main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

01/07/201608:29
Logo form@carm
Santiago de Compostela

form@carm: Formación online para dinamizadores das redes de telecentros

A Asociación de Telecentros abrirá un novo proceso formativo para os dinamizadores das súas redes de telecentros, esta formación que se realizará a través da plataforma de e-learning form@carm, é froito da colaboración da asociación coa Comunidade Autónoma da Rexión de Murcia e a Fundación Integra, e nela un total de 600 dinamizadores das redes de telecentros de, Andalucía, Asturias, Castela e León, Estremadura, Forteventura, Galicia e Navarra poderán realizar varios cursos ata marzo de 2017.

A oferta formativa de form@carm compona diversos cursos e foron elaborados cunha metodoloxía e recursos multimedia que facilitan a adquisición de coñecementos de forma sinxela e cómoda. O alto grao de satisfacción dos alumnos que cursaron os distintos cursos avala a calidade dos contidos ofertados. Actualmente form@carm está a xogar un importante papel na Rexión de Murcia ao complementar a aprendizaxe e a capacitación tanto de emprendedores e empresarios como de traballadores en activo e desempregados co fin de promover a súa reciclaxe e inserción no mundo laboral.

A acción formativa estrutúrase en tres fases, unha fase inicial, antes do verán, de dinamización entre as redes participantes, unha segunda fase de preinscrición e validación de matriculacións, en setembro e unha última fase de formación online, na que os dinamizadores terán 6 meses de acceso aos diferentes cursos , podendo realizar tantos como desexen, coa limitación de 3 cursos simultáneos.

form@carm é un proxecto xestionado pola Fundación Integra e financiado con fondos europeos FEDER da Unión Europea nun 80 %, e nun 20 % por fondos propios da Comunidade Autónoma da Rexión de Murcia.

Desde a Asociación Comunidade Redes de Telecentros, retomouse este proxecto, enmarcándoo na campaña e-skills for Jobs e que se desenvolve dentro do marco de cooperación e compartición de proxectos e recursos que persegue a Asociación entre os seus membros, dado o interese común en fomentar e mellorar a formación das persoas que dinamizan os centros de innovación tecnolóxica/espazos TIC.

Máis información en: comunidaddetelecentros.net/formacarm/ y www.formacarm.es.

30/06/201612:15
Entrega dos premios 3DMobile
Santiago de Compostela

Entregados os galardóns da terceira edición do campionato galego D3Mobile

Finalmente os equipos vencedores na D3Mobile Metrology World League 2016 recibiron este mércores os seus respectivos premios no marco dunha cerimonia que congregou na Escola Politécnica Superior da USC a preto de medio centenar de estudantes de ESO e BAC e profesorado de centros educativos de ensino medio de Galicia e doutras comunidades autónomas como Castela e León ou Asturias. O gañador desta terceira edición foi o equipo Aspaveres, do IES Nº1 de Ribeira, formado por Abel Muñiz Cameán, Marta Franco González, Almudena Pérez Parada e José Manuel Pena Fernández, coordinados pola profesora Margarita Saborido Ojea. Elaboraron o modelo 3D dun tipo de zapatilla moi popular e moi espallada entre os adolescentes e que xa fora modelada en edicións previas.

Cada alumno deste equipo de Ribeira recibiu un premio tecnolóxico, e o centro ao que pertencen equipamento de laboratorio, unha subscrición á revista Educación 3.0 e unha zapatilla asinada por Pau Gasol.

O subcampión do certame, cun modelo 3D dunha estatua da Virxe María, foi o equipo Black Rangers do Salvador formado polos alumnos Salvador Mejía Rosales, Ariel Alexander Cruz Martínez, José Alejandro Ramírez Trujillo e Carlos Rafael Gil Alvarado, coordinados polo profesor Salvador Ernesto Rivas Leiva, que non puideron asistir á cerimonia en Lugo. Como tampouco puido o gañador do terceiro premio, o equipo estepeño Awawa69 formado por Eduardo Muñoz Tejada, Rafael Muñoz Sánchez e Sergio Gálvez Martín que, coordinados por Salvador Páez Díaz, realizaron o modelo 3D dun galo.

O equipo Ausiets, de Gandía (Valencia), formado por Pau Sánchez Climent, Aly Alexandra Cuba, Xema Martínez Pascual e Julieta Antoniazzi, coordinados por Amparo Bataller Vidal, foi o equipo debutante mellor clasificado tras elaborar o modelo 3D dunha figura xeométrica.

Pola súa banda, Ángela Mª Martín García, Inés Suárez Arca, Paula Pastor Calvo e Lucía Menéndez Arca, do IES Val de Ebro, foron os máis votados polos propios finalistas co modelo 3D da escultura Hortelana, situada na localidade navarra na que viven, Tudela, vila que xa foi premiada na edición anterior con outra das súas esculturas urbanas realizada por outro equipo do mesmo centro, coordinado tamén polo profesor Paulino José Martínez Salcedo.

