Microsoft, xunto ás súas empresas colaboradoras agrupadas no capítulo español da International Association of Microsoft Channel Partners (IAMCP), uníronse á Fundación ONCE para desenvolver o Proxecto TICTEA, co obxectivo de promover o emprego das persoas con Trastornos do Espectro Autista (TEA) na industria das Tecnoloxías da Información e a Comunicación, para o que se contou coa Confederación Asperger España.
Esta iniciativa enmárcase dentro do convenio marco que renovaron recentemente os máximos responsables de Microsoft e a Fundación ONCE, co fin de promover a accesibilidade e a plena inclusión das persoas con discapacidade. Así, celebrouse unha reunión de traballo en Madrid, á que asistiron representantes de cada unha das entidades arriba mencionadas.
Durante o encontro expuxéronse mecanismos concretos para facilitar a identificación de potenciais candidatos con TEA para cubrir postos de alta cualificación técnica, e déronse a coñecer as principais liñas de traballo do proxecto TICTEA.
IAMCP España, entidade que agrupa aos principais partners de Microsoft no noso país -que representan máis de 3.000 empregos tecnolóxicos de alta cualificación- impulsará a adopción de medidas nesta liña para favorecer a inserción laboral de persoas con Trastornos do Espectro do Autismo. Igualmente, Microsoft modificará os seus procesos de selección e recrutamento en España co fin de ter en conta estes perfís. A subsidiaria española da compañía desenvolverá un proxecto piloto para a incorporación de persoas con TEA, que se estenderá posteriormente ao resto de Europa.
Pola súa banda, a Fundación ONCE, da man de Inserta Emprego e a Confederación Asperger España achegarán a súa experiencia na inserción laboral de persoas con discapacidade e asesorarán ás empresas participantes no proxecto. As persoas con TEA veñen demostrando unha grande capacidade para tarefas de programación, análise de datos e desenvolvemento de código, pero en ocasións non é sinxelo detectar estas capacidades nun proceso de selección estándar. A experiencia de Microsoft na incorporación de persoas con autismo no seu persoal demostra que uns mínimos cambios no proceso de recrutamento poden xerar oportunidades para persoas con síndrome de Asperger e outros TEA en postos de alta cualificación técnica. Pola súa banda, a experiencia da Fundación ONCE e de Inserta Emprego, co apoio do Fondo Social Europeo, demostrou que o talento das persoas con discapacidade é unha oportunidade e unha vantaxe competitiva para as empresas e para a creación dunha economía inclusiva.
Recrutamento, acompañamento e formación
O proxecto TICTEA vén continuar a experiencia desenvolvida por Microsoft en Estados Unidos para a incorporación de persoas con autismo, lanzada fai xa tres anos. Neste tempo, máis de 50 persoas con TEA incorporáronse con éxito á compañía, nunha diversidade de posicións, que inclúen desde enxeñeiros de software a científicos de datos. Unha das principais accións que se implementaron para facilitar estas incorporacións foi modificar o procedemento de recrutamento -para evitar que as persoas con TEA fosen descartadas nas primeiras fases dos procesos de selección- ampliar os plans de acompañamento durante os primeiros meses na organización -para asegurar a correcta adaptación ao posto- e implementar formacións específicas para os empregados -co fin de garantir unha experiencia inclusiva para as persoas con TEA.
As Termas Centro Comercial e o Concello de Lugo presentaron na mañá deste 10 de abril a segunda edición do seu certame conxunto de innovación, o concurso Wonderful. Segundo fixeron saber, a nova convocatoria do certame vai dirixida a apoiar unha vez máis a posta en marcha (da man de empresas ou persoas de Lugo) de iniciativas que marquen un antes e un despois (no económico, no produtivo pero tamén no social) na contorna da que xorden, a lucense. Ou sexa, que do que se trata é de recoñecer o esforzo dos lucenses a prol de dar forma a cadansúa visión de futuro empresarial. A iniciativa foi dada a coñecer pola concelleira de Economía, Emprego e Desenvolvemento Económico de Lugo, Ana Prieto, e o xerente do Centro Comercial As Termas, Esteban Patiño.
As propostas candidatas poden participar en catro categorías diferentes. A primeira é a de Solucións Innovadoras para tendas e centros comerciais; a segunda, Solucións Innovadoras que melloren a calidade de vida do cidadán con respecto á súa cidade (Smart Cities); a terceira é a de Negocios ou tendas innovadoras, e a cuarta, Ideas Innovadoras.
Segundo informaron, as tres primeiras están concibidas para empresas ou startups que traballan con innovación nos ámbitos das Cidades Intelixentes, as vendas ao por maior (retail) ou do comercio. A última diríxese sobre todo a emprendedores e universitarios con ideas de negocio innovadoras en calquera ámbito e coa posibilidade de plasmar os seus proxectos ou mesmo participar mediante os seus traballos de fin de grao.
Os gañadores conseguirán un conxunto de premios orientados a axudarlles nas fases iniciais, grazas aos patrocinadores e impulsores de Wonderful: Bstartup de Banco Sabadell, BizSpark de Microsoft, El Economista, IBM, a Universidade Francisco de Vitoria ou Indra. Os premios terán unha contía de 5.000 euros en metálico que entregará Lar España (propietaria, precisamente, do Centro Comercial As Termas), unha entrevista nun medio de comunicación do eido estatal, o acceso a financiamento bancario e investimento privado, axudas de software e novas tecnoloxías, consultoría estratéxica, formación e asesoramento personalizado. Ademais, os gañadores das categorías de innovación en retail participarán no Wonderful Summit 2018, presentando os seus proxectos no segundo Encontro Nacional de Innovación en Centros Comerciais e Retail que se celebrará en xullo de 2018.
Na cita de hoxe tamén se lembrou que Wonderful desenvólvese en Lugo grazas ao impulso de As Termas que, xunto co Concello de Lugo e outras entidades locais, colaboran no fomento da innovación na provincia. “Este tipo de iniciativas son clave para axudar ao desenvolvemento económico e social da nosa cidade e o das empresas ou emprendedores que están a innovar, xa que toda axuda é importante nos difíciles momentos iniciais”, sinalou Esteban Patiño.
Desde este 10 de abril e até o 31 de maio os emprendedores ou empresas poderán participar, presentando os seus proxectos de negocio a través do portal www.proyectowonderful.es.
A Fundación TIC da Deputación de Lugo anunciou hoxe un importante fortalecemento da súa actividade formativa e divulgativa, un proceso que tamén pon en xogo un relevante reforzamento das súas ramificacións na provincia, abranguendo o rural. Segundo fixeron saber os responsables da entidade lucense, esta incrementará nun 60% o número de cursos e obradoiros de novas tecnoloxías para maiores no segundo trimestre do ano, dos que 12 impartiranse na provincia. Os datos foron achegados este martes polo presidente da Deputación, Darío Campos, durante a presentación da nova programación do InLugo, na que estivo acompañado pola alcaldesa de Lugo, Lara Méndez. O prazo de inscrición xa está aberto en www.fundaciontic.org e en www.deputacionlugo.gal, ou chamando ao teléfono 982 225 186.
Campos Conde subliñou que “como alcalde dun concello pequeno, o da Pontenova, coñezo de primeira man a utilidade das novas tecnoloxías na vida cotiá dos maiores que residen no rural e as posibilidades que ofrece esta ferramenta nas súas relacións con familiares e amigos”. Por iso, engadiu, “este trimestre imos facer un esforzo especial para retomar as actividades do InLugo na provincia”. Desta volta, o programa inclúe 12 obradoiros, maioritariamente de Internet e de uso do móbil, que, segundo fixo saber, son os máis demandados. “A nosa vontade é que, en función dos nosos recursos, cheguemos a toda a provincia en futuras edicións”, engadiu.
Entre as novidades desta nova tempada, o presidente da TIC destacou “o importante incremento de actividades”. E apuntou: “Neste segundo trimestre haberá 81 cursos e obradoiros, con 1.085 prazas, fronte aos 51 cursos e 713 prazas da edición anterior, o que supón un incremento do 60%. Queremos dar resposta así á alta demanda que hai destas actividades. De feito, vemos como en cada edición as prazas se cobren nas primeiras horas de apertura de inscrición”.
Darío Campos dixo que tamén se están a atender as demandas dos usuarios coa incorporación de novas materias, como por exemplo un curso de Instagram, “unha rede social que está moi de moda e na que os maiores poderán compartir as súas fotos”, ou outro obradoiro de Word que, por primeira vez, estará enfocado á Memoria Dixital, a iniciativa da Deputación para dinamizar tecnoloxicamente as comarcas lucenses a través da recuperación e posta en valor do seu pasado (dixitalizando contidos e todo tipo de materiais achegados pola veciñanza). Segundo explicou o titular da Deputación, a incorporación do curso de Word responde a un interese concreto das usuarias e usuarios de Memoria Dixital, que precisaban de ferramentas que lles permitisen dar conta por escrito das súas historias e anécdotas, que agora poderán engadir ao banco de recordos dixital. Por outra banda, os cursos con máis demanda, os de móbil, Internet e tabletas, ampliarán o número de horas. Deste xeito, os de móbil e Internet pasarán a ser de 4 días, e o de tabletas, de tres. Tamén aumentará o número de cursos de reforzo e os obradoiros de memoria.
Esta semana estase a celebrar na Coruña o salón de emprego Laboralia 2018, organizado polo consello social da Universidade da Coruña e coa sede de Afundación como centro de operacións. Este ano, incluíuse unha importante novidade que nos toca de preto: a inclusión dun programa especialmente centrado na relación entre as novas tecnoloxías dixitais e o emprego. Esta edición de Laboralia, polo tanto, está a ser un evento especialmente acaido para toda persoa (empresarias/os, emprendedoras/es, profesionais, estudantes, tituladas/os) que queira facer sondaxes de por que vieiros tecnolóxicos vai discorrer o mercado de emprego.
O programa desta convocatoria inclúe obradoiros e unha xornada formativa na que se celebrarán conferencias e mesas redondas. Os relatores dos obradoiros son Yaiza Rubio, primeira muller hacker de España en participar en Def Con & Black Hat en Las Vegas; Álvaro Núñez, máster en Seguridade Informática e membro de Telefónica Dixital España e de Hackers Club Academy; Ángel Hernández, experto en Intelixencia Artificial e desenvolvemento e adestramento de chatbots; Félix Brezo, analista de intelixencia en Eleven Paths; Pablo González, hacker e responsable de negocio tecnolóxico en Telefónica Digital España e Ignacio Villoch, construtor de ecosistemas de innovación aberta en BBVA.
A xornada formativa, prevista para o día 13 de abril, contará coa presenza de relatores relacionados co ámbito universitario e con Juan Antonio Rosell, director de Talento e Transformación de Everis.
Tes conta de correo electrónico? Gustaríache aprender a utilizar as súas funcións avanzadas?
Hoxe en día faise difícil vivir sen correo electrónico. Se navegas, te conectas a Internet e utilizas redes sociais é imprescindible utilizalo en moitas ocasións. Pero... sácaslle todo o partido que che gustaría?
Neste curso gratuíto adquirirás coñecementos para utilizar as súas utilidades:
A Universidade de Vigo vén de facer reconto do acadado até agora, en materia de participación, pola nova edición da Feira Internacional Virtual de Emprego Finde.U, a terceira, que se celebra entre o 16 e o 18 de abril. Segundo fai saber a institución educativa galega, xa se inscribiron 1.200 demandantes de emprego (procedentes sobre todo de ámbalas beiras da raia galego-portuguesa pero tamén doutros países europeos como Francia e Reino Unido, entre outros) e a previsión é acadar os 3.500 da anterior edición. Ademais, está previsto que concorran máis de 120 expositores, 30 máis ca en 2017. Destes expositores, 90 son empresas con necesidades de contratación de persoal, 17 son servizos/puntos de información relacionados con emprego e mobilidade e 12 son espazos de atención dos diferentes países participantes no ámbito da rede Eures.
A feira vén da man das universidades de Vigo, Porto, UTAD (Trás-os-Montes e Alto Douro) e a Universidade Católica Portuguesa – Oporto, en cooperación con IEFP / EURES Portugal e EURES Transfronterizo Galicia-Norte de Portugal. Segundo informan as entidades organizadoras, a cita da vindeira semana será o primeiro gran acontecemento da fieira Finde.U no ano 2018, acontecemento que se completará cos eventos presenciais que terán lugar no mes de outubro: en Porto, os días 16 e 17, e en Vigo, o 23 e 24 . En palabras de Alejandro Martínez, director da Área de Emprego e Emprendemento, a feira permite a aquelas persoas egresadas que estean a buscar un emprego, “presentar a súa candidatura a ofertas de traballo e a oportunidades de investigación, coñecer empresas e/ou expertos no mercado laboral dalgúns países europeos e mesmo ser convidado ou convidada a entrevistas de tipo laboral”. A maiores, sinala, “as persoas participantes tamén terán á súa disposición un programa cunha ampla oferta de obradoiros e sesións informativas sobre competencias transversais e desenvolvemento persoal, emprendemento, empregabilidade a nivel europeo, así como presentacións de empresas e institucións sobre as súas necesidades de contratación de persoal”.
Polo que se refire a ofertas de traballo, xa se publicaron preto de 300, dando acceso a máis de 700 empregos. Porén, a maior parte das contribucións iranse publicando ao longo desta semana. “O perfil máis demandado é o tecnolóxico e o sanitario, pero, en xeral, búscanse profesionais cualificados en practicamente todas as áreas, sobre todo nos países nórdicos”, explica o director da Área de Emprego e Emprendemento, engadindo que a nivel internacional as ofertas chegan de países como Reino Unido, Bélxica, Alemaña ou Dinamarca. “Hai moita demanda de especialistas nas diferentes ramas do mundo da enxeñaría (mecatrónica, eléctrica, telecomunicacións...), pero tamén no da medicina, enfermaría e fisioterapia”, informa, incidindo na importante presenza de empresas do sector TIC (Tecnoloxías da Información e a Comunicación), do turismo, da saúde e da alimentación. Entre as firmas galegas que xa achegaran ofertas salientan nomes como Televés, con sede en Santiago de Compostela e máis de 800 persoas no seu cadro de persoal, e Vegalsa-Eroski, con máis de 200 puntos de venta, repartidos ao longo de Galicia, Asturias e Castela-León e 6.000 persoas contratadas.
O certame Youtubeiras.gal, o concurso encamiñado a encher YouTube de vídeos en galego, rematou prazo de presentación de candidaturas o pasado 15 de marzo e, tres semanas despois, logo dos membros do xurado visualizaren as 229 propostas desta edición 2018, xa foron elixidas as 26 propostas que chegarán directas á final. O xurado (composto por Adrián Dios, Anxos Sobriño, Estela Romasanta, Iván Capón e Laura Cruxeiras) e as entidades impulsoras deste certame (os servizos de normalización lingüística dos Concellos da Baña, Ames, Carballo, Ourense, Pontevedra, Ribadeo, Santiago, Teo e O Grove; as Universidades de Coruña, Santiago e Vigo; e da Deputación da Coruña) darán a coñecer as achegas finalmente recoñecidas o 20 de abril, nunha gala no Teatro Colón da Coruña.
Segundo puidemos saber dos datos achegados pola organización do certame, esta edición ten un marcado acento compostelán. Por que motivo? Pois porque Santiago, con 38 candidaturas, é o municipio con máis participantes: 20 inscribíronse na categoría video-facermos, 13 na video-opinarmos e 5 na de canles.
Volvendo ao evento do 20 de abril, lembrar que será presentado pola compañía teatral A Panadaría, ou sexa, polas Areta Bolado, Noelia Castro e Ailén Kendelman. O público poderá acceder de balde á gala, tras reservar previamente as súas entradas a través da ligazón da web do Teatro Colón.
Os finalistas desta edición 2018 son:
Categoría de vídeo-facermos
Categoría de vídeo-opinarmos
Categoría de canle
Categoría de creatividade
Categoría de eficiencia comunicativa
Categoría de calidade técnica
Categoría de calidade lingüística
Categoría de proposta youtubeira
Máis detalles desta segunda edición
Os galardóns artelláronse este ano, logo da primeira edición de 2017, en cinco categorías: video-facermos, vídeo-opinarmos, canle, creatividade, eficiencia comunicativa, calidade técnica, calidade lingüística e o premio do público. A estes cinco apartados puideron concorrer todas as persoas maiores de 14 anos a través de vídeos de opinión ou videotitoriais autoproducidos en galego subidos a Youtube de xeito independente ou nunha canle.
Na edición presente hai 5.500 euros en premios. Este repartiranse as ditas categorías, que incrementan o seu número con respecto ao ano pasado. O premio do público, chamado #propostayoutubeira, é unha das grandes novidades deste ano. Como temos sinalado noutras ocasións, a través deste recoñecemento, os membros de Facebook poderán propoñer a través dun comentario no perfil de Youtubeir@s un vídeo do que sexan seareiros/as incluíndo o cancelo #propostayotubeira.
Segundo puidemos saber, a convocatoria 2017 saldouse cunhas importantes cifras de convocatoria, con máis de 200 vídeos presentados da man de internautas de idades comprendidas entre os 17 e os 30 anos. Todas estas pezas salientaron pola súa riqueza temática, tocando temas que oscilaron entre a crítica de cine e as cuestións de actualidade, pasando por titorías con trucos e consellos no ámbito da tecnoloxía, a mecánica ou a cociña. Ademais, lográronse altos niveis de implicación por parte de diferentes asociacións e colectivos, e de persoas de idades moi diversas.
ILUNION Tecnoloxía e Accesibilidade, a empresa social da ONCE e a súa Fundación, está a realizar un estudo para unha entidade bancaria que traballa na mellora da súa accesibilidade web e nas súas aplicacións móbiles.
Para realizar o estudo lanzouse unha enquisa cuxo fin é coñecer como é a experiencia das persoas con discapacidade visual ao realizar operacións bancarias a través de aplicacións móbiles.
Para realizar a enquisa non tardarás máis de 10 minutos e colaboras a derrubar barreiras nas accións e ferramentas web e móbiles da banca.
Ao terminar a enquisa hai que pulsar Gardar para que se salve a enquisa. Aquelas preguntas con asterisco deben contestarse de forma obrigatoria para continuar e finalizar a enquisa.
Na seguinte ligazón tedes acceso á enquisa sobre accesibilidade na banca online e en aplicacións móbiles.
O Colexio Profesional de Enxeñaría en Informática de Galicia (CPEIG) fai hoxe un novo chamamento a prol dun uso responsable das novas ferramentas dixitais e (sobre todo) a prol dun maior coidado no emprego dos nosos datos persoais ao abeiro delas. A proclama insírese no Día Internacional da Internet das Cousas, este 9 de abril, unha celebración mundial impulsada polo IOT Council co obxectivo de garantir unha evolución racional das tecnoloxías que conectan uns obxectos cos outros e a nós con eles (co fin de garantir espazos privados e públicos con meirande calidade de vida, mellor conectados, mellor xestionados e máis sustentables).
O Colexio Profesional de Enxeñaría en Informática de Galicia (CPEIG) súmase a este acontecemento cun manifesto onde considera “de vital importancia” que a sociedade galega “sexa consciente dos dispositivos da Internet das Cousas que emprega e faga un uso responsable e seguro dos mesmos de cara o envío de datos persoais e a súa publicación en Internet”. Segundo lembra o colexio que preside Fernando Suárez para poñernos en situación, coñécese como Internet das Cousas todo ecosistema de dispositivos que procesen datos e información e están conectados entre eles e con Internet.
A entidade tamén recorda que hoxe en día calcúlase que máis de 8.400 millóns de dispositivos conectáronse a Rede en 2017 (algunhas consultoras como Gartner calculan que no ano 2020 serán 20.000 millóns de dispositivos, sen contar teléfonos móbiles, tabletas ou ordenadores). “O medre da Internet das Cousas”, engade o CPEIG, “traerá evidentes melloras sociais e económicas e, segundo a tecnoloxía avance, poderanse obter mellores produtos e servizos para a sociedade, por exemplo, no eido da teleasistencia ou do control continuo de variables de saúde”. Por outra banda, continúa, “as empresas posuirán cada vez máis datos dos usuarios e poderán anticipar as súas necesidades e proporcionarlle servizos que axuden á toma de decisións e a aforrar cartos e tempo, como no ámbito do fogar cos dispositivos de control de consumo e de medición dos parámetros ambientais”.
Por todos estes motivos, o CPEIG considera que os cidadáns deben tomar conciencia dos dispositivos que manexan e que se conectan a Internet para o envío de datos ou seguimento de diversas actividades, como termostatos intelixentes, cámaras web intelixentes, Smart TV, teleasistencia, pulseiras de control deportivo ou reloxos intelixentes. “Todos estes aparellos poden ser unha fonte de ataques á privacidade e á seguridade dos cidadáns; por exemplo, no ámbito da seguridade están documentados ataques masivos a cámaras web dos fogares ou a televisións intelixentes; e no ámbito da privacidade a publicación sen control de datos de pulseiras deportivas (tipo fitbit) con información sensible como as rutas xeográficas nas que practica deporte ou a súa actividade sexual”, explica o presidente do CPEIG, Fernando Suárez.
O colexio recomenda usar estes dispositivos de forma segura, protexendo os nosos datos persoais e a súa difusión mediante a lectura e comprensión das cláusulas de contratación que son aceptadas na instalación e uso dos mesmos. Tamén incide na necesidade de reforzar as conexións dos dispositivos conectados, sobre todo no fogar, mediante instalacións profesionais con redes seguras e inhabilitar calquera tipo de opción de conexión que non sexa precisa para o bo funcionamento do servizo.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...