Unha das principais vantaxes que ofrece a impresión 3D é a redución dos custos de fabricación e a posibilidade de personalizar cada peza ás necesidades dos usuarios, algo que é fundamental para a creación de tecnoloxía dirixida a persoas con discapacidade.
Un exemplo claro é o da compañía guipuscoana Gogoa, dedicada á fabricación de exoesqueletos e dispositivos dirixidos á rehabilitación e que incorporou a tecnoloxía de impresión MultiJet Fusion 3D de HP aos seus procesos produtivos.
O uso desta tecnoloxía permite a Gogoa unha gran flexibilidade no deseño dos seus produtos para mellorar o tempo de fabricación e para que se adapten facilmente a cada usuario, á vez que se abarata o prezo das próteses.
Todo iso redunda nunha mellora da calidade de vida dos usuarios destas próteses, moitas das cales están destinadas a persoas que están en proceso de rehabilitación para recuperar o movemento das súas extremidades inferiores.
É o caso do exoesqueleto Hank, desenvolvido por Gogoa, que está deseñado para axudar a persoas con dano cerebral adquirido (ABD) ou lesións na medula espinal nos procesos de rehabilitación.
Este exoesqueleto está considerado un dos máis lixeiros e avanzados do mercado e incorpora toda a tecnoloxía para o control deste tipo de dispositivos, incluído o control mediante sinais electroencefalográficas (EEG).
O control do exoesqueleto mediante sinais EEG permite reforzar as conexións neuronais de persoas con dano cerebral e mesmo abre a posibilidade a que unha persoa con paraplexia ou cuadriplexia poida volver camiñar.
Sen dúbida o desenvolvemento da impresión 3D é un dos avances máis importante no desenvolvemento de tecnoloxía e dispositivos dirixidos a persoas con discapacidade.
O conselleiro de Economía, Emprego e Industria, Francisco Conde, subliñou o importante estímulo que supón a feira científica Galiciencia á creatividade e o talento para innovar dos máis novos, permitíndolles achegarse á ciencia a través do xogo e a creación e contribuíndo a espertar as vocacións científicas.
Conde asistiu no Auditorio de Ourense ao espectáculo “A maxia da ciencia”, organizado polo Parque Tecnolóxico de Galicia-Tecnópole coa colaboración da Consellería de Economía, Emprego e Industria e da Fundación Española para a Ciencia e a Tecnoloxía (Fecyt).
Con esta iniciativa, búscase estender á cidadanía a invitación para acudir polas tardes, á marxe das visitas dos grupos escolares, á Galiciencia, que terá lugar entre o 8 e o 10 de maio no recinto de Tecnópole, en San Cibrao das Viñas (Ourense), coa saúde e os bos hábitos como tema principal.
A partir do mércores da próxima semana, pasarán pola décimo cuarta Galiciencia máis de 150 investigadores noveis procedentes de 30 centros educativos de Galicia. Agárdase que pasen pola feira máis de 2.000 visitantes, entre visitas organizadas de escolares, familias e particulares.
O conselleiro de Economía, Emprego e Industria, Francisco Conde, salientou hoxe en Ourense que o Technium R Encounter, que reúne durante toda a fin de semana a arredor de 500 afeccionados e profesionais da informática, permite achegar aos máis novos dun xeito lúdico tecnoloxías como a realidade virtual, a robótica ou a impresión 3D, ferramentas de traballo da fábrica do futuro.
Na súa intervención, o conselleiro apuntou que esta cita, que promove o intercambio de coñecementos e que inclúe distintas actividades como obradoiros e conferencias, é unha gran oportunidade para coñecer as últimas novidades tecnolóxicas que xa están no mercado.
Do mesmo xeito, fixo fincapé en que esta cita está centrada no talento e na creatividade, e contribúe a que a sociedade galega vaia incorporando as novas tecnoloxías desde o punto de vista da actividade económica, favorecendo que o talento vinculado á informática reverta no tecido empresarial.
Francisco Conde sinalou que a cuarta revolución industrial está a facer da tecnoloxía dixital o gran elemento transformador, apuntando que calquera empresa que queira ser hoxe en día competitiva e eficiente ten que dar o salto dixital.
Nese sentido, cómpre sinalar que en Galicia as empresas aumentaron nun 80% o investimento en tecnoloxías da información e a comunicación (TIC), ata superar os 364 millóns de euros. Ademais, un 13% das empresas galegas con 10 ou máis traballadores xa emprega robots, o que sitúa a Comunidade dous puntos por riba da media estatal.
Kent Cullers é un astrofísico estadounidense que soñou desde neno con traballar na NASA e non se detivo ata conseguilo. Durante varios anos foi un dos responsables do famoso programa SETI, destinado a atopar sinais de intelixencia extraterrestre no espazo. A súa historia, aínda que non demasiado común (obviamente hai máis camareiros que astrofísicos no mundo), alcanza a categoría de extraordinaria por un simple detalle: Cullers é cego. De feito, probablemente sexa o primeiro astrónomo cego en Estados Unidos. Esta peculiaridade fixo mesmo que Robert Zemeckis se inspirase nel para crear un dos personaxes da súa película Contact. A historia de Cullers, do mesmo xeito que a doutros ilustres invidentes como Ray Charles ou Jorge Luís Borges, demostra que con tesón e unha vocación verdadeira os invidentes poden desempeñar practicamente calquera actividade profesional. Con tesón e coa axuda das ferramentas adecuadas, claro.
Ferramentas como a deseñada por Kristina Tsvetanova. As dificultades dun amigo invidente para inscribirse nun curso online, algo que para a maioría das persoas é un simple trámite, foi o que animou a enxeñeira búlgara a buscar unha solución que permitise aos cegos saltar sobre a fenda dixital. "Só o 1% da información total está dispoñible en braille. E esta é a única posibilidade que teñen os nenos e os adultos de alfabetizarse, de aprender a ler e a escribir", explica Tsvetanova. "É crucial para que despois poidan atopar un emprego". E se falamos de información na actualidade, do que falamos é do mundo dixital e da internet. Un mundo que resulta menos accesible para os 285 millóns de persoas que sofren algún tipo de discapacidade visual. Desa inxustiza que emocionou a Tsvetanova e da súa inquietude por axudar xurdiu Blitab, a primeira tableta do mercado capaz de converter en braille texto e gráficos procedentes de páxinas web ou dispositivos de almacenamento dixitais como unha memoria USB, e facelo ademais en tempo real. O sistema creado por Tsvetanova e os seus socios consiste nun líquido intelixente que se levanta formando pequenas burbullas para que poida ser lido.
Blitab permitirá aos invidentes estudar, informarse, xogar... e sobre todo sentirse parte dunha sociedade na que ninguén debe quedar excluído. Compañías, organizacións sen ánimo de lucro, gobernos e universidades de todo o mundo xa se interesaron pola súa idea, o que lle augura unha máis que interesante proxección. Tsevetanova, seleccionada como unha dos 35 innovadores menores de 35 polo MIT, pensa que os dispositivos que utilizan o audio non son competidores para Blitab porque "o braille nunca morrerá do mesmo xeito que a palabra escrita tampouco o fará". Unha idea fermosa e esperanzadora.
Este 3 de maio inaugúrase o encontro informático ourensán Technium R Encounter 2019, a gran cita da tempada para a nosa comunidade de seareiras e seareiros das novas tecnoloxías para compartir e tamén, para construír. A cita, que se desenvolve en Expourense, contará para a apertura oficial de actividades (ás 12.00 horas) coa presenza do conselleiro de Economía, Francisco Conde, e máis do director xeral da operadora galega R, Alfredo Ramos.
Segundo apunta a organización (a devandita compañía de cable), por primeira vez na historia, o encontro informático desenvólvese no recinto de Expourense, e co engadido extra de ofrecer unha velocidade de conexión de 10 Gbps. A sétima edición da party tamén fornecerá á comunidade de asistentes dunha contorna aberta ao público, de acceso libre e de balde, na que poderán coñecer de preto as últimas novidades TIC.
Deste xeito, preto de 500 participantes tomarán parte nun evento sen ánimo de lucro organizado pola asociación Technium e que conta co patrocinio da Xunta de Galicia, de R e de Expourense. Os organizadores esperan que o novo espazo aberto ao público, denominado Extranet, tamén atraia centos de visitantes, xa que poderán acceder a conferencias gratuítas e recantos interactivos adicados ás impresoras 3D, os videoxogos e a realidade virtual.
A tecnoloxía utiliza habitualmente sinais alternativos para facer chegar a información ás persoas con discapacidade, e unha das opcións máis recorrentes é a vibración que permite comunicar obxectos con persoas cunha discapacidade sensorial.
En máis dunha ocasión vimos dispositivos para persoas con discapacidade visual que utilizan a vibración para transmitir a información ao usuario, e nesta ocasión son as persoas con discapacidade auditiva as que a través deste tipo de sinais son capaces de mellorar a súa relación coa contorna.
Falamos dunhas luvas que está a desenvolver o Centro Español do Subtitulado e a Audiodescripción (CESyA) que conta cunha serie de actuadores e vibradores que busca transmitir distinta información sonora ao usuario.
En concreto, segundo explica o subdirector do CESyA, José Manuel Sánchez Pena, este dispositivo é capaz de trasladar ás persoas con discapacidade auditiva determinadas características do son, como o ritmo ou a aspereza, a través de vibracións.
O CESyA presentou esta luva na celebración de Sinfoton2-CM, un programa de actividades sobre tecnoloxía fotónica da Comunidade de Madrid.
Nesta edición, a entidade participa en Sinfoton2-CM compartindo os seus avances en optoelectrónica, é dicir, tecnoloxía que combina a óptica e a electrónica e que está orientada á adaptación de postos de traballo, servizos hospitalarios e o acceso ao lecer a persoas con discapacidade sensorial.
Un equipo da Universidade de Vigo vén de facerse cun dos premios estatais do certame HackForGood, convocado anualmente por Telefónica para impulsar proxectos e contribucións tecnolóxicas “en positivo” (solidarias, sociais, humanitarias, activistas) da comunidade hacker dos campus. O equipo da UVigo, que tamén se impuxo na edición local (HackForGood Galicia) de 2018, foi recoñecido no marco do HackForGood Big Day, o peche anual do evento de innovación social e interuniversitario HackForGood.
A cita celebrouse o pasado venres no Auditorio Innovation Center no Distrito Telefónica (Madrid) e nela o equipo vigués competiu con outros oito gañadores do HackForGood 2018 a nivel nacional. O grupo da UVigo, constituído por cinco estudantes da Escola de Enxeñaría de Telecomunicación, foi o creador de Atopa Project, unha aplicación web dirixida a loitar contra a exclusión social desde a escola baseada no uso da sociometría.
Os equipos participantes expuxeron os seus traballos un ano máis tarde de gañar a correspondente edición local para que os membros do xurado (composto por representantes de doce universidades de toda España e sete representantes de diversas áreas de negocio da compañía Telefónica) puidesen comprobar a evolución de cada un dos traballos gañadores das distintas sedes do evento. Finalmente o equipo vigués, composto por María Cabrero, Marta Blanco, Adrián Lombardía, Miguel Ángel Otero e Sara Berezo, fíxose co terceiro premio, dotado con 1.000 euros.
Atopa Project xurdiu ao abeiro da asociación viguesa TEAVI, Transtornos do Espectro Autista, que foron os que primeiro se decataron de que a exclusión social é un dos principais problemas no ámbito escolar. “Nós, cinco alumnos da EE de Telecomunicación especializados en imaxe e son, sistemas de telecomunicación e telemática, decidimos abordar este problema e iniciar un desenvolvemento que poña solución a este problema”, explica o equipo nas súas redes sociais. Atopa, que o ano pasado conseguiu tamén un dos premios dos LProDays da EE de Telecomunicación, é unha aplicación web dividida en dúas interfaces: unha para o docente e outra para o alumno/a. Na interface do alumnado permítese responder a unha serie de preguntas, cun respaldo psicolóxico previo, que permitan establecer as relacións sociais de cada neno ou nena. No caso da do profesor a interface ten a opción de modificar as preguntas para adecualas ás diferentes idades escolares e, por outra banda, coas respostas obtidas do alumnado, permite visualizar un sociograma por pregunta.
O edificio CINC da Cidade da Cultura vai dar acollida á XVII edición de GaliciaTIC, o histórico evento tecnolóxico galego, un referente para calquera cita de profesionais e empresas dixitais de cantas se celebran na nosa terra e no ámbito estatal. A cita será o 23 de maio e virá, novamente, da man da Asociación de Empresas de Tecnoloxía de Galicia (Ineo) e a empresa INETEC. Ademais, desenvolverase baixo o epígrafe Tendencias tecnolóxicas e oportunidades para Galicia.
Segundo fai saber Ineo acerca dos principais desafíos que se mostran e encaran en GaliciaTIC, o tempo que estamos a vivir é un intre clave de maduración nas tecnoloxías innovadoras e a súa aplicación ao mundo empresarial e á sociedade: un intre para achegar impulsos á transformación tecnolóxica dos sectores e das empresas, poñendo o foco nas de menor tamaño. “É por iso que na vindeira edición de GaliciaTIC seguiremos contribuíndo á devandita transformación, atraendo a sectores non tecnolóxicos e emprestando especial atención ás ferramentas e servizos que conformarán un novo ecosistema dixital nos vindeiros anos”, explican dende a organización do evento, que concentrará as actividades previstas nunha xornada matinal na que se darán cita ducias de profesionais do sector TIC e, tamén, representantes diversos de empresas non tecnolóxicas.
Respecto do programa, o encontro dará comezo ás 9.30 co acto inaugural a cargo de Mar Pereira, directora de AMTEGA, e Luis Álvarez Sestelo, Miguel Merino e Carlos Suárez. A continuación será a quenda da conferencia inaugural, que virá da man de Ed Gabrys, analista, senior director e responsable de comunicacións de Gartner. Logo será a quenda das mesas temáticas (sobre Cidades Intelixentes e traballo na nube, a cargo de Imatia e Ozona) e, despois dunha pausa para o café, falarase sobre 5G, seguridade, Intelixencia Artificial, eSaúde e captación de talento (organizan Deloitte, Orange, a operadora galega R, Sanitas, Ineo e a Fundación Kion).
A Axencia para a Modernización Tecnolóxica de Galicia continúa a desenvolver as medidas previstas na Axenda Dixital de Galicia 2020 en colaboración cos axentes do sector. Con este obxectivo, a directora da Amtega, Mar Pereira, e o presidente do Colexio Profesional de Enxeñaría en Informática (CPEIG), Fernando Suárez, renovaron recentemente a cooperación que veñen mantendo nos últimos anos coa sinatura dun acordo con tres liñas de actuación, que se desenvolverán ao longo deste ano.
O convenio recolle a celebración da segunda edición do Programa Tech Kids, unha das actividades enmarcadas no Plan Digitalent da Amtega, que ten entre os seus obxectivos fomentar as vocacións STEM entre a mocidade galega.
Durante 2019 o CPEIG organizará un mínimo de 40 xornadas Tech Kids distribuídas pola xeografía galega con diferentes desafíos temáticos dirixidos á franxa de idade de 10 a 16 anos. Os rapaces e rapazas que participen poderán achegarse dun xeito lúdico ao desenvolvemento de aplicacións para dispositivos móbiles, ao deseño de videoxogos, á creación de contidos dixitais, á programación de drons ou á robótica.
A través destas actividades, rapazas e rapaces aplicarán conceptos de matemáticas, ciencia e tecnoloxía na vida real e potenciarán habilidades e competencias como o traballo en equipo, a resolución de problemas e a comunicación.
O CPEIG realizará tamén ata seis cursos de distintas temáticas orientados a especialización de ata 300 profesionais do ámbito TIC, que combinarán a modalidade semipresencial e de teleformación para facilitar a participación.
As actuacións previstas polo CPEIG completaranse con actividades de difusión para profesionais, organismos e empresas do sector TIC galego en temas de investigación, tendencias de mercado, innovación, etc.
A Amtega achegará ao Colexio Profesional de Enxeñaría en Informática (CPEIG) 65.000 euros para o desenvolvemento destas actividades.
O pasado 25 de abril, Trainnova no seu compromiso como aliado dixital do Plan de Inclusión Dixital de Galicia, sumouse á conmemoración do Día das Rapazas nas TIC programando e desenvolvendo unha actividade para un grupo de rapazas de entre 14 e 17 anos do Complexo de Atención a Menores de Ferrol co obxectivo de promover o seu interese na tecnoloxía.
A iniciativa promovida por Trainnova foi deseñada coa finalidade última de contribuír á creación dunha contorna mundial que empodere ás nenas e ás rapazas e as alente a contemplar unha vida profesional no eido das TIC, para que deste modo elas, e tamén as empresas tecnolóxicas, cultiven os beneficios dunha maior participación das mulleres no sector TIC.
Con motivo deste evento, as rapazas do Complexo de Atención a Menores de Ferrol tiveron a ocasión de achegarse á programación de videoxogos en tres dimensións (Kodu 3D) e á robótica e a programación a través da actividade de Robobo, un robot deseñado por unha spinoff da UDC.
Con Robobo as rapazas programaron o sistema de control do robot e posteriormente tiveron ocasión de conducilo para que aparcara nunha das dúas prazas de estacionamento que había: a de Ada Lovelace e a de Eva María Kiesler (Hedy Lamarr), na que unha vez aparcados os robots, estes explicaban quen era cada unha destas mulleres de referencia no campo das TIC que revolucionaron unha parte da tecnoloxía en tempos moi complicados para as mulleres e máis aínda nas TIC.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...