main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

30/05/201612:43
Logo 1 mes 1 profesión dixital
A Coruña

O Cloud computing a debate nun novo faladoiro dixital, organizado polo CPEIG e a Amtega

  • A xornada desenvolverase o 7 de xuño na Facultade de Informática da Coruña, no marco da campaña de divulgación e difusión de novos perfís profesionais na era dixital

O Cloud Computing protagonizará o novo faladoiro dixital, organizado polo Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (Amtega), no marco da campaña de divulgación e difusión de novos perfís profesionais na era dixital. O encontro desenvolverase na Facultade de Informática da Coruña (FIC) o vindeiro 7 de xuño de 11.15 a 14.00 horas.

Tras a benvida institucional, a cargo do presidente do CPEIG, Fernando Suárez, e do decano da facultade, Luis Hervella, o profesor doutor da FIC, Guillermo López, falará da oferta formativa en Cloud Computing. A continuación, o xerente de Tecnoloxía e Contornos Colaborativos en Hijos de Rivera, Carlos López, e a responsable de Sistemas Informáticos e Telecomunicacións en Auto Radio, Cristina Bernárdez, analizarán as boas prácticas de solucións Cloud.

Un debate aberto ao público pechará este faladoiro dixital ao redor do Cloud Computing. As persoas interesadas en asistir poden inscribirse xa de balde no enderezo eventos@cpeig.org e a través da web www.profesionsdixitais.org, onde tamén atoparán información do programa e dos relatores.

 

1 mes, 1 profesión dixital

A campaña 1 mes, 1 profesión dixital arrincou a súa segunda edición o mes pasado en Ourense, abordando as oportunidades profesionais e boas prácticas ao redor do Big Data. O obxectivo xeral é crear conciencia da necesidade que teñen os cidadáns de mellorar o seu dominio da tecnoloxía da información e a comunicación cara ao emprego. A iniciativa é froito do acordo de colaboración asinado no presente ano entre o CPEIG e a Amtega.

30/05/201612:19
Cartel do premio
Santiago

A Amtega convoca a IX edición do Premio ao Mellor Proxecto Universitario con licenza libre

  • Pode presentarse calquera estudante do Sistema Universitario Galego que teña defendido o seu Proxecto de Fin de Carreira, Traballo de Fin de Grao ou Traballo de Fin de Mestrado nalgunha das convocatorias do ano académico 2015-16
  • O prazo de presentación de candidaturas estará aberto ata o vindeiro 2 de outubro

A Axencia para a Modernización Tecnolóxica de Galicia (Amtega) convoca a IX edición do Premio ao Mellor Proxecto Universitario con Licenza Libre co obxectivo de achegar aos universitarios galegos ao software libre e difundir ás posibilidades de emprego que lles pode abrir a publicación ou colaboración con proxectos libres.

O premio está dotado con 2.250 euros, repartidos nun primeiro premio de 1.500€ e nun segundo de 750 euros, grazas á achega do Consorcio para o desenvolvemento de aplicacións para a Xestión Universitaria (CIXUG), e do Grupo de programadores e usuarios de Linux (GPUL), respectivamente. Ambas entidades son patrocinadoras do premio no marco do convenios de colaboración asinados coa Amtega para a realización de actividades de promoción do Software Libre en Galicia.

 

Requisitos e prazos
Pode optar ao premio calquera estudante do Sistema Universitario Galego que teña defendido o seu Proxecto de Fin de Carreira, Traballo de Fin de Grao ou Traballo de Fin de Mestrado cunha nota mínima de 5, nalgunha das convocatorias do ano académico 2015-2016. O prazo de presentación de candidaturas estará aberto ata o domingo, 2 de outubro.

Os requisitos que deben cumprir estes traballos son: ter sido realizados cunha implementación libre de calquera linguaxe de programación e ter publicado o software desenvolvido durante o proxecto cunha licenza libre entre as recoñecidas como tal pola Free Software Foundation ou a Open Source Initiative. Así mesmo, tamén poden participar proxectos que fagan uso de Hardware Libre.

Toda a información sobre como participar está dispoñible na páxina do premio dentro do portal mancomún (https://www.mancomun.gal/premiopfc/nova venta). Ademais, para calquera consulta pode contactarse coa organización do premio, tanto a través da Oficina de Coordinación de Software Libre da Amtega como da Oficina de Software Libre do CIXUG.

 

Plan de Software Libre da Xunta
Esta iniciativa enmárcase no Plan de Acción de Software Libre 2016 da Xunta de Galicia, dentro das liñas de actuación para mellorar e potenciar os mecanismos de formación e difusión do software de fontes abertas entre a cidadanía galega e en particular no estudantado universitario.

Este premio, que vai pola súa IX edición, ten a súa orixe no ano 2007 da man da empresa galega Igalia, quen ao detectar a carencia de profesionais cunha alta especialización neste área decidiu poñer o seu gran de area para reducir esa falla poñendo en marcha este premio. Dende o curso 2011-2012 este premio é convocado e organizado pola Amtega como parte do seu Plan de acción en materia de software libre, para o que conta coa colaboración e apoio dos distintos axentes do ecosistema do software libre galego.

Con esta iniciativa a Xunta desexa continuar poñendo en valor o traballo que realizan os universitarios galegos durante o seu traballo fin de grao ou mestrado, promovendo o emprego e difusión do Software Libre como ferramenta de achegamento ao mundo laboral.

Na edición do ano 2015 resultou como gañador Xoan Iago Suárez Canosa polo proxecto “Aplicación web para a Análise do comportamento humano en zonas transitadas”. Así mesmo, concedeuse o segundo premio a Pablo Grela Palleiro polo proxecto “ Sistema de xestión de asociados de CuacFM”.

30/05/201609:23
Web Faite Dixital
Santiago

A Amtega publica o portal “Faite Dixit@l!”, que integra todos os recursos e iniciativas do Plan de Inclusión Dixital de Galicia

  • O Plan ofrece á sociedade galega un servizo integral de dixitalización para que todo o mundo poida explotar e aproveitar o potencial das TIC a nivel persoal, profesional e relacional
  • Conta xa co apoio de 700 aliados dixitais e pódense adherir ao Plan profesionais e entidades públicas ou privadas que estean interesadas en colaborar para conseguir un efecto multiplicador das súas actuacións

A Axencia para a Modernización Tecnolóxica de Galicia (Amtega) vén de publicar o portal Faite Dixit@l, a páxina que integra nun único espazo os servizos, proxectos e actividades impulsadas no Plan de Inclusión Dixital de Galicia 2020.

Coa posta en marcha de http://faitedixital.xunta.gal/, a cidadanía conta cun único punto de acceso ás distintas iniciativas que se están a desenvolver en Galicia en torno aos tres eixos principais do Plan, tanto os da alfabetización e a capacitación dixitais, como o orientado ao impulso da innovación social dixital.

 

Estrutura da Web
Faite Dixit@l dispón dunha portada inicial, onde se presenta o Plan de Inclusión Dixital de Galicia 2020, así como a formación e os proxectos dispoñibles en cada un dos tres eidos de actuación. O resto do contido estrutúrase en cinco bloques: A Estratexia, Os Aliados Dixitais, Os Servizos, Os Recursos e A Actualidade.

No apartado da Estratexia, a web ofrece toda a información relacionada con Plan de Inclusión Dixital de Galicia: os seus valores, obxectivos, os destinatarios, os servizos, así como o camiño percorrido cos proxectos da Rede CeMIT e o Programa de Voluntariado Dixital, xa que foron o punto de partida para posta en marcha do Plan.

O espazo dos Aliados Dixitais explica os pasos para adherirse ao Plan como aliado dixital e mostra os diferentes perfiles de aliados: mecenas, referentes, menores, voluntarios e entidades colaboradoras, e as súas achegas.

O bloque dos Servizos presenta o catálogo de servizos dixitais dispoñibles tanto de formación presencial, teleformación, certificación de competencias dixitais en ofimática, proxectos e iniciativas singulares, faladoiros e apoios dixitais.

En Recursos os usuarios acceden aos diferentes tipos recursos que teñen a súa disposición: a rede de aulas CeMIT, o mapa de e-Servizos de inclusión dixital, a comunidade virtual do voluntariado dixital, o espazo multimedia de aprendizaxe así coma contidos e publicacións de interese. Finalmente a web tamén dispón dun apartado de Actualidade, que permite acceder as novas e eventos, proxectos, informes de interese en torno á inclusión dixital.

 

Accesibilidade e fácil navegación
A organización dos contidos céntrase en darlle un maior protagonismo aos usuarios finais do Plan de Inclusión Dixital, xa que facilita a busca e acceso áxil á información que máis se adapte as súas necesidades, cuns contidos estruturados.

Ademais, o deseño interactivo e innovador faino máis atractivo aos usuarios e o ton e linguaxe accesible e amigable facilita a lectura. Faite Dixital interacciona coas outras Webs operativas relacionadas co Plan como a da Rede CeMIT: https://cemit.xunta.gal, a do voluntariado Dixital:https://voluntariadodixital.xunta.gal, a do Centro Demostrador TIC: https://cdtic.xunta.gal/ e o Blog Xente Dixital http://blogs.xunta.gal/xentedixital/es/

 

Un Plan con máis de 700 aliados
O Plan de Inclusión Dixital de Galicia 2020, presentado o pasado 18 de maio ante os máis de 700 aliados cos que conta, busca acadar unha sociedade plenamente dixital formada e capacitada no uso das tecnoloxías, capaz de explotar e aproveitar todo o potencial das TIC a nivel persoal, profesional e relacional.

Cun orzamento de máis de 7 millóns de euros en cinco anos o Plan articúlase en torno a un novo modelo de relación flexible e en rede, sustentado en alianzas dixitais entre a Xunta de Galicia e os diferentes axentes do ecosistema dixital que permitirá sumar capacidades, recursos e iniciativas.

O Plan ofrece á sociedade galega un servizo integral de dixitalización que abrangue desde as accións para a alfabetización dixital ata aquelas que permitan a calquera persoa, independentemente do nivel dixital no que se atope, avanzar, madurar e acceder a maiores niveis de coñecemento e uso das TIC. Para acadar este obxectivo o Plan establece actuacións en 3 grandes eixos estratéxicos: a alfabetización dixital, a capacitación dixital e a innovación social dixital e participativa.

26/05/201609:43
Pleno OSIMGA 2016
Santiago

O Osimga aborda este ano tres novas liñas de estudo sobre o uso das TIC na comunidade

  • Por primeira vez elaborará informes específicos sobre o emprego das TIC entre as persoas maiores, entre as persoas con discapacidade e sobre a situación da sociedade da información no ámbito rural
  • Ademais, presentará dous traballos vinculados a medidas da Axenda Dixital de Galicia 2020: o Mapa da Innovación Social Dixital en Galicia e o Estudo sobre a Demanda de novos perfís Dixitais
  • Mar Pereira deu conta no pleno do organismo das actuacións do primeiro ano da Axenda 2020, que mobilizaron 158 millóns de euros

O Observatorio da Sociedade da Información e a Comunicación de Galicia (Osimga) da Axencia para a Modernización Tecnolóxica de Galicia (Amtega) amplía o seus ámbitos de análise con tres novos estudos específicos sobre: o uso das TIC entre as persoas maiores e entre as persoas con discapacidade; e a situación da sociedade da información no rural.

Ademais, o Osimga presentará este ano dous traballos vinculados a medidas da Axenda Dixital de Galicia 2020 (ADG2020): Mapa da Innovación Social Dixital en Galicia, enmarcado no Plan de Inclusión; e o estudo sobre a Demanda de novos Perfís Dixitais, contemplado no Plan Transformatic. O Observatorio realizou o pasado ano un total de 40 informes e a súa web recibíu máis de 100.000 visitas.

O traballo do Osimga permite coñecer o nivel de desenvolvemento, a tendencia e os problemas que poden afectar á extensión da Sociedade da Información na Comunidade e facilita a definición das políticas públicas neste ámbito. Ademais, o Observatorio é o organismo encargado do seguimento e avaliación das medidas políticas tecnolóxicas da Administración autonómica.

O pleno anual do Observatorio celebrouse esta mañá en Santiago, presidido pola directora da Amtega, Mar Pereira, que deu conta das medidas desenvolvidas no primeiro ano da ADG 2020. En 2015 a Axenda Dixital para 2020 mobilizou 158 millóns de euros nas actuacións das súas cinco liñas estratéxicas: Valoración da Administración, Énfase na vida Dixital, Aceleración da Economía Dixital, Estímulo ao Crecemento do Sector TIC e Articulación Dixital do Territorio.

 

Valorización da Administración
No eido da Administración avanzouse na consolidación dunha administración dixital co 70% dos trámites dispoñibles online na sede electrónica, a entrada en funcionamento do sistema Chave 365 para simplificar o uso da sede; e a posta en marcha da plataforma de interoperabilidade Pasaxe! que rexistrou 1,8 millóns de consultas. O arranque do Arquivo Electrónico da Xunta foi outro dos fitos para avanzar cada unha administración totalmente dixital.

Na Administración da Xustiza continuouse coa dotación de equipamento e medios TIC prevista no Plan Senda, que permitiu consolidar o uso de Lexnet con 4,5 millóns de notificacións; estender o sistema de gravación de vistas con sinatura dixital ata o 79% das salas e que o 84% dispoña de videoconferencia.

 

Énfase na vida dixital
O proceso de transformación da educación tradicional en dixital avanzou da man do Proxecto Abalar, con máis de 6.000 rapaces e rapazas integrados en eDixgal, empregando só contidos dixitais no curso 2015-2016.

As aulas públicas de formación dixital CeMIT, incrementaron en 10.000 o número de usuarios, rexistrando a finais de 2015 un total de 53.800. Emitíronse 790 certificacións de Competencias Dixitais en Ofimática e desenvolvéronse 20 proxectos de innovación social dixital.

En canto á modernización do servizos sociais, sentáronse as bases para a entrada en funcionamento da Historia Social Única Electrónica, que entrará en funcionamento despois do verán.

 

Aceleración da Economía Dixital e Estímulo ao sector TIC
Potenciar a transformación dixital do tecido empresarial galego é un dos obxectivos da Axenda. As preto de 100 actuacións do Centro Demostrador TIC de Galicia así como o acordo entre Amtega e Igape para impulsar a dixitalización empresarial e a industria 4.0 no no período 2016- 2020 entre as pemes galegas que buscan avanzar cara ese obxectivo

O estímulo ao sector TIC é outra das prioridades da Axenda Dixital que se materializa coas medidas do Pacto Dixital como Galicia Open Future e outras actuacións como Vía Galicia e e a aprobación da Estratexia de Internacionalización da Empresa 4.0.

 

Articulación Dixital do Territorio
A aprobación do Plan de Banda Larga 2020 para dotar de acceso a redes ultrarrápidas a todos os galegos e a posta en marcha da Rede Dixital de Emerxencias de Galicia, son dúas das medidas para garantir unha Galicia conectada e adaptada ás novas demandas da sociedade dixital.

24/05/201609:16
Logo Fundación Vodafone España
Santiago

A Fundación Vodafone España recibirá o Premio e-Inclusión, un dos galardóns da “Noite da Enxeñaría en Informática de Galicia”

  • As actividades da entidade diríxense ao desenvolvemento das TIC para fomentar a accesibilidade universal e a inserción

O Colexio Profesional de Enxeñaría en Informática de Galicia (CPEIG) vén de facer público o recoñecemento á Fundación Vodafone España, gañadora do premio e-Inclusión pola súa acción social que realiza en todos os países nos que opera, un total de 27, nos cinco continentes. A acción en todos eses estados englóbase baixo o lei motiv “Connecting for Good” (C4G).

O CPEIG fará entrega do galardón o vindeiro día 3 de xuño dentro da “Noite da Enxeñaría en Informática de Galicia”, que terá lugar no Hotel-Monumento San Francisco en Santiago de Compostela.

A Xunta de Goberno do CPEIG valorou que a Fundación Vodafone España é unha institución non lucrativa, de ámbito nacional, que forma parte do Grupo Vodafone, unha das principais corporacións do mundo do sector das telecomunicacións.

A prol dos grupos vulnerables
As actividades da Fundación Vodafone España  diríxense ao desenvolvemento das TIC para fomentar a accesibilidade universal, a vida independente e a inserción socio- laboral a prol dos grupos vulnerables, especialmente maiores e persoas con discapacidade.

Realiza os seus proxectos  en colaboración con institucións representantes deses colectivos relacionadas coa investigación, a formación e a atención (Cruz Vermella, ONCE, CNSE, Conf ASPACE, COGAMI, CEOMA, FEGAUS, ATEGAL, PREDIF, PLENA Inclusión, Orden de San Juan de Dios ou Down España, entre outras). Ademais, contribúe á difusión das telecomunicacións na sociedade a través de publicacións e informes. Pódese ver, resumido, en:  https://www.youtube.com/watch?v=iISkEqfRkik

Catro programas principais enmarcan as devanditas actividades:

  • Promoción do Coñecemento C4G: estudos, investigacións, obradoiros e congresos para divulgar as oportunidades das TIC  para dar resposta ás necesidades de colectivos vulnerables; ademais de convocatorias nacionais, entre outras, os Premios Vodafone de Periodismo.
  • Desenvolvemento e despregamento de Solución C4G: proxectos de innovación en TIC accesibles para mellorar a calidade de vida de grupos vulnerables e transferilos á sociedade de forma sustentable.
  • Formación C4G, para conseguir, por un lado, a empregabilidade das persoas con discapacidade a partir da formación nesas novas tecnoloxías e, por outro, evitar a fenda dixital nas persoas maiores.
  • Colaboracións C4G: acordos e participacións estratéxicas en fundacións e/ou a través de acordos marcos de colaboración que vinculen asociacións de colectivos vulnerables. 

E un quinto, complementario:

  • Outras actividades adicionais, que recollen accións puntuais, tanto rexionais como a nivel de Grupo.

En Galicia, a Fundación Vodafone España está presente cos seus programas desde a súa creación.

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS