Este xoves presentouse en Lugo, no Campus Terra da Universidade de Santiago, a quinta edición de XuvenCiencia, un programa estival organizado polo profesorado do Campus lucense en colaboración coa Vicerreitoría de Coordinación, sendo o seu obxectivo “espertar a vocación científica do alumnado preuniversitario de toda Galicia”. Na presentación da iniciativa, que se celebrará do 2 ao 8 de xullo, fíxose saber que se fornecen 135 prazas e que as inscricións pódese facer a partir das 16.00 horas deste venres 28 abril, a través da páxina web de Xuvenciencia. Na cita de hoxe participaron o vicerreitor de Desenvolvemento Científico e Tecnolóxico do Campus de Lugo, Andrés Barreiro Lois, e máis o responsábel de Turismo da Deputación, Eduardo Vidal Baamonde.
Entre outras cousas fixeron saber que o proxecto abrangue máis de 100 eventos e está avalado pola participación duns 146 docentes da USC e outro persoal de apoio. Entre os espazos que se converterán en obradoiros para os participantes atópase a Fundación TIC da Deputación, que amosará aos estudantes como facer vídeos para YouTube, entre outras cousas. Tamén haberá un achegamento directos á robótica, entre outros moitos contidos
No acto tamén participou a profesora da USC e coordinadora do campus de verán XuvenCiencia Lugo, Mercedes Novo Rodríguez; o secretario xeral de Universidades, José Alberto Díez de Castro; e Carlota López Pardo, en representación da empresa patrocinadora Aresa. Segundo engadiron, as actividades acubilladas no programa van dirixidas a alumnado preuniversitario de cuarto de ESO e Bacharelato e desenvólvese baixo o lema Aprendendo desde a experiencia. Un dos seus obxectivos básicos, amais de fomentar as vocacións científicas, investigadoras e tecnolóxicas, é dar a coñecer á mocidade preuniversitaria os distintos itinerarios formativos que poden cursan nas seis facultades e escolas do Campus de Lugo, así como nos dous centros adscritos (Escola Universitaria de Relacións Laborais e Escola Universitaria de Enfermaría).
O V Campus de Verán XuvenCiencia iniciarase coa celebración dunha charla divulgativa a cargo do físico Cibrán Santamarina, quen fixo o seu doutoramento no CERN, onde sigue a colaborar na actualidade, co título Elemental, querido Schrödinger. Santamarina traballa no departamento de Física de Partículas da USC.
As actividades desenvolveranse en quenda de mañá e tarde, en horario de 9.30 a 20.30 horas, nas devanditas facultades e escolas do Campus. As visitas aos distintos laboratorios de investigación e servizos do Campus Terra e a centros e empresas colaboradoras (Fundación TIC, Aula de Produtos Lácteos, Laboratorio de Sanidade e Produción Animal de Galicia, Museo Provincial, Domus do Mitreo, AMSlab, Xenética Fontao, Hospital Universitario Lucus Augusti, Castro de Viladonga, Parque Eólico Experimental Sotavento), e a realización de actividades prácticas e de obradoiros relacionados coas titulacións científicas, técnicas e sociais do Campus Terra centran as accións previstas en quenda de mañá. Polas tardes, o alumnado desenvolverá, baixo a tutela do profesorado universitario, distintos proxectos científicos ou técnicos a elixir entre 26 propostas.
Durante o pasado 27 e 28 de marzo, celebrouse a primeira reunión do consorcio de ACTIVAGE, proxecto europeo que ten como obxectivo mellorar o empoderamento dos maiores e aumentar a súa autonomía mediante a prolongación e soporte á vida independente nas súas contornas, ao mesmo tempo que responder as necesidades de coidadores, provedores de servizos e institucións a través do desenvolvemento de 9 pilotos innovadores en 7 países europeos baseadas en tecnoloxías Internet of Things. Neste encontro que tivo lugar na Escola Politécnica de Telecomunicacións, púxose en común o estado actual dos traballos realizados, e organizáronse sesións de traballo divididos en tres grupos distintos: negocios e ecosistemas, Internet of Things (IoT) e envellecemento activo e saudable. Ademais tamén se realizaron sesións de coordinación entre os membros que forman parte dos pilotos cos distintos paquetes de traballo activos.
A Fundación Vodafone España participa no piloto que levará a cabo en Galicia, xunto con TELEVES, Cruz Vermella Española e SERGAS (Servizo Galego de Saúde), cuxo obxectivo é validar os servizos universais de atención sociosanitaria para persoas maiores, reducindo a exclusión social e o cambio de estruturas e actitudes sociais.
Este proxecto europeo está financiado no marco do programa Horizonte 2020 e coordinado pola empresa Medtronic. Esta iniciativa que durará catro anos, conta con 50 socios, implicando a uns 7.200 usuarios e máis de 43.000 dispositivos da internet of Things (IoT).
Amais da Universidade da Coruña, a xornada sobre emprego e TIC contou coa presenza activa do Concello, máis polo miúdo do alcalde Xulio Ferreiro, quen fixo un repaso pormenorizado polas principais conclusións de dous informes encargados pola Concellería de Emprego e Economía Social á UDC e á Fundación Mulleres sobre a situación de empregabilidade nos sectores das TIC e da loxística, así como sobre a igualdade entre homes e mulleres no sector. Este dous informes son Prospección de sectores xeradores de emprego na área metropolitana da Coruña: TIC e Loxística, realizado polo Observatorio Ocupacional da UDC, e Estudo sobre a situación da igualdade entre mulleres e homes no hipersector TIC, realizado pola Fundación Mulleres. Segundo o rexedor, estas investigacións axudarán ao Goberno local que preside a artellar medidas eficaces de creación de emprego. Ao mesmo tempo, achegarán recursos para combater a exclusión social e laboral.
No transcurso da súa intervención, lembrou que no estudo da UDC analizáronse 600 empresas da contorna e que entre as súas principais conclusións atópase o de ter constatado que case un terzo das empresas TIC están a demandar novas e novos traballadoras/es, mentres que no sector da Loxística fano un 23%. Outra das conclusións ten que ver coa previsión futura: a medio prazo o 57% das empresas TIC e o 48% das loxísticas precisarán nova man de obra. Polo que respecta ao informe da Fundación Mulleres, sinálase nel que a día de hoxe apenas existe presenza feminina traballando no sector das TIC, “feito ademais vencellado á escasa presenza das mozas nas titulacións relacionadas con estas materias”, lembrou Ferreiro, facendo referencia a estudos recentes como por exemplo o presentado polo Colexio Profesional de Enxeñaría Técnica en Informática acerca da cuestión da fenda de xénero dixital nos ámbitos académicos e da necesidade de invertermos entre todos esta situación.
O rexedor tamén recordou que dende Coruña Emprega estase a traballar xa contra estas situacións locais de desigualdade, e froito deste labor foi o achado (constatado definitivamente polos devanditos informes) de importantes oportunidades a prol da paridade, da non exclusión e do fomento do emprego nos requirimentos presentes e vindeiros dos tecidos TIC e loxístico. “Queremos sacar beneficio das necesidades de man de obra de moitas firmas tecnolóxicas", salientou o primeiro edil, que tamén puxo de manifesto as políticas transversais aplicadas polo Goberno local: “Dende que chegamos ao Pazo de María Pita levamos a cabo diversas accións, especialmente coa mocidade, nos que intentamos deixar claro que a masculinización ou a feminización dos sectores profesionais só provoca desigualdades”.
O vindeiro 11 de maio terá lugar na Cidade da Cultura #SilverBullet17, o I Congreso de Xestión de Proxectos organizado polo Colexio Profesional de Enxeñaría Técnica en Informática (CPETIG) e a Axencia para a Modernización Tecnolóxica de Galicia (Amtega), concibido como un foro de debate dirixido a empresas e profesionais vinculados á xestión de proxectos TI, expertos, investigadores e docentes implicados na formación de futuros profesionais na área.
Intervirán como relatores algúns dos máis relevantes profesionais do panorama actual. José Luis Iparraguirre, director de IAL Software Engineering; Carlos González Jardón, consultor de Xestión de Proxectos en Tecnocom; Javier Garzás, mentor áxil e experto en xestión de proxectos e equipos; Susana Gómez Carnero, CEO en Origami Soluciones e directora executiva de BNI Galicia; Javier Cebreiros, socio do espazo de innovación social Impact Hub Vigo e da empresa InfoJC; e Jaume Gurt, director de Organización e Desenvolvemento de Persoas en Schibsted Spain, compañía que xestiona os portais Infojobs, Fotocasa, Vibbo, Coches.net e MilAnuncios.
O nome do congreso #SilverBullet17 está inspirado nun coñecido antipatrón da área de xestión de proxectos, “a bala de prata”, mencionada inicialmente polo enxeñeiro de software Frederick P. Brooks en 1987 en alusión á inexistencia de metodoloxías, ferramentas ou solucións milagreiras que permitan que un proxecto que xa se converteu nun monstruo polos retrasos, os custos, a calidade, etc. volva ser un proxecto ben xestionado, algo que unicamente se podería facer cunha bala de prata.
Durante a sesión porase o foco nos tres factores que representan precisamente esa bala de prata: o traballo sistematizado desde o inicio do proxecto, a aplicación de metodoloxías adecuadas e o coñecemento sobre a xestión de proxectos. Ademais de amosar as últimas tendencias metodolóxicas no eido da xestión de proxectos, SilverBullet17 favorecerá a adquisición de habilidades de comunicación, xestión de recursos humanos e liderado.
Máis información e formalización de inscricións en http://silverbullet.cpetig.org/gl/inicio/
Favorecer a innovación empresarial e social. E se, aínda así, esta non abrolla, redobrar esforzos. Esta é a base do proxecto Wonderful, unha iniciativa impulsada polo Centro Comercial As Termas en colaboración co Concello de Lugo, ao abeiro das accións de responsabilidade social corporativa de LAR España, propietaria da área comercial. Segundo fixeron saber onte en rolda de prensa a concelleira de Economía Ana Prieto e máis o xerente de AS Termas, Esteban Patiño, Wonderful lánzase a “fomentar proxectos innovadores que melloren a relación do cliente co seu centro comercial e a relación dos cidadáns coa cidade”. A marxe para a creación de novas tecnoloxías de comunicación entre tecido comercial e cidadanía é ampla de abondo.
Na cita, na que tamén participou un representante do Grupo PGS, organizador do certame, Federico García Liñares, lembrouse que as candidaturas poden presentarse até o 4 de xuño e que os gañadores recibirán acceso a financiamento, investimento privado, ferramentas tecnolóxicas e difusión.
Ana Prieto salientou que este proxecto agroma da responsabilidade social empresarial, “unha estratexia que xera un importante retorno económico, porque é unha vantaxe competitiva e un factor que marca diferenzas, pero tamén un importante retorno social”. Wonderful, sinalou, participa deste marcado perfil social e dinamizador, non só na forma senón tamén no contido: a través do proxecto recoñeceranse e visualizaranse propostas para centros comerciais e tendas que sexan, tamén, solucións innovadoras dirixidas a mellorar a calidade de vida do cidadán con respecto á súa cidade.
A concelleira agradeceu a LAR España que elixise Lugo para desenvolver Wonderful, que acollerá só outra provincia galega e 8 en todo o ámbito estatal, e animou aos emprendedores e empresarios do municipio “a participar cos seus proxectos”.
Pola súa banda, o xerente do Centro Comercial As Termas, agradeceu ao Concello que acollese “con moitas ganas” este proxecto, que busca “axudar a que saian adiante proxectos de innovación, fundamentais para o desenvolvemento social e económico, na fase de inicio, que é a máis comprometida”.
O representante de PGS explicou que poderán presentarse ao concurso emprendedores ou empresas que desenvolven a súa actividade na provincia. Tamén explicou que se ben serán ben acollidas propostas relacionadas coas novas Tecnoloxías da Información e a Comunicación (as TIC, un dos piares do concepto de “innovación”), tamén se valorarán moi positivamente outras achegas non necesariamente dixitais que contribúan a mellorar os procesos, os servizos e as comunicacións entre clientes e usuarios.
Wonderful inclúe dúas categorías:
Os gañadores conseguirán un conxunto de premios orientados a axudarlles a poñer en marcha o seu negocio grazas aos patrocinadores do proxecto (Correos Lab, BzSpark de Microsoft, BStartup de Banco Sabadell ou El Economista) e que consistirán, entre outros, en acceso a financiamento bancario, investimento privado, ferramentas tecnolóxicas e difusión. Os vencedores de cada Comunidade ao abeiro da categoría O Teu Centro Comercial participarán no Wonderful Summit presentando os seus proxectos de negocio no primeiro Encontro Nacional de Innovación en Centros Comerciais e Retail, que se celebrará en xullo.
O obxectivo do reto #TecnologíaConPropósito é buscar proxectos desenvolvidos por emprendedores ou empresas con residencia en España, que persigan transformar a sociedade e necesiten financiamento e promoción para facerse realidade. Samsung premiará os proxectos máis creativos e innovadores que utilicen a tecnoloxía para mellorar a vida das persoas.
Toda a comunidade local de desenvolvedores españois está chamada a participar no reto da convocatoria ‘The Challenge: #TecnologíaConPropósito' de Samsung, que premiará os proxectos máis creativos e innovadores que utilicen a tecnoloxía para mellorar a vida das persoas.
O reto busca proxectos desenvolvidos por emprendedores ou empresas con residencia en España, que persigan transformar a sociedade e necesiten financiamento e promoción para facerse realidade. A idea do proxecto ten que estar desenvolvida ou atoparse en fase de xestación avanzada, xa que o proxecto deberá completarse antes do 31 de decembro de 2017.
Entre outros temas, os desenvolvedores poden idear posibles solucións, a través da tecnoloxía, a problemas como o envellecemento da poboación, o control de enfermidades crónicas, a utilización da xeolocalización para axudar en situacións de risco na natureza, a mellora da seguridade no fogar, o coidado de mascotas, o fomento da reciclaxe ou a redución do consumo enerxético. Un xurado formado por Samsung valorará a orixinalidade, innovación, atractivo e viabilidade dos proxectos presentados.
A proposta presentada ao reto deberá poder utilizarse de forma universal e gratuíta; debe ser unha app ou desenvolvemento tecnolóxico que implique a Samsung dalgunha forma e debe utilizar, preferiblemente, o ecosistema Samsung e os seus dispositivos ou a converxencia entre todos eles. O proxecto ou proxectos gañadores recibirán un apoio económico de ata 100.000 € para o desenvolvemento da idea e un plan de comunicación nas plataformas de Samsung para a súa difusión mediática.
Os desenvolvedores interesados deberán darse de alta en Samsung Dev Spain e encher o formulario de inscrición, cunha memoria/dossier que explique detidamente en que consiste o proxecto e que necesita, o calendario de implementación e os dispositivos nos que funcionaría. O prazo de presentación de proxectos arrinca o 1 de maio e pecharase o 1 de xuño. O resultado da convocatoria publicarase antes do 30 de setembro.
A Axencia para a Modernización Tecnolóxica de Galicia (Amtega) vén de publicar a listaxe definitiva das 475 persoas matriculadas para a realización das probas de avaliación para a obtención da Certificación Galega en Competencias Dixitais en Ofimática (CODIX). Esta convocatoria, publicada no Diario Oficial de Galicia do pasado 15 de marzo, está orientada a aquelas persoas que xa posúen os coñecementos necesarios das aplicacións informáticas que compoñen o módulo formativo MF0233_2 «Ofimática» baixo o paquete de LibreOffice.
As persoas admitidas poden consultar na web do CeMIT (http://cemit.xunta.gal) a súa data de exame asignada, centro e hora, así como as instrucións para a realización das probas, que se celebrarán o mércores, xoves e venres desta semana -días 26, 27 e 28 de abril- nas aulas CeMIT dos seguintes 36 concellos:
Abegondo, Ames, Arzúa, Boiro, Brión, A Coruña, Fisterra, Oroso, Padrón, Pontedeume, As Pontes, Santa Comba, Santiago de Compostela e Vimianzo na provincia de A Coruña; Barreiros, Carballedo, A Fonsagrada, Sarria e O Vicedo na provincia de Lugo; Bande, O Barco, A Cañiza, Celanova, Leiro, Ourense e Xunqueira de Ambía na provincia de Ourense; e Campolameiro, Castro Caldelas, Cuntis, Lalín, Marín, Pontevedra, Tomiño, Valga e Vigo na provincia de Pontevedra.
Perfil das persoas a examinar
En canto ao perfil das persoas convocadas, a media de idade é de 37,5 anos; a maioría son mulleres, (328 mulleres e 147 homes); o 55% ten estudos superiores (151 licenciados e 110 diplomados) e un 32% Bacharelato ou FP-II; e o 94% dispón de ordenador e acceso a internet no seu fogar.
Por primeira vez nesta edición, as persoas demandantes de emprego ou cunha discapacidade igual ou superior ao 33% gozaban de exención no pagamento das taxas de exame. Das 475 persoas matriculadas, 105 son demandantes de emprego e 40 persoas con discapacidade.
Avaliación
Para obter o CODIX é preciso superar un exame de 50 preguntas tipo test referidas aos contidos do Plan Formativo Ofimático de Galicia, composto polas cinco unidades nas que se estrutura o módulo formativo MF0233_2 «Ofimática» do Repertorio Nacional de certificados de profesionalidade:
Os materiais formativos que compoñen estes cursos foron elaborados seguindo as boas prácticas recollidas na Guía de boas prácticas para a publicación de obras documentais da Xunta de Galicia e poden ser seguidos libremente na súa modalidade de autoformación dentro da plataforma de teleformación da rede CeMIT http://cemit.xunta.es/ema, na que se poden consultar tanto os contidos específicos dos diversos módulos que compeñen o CODIX como diversos casos prácticos e test de exemplo
Preto de 1.500 prazas convocadas para este ano 2017
Esta convocatoria forma parte do Plan de Formación da rede CeMIT para este ano 2017, que terá a súa continuación no segundo semestre cun novo curso de teleformación titorizada (con inicio previsto para o mes de setembro) e novos exames presenciais en outubro.
Dende a habilitación da rede CeMIT para a formación e avaliación dos contidos formativos do CODIX en maio de 2014, foron máis de 4.400 as prazas convocadas nas súas diferentes modalidades e 1.737 as persoas que obtiveron a certificación emitida por parte da Axencia para a Modernización Tecnolóxica de Galicia despois de superar as probas convocadas nas aulas da rede CeMIT.
A estes datos hai que engadir as máis de 300 actividades e cursos en ofimática en software libre que veñen realizando as diferentes aulas de forma presencial durante o último ano como preparación orientada á presentación para estas probas libres, así como os 2.500 accesos aos contidos específicos do CODIX aloxados na plataforma de teleformación a través de internet (http://cemit.xunta.es/ema) e abertos para ser consultados en calquera momento.
Este martes celébrase no paraninfo da Reitoría da Universidade da Coruña unha xornada sobre novas tecnoloxías e igualdade, novas tecnoloxías e emprego e, tamén, sobre ferramentas dixitais na coordinación de recursos humanos e técnicos en iniciativas públicas e empresariais. Na sesión participarán o reitor da Universidade da Coruña, Julio Abalde, e o alcalde da Coruña, Xulio Ferreiro. Dará comezo ás 9:45 horas e no seu transcurso presentarase o informe Prospección de sectores xeradores de emprego na área metropolitana da Coruña: TIC e Loxística realizado polo Observatorio Ocupacional da UDC, e máis o Estudo sobre a situación da igualdade entre mulleres e homes no hipersector TIC, realizado pola Fundación Mulleres.
Reitor e alcalde abrirán o acto dirixido ás empresas participantes nos estudos e outras entidades cidadáns que desenvolven políticas activas de emprego na cidade. Logo da inauguración, ás 10:00h., María Jesús Freire Seoane, profesora da área de Fundamentos da Análise Económica da UDC e directora do Observatorio Ocupacional, afondarán no devandito informe sobre prospección de sectores creadores de emprego, sendo a continuación a quenda de María José Guerra Ortega, coordinadora da área de Igualdade de Fundación Mulleres, dando a coñecer detalles do Estudo sobre a situación da igualdade entre mulleres e homes no hipersector TIC.
O concelleiro de Emprego e Economía Social, Alberto Lema Suárez, moderará un debate coa participación de María Jesús Freire, María José Ortega, María Regueiro Portos, da empresa Asubía e José Manuel Rabuñal, da empresa Permar Sistemas de Almacenaxe que analizarán a potencialidade dos sectores na xeración de emprego e a situación da igualdade entre homes e mulleres no hipersector TIC.
O encontro práctico de profesionais locais do marketing en liña, a comunicación e as redes sociais coñecido como NetLab chegará o vindeiro 13 de maio á súa terceira edición, que celebrarase en La Ferretería de Lugo, onde naceran estas xornadas que na súa segunda edición trasladáranse ao novo espazo de coworking Accede Papagaio na Coruña.
NetLab é unha iniciativa conxunta de estati.co, Carmen Porteiro e APM Social e busca fomentar o ecosistema galego da comunicación dixital, e desta volta contará con 5 relatores que compartirán o seu coñecemento e que rematarán a xornada participando nunha mesa redonda moderada por Verónica Ramallal. Os interesados en acudir xa poden adquirir o seu billete a través da Internet a un prezo de 10 euros (rematando a inscrición o vindeiro 7 de maio).
A xornada transcorrerá seguindo o programa que detallamos a continuación:
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...