A Axencia para a Modernización Tecnolóxica de Galicia (Amtega) publica como software libre novas versións do seu arquetipo corporativo para o desenvolvemento de aplicacións web. O código fonte liberado baixo unha licenza de software libre pode atoparse xa no repositorio de Software Libre da Xunta de Galicia (https://forxa.mancomun.org/projects/archam-spw/).
Esta liberación ofrece unha versión do arquetipo para o desenvolvemento de aplicacións web, que inclúe diversas melloras. Ademais, tras o interese despertado, publícanse tamén dúas novas versións do arquetipo especificamente adaptadas a dous dos servidores de aplicacións web máis empregados na actualidade, Apache Tomcat e WebLogic.
A nova versión xeral liberada, a 1.5.0, inclúe tamén a actualización de diversos compoñentes transversais que xa foran liberados xunto coa primeira versión do arquetipo e que agora se actualizan tamén con novas melloras. Estes compoñentes que se empregan normalmente co arquetipo poden ser empregados tamén de xeito individual e reutilizados en moitos casos de uso.
Spring é un entorno de traballo, para desenvolver aplicacións web usando a linguaxe de programación Java. O arquetipo pódese entender como un esqueleto común para a realización de aplicacións, que inclúe xa unha base a partir da cal se poden desenvolver funcionalidades máis específicas.
Este arquetipo xurde como un obxectivo interno de homoxeneizar e estandarizar todos os desenvolvementos realizados con esta tecnoloxía, cumprindo tamén cos estándares Java da Amtega o que facilita tamén o traballo aos provedores tecnolóxicos, e fomentar tamén na comunidade o desenvolvemento e reutilización de compoñentes transversais.
Esta liberación enmárcase no Plan de Acción en materia de Software Libre da Xunta de Galicia e contou coa participación da Oficina de Software Libre da Amtega, quen elaborou un informe técnico que garante a viabilidade xurídica da liberación e as condicións nas que se pode realizar. O Arquetipo publícase cunha licenza libre ASLv2 (Apache Software License version 2) e tamén baixo a EUPL (European Union Public License).
O avance tecnolóxico na nosa sociedade é imparable e é vital asegurar a accesibilidade para todas as persoas evitando barreiras dixitais dos novos produtos, procesos e servizos dixitais. Neste contexto, a xornada "Emprendemento e Investigación en Accesibilidade Dixital" celebrada na Universidade de Alacante ten como obxecto divulgar os últimos avances nesta materia e mostrar as oportunidades de investigación e emprendemento que xorden no proceso de transformación dixital.
"Unha xornada que nace da estreita colaboración e compromiso da Fundación Vodafone España e a Universidade de Alacante, a través do seu Programa de Accesibilidade Dixital, para a formación e deseño de documentos dixitais accesibles, creación de contidos web e multimedia, así como o desenvolvemento de tecnoloxías inclusivas como ListenAll e Ability Connect que hoxe se presentan", destacou a vicerreitora de Estudantes e Emprego da UA, Nuria Grané, durante a inauguración.
Pola súa banda, Antonio Álvarez, director de Administración Pública de Vodafone en Levante e Baleares, en representación da Fundación Vodafone España, animou aos máis de 90 asistentes á xornada para participar nos XIII Premios Vodafone á Innovación. "Unha nova convocatoria para desenvolver proxectos de innovación en TIC que melloren a calidade de vida de sectores da poboación que se atopen nunha situación de vulnerabilidade ou nunha posición de risco de caer na exclusión social", destacou.
Tras a inauguración, a xornada acolleu a presentación da aplicación capaz de recoñecer a voz e trascribirla a texto, ListenAll, integrada en Ability Connect, app gratuíta de comunicación para a integración de estudantes con discapacidade. Ability Connect permite que varios dispositivos se comuniquen simultaneamente a través de Bluetooth sen necesidade de conexión a internet, aínda que tamén pode funcionar mediante wifi ou datos móbiles. Ademais, expuxéronse as últimas innovacións levadas a cabo por grupos de investigación, así como os proxectos de emprendemento máis relevantes en materia de accesibilidade.
Esta xornada foi en si mesma un exemplo de accesibilidade xa que contou con bucle magnético para o seguimento oral; transcrición automática en texto a través de ListenAll e Ability Connect; intérprete de Lingua de Signos, e videostreaming.
Noticia relacionada
A Universidade de Alacante desenvolve unha nova app capaz de recoñecer a voz e trascribirla a texto
Lugo vai ter novamente unha finde tecnolóxica, logo da cita cos videoxogos e as súas vertentes máis construtivas celebrada os días pasados (o Ludus Gamin Festival). E, sen saírnos da liña construtiva, participativa e colaborativa, a concelleira de Economía Ana Prieto deu a coñecer onte a celebración do ArduinoDay na cidade da Muralla. Será este sábado 6 de abril, da man da Asociación MakersLugo e coa colaboración do Goberno local.
A cita foi dada a coñecer na sala de usos múltiples do Edificio de Novas Tecnoloxías pola edil de Economía e Emprego e o presidente da dita comunidade argalleira lucense, José Manuel López. Segundo fixeron saber, o ArduinoDay celebrarase no CEI-Nodus, poñendo en xogo todo tipo de recursos para festexar as posibilidades de traballo e desenvolvemento interactivo que se abren co hardware libre Arduino e, tamén, para poñer aos participantes mans á obra. A festa, que se celebra por sexto ano consecutivo, incluirá competicións de robots e obradoiros educativos para as persoas interesadas en profundar no mundo das tecnoloxías libres e maker. O Concello colabora con esta programación, coa que Lugo se une á centos de celebracións que se realizarán o mesmo día e por todo o mundo para homenaxear o nacemento desta plataforma, que permite a construción de dispositivos dixitais.
Na presentación, na que tamén estiveron presentes outros membros da Asociación MakersLugo, Ana Prieto convidou á veciñanza luguesa a achegarse ao CEI-Nodus a visitar este evento, aberto a todo o público. Pola súa banda, José Manuel López agradeceu a colaboración do Concello tanto co labor do colectivo como con esta cita. O ArduinoDay poderá visitarse en horario de 10:30 á 13:30 horas e de 16:30 á 19:30 horas e contará coa presenza e as iniciativas de makers que ofrecerán aos visitantes unha gran variedade de proxectos innovadores. Tamén haberá un reto de impresión 3D, charlas (unha sobre Odoo e Arduino, outra sobre Cyclops-Project e outra de iniciación á impresión 3D), competicións de robótica e obradoiros, sobre modelado en 3D, foguetes e escornabots, entre outros enxeños e tecnoloxías. Ademais as persoas interesadas en mostrar o seu traballo, ideas ou aparellos baseados en Arduino, poden apuntarse para participar na ligazón www.makerslugo.org.
En setembro contámosvos o lanzamento comercial dun dispositivo revolucionario, o Xbox Adaptive Controller, un mando para a consola de videoxogos de Microsoft pensado para facilitar que as persoas con discapacidade poidan gozar desta tecnoloxía.
Agora, case medio ano despois, a compañía realizou a presentación oficial deste mando en España. Unha vez visto o acto de presentación, ese atraso vese plenamente xustificado.
O mando deseñado e desenvolvido por Microsoft co obxectivo de que todas as persoas poidan gozar dos seus videoxogos non é un dispositivo calquera para a compañía e, por esa razón, a súa presentación non foi como a doutros produtos.
Neste caso, a presentación do Xbox Adaptive Controller estivo marcada polos testemuños de empresas e organizacións que tiveron a sorte de realizar e participar en proxectos nos que persoas con discapacidade probaban este mando.
De aí o mencionado atraso. Nestes seis meses numerosas entidades achegaron o mando ás persoas ás que vai dirixido co obxectivo de coñecer de primeira man cal é a utilidade real do mesmo. E a resposta foi moi positiva.
Segundo contaron representantes de empresas como EA, organizacións como a Fundación ONCE ou a Fundación Universia, e entidades educativas como a Universidade Francisco de Vitoria ou ENSE, a experiencia con persoas con discapacidade foi insuperable.
O Xbox Adaptive Controller permitiu a persoas con discapacidade probar por primeira vez a experiencia de xogar a un videoxogo; ou a persoas que sufriron a discapacidade de forma sobrevinda, volver gozar da súa afección.
Tamén moitas persoas con discapacidade, sobre todo novas, que podían xogar de certa maneira a estes videoxogos, emocionáronse ao comprobar como o novo mando adaptado de Microsoft permitíalles ter unha experiencia moito máis completa da diversión que ofrecen as consolas.
No acto de presentación tamén puidemos coñecer o compromiso de empresas como a propia Microsoft ou EA pola accesibilidade, incorporando este valor ao núcleo do proceso de deseño e produción dos videoxogos.
Da mesma forma, escolas que ensinan aos mozos como deseñar e programar un videoxogo, como a Universidade Francisco de Vitoria ou o ESNE, subliñaron que a accesibilidade converteuse nun punto fundamental no temario que trasladan aos seus alumnos.
O Xbox Adaptive Controller é un mando deseñado por Microsoft con dous grandes botóns centrais, varios controis adicionais e ata 24 conectores para facer a experiencia de xogo totalmente personalizable.
O mando permite conectar case calquera dispositivo e asignarlle calquera tecla ou botón do controlador, de forma que se poida adaptar ás necesidades de cada xogador.
Como xa vos comentamos con anterioridade, o Xbox Adaptive Controller é un dispositivo que marca un antes e un despois na experiencia de videoxogos de millóns de persoas con discapacidade e que debe servir como acicate á industria para apostar dunha forma máis decidida pola accesibilidade universal dos seus produtos e servizos.
A Confederación de Empresarios de Ferrol, Eume e Ortegal iniciará o vindeiro día 8 un curso de balde organizado pola Asociación TIC Ferrolterra que instruirá sobre Deseño e web e impartirase até o 12 de abril na sede da Confederación no polígono Río do Pozo de Narón. A actividade terá unha duración de dez horas, de 20:00 a 22:00 horas de luns a venres, e cada alumno terá que levar o seu propio ordenador portátil.
Os contidos do curso inclúen formación sobre coñecementos básicos de imaxe (utilización da cor, nocións de deseño), sobre como realizar a imaxe dos produtos e servizos, a documentación necesario para crear unha imaxe corporativa (tarxetas, carteis e folletos) e Internet na imaxe corporativa (uso das redes sociais e creación e mantemento dunha páxina web con posicionamento en servidores).
A partires do 23 de abril continuará o ciclo formativo con cursos sobre impresión 3D e Photoshop. En todos os casos a inscrición pode realizarse chamando por teléfono ao 981 33 33 22 ou por correo electrónico.
Representantes de sete países reúnense do 1 ao 3 de abril no centro da Orde Hospitalaria de San Xoan de Deus de Cracovia, no segundo encontro de coordinadores de LETITBE. Un proxecto con financiamento Erasmus da Comisión Europea para mellorar a vida das persoas con discapacidade a través da innovación e a tecnoloxía dixital.
Nesta ocasión reuníronse 16 participantes que inclúen coordinadores de LETITBE nos centros para persoas con discapacidade de San Xoan de Deus implicados, membros da Fundación Xoan Cidade, o responsable da oficina Hospitality Europe, un centro das Irmás de San Benito Menni e un responsable da Fundación Vodafone.
En total son sete os países que están a traballar conxuntamente para atopar solucións a problemas da vida cotiá que afrontan as persoas con discapacidade en España, Polonia, Irlanda, Alemaña, Austria, Portugal e Bélxica.
Este proxecto pon no centro a estas persoas, sendo elas as protagonistas de decidir e probar aqueles apoios e solucións tecnolóxicas que consideran importantes para as súas propias necesidades, como cociñar, viaxar en transporte público, comunicarse ou ir ao cinema.
Todo iso realízase a través da plataforma Mefacilyta, creada pola Fundación Vodafone, que colabora no desenvolvemento e mellora desta aplicación, que é de uso gratuíto e pode descargarse en diferentes dispositivos como smartphones e tablets.
O programa LETITBE ten unha duración de dous anos e desenvólvese en cinco centros de atención de persoas con discapacidade de San Xoan de Deus en España, Irlanda, Alemaña, Austria e Polonia, ademais dun centro das Irmás Hospitalarias en Portugal.
Na parte de coordinación participan a Fundación Xoan Cidade desde Madrid e a Oficina Hospitality Europe en Bruxelas, e conta coa colaboración da Fundación Vodafone España.
