que xogou e xoga a muller na enxeñaría e a arquitectura, co premio D3Mobile-Fundación Mulleres, ao que optaban aqueles equipos que seleccionasen para modelar en 3D un obxecto representativo dunha científica/tecnóloga de éxito nos eidos da enxeñaría e/ou a arquitectura. O premio foi a parar a mans do tamén equipo de Guitiriz Mivecino.com, do IES Poeta Díaz Castro, formado por Laura Deive Xaneiro, Lucía Villar Martíns e Yago Martínez Pena. O profesor Miguel Anxo Barreiro Díaz coordinou a realización do modelo 3D titulado Poción, un traballo feito en homenaxe á bióloga española experta en coronavirus Isabel Soa Gurpegui, que é codirectora do laboratorio de Coronavirus do Centro Nacional de Biotecnoloxía do Consello Superior de Investigacións Científicas-CNB-CSIC.
O gañador do premio ao mellor equipo de mozos metrólogos galegos, outorgado pola Xunta de Galicia, recaeu tamén no IES Poeta Díaz Castro. Nesta ocasión, o equipo galardoado foi o formado por Érika Bao Castro, Noemí Vázquez Roca e Javier Mulet Maio, que, coordinados polo profesor Barreiro Rivas, escanearon unha forquita. O equipo O Trío, do IES Ánxel Fole de Lugo, integrado polos alumnos Yaiza Cobas Varela, Antía Curral Meilán e Lucía Curral Rivas, coordinados pola profesora Ana Belén Lamas Lombao e que saldaron a súa participación na IX D3Mobile co escaneado en 3D dunha cunca, recibirán o premio outorgado pola Deputación Provincial de Lugo no marco dunha cerimonia que se celebrará ao longo do mes de setembro.
A oportunidade que ten Galicia de especializarse en intelixencia artificial foi un dos argumentos da xornada coa que hoxe comezou a súa actividade o centro GaiásTech da Xunta, que ocupa unha superficie de 500 metros cadrados na Cidade da Cultura.
A xornada de traballo estivo precedida das intervencións da directora da Amtega, Mar Pereira, e da directora da Fundación Cidade da Cultura, Ana Isabel Vázquez. Así mesmo, o director da Área de Sociedade Dixital da Amtega, Miguel Rodríguez, ofreceu unha visión global do proceso de transformación dixital de Galicia que se reflicte na plataforma DixiTerrae.
A xornada técnica inaugural, baixo o título “Impulsando a dixitalización de Galicia”, acolleu dúas mesas de debate sobre Intelixencia Artificial e sobre a estrutura de colaboración público privada reflectida nos nodos tecnolóxicos de Galicia.
Na primeira das sesións, a directora do entorno de Saúde do Instituto de Enxeñaría do Coñecemento (IIC), Elisa Martín, moderou unha mesa de debate na que participaron a coordinadora do Grupo Laboratorio de Investigación e Desenvolvemento en Intelixencia Artificial (LIDIA) da Universidade da Coruña, Amparo Alonso, e o director do Centro de Investigación en Tecnoloxías Intelixentes (CITIUS) da Universidade de Santiago, Senén Barro. Ademais, Elisa Martín tivo unha intervención sobre o uso da intelixencia artificial para a innovación.
A segunda sesión estivo coordinada polo presidente do Clúster TIC de Galicia, Antonio Rodríguez, e contou coas participación da directora da Escola de Enxeñería de Telecomunicacións de Vigo, Rebeca Díaz, e o directivo do ISMS Forum e director de Prevención de Perda, Continuidade de Negocio e Seguridade de Abanca, Roberto Baratta. Os participantes nesta mesa puxeron en valor a estratexia de colaboración entre administración públicas e co sector privado, que se plasma nos nodos tecnolóxicos promovidos pola Xunta de Galicia.
O centro GaiásTech que hoxe iniciou a súa actividade na Cidade da Cultura de Galicia actuará como un espazo para a demostración e experimentación en tecnoloxías avanzadas e de concentración do coñecemento ao servizo da transformación dixital das empresas, das administracións e da sociedade galega.
O centro estará á disposición das máis de 3.800 empresas tecnolóxicas de Galicia e das máis de 24.000 persoas profesionais do sector TIC da nosa Comunidade. Terá tamén a función de fomentar as vocacións tecnolóxicas e a promoción e retención do talento dixital en Galicia. A súa superficie, de máis de 500 metros cadrados, contará cun espazo de inmersión interactivo e coa superficie proxectada, orientado a experiencias de realidade virtual e aumentada. Conta tamén con salas de ideación con equipos interactivos para acoller actividades e desenvolver proxectos.
O novo centro ofrecerá servizos como o GaiasTechCloud, para a realización de probas de software na nube, demostracións de solucións tecnolóxicas, reservas de espazos ou o desenvolvemento de xornadas temáticas. Incorporará tamén un servizo de vixilancia tecnolóxica para a identificación de tendencias dixitais. Funcionará, así mesmo, como un centro de asesoramento que porá á disposición de industria e do coñecemento espazos para experimentación con equipos de realidades virtual e aumentada. De xeito paralelo a este espazo físico, GaiásTech disporá dun “xemelgo” dixital no que se localizará a axenda tecnolóxica de Galicia, disporá dos seus propios espazos virtuais e actividades e permitirá a retransmisión e participación non presencial en calquera actividade.
GaiásTech será un escenario central para a posta en marcha da Estratexia Galicia Dixital 2030, especialmente do seu eixo transversal, que ten o obxectivo de promover a especialización tecnolóxica a través do reforzo das capacidades e infraestruturas dixitais da nosa Comunidade.
O GaiásTech será tamén o espazo dende o que se coordinará a actividade dos nodos tecnolóxicos de Galicia, baseados na colaboración público privada e que aliñan a estratexia de transformación dixital da nosa Comunidade coas estratexias europea e española. Os nodos están formados polas administracións, as institucións de referencia e as empresas implicadas no desenvolvemento de tecnoloxías como o 5G, a Intelixencia Artificial, a Ciberseguridade ou o BigData.
Ademais de ofrecer soporte e asesoramento especializado aos sectores tecnolóxicos, o GaiásTech disporá e divulgará o mapa de capacidades dixitais de Galicia. Entre os seus obxectivos está tamén o de fomentar e atraer o talento dixital.
O inicio da actividade do GaiásTech coincide coa posta en marcha por parte da Xunta de dúas plataformas na web que reflicten a transformación dixital da sociedade galega, e ofrece información sobre as utilidades prácticas e solucións que proporciona este proceso.
O novo centro e as súas actividades e servizos pódense coñecer a través da plataforma gaiastech.xunta.gal, que centra os seus contidos no impulso do ecosistema dixital galego.
Pola súa banda, a plataforma dixiterrae.xunta.gal ofrece á cidadanía información sobre o proceso de transformación dixital e facilita o acceso e o coñecemento sobre os recursos e ferramentas dispoñibles.
O delegado da Xunta na Coruña, Gonzalo Trenor, participou no acto de peche do proxecto “Talentos Inclusivos”, que se está levando cabo grazas á colaboración da Consellería de Educación, Cultura e Universidade, Aspace (Asociación de padres de persoas con parálise cerebral) e a Universidade da Coruña a través do CITIC (Centro de Investigación en Tecnoloxías da Información e as Comunicacións).
O obxectivo deste programa foi espertar vocacións STEM entre os mozos e mozas e dar a coñecer a realidade da discapacidade a través de equipos colaborativos de traballo para resolver retos tecnolóxicos expostos por persoas con parálise cerebral.
Trenor destacou que este programa "foi un reto, un exemplo de unión, de colaboración e de innovación. Unha boa mostra de que o traballo en equipo divide os esforzos e multiplica os resultados”.
Neste programa participaron 120 persoas nos equipos colaborativos entre persoas con parálise cerebral, mozas e mozos e profesorado, 30 profesores da UDC, institutos e centros de Formación Profesional e leváronse a cabo 45 retos tecnolóxicos propostos por ASPACE. Os retos encádranse en cinco apartados: produtos de apoio e impresión 3D, control do entorno do fogar, rehabilitación, acceso ao ordenador, ao móbil e aos sistemas de comunicación e ocio.
Concretamente recibiron o seu recoñecemento os alumnos, profesores e usuarios de Aspace dos seguintes proxectos: creación dun sistema anticolisión para as cadeiras de rodas; robot controlado coa man ou a cabeza, creación de produtos de apoio con impresión 3D, adaptación de xogos clásicos de máquinas recreativas e creación de premedores adaptados, creación de traxes de led con control remoto adaptado, adaptación de xoguetes infantís, adaptación de coches de exploración temperá e dron controlado coa man ou a cabeza e sistema adaptado para o acendido e apagado do computador.
Os centros educativos participantes foron: IES Miraflores de Oleiros, colexio Calasanz PP Escolapios, CPR Salesianos San Juan Bosco, IES David Buján de Cambre, IES As Mariñas de Betanzos, IES Terra Trasancos de Narón, IES Ortigueira e IES Sofía Casanova de Ferrol.
O representante do Goberno autonómico incidiu en que todas estas actividades tiveron como obxectivo facilitar a vida diaria ás persoas con parálise cerebral e potenciar o seu rol como actores proactivos no futuro. Ademais, engadiu, “búscase favorecer que os mozos e mozas exploren e experimenten con tecnoloxías innovadoras, detectando as necesidades identificadas durante os diferentes restos e o impacto psicosocial da solución tecnolóxica na vida diaria dos participantes”.
A directora da a Axencia para a Modernización Tecnolóxica de Galicia (Amtega), Mar Pereira; o secretario xeral de Educación e Formación Profesional da Consellería de Cultura, Educación e Universidade, José Luis Mira, e a directora xeral da Fundación Vodafone, Gloria Placer, entregaron esta mañá os premios do Super Reto DigiCraft a alumnado dos colexios Corvillón, de Cambados e Vista Hermosa, de Ourense.
O Super Reto é un evento enmarcado no programa DigiCraft de competencias dixitais de Fundación Vodafone dirixido a nenos e nenas das comunidades autónomas de Galicia, Madrid e Andalucía. Na presente edición foron convocados arredor de 300 colexios, dos que máis de 100 eran de Galicia, onde participaron máis de 8.000 escolares. Na actualidade está en marcha unha nova convocatoria para o curso 2021-2022 na que entrarán 50 novos centros educativos galegos, cuns 2.500 nenos e nenas e 150 profesores e profesoras.
O alumnado, xunto co profesorado, realizou a través da colaboración un mural interactivo que reflicte a súa idea de como será o colexio no futuro. O obxectivo do programa DigiCraft é o de presentar ás aulas como un itinerario formativo que pretende espertar no alumnado o interese polo mundo dixital.
Na súa presentación, os escolares amosaron as posibilidades de interacción co mural a través dunha tablet e un dispositivo “Makey Makey” que permite converter calquera superficie en teclado ou rato para transmitir instrucións ao ordenador.
O curso de 3º do CEIP Corvillón de Cambados presentou un mural no que explicou que o colexio do futuro debería dispoñer dun “aula de croma e gravación”, robótica e “maxia” tecnolóxica, realidade virtual e videoxogos e un obradoiro de reciclaxe e ecoloxía. Por esta proposta resultaron gañadores de Galicia na categoría de 6 a 8 anos.
Pola súa parte, o alumnado do curso 6º do CEIP Vista Hermosa de Ourense construíu una mesa de “pinball” na que os escolares utilizaron tecnoloxía de impresión dixital e empregaron materiais reciclados, como tapóns de botellas. A súa idea do colexio do futuro é un centro autosuficiente dende o punto de vista enerxético; que teña a disposición mapas de realidade virtual e holografías para aprender conceptos, viaxar ao espazo, mergullarse no mar ou ver museos e que use a robótica. Con este traballo resultaron gañadores na categoría de 9 a 12 anos.
O fomento das vocacións en áreas de coñecemento STEM (Ciencia, Tecnoloxía, Enxeñaría e Matemáticas) forma parte do modelo educativo e de transformación dixital en Galicia a través de programas como o Plan de Promoción do Talento Dixital de Galicia, DigiTalent; a Estratexia Galega para a Educación Dixital, EduDixital, ou a propia Estratexia Galicia Dixital 2030.
Durante o acto de entrega dos premios, a directora da Amtega, Mar Pereira, salientou que o DigiTalent desenvolve accións dirixidas ao alumnado de Galicia, como os programas TechKids, ou Ciberseguranza Kids, xunto co Colexio Profesional de Enxeñaría de Informática, ou encontros dos escolares con profesionais das áreas tecnolóxicas.
Mar Pereira lembrou que as mulleres representan soamente o 16,8 por cento do alumnado en enxeñarías tecnolóxicas e o 38,5 por cento en enxeñarías STEM, cando son o 55,2 por cento do total do alumnado do Sistema Universitario de Galicia.
Neste sentido, destacou que DigiTalent desenvolve tamén accións como o programa Girl STEAM, para motivar as vocacións tecnolóxicas entre o alumnado feminino, ou o programa Mática de obradoiros para alumnas do rural.
A Amtega desenvolve outras accións para fomentar as vocacións STEM, como campamentos de verán sobre o manexo e voo de aeronaves non tripuladas, programación de robots, creación de vídeos mediante videomaping ou edición de videoxogos.
Pola súa banda, o programa EduDixital permitiu a implicación de máis de 12.000 escolares en actuacións sobre competencias STEM, o despregamento de máis de 750 kits de robótica, programación e impresión 3D, a posta en marcha de 167 contratos programa para mellorar a competencia STEM e o desenvolvemento de 12.000 horas de formación nas que participaron máis de 8.800 docentes.
En canto a transformación dixital do sistema educativo, a Xunta ten en marcha o Plan Edu100 que permitiu xa a dotación con fibra óptica de 1Gbps e renovación dos servidores do 100% dos colexios públicos; a extensión da wifi a todos os espazos docentes; a dotación de portátiles para o alumnado en risco de exclusión; e permitirá antes de 2023 a extensión a todo o alumnado entre primeiro de primaria das aulas dixitais; a extensión do libro dixital Edixgal ao 70 por cento do alumnado entre 5º de Primaria e 4º da ESO e a dotación de equipamentos PC e portátiles ao profesorado e ciclos formativos. En total, estas actuacións implicarán un investimento de 134,6 millóns de euros.
O Centro de Investigación TIC (CITIC) da Universidade da Coruña dará a coñecer o martes 22 de xuño os resultados do proxecto Talentos Inclusivos, posto en marcha xunto con ASPACE Coruña co obxectivo de espertar vocacións tecnolóxicas entre estudantes de secundaria e bacharelato e visibilizar a diversidade funcional, a través de equipos colaborativos e inclusivos que traballaron durante todo o curso académico. A iniciativa contou co apoio do Consello Social da UDC e a Fundación Española para a Ciencia e a Tecnoloxía (FECYT), dependente do Ministerio de Ciencia, Innovación e Universidades.
O proxecto consistiu no desenvolvemento de solucións tecnolóxicas, por parte de máis de 150 estudantes de centros educativos da provincia, ante retos propostos por persoas con parálise cerebral, usuarios de ASPACE Coruña. No acto de presentación, os oito equipos presentarán os traballos desenvolvidos, entre os que se atopa un robot e un dron controlados coa man ou a cabeza, un sistema anticolisión para cadeiras de rodas, xoguetes infantís adaptados e produtos de apoio con impresión 3D.
A mesa de peche do acto estará moderada polo reitor da UDC, Julio Abalde Alonso, e contará coa participación do delegado territorial da Xunta de Galicia na Coruña, Gonzálo Trenor López; a directora xeral da Fundación Española para a Ciencia e a Tecnoloxía, Imma Aguilar Nàcher; o concelleiro de Educación, Memoria Histórica, Innovación, Industria e Emprego do Concello da Coruña, Jesús Javier Celemín Santos; a presidenta de ASPACE Coruña, Mª Carmen Barreiro Santos; e a membro do pleno do Consello Social da UDC, Nona Inés Vilariño Salgado. O director do CITIC, Manuel F. González Penedo, será o encargado da apertura, mentres que os traballos serán introducidos polo investigador principal do proxecto e coordinador no CITIC, Javier Pereira Loureiro, xunto co coordinador do proxecto en ASPACE Coruña, Rubén Carneiro Medín.
Talentos inclusivos é un proxecto de innovación en que 25 usuarios e usuarias de ASPACE propuxeron unha serie de retos tecnolóxicos cos que resolver algunha das necesidades ou intereses que teñen no seu día a día. Máis de 150 estudantes dos centros IES David Buján, Cambre; Colexio Calasanz PP. Escolapios da Coruña; IES Miraflores, Oleiros, IES Sofía Casanova, Ferrol; IES de Ortigueira; IES As Mariña, Betanzos; IES Terra de Trasancos, Narón e CPR Salesiano San Juan Bosco da Coruña responderon aos retos propostos, co apoio científico do profesorado de Tecnoloxía dos seus centros educativos así como do persoal investigador do CITIC.
ACTO: Peche do proxecto Talentos Inclusivos
HORARIO: Martes 22 de xuño de 11:00 a 13:00 h
LUGAR: Sala Cloud do CITIC (Campus de Elviña, s/n, A Coruña)
Evento híbrido con retransmisión a través da canle de Youtube do CITIC
É imprescindible a confirmación de asistencia para acceder ao acto
A Axencia para a Modernización Tecnolóxica de Galicia (Amtega) vén de publicar o Plan de Acción en Software Libre 2021, que recolle diferentes actuacións co obxectivo de fomentar e promover o uso e reutilización de software libre na administración pública, o impulso dunha oferta de solucións libres e de calidade para as nosas empresas, e incrementar o uso e coñecemento do software libre por parte da sociedade.
Como xa vén sendo habitual, unha parte moi importante destas actuacións desenvolveranse en colaboración dos principais axentes do ecosistema de software libre galego. Así asináronse convenios coa Asociación Galega de Empresas de Software Libre (AGASOL); coas Asociacións Galegas de Usuarios de Software Libre (AGUSL); e co Consorcio para o desenvolvemento de aplicacións Informáticas de Xestión Universitaria de Galicia (CIXUG), integrado polas tres universidades galegas. Así mesmo, o acordo de colaboración co colexio profesional de Enxeñaría Técnica Informática (CPETIG) inclúe tamén algunha actuación en prol do fomento do Software Libre.
Os acordos asinados permitirán a realización de diferentes tipos de actividades que inclúen dende a tradución de Software Libre, a organización de xornadas, cursos, obradoiros, o fomento do software libre en proxectos de cooperación ou solidariedade social, a introdución á robótica educativa con software e hardware libre ou a formación en Software Libre nas Universidades.
No ámbito da administración a Amtega continuará promovendo o emprego de tecnoloxías libres en proxectos de calado para a Administración reforzando a súa posición como referencia e exemplo de políticas de eficiencia e bo uso de tecnoloxías libres grazas á implantación de solucións de software libre na súa infraestrutura tecnolóxica coa consecución de aforro e mellora de produtividade. Así mesmo mantén o seu compromiso de liberación de dúas novas solucións TIC desenvolvidas pola administración pública galega a fin de facilitar a súa reutilización por outras administracións.
No ámbito empresarial, as actuacións irán dirixidas a promover o uso de solucións libres de calidade que permitan ás nosas empresas mellorar en eficacia e competitividade. Ademais da actividade que se viña prestando a través do Centro Demostrador TIC, a posta en marcha este ano do GaiásTech permitirá seguir achegando solucións de software libre ás empresas, así como novas tecnoloxías emerxentes, nas que o software libre xoga un papel moi importante.
Finalmente entre as actuacións dirixidas á cidadanía en xeral, destacar que se seguirán potenciando as tecnoloxías libres dentro dos programas de alfabetización e capacitación dixitais da rede CeMIT así como no resto de iniciativas recollidas no Plan de Inclusión Dixital de Galicia.
Un ano máis a Amtega colaborará co CIXUG no Premio ao mellor traballo universitario de fin de grado con Software Libre e que tamén conta coa participación da Asociación GPUL.
Por suposto é neste eido onde se desenvolverán a maior parte das actuacións que se executarán ao abeiro dos convenios de colaboración asinados cos axentes do ecosistema de software libre de Galicia.
Xunto co plan 2021 publícase tamén o balance das actuacións de fomento do software libre desenvolvidas pola Amtega e en colaboración cos distintos axentes durante o ano 2020.
A pesar de ser un ano complicado pola situación sanitaria derivada da pandemia provocada pola COVID19 e as restricións motivadas polo ben da saúde pública, acadouse un nivel de cumprimento do plan establecido moi alto. Grazas á rápida resposta de todos os axentes implicados puidéronse adaptar moitas das actividades para seren levadas a cabo.
Así pois, a pesar da situación, leváronse a cabo ata un total de 41 actividades que supuxeron máis de 25.000 horas de formación en software libre alcanzando ata un total de 19.500 persoas. A través do Centro Demostrador TIC, algo máis de 400 empresas participaron nas diferentes actividades desenvolvidas sobre solucións de software libre. O portal Mancomún seguiu a ser o punto de referencia sobre o software libre en Galicia, publicando máis de 500 novas ao longo do ano, artigos técnicos especializados, pílulas en formato vídeo, como a serie especial de ferramentas de software libre para o teletraballo, ou os diferentes programas do podcast de Mancomún, entre os que compre destacar unha serie especial de entrevistas a mulleres que destacan no ámbito das TIC.
Do 28 ao 30 de xuño a Escola Superior de Enxeñaría Informática do campus de Ourense celebrará un campamento tecnolóxico destinado a promover a vocación tecnolóxica entre as rapazas e contribuír así a rachar a fenda de xénero que existe á hora de elixir carreiras TIC. A iniciativa terá lugar nas tres universidades galegas no marco do proxecto Mática, do Colexio Profesional de Enxeñaría en Informática de Galicia e Amtega.
No caso da UVigo, o campamento, gratuíto, desenvolverase os días 28, 29 e 30 de xuño en horario de 9.30 a 14.30 horas nas instalacións da Escola Superior de Enxeñaría Informática, que organiza a actividade xunto ao órgano colexial. Haberá un grupo formado por alumnas de primeiro, segundo e terceiro curso de Educación Secundaria Obrigatoria e outro de cuarto de Educación Secundaria Obrigatoria; primeiro e segundo de Bacharelato e Formación Profesional. O prazo de inscrición xa está aberto, habendo dispoñibles 30 prazas presenciais. Debido á limitación de prazas, o campamento tamén dá a opción ás rapazas a inscribirse nun grupo virtual, no que se desenvolverán actividades de conexión remota.
Segundo explica Francisco Javier Rodríguez, director da Escola Superior de Enxeñaría Informática, o campamento incluirá talleres de carácter divulgativo e de iniciación á intelixencia artificial, programación móbil, robótica e pensamento computacional. Ademais terán lugar charlas sobre a profesión de enxeñería informática e algunha visita relacionada, como a centros tecnolóxicos. As actividades estarán adaptadas á idade das participantes e impartidas por profesoras do centro, por mulleres profesionais do sector e tamén por alumnas dos últimos cursos do Grao de Enxeñaría Informática.
A iniciativa forma parte do proxecto Mática. “Trátase dun proxecto destinado a fomentar as vocacións femininas en carreiras TIC. Este campamento tecnolóxico, que se celebrará nos tres campus galegos onde se imparte a titulación de Enxeñaría Informática, é a súa primeira actividade”, comenta Francisco Javier Rodríguez. Así, ademais de na Escola Superior de Enxeñaría Informática da UVigo, a iniciativa terá lugar coas mesmas características na Facultade de Informática do campus da Coruña e na Escola Técnica Superior de Enxeñaría do campus de Santiago de Compostela.
A idea dos campamentos, comenta o director da Escola Superior de Enxeñaría Informática, é que as rapazas coñezan cousas que se están facendo en diferentes eidos tecnolóxicos pero sobre todo que “coñezan referentes femininos” e “fagan comunidade”. Así, detalla, os talleres e charlas serán impartidas por enxeñeiras informáticas do eido académico ou profesional para que as rapazas vexan como si hai mulleres estudando ou traballando neste sector e poidan ter referentes concretos e reais que lle inspiren. Neste senso, o responsable académico destaca a importancia da participación nos talleres tamén de alumnas dos últimos cursos do Grao de Enxeñaría Informática, “que son estudantes moi vocacionais, moi implicadas, que tiveron que loitar xa con estereotipos de xénero ata chegar aquí e que poden ser un bo exemplo para as rapazas, que escoiten a súa experiencia en primeira persoa”. Igualmente, a actividade está destinada a “crear comunidade”, que as asistentes vexan que “hai outras rapazas coas que comparten o seu interese polas tecnoloxías”. Neste senso, o programa Mática ten o obxectivo de “crear unha rede entre todas as rapazas con intereses nas TIC, creando lazos de amizade e colaboración” entre elas con accións coma estes campamentos.
A participación nesta acción, e noutras similares que se levan a cabo no centro ourensán, explica o seu responsable, xorde ante “a problemática da falta de alumnas nas carreiras TIC”. Esta fenda, indica Francisco Javier Rodríguez, “non é algo estrutural, de sempre, senón que o decrecemento estase producindo nos últimos anos”. Así, explica, “Enxeñaría Informática non é como outras carreiras na que a fenda de xénero vén de sempre, como podería ser Enfermaría, que foi tradicionalmente cursada maioritariamente por mulleres. Nós o ano pasado tivemos un 13% de rapazas e antes a porcentaxe de inscrición era moito maior”. Enxeñaría Informática, afirma o responsable académico, “é unha carreira que pode ser moi atractiva, que ten moitas saídas laborais, na que hai moitas mulleres traballando e temos que reverter esa baixada na matrícula, que as rapazas vexan que o interese nas carreiras tecnolóxicas non é unha cuestión do xénero, é universal. Non hai carreiras dun xénero ou doutro”.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...