D3Mobile, como recordaremos, é un campionato pioneiro de modelado 3D de precisión teléfono móbil orientado a estudantes preuniversitarios e promovido polo grupo de investigación USCAN3D da USC en colaboración coa Fecyt, Fundación Vodafone España, o Centro Español de Metroloxía (CEM) e o Instituto Xeográfico Nacional (IGN-CNIG), ademais doutras entidades públicas e privadas. Na competición deste ano tomaron parte 1.348 alumnos e 249 profesores de 223 centros educativos de 37 países de todo o mundo.

30/06/201608:21
Logo 1 mes 1 profesión dixital
Santiago de Compostela

A creatividade e os contidos centran o novo faladoiro dixital organizado pola Amtega e o CPEIG

  • A xornada, que se celebra o 8 de xullo en Santiago, forma parte da campaña de divulgación e difusión de novos perfís profesionais na era dixital
  • A asistencia é de balde previa inscrición a través da web do CPEIG

Un novo faladoiro dixital organizado polo Colexio Profesional de Enxeñaría en Informática de Galicia (CPEIG) co apoio da Axencia para a Modernización Tecnolóxica de Galicia (Amtega) desenvolverase o vindeiro 8 de xullo dentro da campaña de divulgación e difusión de novos perfís profesionais na era dixital. O encontro, que analizará a creatividade dixital, desenvolverase no Edificio Cinc da Cidade da Cultura en Santiago de Compostela, de 09.45h a 14.00h.

Tras a benvida institucional a cargo do presidente do CPEIG, Fernando Suárez, intervirá Juan Corro, director académico de U-Tad, centro universitario referente na formación de futuros líderes do mundo dixital, quen se encargará de disertar sobre a “Formación e emprego na revolución dos contidos”.

A continuación dun breve descanso, falará Manuel Meijide, director de ILUX Visual Technologies e experto no deseño e desenvolvemento de proxectos integrais no eido das “smart cities”, quen abordará a charla “Mundos dixitais e novos media”. Coma último relator da xornada intervirá Roberto Romero, fundador de Future Lighthouse e desenvolvedor de realidade virtual, quen falará de “Realidade virtual, novos horizontes”.

Para finalizar o “Faladoiro dixital arredor da creatividade dixital”, celebrarase unha mesa redonda aberta ás preguntas dos asistentes.

As persoas interesadas en asistiren poden inscribirse xa de balde no enderezo eventos@cpeig.gal e tamén través da web www.profesionsdixitais.org, onde atoparán máis información do programa e dos relatores.

 

1 mes, 1 profesión dixital
A campaña 1 mes, 1 profesión dixital arrincou a súa segunda edición o mes pasado en Ourense, abordando as oportunidades profesionais e boas prácticas ao redor do Big Data. O obxectivo xeral é crear conciencia da necesidade que teñen os cidadáns de mellorar o seu dominio da tecnoloxía da información e a comunicación cara ao emprego. A iniciativa é froito do acordo de colaboración asinado no presente ano entre o CPEIG e a Amtega.

29/06/201610:20
Canvas Innovación Social
Santiago de Compostela

O Plan de Formación do Voluntariado Dixital da Xunta 2016 aborda o uso da ferramenta Canvas na innovación social dixital

  • Ponse en marcha o plan de formación 2016 de Voluntariado Dixital “INNOVACIÓN SOCIAL DIXITAL dende unha análise de ferramentas CANVAS”
  • Haberá dúas edicións no mes de xullo: Santiago os días 4 e 5 e Ourense os días 6 e  7
  • A formación está dirixida aos voluntari@s dixitais, ao persoal técnico de entidades de acción social, aos axentes TIC das aulas CeMIT impulsoras de proxectos de innovación social dixital e a calquera persoa e/ou organización interesada nestes temas
  • Nestas xornadas traballarase dun xeito participativo para definir unha realidade, atopar solucións e planificar accións para darlle resposta a través do modelo “Canvas”
  • A inscrición e de balde e as prazas son limitadas

Desde o Plan de formación continua do Programa de Voluntariado Dixital da Xunta de Galicia, impulsado pola Axencia de Modernización Tecnolóxica de Galicia (Amtega) e a Dirección Xeral de Xuventude, Participación e Voluntariado da Consellería de Política Social, ponse en marcha unha nova actividade formativa: Innovación Social Dixital dende unha análise de ferramentas Canvas.

Os participantes, entre os que se atoparán voluntarios e voluntarias dixitais, persoal técnico de entidades de acción social, axentes TIC das aulas CeMIT-Innova e a calquera persoa e/ou organización interesada nestes temas, aprenderán a utilizar unha serie de ferramentas que lles permitirá definir os seus proxectos de innovación social dixital, atopar solucións aos problemas e traballar de forma colaborativa.

O obxectivo final da formación será polo tanto, xerar sinerxías e colaboracións, en cada un dos proxectos piloto, cos que seguir construíndo unha iniciativa común, de maneira conxunta e coa participación de novos aliados dixitais.

O obradoiro de Canvas desenvolverase en dúas edicións de 12 horas cada unha: unha no Centro de Novas Tecnoloxías de Galicia (CNTG) de Santiago de Compostela o día 4 de xullo de 10:00h a 14:00h e de 16:00h a 20:00h e o día 5 de 10:00h a 14:00h, e outra edición no Centro da Molinera de Ourense o día 6 de xullo de 10:00h a 14:00h e de 16:00h 20:00h e o día 7 de 10:00h a 14:00h.

A continuación facilítase máis información de detalle do programa formativo para cada unha das edicións:

A inscrición é de balde, ten prazas limitadas e pódese formalizar na web de voluntariado galego ata o 1 de xullo ás 12:00h para a formación de Santiago e ata o 5 de xullo ás 12:00h no caso da formación de Ourense:

 

O experto

Para que os participantes consigan o obxectivo de construír innovación social dixital contarase coa presenza de Paco Prieto, consultor en creatividade e innovación en talento corporativo, que conta cunha dilatada experiencia en iniciativas de creatividade e innovación en diversos ámbitos da sociedade e facilitará a todos os asistentes a claves para aplicar a ferramenta canvas para a innovación social dixital en Galicia a través de casos prácticos e colaborativos.

 

Programa de Voluntariado Dixital - VOLDIX

O Programa de Voluntariado Dixital é unha iniciativa, posta en marcha en febreiro de 2011 pola Axencia para a Modernización Tecnolóxica de Galicia e a Dirección Xeral de Xuventude, Participación e Voluntariado, que conta xa con 487 persoas voluntarias e 142 aliad@s dixitais. Ten como obxectivo achegar as novas tecnoloxías a unha maior porcentaxe da poboación, favorecendo a inclusión dixital de toda a cidadanía, especialmente entre os colectivos máis desfavorecidos (persoas maiores, persoas con discapacidade, etc).

A iniciativa suma a solidariedade individual, a responsabilidade social das empresas do ámbito tecnolóxico, a colaboración das asociacións sen ánimo de lucro e o aproveitamento das infraestruturas públicas.

 

Voluntariado Galego

O Voluntariado Galego é outra das apostas da Consellería de Política Social para enmarcar todas as iniciativas que fomentan a participación e a solidariedade dos galegos e galegas, e a través da Dirección Xeral de Xuventude, Participación  e Voluntariado, continuase traballando para promover a participación e o voluntariado en colaboración coas entidades de acción voluntaria para contribuír ao desenvolvemento individual e colectivo da sociedade.

29/06/201608:31
Logo da campaña
Santiago de Compostela

ICT-Go-Girls!, referente europeo no fomento de vocación TIC entre as mozas

Un proxecto educativo no que participan a Universidade de Santiago de Compostela (USC) e mailo Centro de Supercomputación de Galicia vén de ser salientado como exemplo a seguir en canto a fomento das vocacións tecnolóxicas entre as mozas. Estamos a falar do ICT-Go-Girls!, e o contexto no que o comisario europeo de Educación, Cultura e Deportes, Tibor Navracsics subliñou esta achega foi na conferencia Digital Festival 2016 organizada en Bruxelas polo Forum Europe.

Indo ao miolo da iniciativa ICT-Go-Girls! (Promoting Entrepreneurship Among Secondary School Girls through ICT), estamos perante unha proposta Comenius Multilateral dirixida pola área de ensino a distancia do CESGA e no que participou o Grupo de Investigación en Tecnoloxía Educativa da USC xunto con outras cinco institucións europeas.

Trátase das entidades Die Berater e Universidade do Danubio (Austria), Fraunhoffer IAO (Alemaña), Spoleczna Akademia Nauk (Polonia), e CVO Antwerpen (Bélxica). O equipo da USC, liderado polas profesoras Beatriz Cebreiro e Carmen F. Morante, desenvolveu unha metodoloxía educativa para levar a cabo nas aulas dos primeiros anos de educación secundaria permitindo traballar de xeito máis motivador as TIC e acadar un meirande interese e coñecemento na elección de carreiras tecnolóxicas por parte das alumnas de secundaria. Como ferramenta para o desenvolvemento desta metodoloxía, o CESGA deseñou e introduciu unha contorna virtual social baseada en software libre a través da cal se testou a proposta. Ambos recursos están dispoñíbeis no web do proxecto.

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS