A directora xeral de Xuventude, Participación e Voluntariado da Xunta de Galicia, Cecilia Vázquez Suárez, participou esta mañá en Lugo no acto inaugural da iniciativa Atlantic Brainstorming: Creativity & Jobs Conferencia Europea da Creatividade, que reúne hoxe e mañá en Galicia a representantes de 14 entidades de catro países (España, Portugal, Francia e Reino Unido). Durante dous días, expertos e mozos e mozas analizarán o mundo da creatividade e a implicación da mocidade nos procesos creativos, ao tempo que debaterán sobre o futuro do sector cultural como motor de emprego.
Cecilia Vázquez, que estivo acompañada do delegado territorial da Xunta, José Manuel Balseiro Orol, fixo un chamamento á confianza nas ideas transformadoras que chegan da man da mocidade e reivindicou o papel que deben xogar os mozos e mozas como revulsivos da cultura e da economía. Ademais, destacou que esta Conferencia Europea estimula “a creación de novas oportunidades a través do intercambio de experiencias para fortalecer as posibilidades artísticas e laborais dos novos creadores buscando fórmulas para que todos os cidadáns poidamos desfrutar da súa arte”. “É unha aposta máis pola creatividade xuvenil como fórmula previa ao emprendemento”, engadiu.
A titular do departamento autonómico rematou a súa intervención sinalando que “iniciativas como esta Conferencia Europea é un exemplo de unión de esforzos e medios entre entidades de varios países europeos para ofrecer á xuventude ferramentas para o desenvolvemento das súas capacidades creativas e ampliación das súas oportunidades”.
As actividades da Conferencia, que descorrerán no edificio multiusos da Xunta de Galicia en Lugo e no Complexo Residencial Xuvenil LUG2, están divididas en seis bloques: o primeiro, Atlantic Brainstorming, se centrará no emprego, o emprendemento e a economía circular; o segundo, Atlantic Océano, abordará os problemas dos residuos plásticos no Océano Atlántico; o terceiro, Creative Jam, será un espazo interactivo onde os mozos e mozas poderán participar en varios workshops innovadores e prácticos, e no cuarto, AYCH Hackaton, daranse a coñecer as novidades tecnolóxicas creadas pola xuventude.
O programa de actividades conta tamén con outros dous espazos: Creative Space, onde empresas e creativos poderán ensinar os seus proxectos e traballos, e +14, para centros escolares a través dun xogo de rol creativo.
Esta Conferencia Europea da Creatividade é un dos 45 proxectos aprobados na primeira quenda do programa europeo Interreg Atlantic Area, que promove a cooperación trasnacional en 36 rexións atlánticas de 5 países europeos (Irlanda, Reino Unido, Francia, España e Portugal), e descorre no marco do proxecto Atlantic Youth Creative Hubs (acrónimo AYCH), que conta cun orzamento de 4.227.620 euros e unha duración de tres anos.
Son socios do proxecto as seguintes entidades: Devon County Council; Plymouth College of Art; Playmouth County Council; Playmouth Culture; Pacifistream Enterprise Solutions CIC; Brest Metropole; Ayuntamiento de Gijón; Ashton Community Trust; Gran Angouleme; Vida Láctea; Conference of the Atlantic Arc Cities; Cámara Municipal de Santo Tirso; e L´Ecole de Desing Nantes Atlantique.
Todos eles buscan a creación de produtos e de redes de incubadoras creativas internacionais e de intercambios profesionais, así como a posta en marcha dun programa de formación, dunha mentorización internacional e de iniciativas de estancias creativas.
A Universidade Complutense de Madrid e a ONCE presentan o primeiro Editor Matemático Accesible EDICO, desenvolvido grazas ao traballo conxunto entre ambas as entidades e que permite a un estudante cego seguir as clases máis complexas de matemáticas ou ciencias en tempo real, grazas á transcrición automática a braille, voz ou vista adaptada de todo tipo de fórmulas ou aprendizaxes.
A presentación será hoxe, Xoves 12 de abril, ás 12.00 horas, na aula Miguel de Guzmán da Facultade de Matemáticas da UCM (Pza. das Ciencias, 3. Cidade Universitaria).
EDICO facilita tamén que as persoas con discapacidade visual poidan interactuar con outras sen discapacidade, á hora de compartir a edición e representación das matemáticas, a física e a química, ademais de dispoñer dun compendio de ferramentas e/ou recursos didácticos para facilitar a aprendizaxe destas materias.
O vindeiro 25 de abril vaise celebrar o Día das Redes Galegas, co epicentro no Campus de Pontevedra. Trátase dunha xornada con dous obxectivos definidos: por unha banda reivindicar a figurar dos responsables de comunidades virtuais ao abeiro do rápido espallamento das redes sociais nas nosas vidas e, pola outra, mostrar o importante potencial do alumnado (futuras/os profesionais) da Facultade de Ciencias Sociais e da Comunicación. Na organización do evento atópase o profesor Xavier Martínez Rolán, en colaboración coa dita Facultade, a Vicerreitoría do Campus, a Área de Normalización Lingüística da Universidade (ANL) e a Secretaría Xeral de Política Lingüística da Xunta de Galicia. A xornada contará un ano máis cun panel de conferenciantes moi destacable: as/os tituladas/os de Ciencias Sociais e Comunicación.
Entre as relatoras figuran (entre outras) Lucía Gómez, directora de mercadotecnia de contidos e medios sociais de Elogia, a referencial axencia de márketing con sede en Vigo; Cristina García, responsable de comunicación dixital en Esmerarte Industrias Creativas, firma centrada en promoción cultural ao abeiro das novas ferramentas e en facer comunidade arredor do fenómeno creativo; ou Jorge Medal, redactor e guionista de formatos televisivos.
Xunto ás devanditas relatoras, o Día das Redes Galegas contará tamén coa presenza activa de Cristina Rodríguez, técnica de normalización lingüística da ANL, que abordará neste evento a experiencia de Youtubeir@s, proxecto promovido polos servizos de normalización lingüística das tres universidades galegas, nove concellos e a Deputación da Coruña e dirixido a dar visibilidade ao uso do galego a través dun concurso nesta rede social.
Segundo engade Martínez Rolán, o Día das Redes Galegas é un evento aberto a todo o público interesado que manterá, ademais, o formato de edicións anteriores, de tal xeito que trala súa inauguración (prevista para ás 10.00 horas) cada conferenciante falará da súa experiencia en proxectos para, por último, completar a xornada cun coloquio, moderado polo profesor Alberto Dafonte. “Non podemos falar de redes sociais sen ter en conta a bidireccionalidade da comunicación”, sinala nese senso Martínez Rolán, dun evento no que tamén se promoverá o debate a través da rede social Twitter, co cancelo #redesgalegas, e que será retransmitido por UVigo TV.
O centro tecnolóxico CiTIUS, emprazado no Campus Sur de Santiago, vai dar acubillo este 12 de abril, a partir das 17.00 horas, a un relevante encontro coas cousas que poden facer as tecnoloxías de intelixencia artificial e aprendizaxe das máquinas para mellorar a calidade de vida das persoas con algún tipo de lesión, doenza ou característica que reduce a súa mobilidade ou lles impide ter a máxima autonomía e independencia. Estamos a falar da conferencia Robótica de rehabilitación: aplicación da enxeñaría para a rehabilitación motora, que correrá a cargo de Eduardo Rocón, investigador do Centro de Automática e Robótica do CSIC.
Na conferencia tocaranse temas como as novas tendencias dos avances da robótica cara unha meirande interacción co ser humano, o xurdimento dos wearable robots (dispositivos mecatrónicos cuxas articulacións e ligazóns corresponden dalgunha maneira aos do ser humano e están unidos ao paciente) e os detalles legais, sanitarios e regulamentarios que o espallamento deste tipo de tecnoloxías implica.
Segundo explica o CiTIUS, o aspecto distintivo destes robots é a dupla interacción, física e cognitiva, co usuario. A función principal da interacción física é a xeración de forzas que suplementen a dos membros do home alén dos seus límites físicos, sexan estes naturais ou causados por unha doenza ou trauma. O papel da interacción cognitiva é asegurar que o usuario recibe información da interacción do robot coa súa contorna á vez que lle permite comandalo.
Na conferencia tamén se botará luz sobre a seguinte xeración destes dispositivos, un estado de cousas no que todo apunta a un esvaecemento da liña que separa o sistema robótico do ser humano.
A charla, máis en detalle, estará centrada en describir os principais avances neste ámbito e no desenvolvemento da próxima xeración dos robots carrexables para a rehabilitación e asistencia de persoas maiores e con diversidades funcionais, unha poboación crecente cunhas necesidades especiais dentro da sociedade europea.
O vindeiro mes de maio, do 2 ao 5, Ourense volverá ser o epicentro das novidades do audiovisual e da cultura na cuarta edición da Ourense ICC Week, o Marco das Industrias Culturais e Creativas que organiza a Deputación. Indo ao encontro en cuestión, contará cunha gran variedade de actividades: música, videoxogos, humor e historia mesturando a innovación dos temas a tratar, coa tradición de senlleiros lugares da provincia de Ourense (mosteiros de Rocas e San Clodio, a Casa Museo Otero Pedrayo ou o Campus de Ourense) que acollerán ditas actividades. A presentación da programación da Semana das Industrias Culturais e Creativas en Ourense, celebrábase onte no Centro Cultural Marcos Valcárcel e nela participaban o presidente da Deputación de Ourense, Manuel Baltar; e os coordinadores da Ourense ICC Week, Juan Rivas e Manuel Araujo.
Emporiso, a inauguración da Semana das Industrias Culturais e Creativas, na que se falará dos Mundos deseñados, será o mércores, 2 de maio, ás 18 horas, no Centro Cultural Marcos Valcárcel. A presentación e apertura da xornada correrá a cargo do presidente da Deputación de Ourense. A continuación, a fotógrafa e deseñadora, Bárbara Ouka Leele; o axitador cultural, Paco Clavel; e o documentalista e comisario cultural, Juan Sánchez, falarán da Arte nas portadas, e despois, será a quenda para a ilustradora, deseñadora gráfica e Motion Grapher, María Grande e o deseñador gráfico, Javier Mariscal, quen exporán a cuestión da Cultura do deseño. Ese mesmo día, a partir das 21 horas, será a quenda para o apartado musical da xornada, co grupo Morgan, no Teatro Principal da Deputación de Ourense.
O xoves 3 de maio, ás 9.30 horas, a programación retomarase no mosteiro de San Pedro de Rocas (Esgos), onde terá lugar unha mesa redonda sobre o Patrimonio rupestre europeo. Investigación, xestión e difusión. A xornada será presentada polo presidente da Deputación de Ourense e coordinada polo profesor de arqueoloxía da Universidade Autónoma de Madrid, Jorge López Quiroga, e pola arquitecta e profesora da Universidade de Florencia, Carmela Crescenzi. Ás 10 horas, Carmela Crescenzi falará do itinerario polo patrimonio rupestre mediterráneo; ás 10.30 horas, o director do Museo do Territorio de Palagianello (Italia), Domenico Caragnano ofrecerá un relatorio sobre a pintura nas igrexas rupestres de Puglia e Basilicata. Ás 11.30 horas será a quenda para o profesor de Historia do Dereito da Universidade de Bari, Antonio G. Mastrangelo, quen falará da propiedade na área rupestre de Gravine (Taranto); e ás 12 horas, Jorge López Quiroga exporá o tema da aplicación das novas tecnoloxías en San Pedro de Rocas. Pola súa banda, o doutor en física e profesor na Universidade do Pireo (Grecia), Theodoros Ganetsos, exporá un relatorio sobre as análises físico-químicas non destrutivas das pinturas e frescos, a partir das 12.30 horas, e media hora despois, o espeleólogo, escritor e profesor, Alexey Zhalov, falará das vivendas medievais escavadas na rocha en Bulgaria, para rematar a actividade cun debate.
