main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

22/03/201708:11
Personas maiores usando as TIC.
Santiago de Compostela

Os maiores xa non son alleos ás redes sociais na internet

  • O uso da rede entre os españois maiores de 55 anos aumentou un 96% no últimos seis anos

O malagueño Juan José Canas causa sensación: ten 80 anos e conta con máis de 16.000 subscriptores na súa conta de Youtube Atrapatuabuelo, desde finais de 2016. Asegura que se animou, co empuxón dos netos, porque "estaba aburrido como unha ostra", pero o que empezou como un xogo familiar converteuse nun fenómeno. 

 

Canas é a versión española dun fenómeno que tamén se dá noutros países. Con 79 anos, a británica Shirley Curry fíxose famosa porque empezou a comentar en Youtube a súa experiencia como xogadora do videoxogo Skyrim. Enseguida creou a súa canle Grandma Shirley, con máis de 120.000 seguidores. ¿A motivación? Crear un espazo de intercambio de experiencias para xogadores de videoxogos da súa idade porque non sentía representada nos foros.

 

Outro caso é o do británico Peter Oackley, que en 2006 creou a canle Geriatric1927. ¿Por que? Segundo explicou en varias entrevistas, quería probar que era iso que facían os mozos. Oackley colgaba pequenos tutoriais, reflexións ou vivencias da II Guerra Mundial. Durante un tempo foi a canle con máis visitas da plataforma.

 

¿Redes sociais, dimensión descoñecida para a xente maior?

Á marxe destes casos, que superan a fotografía xeral do uso que as persoas maiores fan das redes sociais, varias liñas de investigación da Universitat Oberta de Catalunya (UOC) conclúen que os maiores non son alleos ás redes sociais. "A realidade está moi lonxe dos estereotipos", sentenza Mireia Fernández-Ardèvol, investigadora do grupo de investigación Communication Networks and Social Change (CN&SC) do Internet Interdisciplinary Institute (IN3) da UOC.

 

Fernández-Ardèvol, que centra parte da súa investigación na relación do maior coas tecnoloxías dixitais, destaca que no últimos seis anos, o número de usuarios da internet do grupo de idade 55-74 anos aumentou de forma exponencial. "É certo que as persoas maiores aínda se conectan menos que outros segmentos de idade, pero –segundo os datos do Eurostat– en seis anos o crecemento do uso da internet neste colectivo foi do 96%", di a investigadora, que tamén explica que os usos non son unicamente prácticos e que os senior levan a cabo un uso diverso da rede.

 

Chegan ás redes para quedar

Nesta mesma liña apunta a investigación publicada en 2015 sobre Internet e os novos medios de comunicación, liderada por Mireia Montaña, Elisenda Estanyol e Ferran Lalueza, profesores da UOC. Por mor dun traballo de campo realizado en 2013, destacan que a pesar de que son o grupo de poboación que máis lentamente se incorpora a Internet, úsano considerablemente.

 

Acábase de facer público o informe de referencia 'Sociedade da información en España 2016' (SIE16, de Fundación Telefónica), que ratifica plenamente o que hai uns anos xa avanzaron Montaña, Estanyol e Lalueza. Segundo o SIE16, "durante 2016 advírtese que os internautas deste segmento de idade [maiores de 65 anos] empezan a facer un uso intensivo da internet". En gran medida, e sempre segundo o SIE16, o uso crecente das tablet sería un factor determinante para explicar esta tendencia. "Pódese afirmar que o uso da tablet está a pechar o último reduto da fenda dixital, o dos maiores de 65 anos", aseguran.

 

As redes, vía de socialización

Fernández-Ardèvol alerta de que, como sociedade, achegámonos aos maiores de forma paternalista e facémolo tamén cando falamos da súa relación coas novas tecnoloxías. "A xente maior usa as redes sociais en liña para ser cidadán ou cidadá. É unha maneira máis de sentirse integrado, expresar a identidade e, en definitiva, ser como o resto", afirma, "saben que estas redes son importantes".

 

Segundo Ferran Lalueza, profesor dos Estudos de Ciencias da Información e da Comunicación da UOC, "a xeneralización do uso da internet iniciouse hai dúas décadas, de forma que moitas das persoas que actualmente consideramos senior (a partir de 61 anos) tiveron tempo de incorporar este uso ás súas rutinas profesionais antes de chegar á idade de xubilación. En cambio, o fenómeno das redes sociais é bastante máis recente (a rede social máis consolidada, Facebook, só ten trece anos de existencia) e, por tanto, á maior parte dos senior a súa eclosión xa os colleu maiores. Isto pode explicar que non se engancharon '' ás redes", aínda que cada vez hai máis usuarios maiores.

 

"O número de usuarios dunha rede, a partir da consecución dunha masa crítica suficiente, medra exponencialmente polo que poderiamos denominar 'efecto contaxio': eu utilízoa porque alí encontro ás persoas con quen me interesa estar en contacto. Se nun momento dado a presenza nunha rede social dun determinado colectivo (por exemplo os senior) non logra esa masa crítica, o efecto contaxio non se produce. "É o mesmo fenómeno que explica por que Snapchat é moi popular entre adolescentes e novos e, en cambio, crece moi lentamente en usuarios máis adultos", matiza Lalueza, que tamén é investigador do grupo de investigación Game da UOC, centrado nas aprendizaxes, os medios e o entretemento.

 

De feito, unha das vías de entrada de usuarios en idade avanzada é a familia e os amigos próximos. Fernández-Ardèvol pon como exemplo aplicacións como Whatsapp, Skype ou Facebook, que permiten ter contacto en vivo con familiares que viven no estranxeiro e que se converteron nun importante punto de entrada a Internet.

 

En canto ao caso concreto de Youtube, estudos norteamericanos confirman que esta canle de vídeo ten un público moi transversal, pero sorprende que tres de cada catro internautas de máis de 65 anos conectáronse a Youtube o pasado mes de febreiro. Representan un total de 19,4 millóns de usuarios que, basicamente, interésanse por consellos sobre todo tipo de cousas: desde videoxogos a trucos de beleza ou manualidades.

22/03/201707:58
Presentación do curso.
Online

Novo curso online sobre as TIC nas persoas maiores e discapacitadas

  • A través de once módulos, a Universidade Complutense de Madrid impartirá clases para aprender de que maneira os soportes tecnolóxicos poden mellorar a vida do colectivo senior e os discapacitados

 

A Universidade Complutense de Madrid acaba de poñer en marcha un curso masivo online e gratuíto en MiriadaX: 'Discapacidade e envellecemento activo. Soportes tecnolóxicos'.

 

Miríada X pon a disposición de calquera interesado Cursos Online Masivos en Aberto (máis coñecidos como MOOC) a través dunha plataforma aberta sen restricións, sen condicións, sen horarios, sen custo e sen barreiras.

 

Nesta ocasión, a través dos seus once módulos, neste novo curso pódese aprender de que maneira as TIC melloran a vida das persoas con discapacidade e os maiores. Así, considéranse as TIC como unha engrenaxe adecuada e peza clave na actual sociedade dixital que colabora no logro da saúde das persoas.

 

O curso é unha formación nunha área interdisciplinar de humanidades e tecnoloxía, cuxa interacción enriquece a profesionais e persoas con discapacidade. Preséntanse boas practicas no uso das TIC que poden inspirar novos xacementos de emprego nos estudantes de diferentes Graos con competencias humanas e tecnolóxicas como transversais (Traballo Social, Terapia Ocupacional, Psicoloxía, e Enxeñerías de Informática, Telecomunicacións, etcétera).

 

O 20 de marzo iniciouse unha formación que se estenderá durante 12 semanas, cun total de 66 horas de estudo estimadas.

21/03/201710:39
Desafío STEM.
Santiago de Compostela

Os Desafíos STEM recoñecerán os mellores proxectos de robótica e programación da nosa mocidade

O enxeño e o maxín da nosa mocidade van ter máis recoñecemento. Así o fixo saber estes días a Consellería de Cultura e Educación, que vén de convocar un premio de innovación educativa co que se busca visualizar e salientar o traballo que están a desenvolver os centros educativos públicos en prol da promoción e impulso dos coñecementos STEM (Ciencia, Tecnoloxía, Enxeñaría e Matemáticas), presentes nas materias de libre configuración autonómica de Programación (ESO) e Robótica (Bacharelato). O nome certame, Desafíos STEM: programación, robótica e impresión 3D, fai alusión directa (precisamente) a estas materias.

Segundo fai saber Educación, cada centro poderá concorrer con até un máximo de seis equipos, que estarán configurados por un mínimo de tres alumnos e un máximo de seis. A competición artellarase en dúas categorías e tres desafíos. A categoría STEM junior está concibida para proxectos sinxelos realizados por alumnado de iniciación e é aconsellable para alumnado de 1º, 2º, 3º de ESO, FP Básica ou PMAR. Pola súa banda, a categoría STEM senior está orientada a proxectos máis complexos, para alumnado de 4º de ESO e 1º de Bacharelato.

  • O desafío robots consiste en que un ou varios robots, sobre un escenario, realicen accións ou tarefas encamiñadas a dar solución a unha situación que teñan aplicación na realidade da vida cotiá.
  • O desafío programación basearase nun proxecto tecnolóxico que dea solución a unha necesidade concreta onde se utilicen linguaxes de programación tipo Scratch.
  • No desafío impresión 3D empregarase unha impresora destas características para o deseño e construción de todas ou parte das pezas da maqueta que represente ao proxecto.