Acompañados por membros do noso equipo percorreron as instalacións da nosa sede central e puideron experimentar o traballo que se desenvolve en áreas de proxectos I+D+i, sistemas ou desenvolvemento para coñecer de preto o funcionamento dunha empresa tecnolóxica e o labor dos seus profesionais, levándose así unha fotografía completa da nosa actividade.
Forman parte dos 65 alumnos galegos, de entre 12 e 17 anos, que ao longo deste mes están participado na actividade Tecnólogo por un día, impulsada pola Axencia para a Modernización Tecnolóxica de Galicia (Amtega) no marco do Plan de Promoción do Talento Dixital de Galicia 2020 (DigiTalent), e que ten como obxectivo fomentar as vocacións STEM, achegando aos máis novos as profesións científico-tecnolóxicas.
Dous destes alumnos, cóntannos como viviron a experiencia.
"A miña intención é estudar unha FP en informática ou TIC e pareceume moi interesante poder participar nesta iniciativa e coñecer como se traballa nunha empresa TIC por dentro. Foi unha experiencia moi positiva e repetiríaa sen dubidalo porque che permite ver cos teus propios ollos como é o traballo e ter a oportunidade de que cho expliquen".
"Gústame estar cos computadores e a tecnoloxía en xeral. De maior quero dedicarme ao mundo TIC, non teño claro aínda a rama, pero si que a algo relacionado coa tecnoloxía, e pareceume interesante coñecer como se traballaba nunha empresa TIC".
Esta é a segunda edición da iniciativa e rexistrou máis de 200 solicitudes de 50 centros educativos de máis de 25 concellos galegos, o que supón o dobre que na primeira.
A Amtega poñerá en marcha unha nova convocatoria no segundo semestre de 2019 para continuar achegando aos mozos ás profesións TIC. Nesta nova quenda procurarase contribuír a reducir a fenda de xénero que existe entre mulleres e homes nos estudos nos campos STEM, reservando un terzo das prazas para nenas co obxectivo de reforzar o atractivo vocacional destas mozas polas profesións TIC.
En SIVSA esperamos que esta sexa a primeira doutras moitas visitas de mozos interesados no sector TIC e que, con ela, contribuamos a fomentar a súa vocación por este apaixonante mundo, poñer un pouco de luz nas súas dúbidas profesionais e, sobre todo, atraer moito talento TIC entre as futuras xeracións.
A Asociación de Enxeñeiros de Telecomunicación de Galicia convoca unha nova edición do Premio Mellor Proxecto TIC con Beneficios Sociais que, en colaboración coa Amtega, está destinado a recoñecer os mellores proxectos no ámbito das tecnoloxías da información e a comunicación que contribúan e aporten beneficios á sociedade.
A data de recepción de candidaturas remata o luns 15 de abril ás 10:00 horas e deberase remitir a solicitude de participación ao enderezo electrónico administracion@aetg.gal.
A este premio, de carácter honorífico, poderán concorrer, as persoas físicas, entidades ou pequenas ou medianas empresas, tanto de forma individual como conxunta ou con traballos de equipo, con sede en Galicia.
A Asociación de Enxeñeiros de Telecomunicación (AETG), en colaboración coa axencia AMTEGA, vén de convocar a nova edición do seu Premio Mellor Proxecto TIC con Beneficios Sociais, 2019, destinado a recoñecer as mellores contribucións no ámbito das Tecnoloxías da Información e a Comunicación a prol da solidariedade, a integración e o activismo, poñendo o foco na inclusión social e dixital e na igualdade de oportunidades. O galardón será entregado no marco da Noite Galega das Telecomunicacións e da Sociedade da Información, que se celebra o 31 de maio na Coruña (edición número 24) da man do Colexio Oficial e a Asociación de Enxeñeiros de Telecomunicación de Galicia (COETG-AETG).
Volvendo ao devandito galardón TIC solidario, a AETG lembra que as candidaturas deben ser entregadas antes das 10.00 horas do 15 de abril e estar especialmente dirixidas a potenciar fomento das tecnoloxías facilitando o seu emprego para contribuír, deste xeito, “á diminución da fenda dixital, poñendo en marcha iniciativas empresariais ou sociais de desenvolvemento, fabricación ou servizos, que incorporen un elevado nivel do uso das TIC con produtos e/ou servizos que melloren a calidade da vida das persoas”. Así, os proxectos deberán dar resposta a demandas sociais dirixidas á mellora de áreas concretas, ou ben estar dirixidos ao benestar e a calidade de vida das persoas e da sociedade en xeral. Valoraranse especialmente aquelas contribucións que atendan a colectivos en risco de exclusión dixital.
O premio, que ten carácter honorífico, é pois un incentivo para recoñecer as accións emprendidas por empresas, entidades ou particulares para “que as persoas e comunidades sexan cada vez máis dixitais mediante o acceso, uso e apropiación das TIC”, sinala a AETG. En termos máis concretos, teranse moi en conta as seguintes características nos proxectos: presentación e claridade na exposición, calidade na proposta, grao de innovación tecnolóxica ou científica, resolución de retos sociais, orixinalidade e carácter innovador da idea, público obxectivo que se vería beneficiado pola solución do proxecto, participación efectiva das persoas beneficiarias da solución TIC, aplicabilidade e pragmatismo para a obtención dos resultados nos colectivos aos que vai dirixido o proxecto, a súa madureza, a súa accesibilidade en custo para o usuario final ou a súa viabilidade comercial, entre outros parámetros.
Onte presentouse o Informe da Sociedade Dixital en España 2018 elaborado pola Fundación Telefónica, no que recollen os indicadores sociais máis relevantes que conforman o panorama da sociedade dixital á vez que analizan a evolución dos servizos dixitais e infraestruturas no ámbito estatal.
Pero os datos recollidos no informe tamén serven para facer un retrato da sociedade galega, destacando que un 62,7% dos galegos de entre 16 e 24 anos compran a través da Internet superando en 8 puntos a media estatal, mentres que o 40,4% da nosa poboación tería realizado a adquisición dalgún produto ou servizo a través da Internet nos últimos 3 meses, o que supón un crecemento interanual do 25,9% (mentres que a media estatal está nun 8,8%). Temos así que Galicia está a medrar no uso do comercio electrónico, sendo a nosa mocidade a que ten unha maior afinidade a esta forma de mercar.
O informe da Fundación Telefónica recolle que o 82,6% dos fogares galegos teñen contratado un servizo de acceso á Internet, considerándose que o usa da Internet é practicamente universal entre os menores de 34 anos, aínda que entre os galegos de entre 65 e 74 anos tamén se rexistrou un importante incremento (8,6%) con respecto ao ano anterior. No relativo á interacción coas Administracións Públicas, Galicia consegue situarse no terceiro posto de comunidades autónomas a nivel estatal, acadando un meritorio 68,2%, o que supón un crecemento interanual do 16,6% e unha posición un 2,8 puntos superior á media.
Se analizamos a España en xeral vemos como o móbil segue a ser o corazón da tecnoloxía, pechando o mes de setembro de 2018 cun parque de 53,4 millóns de liñas móbiles, ou sexa, 114 liñas por cada 100 habitantes. Tamén salientan que a cobertura das redes 4G xa chega ao 97,2% da poboación, mentres que nas comunicacións fixas a fibra óptica até o fogar xa ten unha cobertura do 71%, superando amplamente a países como Reino Unido, Alemaña ou Francia.
Pero a proliferación de liñas móbiles non indica un maior uso dos servizos de voz, senón que o informe tamén incide nunha tendencia moi asentada: a preferencia da mocidade pola mensaxería instantánea. Aseguran que o uso de mensaxes case dobra ao de chamadas por móbil e fixo, cun 60% da poboación que envía mensaxes instantáneos varias veces ao día, mentres que só un 24% fai varias chamadas polo móbil e só un 12% faría o mesmo polo fixo. Nesta liña sosteñen que o 96,8% dos mozos españois de entre 14 e 24 anos empregan o WhatsApp como canle preferente para comunicarse con familiares e amigos. Un detalle significativo no informe de 2018 é o relativo aos cambios no consumo televisivo, de xeito que o consumo audiovisual diante do televisor comeza a igualarse ao doutras pantallas (ordenadores, móbiles e tabletas), e tamén está a medrar moito o consumo en Smart TV.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...