Pola tarde, ás 17 horas, a programación trasladarase ata o Centro Cultural Marcos Valcárcel para falar da supervivencia na xungla dixital. Participarán o músico e compositor, Nacho García Vega e o músico e compositor, Luis Mendo. Neste mesmo centro, a partir das 19.00 horas será a quenda para o humor e a cultura, na que se darán cita o humorista, Rober Bodegas; o humorista, Alberto Casado; a humorista, blogueira e ilustradora, Raquel Córcoles; e o humorista e xornalista, Juan Ramón Monet, para falar do sentido da creatividade. A mesa será moderada polo xornalista Manuel de Lorenzo.
O venres, 4 de maio, as actividades trasladaranse ao mosteiro de San Clodio (Leiro), onde a partir das 10.30 horas, falarase da creatividade e do sector TIC, baixo o título Unha viaxe cara a sociedade do coñecemento. Abrirá a xornada a directora de Imaxin Software, Luz Castro, quen falará da gamificación e software galego. Ás 11.30 horas, será a enxeñeira e deseñadora gráfica, Cynthia Gálvez, quen fará un relatorio sobre AV. VR. MR.: Alén da tecnoloxía, e rematará, ás 12.30 horas, a avogada e policy manager, Sara Rodríguez, para falar da economía colaborativa.
Os máis pequenos terán unha cita coa cultura contemporánea ás 16.30 horas, pois levarase a cabo o ICC Kids no Centro Cultural Marcos Valcárcel. Primeiro coa actividade Xogas ou traballas?, a cargo dos youtubeiros @Chincheto77 e @Tonacho que explicarán como fixeron da súa paixón a súa profesión; e a partir das 17 horas, estará a E-Cuarela, unha instalación de pintura dixital ao aire libre para que os nenos poidan pintar con auga este panel. Ás 18 horas, as actividades trasladaranse ao Liceo de Ourense onde será protagonista o sector audiovisual. Alí o presidente da AGAG (Asociación Galega de Guionistas), Nico Campos, e a directora e guionista de cine, Gracia Querejeta, falarán Do papel á pantalla: a traxectoria dunha muller creativa. E, nese mesmo centro, ás 19.30 horas, será a quenda para Autores e Creadores, coa entrega do galardón Premio MUSA SGAE a cargo do presidente da SGAE, José M. Fernández Sastrón, ao autor e compositor de Los Suaves, Yosi Domínguez. A xornada rematará, ás 21 horas, no Teatro Principal, co concerto de Mikel Erentxun.
O sábado, 5 de maio, ás 11 horas as actividades comezarán na Casa Museo Otero Pedrayo (Amoeiro), cunha xornada adicada á xestión cultural co tema Xestión de públicos: non quero que veñan, quero que volvan; a cargo da subdirectora artística do Museo Nacional Centro de Arte Reina Sofía, Carlota Álvarez Bassó. O acto será presentado pola xornalista, Marta Gómez. Ás 12 horas, será a entrega dos Premios Rodolfo Prada Chamochín, un galardón instaurado pola Deputación de Ourense en colaboración coa Asociación Galega de Profesionais da Xestión Cultural, co obxectivo de recoñecer o labor que realizan os xestores culturais en Galicia.
Ás 10.30 horas, nos Xardíns Padre Feijóo estará novamente o panel da E-Cuarela, no marco da ICC Kids, e completará a programación o obradoiro Emojinarium que será ás 12.00 horas no Centro Cultural Marcos Valcárcel a cargo de María Grande no que analizarán os emojis, a linguaxe universal das expresións e crearán os seus propios personaxes. E, ás 12.00 horas, nese mesmo lugar, dará comezo a ICC Show Vermú, na que actuarán Rufus T. Firefly, Esposa, Bifannah e Silvia Superstar DJ. O humor volverá a ser protagonista, nesta ocasión no Teatro Principal, a partir das 20.00 horas, co espectáculo de Pantomima Full.
ICC Gamers
De maneira paralela a estas actividades, os días 3, 4, 5 e 6 de maio, o Campus de Ourense, acollerá a ICC Gamers que inclúe dúas actividades: a ICC Technium R Encounter e a ICC eSports. ICC Gamers, escaparate das últimas tendencias en videoxogos e deportes en liña, contará coa colaboración da Deputación de Ourense, a Universidade de Vigo, R Euskaltel, a Federación Galega de Automobilismo e Mahou.
Indo ao miolo desta vertente de lecer dixital, a xuntanza ICC Technium R Encounter botará a andar o día 3 de maio ás 18 horas e rematará o 6 de maio á mesma hora, no Pavillón Universitario de Ourense. A edición 2018 da quedada informática terá catro grandes torneos: League Of Legends, Counter Strike Global Offensive, Hearthstone e Super Smash Bros Brawl. Haberá 4.000 euros en premios en torneos ou en outras actividades lúdicas dentro da party.
A xeito de curiosidade lembrar que na pasada edición, o moañés Aarón González Santomé, acadou un novo récord Guinness do xogo Final Fantasy 10, logo de permanecer 40 horas consecutivas competindo.
Volvendo ao apartado de xogos, este completarase coa devandita actividade ICC eSports, que tamén se celebrará no Pavillón Universitario de Ourense, o 5 de maio ás 10 horas até o 6 de maio ás 15 horas. Dentro desta celebración os torneos que se disputarán serán: FIFA 18, Clash Royale, e GT Sports. A entrada aos mesmos pode adquirirse estes días en Ticketea (podéndose acceder a ela a través da web www.technium.es). Neles poderán participar xente de fóra da ICC Technium R Encounter, así como as persoas da propia party.
A Cámara de Comercio de Santiago quere familiarizarnos ao máximo coa Internet das Cousas, un ámbito cheo de posibilidades profesionais e de desenvolvemento (agora que comezamos a vivir a cuarta revolución industrial, a dos obxectos conectados e intelixentes), facendo fincapé en divulgar a importancia do eido IoT (Internet of Things) entre as e os menores de trinta anos (fomentando a súa empregabilidade futura). Estamos a falar do programa Constrúe o teu Futuro. Internet das Cousas (IOT) e Emprendemento, que comeza o 16 de abril e que vén da man da entidade cameral, en colaboración (co-financiando) do Concello de Santiago e a Fundación INCYDE a través do Fondo Social Europeo.
A formación está destinada a mozos e mozas menores de 30 anos, en desemprego pero con arela de pór en marcha a súa propia iniciativa de mercado ou ben de atopar traballo nunha empresa do sector. Tamén se dirixe a persoas interesadas en ampliar e consolidar os seus coñecementos no campo da creatividade dixital. O programa ten por obxecto ensinar “os distintos modelos de negocio baseados e realizados baixo este paradigma, con especial atención aos sectores máis puxantes e considerar as novas solucións que comercializaron as startups no ámbito nacional e internacional”. Segundo apunta a Cámara acerca da importancia de adestrarnos no eido IoT, hoxe en día son innumerables os ámbitos de actividade onde comezan a ter vital importancia as tecnoloxías das cousas conectadas: saúde, docencia, industria, agro, turismo, deporte ou lecer.
O obradoiro debullará as tecnoloxías vencelladas á Internet das Cousas e que tipo de requisitos son básicos para construír un modelo de negocio analizando e realizando un estudo de mercado, dará a coñecer as ferramentas necesarias e distinguirá casos de éxitos das empresas que xa triunfaron no ámbito IoT. Desenvolveranse conceptos de información masiva (Big Data), uso de aplicacións móbiles e conceptos de ciberseguirdade e benchmarking.
O programa, no que poderán participar un máximo de 25 persoas, celebrarase ata o 25 de maio no viveiro de empresas da Cámara de Comercio de Santiago (Polígono de Costa Vella. Rúa República Checa nº 40. Santiago), luns e xoves en horario de 10:00 a 12:00 horas. Tamén inclúe titorías individuais entre o alumno e o consultor, sempre dentro do horario de apertura do viveiro de empresas (de 8:00 a 22:00 horas). As persoas interesadas en participar poden poñerse en contacto coa Cámara de Comercio de Santiago (981596800; vivero@camaracompostela.com) ou consultar o programa completo e inscribirse na web www.camaracompostela.com.
Onte pola mañá celebráronse na Facultade de Dereito do Campus de Ourense uns encontros que puxeron de relevo a importancia de protexer o noso dereito á privacidade e a información persoal das traballadoras e traballadores dunha empresa, por moito que vivamos nunha sociedade dixital onde todo tende a estar conectado e compartindo datos a tempo continuo. As Xornadas Dereito á Intimidade e Protección de Datos no Ámbito Laboral viñeron da man da dita facultade, o Consello Galego de Relacións Laborais e o Colexio Oficial de Graduados Sociais da Coruña e Ourense. Xuntaron unha manchea de profesionais dos eidos da xudicatura, a universidade e a inspección de traballo, e máis representantes das organizacións sindicais e empresariais máis sobranceiras en Galicia co obxectivo de analizar o estado actual da protección da información persoal dos equipos de traballo e os inminentes cambios normativos.
O encontro foi inaugurado polas responsables das devanditas entidades, Marta Fernández, Verónica Martínez e Susana Soneira, respectivamente. Segundo sinalaron, a decisión de abordar esta cuestión débese á importancia que recobrou nos últimos anos, polo espallamento dos medios dixitais, a cuestión do tratamento, límites e ámbito da intimidade na relación laboral. Segundo se lembrou nas xornadas, o artigo 4.2.e) do Estatuto dos Traballadores e Traballadoras dispón que na relación de traballo, os traballadores e traballadoras teñen dereito ao respecto da súa intimidade e á consideración debida á súa dignidade. Ademais, o artigo 20.3 desta norma establece que o empresario ou empresaria poderá adoptar as medidas que estime máis oportunas de vixilancia e control para verificar o cumprimento polo traballador ou traballadora das súas obrigas e deberes laborais, gardando na súa adopción e aplicación a consideración debida á súa dignidade.
Yolanda Maneiro, profesora da Universidade de Santiago de Compostela encargada de arrancar a quenda de intervencións, salientou que o impacto das novas tecnoloxías “pon en xaque” dereitos fundamentais do traballador e traballadora como son a intimidade e a protección de datos. “O límite do control do empresariado estarían”, apuntou recorrendo ao sinalado polo Tribunal de Dereitos Humanos da UE, “no principio de proporcionalidade, no requisito de necesidade e na idoneidade da medida de control, entre outros aspectos”.
Durante a xornada tamén se afondou no Regulamento (UE) 2016/679, do 27 de abril de 2016, Regulamento Xeral de Protección de Datos, que entra en vigor o vindeiro 25 de maio e que segundo se destacou na xornada “vai cambiar o panorama da protección de datos para as empresas, que deberán ser máis dilixentes no axeitado” tratamento de datos persoais. Segundo se fixo saber, “no ámbito da relación laboral vai desenvolver efectos importantes, posto que introduce novidades en relación co reforzo do consentimento, un máis esixente deber de información, a obriga de notificar os fallos de seguridade ou un encarecemento das sancións polo incumprimento, que van depender do volume de facturación da empresa”, detallaron desde a organización da xornada.
A conselleira do Mar, Rosa Quintana, adiantou esta tarde no pleno do Parlamento que a Xunta instalará nove caixeiros Ticpesc máis nos peiraos galegos. Estes dispositivos sumaranse aos 58 xa existentes nos portos autonómicos e constitúen unha ferramenta de acceso á administración electrónica que se pon a disposición do sector para que non teñan que desprazarse ás oficinas da Xunta para realizar as xestións correspondentes da súa actividade diaria.
Neste sentido, a conselleira explicou que esta ampliación do número de caixeiros telemáticos se realiza dada a súa boa acollida. Así, trasladou que os Ticpesc evitaron case 280.000 desprazamentos dos profesionais do mar ás confrarías e ás dependencias da Administración.
Ademais, Rosa Quintana tamén avanzou que está previsto mellorar e actualizar o software de 30 dos caixeiros xa instalados, coa finalidade de mellorar a súa operatividade. Ademais prevese instalar en determinados terminais un sistema de pesaxe para aportarlle funcionalidade e axilidade, permitindo que se poidan pesar os produtos da pesca e do marisqueo no mesmo momento no que se realiza o desembarque das capturas.
A conselleira aproveitou para resaltar a importancia que ten a trazabilidade dos produtos do mar. De aí, explicou, que se considerase a necesidade de ampliar a rede de terminais para que os profesionais poidan estar atendidos as 24 horas do día dos 365 días do ano sen depender dos horarios das oficinas das confrarías, das lonxas ou doutras entidades.
Nesta liña, a titular de Mar puxo de relevo o traballo realizado desde a Xunta na materia e agradeceu ao sector a achega de datos día a día. Neste aspecto explicou que a Xunta dispón de mecanismos como a Plataforma Tecnolóxica da Pesca (www.pescadegalicia.gal) a través da que se pode acceder a rexistros administrativos como os dos buques, os dos permisos de explotación do marisqueo a pé ou o das descargas e primeiras vendas de produtos do mar frescos, entre outros. A maiores, esta aplicación web tamén lle permite ao sector tramitar a alternancia de artes e xestionar telematicamente os documentos de transporte, recollida, orixe e rexistro desde calquera ordenador, sen necesidade de desprazarse.
Finalmente, Rosa Quintana fixo un balance “sumamente positivo” da evolución en materia de trazabilidade e comercialización grazas aos caixeiros Ticpesc e á aplicación web. Así, especificou que no 2017 se emitiron máis de catro millóns de notas de venda e que os documentos expedidos polo sector aumentaron un 42% na última década, ata acadar a cifra dos 314.000.
A boa noticia é que estes novos empregos estarán moi ligados á tecnoloxía, o que, en teoría, facilita a súa accesibilidade para todas as persoas.
Con todo, é necesario que empresas e organismos públicos se conciencien sobre a importancia de facer realidade este obxectivo, para evitar un incremento na brecha de emprego que xa sofren as persoas con discapacidade e as persoas maiores.
O estudo apunta a que estes máis de tres millóns de novos empregos compensaría a perda de postos de traballo que provocará a robotización de moitas profesións, que supoñerá a desaparición de 1,4 millóns de empregos.
O que é fundamental é que estes 1,4 millóns de empregos perdidos pola automatización derivada da robotización non afecten especialmente a sectores nos que as persoas con discapacidade teñen unha maior presenza.
E, sobre todo, que os máis de 3 millóns de novos empregos estean preparados para que poidan ser cubertos por todas as persoas.
O futuro debe ser inclusivo en todas as súas facetas, pero especialmente no emprego, xa que, pola contra, será unha ocasión perdida que será moi difícil de recuperar. E para iso, as novas tecnoloxías xogan un factor primordial e é necesario que todos esteamos concienciados niso.
Máis información na Web da Calculadora Incapacidade Permanente de Campmany Avogados.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...