main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

28/09/202307:33
Mans de home maior usando un smartphone.
Santiago de Compostela

A Xunta implanta unha solución tecnolóxica para facilitar a monitorización do estado de saúde nas residencias de maiores e de atención a persoas con discapacidade

  • Os equipos, que permiten recoller a tempo real as constantes vitais, están a ser implantados este ano en 22 residencias
  • O sistema incorpora automaticamente os datos aos historiais e facilita o traballo dos profesionais
  • Ademais de mellorar a calidade da atención sanitaria, o sistema aumenta a seguridade dos procesos de control sobre o estado de saúde das persoas residentes
  • Permite conectar á estación de traballo móbil dispositivos como tensiómetro, pulsioxímetro, báscula ou glucómetro e está preparado para futuras ampliacións

O proceso de toma de biomedidas das persoas que viven nas residencias de maiores e de atención a persoas con discapacidade que dependen da Xunta de Galicia será sensiblemente máis doado e eficaz para os profesionais, mediante unha solución tecnolóxica que, este ano, está a ser implantada en 22 centros da Comunidade.

O sistema é o resultado da colaboración entre a Consellería de Política Social e a Axencia para a Modernización Tecnolóxica de Galicia, que conta para a súa implantación, soporte e mantemento coa compañía galega Coremain. Esta solución avanzada forma parte da aposta da Xunta por un novo modelo residencial que incorpora as vantaxes da tecnoloxía para a prestación dun servizo máis eficiente e personalizado.

As residencias contarán con estacións portátiles, ou “carros de enfermaría” e monitorización de pacientes, coas que os profesionais poden recoller a tempo real as constantes vitais e incorporalas de forma automática no sistema de xestión das residencias.

Nesta primeira fase de implantación, as estacións de traballo dispoñen de dispositivos multiparamétricos homologados e con conectividade wi-fi como tensiómetro, pulsioxímetro, báscula e glucómetro, entre outros. Unha das características principais do sistema é a escalabilidade, coa posibilidade de incorporar novos dispositivos, como dermatoscopio ou cámara de fondo de ollo. Destaca tamén pola súa autonomía e facilidade de uso por parte dos profesionais, que dispoñen dun monitor que permite visualizar as biomedidas tomadas por cada dispositivo.

Os equipos incorporan unha cámara que pode ser habilitada para facer fotografías ou ler códigos QR e de barras para identificar as persoas residentes. Están preparados, tamén, para poder realizar no futuro teleconsultas.

O proceso de implantación deste sistema comezou o pasado mes de xullo na residencia de maiores da Pobra do Caramiñal e, ata finais de ano, será instalado nos centros de atención a persoas con discapacidade da Coruña, de Chapela-Redondela e Sarria; nos complexos residenciais de atención a persoas dependentes Vigo I e Vigo II; e nas residencias de maiores da Milagrosa (Vigo), As Gándaras (Lugo), Carballo, A Estrada, Burela, Campolongo, Caranza-Ferrol, Castro Caldelas, Marín, Oleiros, Santiago de Compostela, Monforte, Nosa Señora dos Miragres (Ourense), Torrente Ballester (A Coruña), Volta do Castro (Santiago) e O Carballiño.

 

25/09/202308:32
VIII Scratch Day.
Santiago de Compostela

Aberto o prazo de inscrición do VIII Scratch Day do CPETIG para iniciarse na programación en familia e nas aulas

  • Esta nova actividade de fomento das vocacións científico-tecnolóxicas entre a mocidade desenvólvese no marco de colaboración conxunta coa Axencia para a Modernización Tecnolóxica de Galicia – Amtega e está dirixida a nenos e nenas de entre 6 e 16 anos, nais e pais e profesores ou formadores
  • Celebrarase o sábado 7 de outubro, de 9 a 14 horas na Cidade da Cultura de Santiago de Compostela. Haberá 30 prazas para a rapazada con adultos e outras 15 para profesorado. A reserva de praza tramítase a través do link: https://viii-scratchday-cpetig.eventbrite.es

O Colexio Profesional de Enxeñaría Técnica en Informática (CPETIG) abre o período de inscrición para o seu programa de fomento das vocacións científico-tecnolóxicas entre a mocidade. O “Scratch Day” celebrará este ano a súa oitava edición, sendo este un dos contidos máis destacados dentro do marco de colaboración que o ente colexial mantén coa Axencia para a Modernización Tecnolóxica de Galicia – Amtega, e que está deseñado para achegar aos máis novos, pero tamén aos seus pais e nais, e aos formadores interesados, ás novas tecnoloxías, á linguaxe de programación e á informática.

O Scratch Day 2023 estará centrado na temática da gamificación e do entorno dos videoxogos. Os tres públicos obxectivos aos que se dirixe esta actividade lúdico-formativa son: nenos e nenas de idades comprendidas entre os 6 e os 16 anos; os seus pais, nais ou titores, e a comunidade de profesores, formadores e directores de centros de ensino interesados en aplicar a tecnoloxía e a linguaxe Scratch nas súas aulas. Esta formación teórico-práctica desenvolverase o vindeiro sábado 7 de outubro en formato intensivo de 9:00 a 14:00 horas no salón de convencións do edificio CINC da Cidade da Cultura de Santiago de Compostela.

O programa da actividade para as familias inclúe unha primeira aproximación ao entorno Scratch, cunha parte didáctica de como mover, lanzar e interactuar con obxectos para programar un videoxogo básico. Ademais, traballaranse as interaccións a través da cámara e do son e a linguaxe de programación con Microbit permitirá empregar a radio e o control remoto entre dispositivos. Os participantes crearán o xogo do número segredo, xogos de scroll, un dado dixital, unha búsqueda do tesouro e un videoxogo con LEDs.

No módulo específico para profesores e formadores, traballaranse obxectos, escenarios e bloques de programación, así como o movemento, a animación e a interacción entre eses obxectos. Por último, haberá tempo para o desenvolvemento dun videoxogo básico. Habilitarase tamén a creación de unidades didácticas para contido curricular e abordarase un traballo transversal con Scratch e Microbit.

Unha das grandes novidades desta edición será a presentación dun caso de éxito no uso de tarxetas Microbit nun colexio, que aplicou esta tecnoloxía a un proxecto para implantar un sistema de rego no centro.

O programa, enmarcado dentro das áreas STEM (polas súas siglas en inglés de Ciencia, Tecnoloxía, Enxeñaría e Matemáticas), conta cunha importante experiencia entre a comunidade escolar galega nas edicións preferentes e colle o relevo dentro do calendario de actividades do CPETIG do programa #GirlSteam, que percorreu 15 concellos de Galicia para amosar o uso das novas tecnoloxías do stop motion e dos tecidos intelixentes entre a mocidade.

Proceso de inscricións

O período de inscricións para a oitava edición do Scratch Day do CPETIG xa está aberto a través da ligazón https://viii-scratchday-cpetig.eventbrite.es.

Haberá un total de 30 prazas para a rapazada, que estarán acompañados nesta actividade conxunta por un familiar adulto e outras 15 para o profesorado que queira recibir formación sobre este entorno para poder aplicar na docencia.

 

22/09/202310:36
Portada do curso.
Santiago de Compostela

A Xunta pon en marcha un ciclo formativo para achegar os usos e vantaxes da intelixencia artificial á cidadanía

  • As sesións, dirixidas especialmente ás persoas maiores, terán lugar ente outubro e novembro, en diferentes aulas da Rede CeMIT das catro provincias
  • A inscrición está aberta e pode realizarse online ou directamente nos centros nos que se imparte o ciclo formativo
  • Esta iniciativa enmárcase nas actuacións da Estratexia Galega de Intelixencia Artificial, para facilitar á sociedade capacitación nesta tecnoloxía en todas as etapas

A Axencia para a Modernización Tecnolóxica de Galicia (Amtega) pon en marcha o ciclo formativo “A Intelixencia Artificial no día a día”, para achegar esta tecnoloxía e as súas vantaxes á cidadanía, centrándose especialmente nas persoas maiores de 55 anos.

As sesións teñen unha duración de 90 minutos e desenvolveranse entre os meses de outubro a novembro de xeito presencial nas aulas da Rede CeMIT de A Coruña, Celanova, Guitiriz, Moaña, Ortigueira, Santiago e Vigo.

O obxectivo desta formación é achegar a un público sen coñecementos específicos na materia as nocións e características básicas da Intelixencia artificial (IA), o seu impacto no día a día das persoas e visibilizar as súas vantaxes a través de casos de uso, dun xeito sinxelo e accesible.

As sesións estrutúranse en catro bloques temáticos, comezando por unha introdución ao concepto de Intelixencia Artificial, a través da presentación de exemplos prácticos e a posta en valor das vantaxes do seu uso. Ademais, farase un repaso polas aplicacións máis cotiás que empregan esta tecnoloxía e a súa contribución á sociedade. Finalmente, farase unha aproximación ás posibles aplicacións futuras, principios éticos e revisión dos avances na súa regulación.

Estratexia Galega de Intelixencia Artificial 2030

Este itinerario formativo enmárcase nas actuacións da Estratexia Galega de Intelixencia Artificial 2030 (EGIA2030), que establece nas súas liñas estratéxicas que a cidadanía sexa a principal beneficiaria da IA, para o que é preciso que conte coa formación e capacitación necesaria para entendela e usala con medidas que abrangan desde a adquisición de competencias básicas, ata a formación para persoal altamente cualificado.

Calendario e inscricións

As persoas interesadas en asistir a estas formacións poderán inscribirse comunicándose directamente co centro da Rede CeMIT do seu interese, ou a través da web. Xúntase o calendario de actividades e as ligazóns de inscrición en cada centro.

Aula CeMIT

Datas

Horarios

Inscricións

A Coruña

20 de outubro

10:00 a 11:45

https://cemit.xunta.gal/gl/formacion/formacion-presencial/43349

Guitiriz

23 de outubro

11:00 a 12:45

https://cemit.xunta.gal/gl/formacion/formacion-presencial/43355

Santiago

24 de outubro

17:00 a 18:45

https://cemit.xunta.gal/gl/formacion/formacion-presencial/43353

Celanova

25 de outubro

11:00 a 12:45

https://cemit.xunta.gal/gl/formacion/formacion-presencial/43347

Ortigueira

26 de outubro

11:00 a 12:45

https://cemit.xunta.gal/gl/formacion/formacion-presencial/43357

Vigo

27 de outubro

11:00 a 12:45

https://cemit.xunta.gal/gl/formacion/formacion-presencial/43345

A Coruña

3 de novembro

12:00 a 13:45

https://cemit.xunta.gal/gl/formacion/formacion-presencial/43350

Santiago

7 de novembro

17:00 a 18:45

https://cemit.xunta.gal/gl/formacion/formacion-presencial/43354

Moaña

8 de novembro

11:00 a 12:45

https://cemit.xunta.gal/gl/formacion/formacion-presencial/43351

Ortigueira

16 de novembro

11:00 a 12:45

https://cemit.xunta.gal/gl/formacion/formacion-presencial/43358

Vigo

17 de novembro

11:00 a 12:45

https://cemit.xunta.gal/gl/formacion/formacion-presencial/43346

Celanova

22 de novembro

11:00 a 12:45

https://cemit.xunta.gal/gl/formacion/formacion-presencial/43348

Guitiriz

27 de novembro

11:00 a 12:45

https://cemit.xunta.gal/gl/formacion/formacion-presencial/43356

Moaña

29 de novembro

11:00 a 12:45

https://cemit.xunta.gal/gl/formacion/formacion-presencial/43352

 

15/09/202318:07
Participantes na mesa redonda sobre os “desafíos e oportunidades na transformación dixital”.
Vigo

Julián Cerviño defende o papel da Xunta na especialización de Galicia no desenvolvemento dunha intelixencia artificial humanista

  • O director da Axencia para a Modernización Tecnolóxica de Galicia participou, está mañá, nunha mesa redonda sobre os “desafíos e oportunidades na transformación dixital”, con motivo do 50º aniversario da tecnolóxica Seresco na nosa Comunidade
  • O director da Axencia autonómica destacou o traballo promovido pola Xunta e no que participou o Sistema Universitario e os concellos que permitiu que A Coruña fora seleccionada para acoller a Axencia Estatal de Supervisión de Intelixencia Artificial
  • Cerviño destacou que o Índice de Competitividade Rexional da Comisión Europea sitúa á nosa rexión por enriba da media comunitaria en preparación tecnolóxica

O director da Axencia para a Modernización Tecnolóxica de Galicia, Julián Cerviño, destacou hoxe en Vigo, que o traballo desenvolvido pola Xunta no marco da Estratexia Galicia Dixital 2030 (EGD2030) está no camiño de acadar o obxectivo de especializar á nosa Comunidade no desenvolvemento dunha intelixencia artificial confiable e humanista na vangarda europea.

Cerviño participou, está mañá, na mesa redonda “Desafíos e oportunidades na transformación dixital de Galicia”, que formou parte dos actos de celebración do 50º Aniversario da implantación da tecnolóxica Seresco na nosa Comunidade. No debate, tamén participaron a vicepresidenta do Circulo de Empresarios de Galicia, María Borrás; o director xeral de Gradiant, Centro Tecnolóxico de Telecomunicacións de Galicia, Luis Pérez Freire; e o catedrático da Universidade de Vigo e director de atlanTTic, Martín Llamas. A mesa foi moderada pola xornalista Gladys Vázquez.

O director da Axencia, dependente da Consellería de Facenda e Administración Pública, destacou o obxectivo transversal da EGD2030 de avanzar cara á especialización tecnolóxica de Galicia a través da creación, atracción e retención de talento dixital e o traballo conxunto co sistema universitario, os centros de investigación e o sector TIC. Cerviño enmarcou neste obxectivo a próxima instalación na Coruña da Axencia Estatal de Supervisión da Intelixencia Artificial (AESIA).

Lembrou que a presentación de Galicia ao proceso de selección da AESIA foi promovido dende un primeiro momento dende a Xunta, que máis tarde recibiu o mandato unánime do Parlamento de elaborar unha candidatura e seleccionar unha localización.

Na mesma liña de especialización en IA, Cerviño anunciou ás persoas asistentes ao acto que a Xunta traballa nun anteproxecto de lei de Intelixencia Artificial que está en proceso de consulta.

O director da Axencia destacou que perseguir o obxectivo de especialización é posible grazas ao grao de madurez dixital alcanzado por Galicia coa aplicación de dúas axendas dixitais entre 2009 e 2020, que ten continuidade coa EDG2030. Resaltou que no último Índice de Competitividade Rexional da Comisión Europea, Galicia está bastante por enriba da media comunitaria en preparación tecnolóxica, cunha puntuación de 123,8 (na que 100 é a media das rexións da UE).

15/09/202317:59
Comisión de Seguimento do nodo galicIA.
Santiago de Compostela

A Xunta abre a consulta pública da futura lei de intelixencia artificial de Galicia

  • A futura norma busca, entre outros aspectos, crear un marco legal uniforme para o deseño, adquisición, implementación e uso de sistemas de IA na Administración xeral e do sector público autonómico, en liña cos valores e o marco normativo establecido polas institucións europeas
  • É un paso máis no obxectivo de converter a Galicia nunha rexión de referencia para o desenvolvemento dunha intelixencia artificial confiable e humanista
  • Cidadáns e entidades poderán realizar as súas achegas, suxestións e alegacións a través do Portal de Transparencia ata o vindeiro 15 de outubro

A Xunta abre hoxe a consulta pública previa da futura Lei de planificación, organización e impulso da intelixencia artificial (IA) en Galicia para recoller as suxestións e achegas que a cidadanía e entidades públicas e privadas poderán realizar ata o vindeiro 15 de outubro a través do Portal de Transparencia da Administración autonómica.

A futura lei galega de IA buscar crear unha regulación única, sistemática e coherente, que permita un uso eficaz, eficiente, ético e seguro da intelixencia artificial na Administración Xeral e do sector público autonómico (SPAG), aliñada co marco europeo, que establecerá a Lei de Intelixencia Artificial.

Obxectivos

A norma galega busca introducir unha serie de medidas para establecer un marco legal uniforme para o deseño, adquisición, implementación e uso de sistemas de IA na Administración xeral e do SPAG e fixa os principios éticos reitores do deseño, adquisición e implantación dos sistemas de IA en Galicia.

Ademais, a futura lei busca recoñecer á cidadanía, con carácter vinculante, unha serie de dereitos, en relación cos sistemas de IA empregados polo Administración pública autonómica galega; fomentar a colaboración público-privada e potenciar as oportunidades existentes a nivel autonómico, estatal e internacional no eido a IA, especialmente coa futura Axencia Estatal de Supervisión de Intelixencia Artificial (AESIA), así como aumentar a capacidade para atraer e reter talento e persoal cualificado a Galicia.

Nodo galicIA

O texto do anteproxecto de lei foi presentado esta semana á Comisión de Seguimento do nodo galicIA, que se encarga de velar polo cumprimento da Estratexia Galega de Intelixencia Artificial (EGIA), e foi o encargado de preparar a candidatura de Galicia para acoller a sede da AESIA.

O nodo galicIA está formado pola Consellería de Economía Industria e Innovación; a Consellería de Facenda e Administración Pública; a Consellería de Cultura, Educación, Formación Profesional e Universidades; a Consellería de Sanidade e a Axencia para a Modernización Tecnolóxica de Galicia; así como pola Comunidade de Traballo Galicia Norte de Portugal; a Universidade de Santiago de Compostela, a Universidade da Coruña e a Universidade de Vigo.

Galicia, rexión de referencia da IA

A apertura da consulta pública da futura Lei de planificación, organización e impulso da intelixencia artificial en Galicia é un paso máis no marco da ruta establecida Estratexia Galicia Dixital 2030 para incorporar as tecnoloxías disruptivas na Comunidade.

No caso da IA, Galicia foi unha das tres primeiras Comunidades autónomas españolas en aprobar unha estratexia propia de intelixencia artificial (a EGIA), ademais foi designada como sede da primeira axencia estatal de supervisión da intelixencia artificial que se crea en Europa. Nesta designación foron esenciais a madurez dixital da rexión, a concentración de coñecemento en torno á Intelixencia Artificial a través de centros singulares de investigación; os dous ‘hubs’ de innovación; e o peso dun sector tecnolóxico con máis de 3.000 empresas e 21.800 empregados.

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS