A cidade de Vigo volverá acoller, como na súa primeira edición, o Congreso Nacional de Conjupes, un encontro que este ano se celebrará os días 20 e 21 de abril baixo o lema “Asegurar o presente e progresar no futuro”.
Como sinala Vicente Sanz, “para nós Vigo e as persoas maiores de Galicia son un referente. Ademais, a organización con Asogapem e Cogama garántenos o éxito dos eventos que celebramos aquí. Temos unha previsión de asistencia de 200 persoas, na súa maioría de Galicia, pero tamén haberá representación de Asturias, Cantabria, Madrid, Castela e León, e Andalucía”.
O programa previsto para estas dúas xornadas, que terán lugar no Hotel Coia –rúa Sanxenxo, 1–, arrincará cun repaso das actividades anuais das entidades integradas na confederación, de propostas en materia de pensións e debate sobre o imposto de sucesións, así como a celebración da Asemblea Xeral de Conjupes.
O encontro contará coa presenza da directora xeral de Maiores e Persoas con Discapacidade da Consellería de Política Social da Xunta, Fabiola García, e o presidente da Sociedade Galega de Xerontoloxía e Xeriatría, Miguel Ángel Vázquez, que ofrecerá unha conferencia sobre o envellecemento activo e saudable.
Como novidade, tal e como avanza o presidente de Conjupes, “facéndonos eco dunha das grandes preocupacións da sociedade española, e especialmente das persoas maiores, incorporamos unha mesa sobre o Imposto de sucesións e a fiscalidade das herdanzas, que correrá a cargo do avogado Jesús Ramón Alonso Fernández, especialista na materia, que está a expoñer o tema en varias asociacións da nosa confederación”.
Doutra banda, e co fin de promover e fortalecer os coñecementos das novas tecnoloxías da información, tamén se celebrará unha mesa na que se abordará este tema.
Entrevista con Vicente Sanz, presidente de Conjupes.
O Concello de Pontevedra presentou os días pasados os resultados dun estudo sobre os hábitos tecnolóxicos dos menores de idade: cousas como que redes sociais empregan, canto tempo están en liña, até que punto cren que marca os seus rumbos de vida o feito de estaren conectadas/os, etc. A enquisa foi elaborada ao abeiro do Plan municipal de prevención de condutas aditivas (PMPCA) da Concellería de Benestar Social, aproveitando o traballo que desempeña este departamento cos centros educativos locais. A base da pescuda foi un nutrido grupo de preto de tres milleiros de estudantes (alumando de 1º a 4º da ESO, de entre 12 e 17 anos). Entre as principais conclusións que se fornecen figura a seguinte: o 75,7% dos rapaces tiveron o seu primeiro móbil entre os 10 e os 13 anos, e o 85% conta con conexión a Internet. Ademais, a gran maioría deles empregan servizos como Whatsapp ou Instagram, malia que o uso das redes sociais polos menores de 14 anos non estea permitido en España. O estudo terá continuidade en setembro con novos datos sobre hábitos por sexo, idade e nivel de formación.
Segundo lembrou a concelleira de Benestar Social, Carme Fouces, o desenvolvemento das novas tecnoloxías e o seu espallamento provocou “un cambio nos costumes, hábitos e actitudes, sobre todo na poboación máis moza xa que naceu practicamente con estes avances”. Neste treito de idade, engadiu, xerouse unha pegada “espectacular”, xa que se modificaron as formas de vivir a nenez e a adolescencia e se abriu marxe para “dedicacións de tempo e con comportamentos moi diferentes aos dos adultos”. Esta situación, sinalou, ten claras potencialidades (desenvolvemento persoal, capacitación, acceso doado ao coñecemento e á comunicación) pero tamén pode achegar unha serie de riscos derivados dun mal uso das tecnoloxías e da falta de supervisión axeitada. Na súa opinión, “o problema xorde cando a tecnoloxía se converte nun fin e non nun medio, e aquí temos o agravante de que a adolescencia constitúe un grupo de risco xa que tende a buscar sensacións novas”. De aí abrolla o problema da adición ás novas tecnoloxías. Segundo indicou Carme Fouces existen unha serie de sinais de alarma para nos axudan a achar un posible caso de conduta aditiva en relación coas TIC. Cousas como privación do sono (co fin de estarmos conectados á Rede durante máis tempo), desleixo con respecto a outras actividades importantes (como a familia, as relacións sociais, o estudo, a saúde, etc), imposibilidade de “desconectar” mentalmente das novas tecnoloxías mesmo cando non se está conectado ou introducir hábitos de illamento con respecto á contorna social máis inmediata.
Resultados da enquisa
75,7% tiveron o seu primeiro móbil entre os 10 e os 13 anos 30,4% tiveron o seu primeiro móbil con 12 anos 85% teñen conexión a internet 25,4% conéctanse a internet entre 1 e 2 horas diarias 14,2% están conectados a internet todo o día 67,5% navegan por internet sen que os seus proxenitores lles poñan limitacións 24,9% entraron en páxinas con contidos eróticos nos últimos 12 meses 7,3% apostaron en xogos on line nos últimos 12 meses 35,6% contactaron con descoñecidos por internet nos últimos 12 meses (o 22,7% menores de 14 anos) 16,7% quedaron con persoas que coñeceran exclusivamente a través de internet nos últimos 12 meses 23,2% bastantes/moitas veces descoidan tarefas escolares ou renden menos en exames por contectarse a internet 26,1% bastantes/moitas veces tiveron a sensación de que si no se conectaban a internet estaban perdendo algo realmente interesante 14,8% bastantes/moitas veces conectáronse a internet aínda que sabían que lles ías a causar problemas. 17,1% bastantes/moitas veces dixeron ou fixeron cousas en internet que non farían ou dirían en persoaComo diciamos ao comezo, o estudo tamén lembra que en España a Lei de Protección de datos non permite aos menores de 14 anos acceder ás redes sociais, e aínda así: 93,3% usan Whatsapp (o 89,2% menores de 14 anos) 77,2% usan Instagram (o 68,4% menores de 14 anos) 54,7% usan Snapchat (o 42,7% menores de 14 anos) 51,2% usan Messenger (o 44,4% menores d e14 anos) 49,2% usan Facebook ( o 34,9% menores de 14 anos) 45,1% usan Twitter (o 27% menores de 14 anos) 31,8% usan Tuenti (o 14,6% menores de 14 anos).
O vindeiro 26 de abril a partires das 19:30 horas o salón de actos da Fundación Barrié acollerá a novena edición do encontro Coruña Bloggers, evento solidario que pretende contribuír á dinamización do mundo dos blogs mediante relatorios enriquecedores para os asistentes e co networking propio dos eventos presencias, o que axuda a dar visibilidade das iniciativas locais, facilitar a divulgación do coñecemento, tecer relacións entre entusiastas da comunicación en liña e, en definitiva, favorecer un ecosistema no que os interesados na publicación de contidos en liña poidan emprender arroupados por outras persoas con inquedanzas semellantes.
Os interesados en acudir xa poden rexistrarse para participar nesta actividade de balde, aínda que cómpre lembrar que prégase aos asistentes que acudan cun mínimo de 1 quilogramo de alimentos non perecedoiros para achegar á Cociña Económica, confiando con que nesta ocasión supérese a barreiro dos 1.000 quilos aportados dende o comezo desta iniciativa.
A primeira charla do Coruña Bloggers de abril recae no profesor universitario Eduardo Mosqueira, quen tamén ten un blog persoal de temas variados (fotografía, astronomía, informática, historia...) e falará de usabilidade a través dun método para probar e atopar erros de usuario que leven a mellorar o software para evitalos.
O segundo relatorio será cousa do xornalista Antonio Sangiao, un dos principais promotores de Coruña Bloggers, quen instruirá sobre Os 10 plugins de WordPress que debes ter instalados no teu blog, ou sexa, unha clase mestra sobre WordPress e os seus complementos.
Completarán a xornada o sorteo dun altofalante Bluetooth por cortesía de Opirata.com e unha sesión de networking nun local de hostalaría próximo.
Ao abeiro do programa DepoEmprega 2016, organizado pola Deputación de Pontevedra para favorecer a inserción laboral de colectivos en risco de exclusión (persoas con diversidades funcionais, mulleres vítimas da violencia machista, mozas e mozos de menos de 30 anos á procura de formación e un posto de traballo), vaise desenvolver na cidade do Lérez un curso sobre informática básica encamiñado a achandar camiños cara ao mercado laboral. Nel participarán 27 persoas, segundo informou a entidade que preside Carmela Silva. Os contidos xirarán arredor do amplo abano de posibilidades e potencialidades que abre laboral e empresarialmente a informática, e todo de un punto de vista de iniciación. De feito, o obradoiro está dirixido a persoas con pouco ou ningún coñecemento dixital. Terá unha duración de 40 horas e desenvolverase entre o 3 e o 12 de maio.
A iniciativa, engade a Deputación, procura acadar que persoas sen coñecementos previos de informática “sexan capaces de manexar correctamente as funcións básicas dun computador persoal”. Así, as clases estarán orientadas a aprender a crear documentos de texto, modificalos e darlle formato, o uso de Excel e funcións básicas, e tamén conectarse e comunicarse a través de internet. O curso impartirase na Aula CeMIT da Deputación de Pontevedra. Polo que se refire a DepoEmprega 2016, ten o obxectivo de mellorar a inserción laboral de colectivos en situación de risco e de desemprego, fornecéndoos de formación para acadar certificados de profesionalidade, de prácticas en empresas e de busca de postos de traballo. Asemade, o programa tamén acolle accións individuais coas que se ofrece orientación en elaboración de currículos, entrevistas de traballo, obradoiros de habilidades sociais, adestramento ou novas tecnoloxías.
A iniciativa "Aporta" creada para divulgar e promocionar a cultura da apertura de información en España, ofrece formación sobre o mundo dos datos abertos e a súa reutilización, dirixida tanto a administracións públicas como á cidadanía interesada. Trátase de formación online cuxos materiais están dispoñibles a través do portal Datos.gob.
Pódese acceder a oito unidades didácticas deseñadas para todos os interesados na formación sobre datos abertos e a súa reutilización.
Consta de oito unidades didácticas que abordan os conceptos básicos do movemento de apertura de datos, as boas prácticas na implementación de políticas Open Data e a súa reutilización, así como as pautas metodolóxicas para a apertura, as normativas técnicas ou as ferramentas máis destacadas para o tratamento de datos.
A iniciativa "Aporta" está promovida polos Ministerios de Enerxía, Turismo e Axenda Dixital e Facenda e Función Pública, así como pola entidade Red.es. Desde 2009 ofrece apoio ás unidades administrativas nas actividades técnicas e organizativas necesarias para que publiquen os seus datos da forma máis amigable para a súa reutilización.
Organizado polo Colexio Profesional de Enxeñaría Técnica en Informática e a Axencia de Modernización Tecnolóxica de Galicia co propósito de converterse nunha xornada de referencia en torno á xestión de proxectos.
O vindeiro 11 de maio vai ter lugar na Cidade da Cultura #SilverBullet17, un Congreso de Xestión de Proxectos Software organizado polo CPETIG e a Amtega, co propósito de converterse nunha xornada de referencia no eido da xestión de proxectos.
Está concibido como un foro de discusión e debate dirixido a empresas e profesionais vinculados á xestión de proxectos de software, expertos, investigadores e docentes implicados na formación de futuros profesionais na área. #SilverBullet17 vai reunir a oferta e a demanda do sector nun espazo de encontro para propiciar un intercambio de información, favorecendo a adquisición de habilidades de comunicación, xestión de recursos humanos e liderado, amais de contribuír a amosar as tendencias metodolóxicas no eido da xestión de proxectos software.
Intervirán como relatores algúns dos máis relevantes profesionais do panorama actual. Na sesión de mañá tomarán a palabra José Luis Iparraguirre, director de IAL Software Engineering; Carlos González Jardón, consultor de Xestión de Proxectos en Tecnocom; e Javier Garzás, mentor áxil e experto en xestión de proxectos e equipos; para rematar cunha mesa de debate moderada por Susana Gómez Carnero, CEO en Origami Soluciones e directora executiva de BNI Galicia. Os relatores previstos para a sesión de tarde son Javier Cebreiros, socio do espazo de innovación social Impact Hub Vigo e da empresa InfoJC; e Jaume Gurt, director de Organización e Desenvolvemento de Persoas en Schibsted Spain, que xestiona os portais Infojobs, Fotocasa, Vibbo, Coches.net e MilAnuncios.
O nome do congreso #SilverBullet17 fai referencia a un coñecido antipatrón da área de xestión de proxectos, “a bala de prata”, mencionada inicialmente polo enxeñeiro de software Frederick P. Brooks en 1987 e que alude á inexistencia de metodoloxías, ferramentas ou solucións milagreiras que permitan que un proxecto que xa se converteu nun monstruo polos retrasos, os custos, a calidade, etc. volva ser un proxecto ben xestionado, algo que unicamente se podería facer cunha bala de prata. Durante a sesión porase o foco nos tres factores que representan esa bala de prata: o traballo continuo desde o inicio do proxecto, a aplicación de metodoloxías adecuadas e o coñecemento sobre a xestión de proxectos.
Asistencia gratuita para colexiados/as e precolexiados/as
No marco da conmemoración do X aniversario do CPETIG, a asistencia aos relatorios e ao xantar de #SilverBullet17 será gratuita para colexiados/as e precolexiados/as. Para formalizar a súa participación, deberán realizar a súa inscrición na web e posteriormente a cota de asistencia seralles reembolsada polo colexio, ben aplicando un desconto sobre as próximas cotas de colexiación ou por transferencia nos casos de precolexiados ou colexiados con exención de cota por desemprego.
Empresas patrocinadoras
No desenvolvemento de #SilverBullet están implicadas como patrocinadoras e colaboradoras unha selección de empresas galegas que van facer posible esta primera edición do congreso. CPETIG agracede a Bahía Software, Balidea, Ednon, Hacce e Plexus a súa colaboración en #SilverBullet17.
Máis información e formalización de inscricións en http://silverbullet.cpetig.org/gl/inicio/.
ILUNION, o grupo de empresas sociais da ONCE e a súa Fundación, levou a cabo a audiodescrición e a subtitulación de 378 películas e 727 capítulos de 44 series para que sexan accesibles aos clientes con discapacidade visual ou auditiva, cegueira ou xordeira da plataforma de televisión Movistar+.
Entre as películas audiodescritas e subtituladas atópanse ‘Un monstro vén a verme', ‘Elle', ‘A moza do tren', ‘Florence Foster Jenkins', ‘O meu amigo o xigante' e ‘Buried (enterrado)'.
Entre as series, que a partir de agora serán accesibles tanto para persoas cegas como xordas, destacan a británica ‘Downton Abbey', a mítica ‘Twin Peaks', ‘Mr Robot', ‘Fargo', baseada na película do mesmo título dos irmáns Cohen; ‘Breaking bad', ‘Better call Saul' e ‘Ray Donovan'.
Aqueles clientes con discapacidade visual ou auditiva que queiran gozar dos títulos accesibles desta plataforma televisiva poden facelo desde a aplicación Movistar+ 5S, dispoñible para os sistemas operativos IOS e Android e que ofrece 3 modalidades de accesibilidade: audiodescrición, subtitulado e lingua de signos.
Pasos
Unha vez elixida a película ou serie, o telespectador deberá seleccionar a accesibilidade que desexa e esta comezará a descargarse no ‘seu smartphone' ou tableta.
Acto seguido, deberá iniciar a reprodución da película ou serie, seleccionar a opción ‘accesible' no apartado ‘descargas' da aplicación Movistar+ 5S e pulsar o botón ‘sincronizar' cando comece a cinta televisiva.
Nuns segundos, os necesarios para que a aplicación capte o son da película ou serie seleccionada, o telespectador poderá escoitar ou ler, de forma sincronizada e simultánea ao audio do seu televisor, a audiodescrición ou subtítulos que o levarán a gozar dun intre de lecer.
A audiodescrición e subtitulación de 378 películas e 727 capítulos de 44 series por parte de ILUNION é froito do contrato que o grupo de empresas sociais da ONCE e a súa Fundación subscribiu con Movistar+ en maio de 2016.
Audiodescribir sen desvelar
Segundo Juan Manuel Molina, responsable da área de Accesibilidade á Información e á Comunicación de ILUNION, a clave da audiodescrición radica en describir, nos ocos que deixa libre o diálogo dos personaxes, o que está a ocorrer, de forma que permita o seguimento da trama pero sen desvelar nada do que vai suceder, e respectando o momento no que o director da película decide presentar aos protagonistas.
“Unha cousa é describir o que está a pasar e outra contar a película”, apuntou Molina, quen engadiu que a audiodescrición debe seguir, na medida do posible, o ritmo cinematográfico do contido audiovisual.
En canto aos subtítulos, estes deben compatibilizar a literalidade co tempo mínimo de exposición en pantalla do subtítulo e, á vez, conseguir a súa fácil lectura, segundo este experto de ILUNION.
Así mesmo, para facilitar o seguimento da trama da película, os subtítulos han de indicar só os efectos sonoros verdadeiramente necesarios e facelo na súa localización correspondente, é dicir, entre paréntese e na parte superior dereita, segundo establece a norma UNE 153010.
O Concello de Salvaterra do Miño vén de informar do remate do seu segundo curso Coñece o teu móbil, como o seu nome indica orientado a tirar abaixo as barreiras que puideran afastar á veciñanza destes dispositivos e das moitas vantaxes que nos ofrecen (comunicarnos de maneira instantánea, facer e enviar fotos e vídeos, establecer a nosa localización exacta e o dos sitios a onde queremos ir, compartir historias, xestionar as nosas contas bancarias e as nosas compras, levar a cabo procedementos administrativos, etc). Segundo informou o Concello, o obradoiro foi un gran éxito entre o alumnado participante. Estendeuse no tempo durante 20 días, en clases de hora e media, e contou coa participación de dúas profesoras. Nel concorreron persoas maiores de Salvaterra coa finalidade de achegárense ao uso e potencialidades dos smartphones e das tabletas.
Nun plano máis concreto, introducíronse no manexo de programas básicos do móbil, en como xestionar contactos (gardalos, eliminalos, acceder a eles), en poñer unha ou varias alarmas, en empregar a calculadora, en personalizar as pantallas de inicio e bloqueo, en facer cambios de escritorio, ou en enviar, ler e suprimir mensaxes de texto. Tamén se lles ensinou a empregar a cámara de fotos e o calendario. Ademais, os alumnos e alumnas aprenderon a manexar o WhatsApp: a crear grupos, a enviar contidos ou a bloquear contactos, entre outras funcionalidades do popular servizo de mensaxeiría instantánea. Asemade, aprendéuselles a acceder a webs públicas de uso común (como a do SERGAS), a conectárense a accesos sen fíos Wi-Fi e a familiarizárense con redes sociais como Facebook ou con ferramentas como o GPS ou o Google Maps (moi útil para ampliar os coñecementos que teñen os nosos maiores da súa contorna xeográfica).
Para quen quedase con fame de robótica e tecnoloxía libre e creativa logo do Arduino Day 2017 celebrado en Lugo, da man de MakersLugo, esta asociación vén de anunciarlles que xa ten entre mans unha nova actividadeargalleira e colaborativa. Trátase dun obradoiro de iniciación de Arduino, unha actividade especialmente deseñada para as persoas que acudiron á cita do 1 de abril que se “interesaron polo mundo Maker” e fixeron pescudas sobre onde introducírense neste eido e sobre a liña de actividade de MakersLugo alén do Arduino Day. Co obxectivo de axudar a estes vindeiros makers a convertérense en tales celébrase precisamente este obradoiro de iniciación. A cita será o sábado 6 de maio pola mañá (de 10.30 a 13.30).
“A nosa idea”, sinala a asociación, “é que se trate dunha primeira toma de contacto ou bautismo, para quen non se atreve a empezar, e lanzalo a imaxinar os seus propios primeiros proxectos”. E engaden: “Será unha sesión sobre todo práctica, para aprender a posta a punto do entorno de desenvolvemento de Arduino, o asunto das entradas e saídas, con premedores e LEDs”. Ou sexa, conceptos e compoñentes básicos de electrónica mínima. Ademais, os organizadores do evento engaden que se a marxe de tempo resulta ampla de abondo, tamén se introducirá aos participantes na cuestión do audio.
O taller será no local D10 do CEI-Nodus. Respecto das idades, consideráronse os 12 anos como “unha idade mínima orientativa”. A actividade é de balde, previa inscrición no formulario que habilita MakersLugo.
Sobre Arduino
A tecnoloxía Arduino, segundo lembran os responsables de Makers Lugo, é unha plataforma de hardware libre deseñada para facilitar a creación de proxectos interactivos que integren elementos electrónicos. A tecnoloxía foi creada hai máis dunha década no Instituto de Deseño Interactivo da cidade italiana de Ivrea. Buscábase unha ferramenta para que os estudantes puidesen ter acceso a plataformas de creación interactivas de baixo custo. Nos últimos anos, Arduino estendeu o seu obxectivo orixinal converténdose nun dinamizador da industria global de electrónica e do movemento Maker.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...