En canto aos premios, outorgaranse un total de seis, un por cada desafío e categoría. En concreto, cada galardón ascende a 2.000 euros, que irán destinados ao centro docente do equipo gañador. A maiores, os alumnos e alumnas dos equipos recoñecidos recibirán un premio ou unha distinción e poderán participar nun evento onde amosen os seus traballos e destrezas. Os centros teñen até o 21 de abril como data límite para presentar a solicitude e a documentación de cada proxecto STEM. Todos os detalles da convocatoria poden consultarse na ligazón específica da Consellería de Cultura e Educación.

21/03/201710:28
Cartel do evento.
Online

Chega a segunda edición da feira virtual galego-portuguesa de emprego universitario: Finde.U

Este martes 21, e até o día 24, celébrase un evento que dalgunha maneira complementa e amplía cara a novos horizontes (horizontes dixitais e sen limitacións de espazo) os obxectivos e estratéxicas do Foro Tecnolóxico de Emprego, desenvolvido hai uns días no Campus de Vigo. Estamos a falar da segunda edición da Feira Internacional Virtual de Emprego Finde.Eu, unha cita organizada polas universidades de Vigo, Porto e Tras Os Montes e Alto Douro. Segundo puidemos saber, nela van participar máis de cen empresas procedentes de todos os recantos de Europa. Lembrar que na edición anterior concorreron 78 firmas ofertando 1.324 postos de emprego para os que se recibiron máis de 4.400 currículos. As novas tecnoloxías e a enfermería foron os ámbitos máis demandados da convocatoria de 2016.

O obxectivo da Área de Emprego da UVigo, co-organizadora, é que “durante catro días expositores de toda Europea teñan a oportunidade de entrar en contacto virtual con máis de 60.000 estudantes e 110.000 titulados e tituladas das tres universidades organizadoras”. A estes estudantes e titulados cómpre engadir os egresados doutras institucións educativas de toda Europa que se atopen na mesma situación de procura de emprego, prácticas ou oportunidades de investigación.

Na anterior edición desta feira participaron 114 expositores virtuais: 78 empresas con necesidades de contratación de persoal, 23 servizos ou puntos de información relacionados con emprego e mobilidade e 13 entidades relacionadas co ámbito da rede Eures. Dende a organización (a devandita Área de Emprego) explican que o sector con máis demanda foi o das novas Tecnoloxías da Información e a Comunicación, as TIC, que copou o 32% do total dos requirimentos. A continuación situouse enfermaría, coa cuarta parte das demandas. Segundo explican o impulsores desta feira virtual, no caso das TIC a demanda é moi alta tanto en España en Portugal coma no resto de países, mentres que no caso de enfermaría a demanda vén sobre todo do estranxeiro.

Por países, os máis representativos no que a oferta de postos de traballo se refire, foron Alemaña, Reino Unido, España e Portugal, seguidos de Malta, Suecia, Noruega, Dinamarca, Holanda, Bélxica e Eslovaquia. Ao igual ca o ano pasado, esta feira virtual completarase a finais de ano con dúas feiras presencias, unha en Porto, que se celebrará do 17 ao 18 de outubro, e outra en Vigo, do 24 ao 25 do mesmo mes. Na primeira edición da feira, celebrada o pasado mes de novembro, ao longo das catro xornadas nas que se prolongou este actividade, preto de 5.000 estudantes das universidades de Vigo, Porto e Tras- Os-Montes e Alto Douro visitaron os stands das máis de 120 empresas e institucións que participaron.

21/03/201710:22
Cartel do evento.
A Coruña

Ábrese a inscrición ao VIII Coruña Bloggers

O vindeiro día 29 vai celebrarse a oitava edición de Coruña Bloggers, encontro que xuntará a blogueiros e outras persoas con inquedanzas dixitais no salón de actos da Fundación Barrié para atender a un par de relatorios dos que tirar proveito coñecendo os proxectos dos seus oradores e atendendo aos seus consellos para aproveitar a súa experiencia, non repetir os seus erros e coñecer algúns xeitos de abordar certos eidos con éxito.

 

Os relatores

A primeira oradora da xornada será Patricia Cortés, estudante universitaria de Educación Infantil na Universidade da Coruña, que tamén é autora de contos infantís e artigos de reflexión sobre o mundo da educación e a infancia empregando como fiestra ao mundo a súa páxina web All for Education. Na súa intervención titulada 10 consellos para o teu blog interactuará co público sobre blogging e dará as súas propias chaves e trucos para ter éxito cun blog, abordando temas tan variados como a importancia de ter un bo logotipo até como comunicar correctamente cos lectores.

Mario López Guerrero collerá o relevo de Cortés e comentará 10 trucos para falar en público, de xeito que achegará pequenos trucos para falar en público, captar a atención e sacar adiante as nosas presentacións dun xeito eficaz. Este experto formador leva máis de quince anos desenvolvendo a súa actividade profesional, tempo no que publicou diversos libros como Con el tiempo en los talones ou Habla como puedas.

 

Inscrición aberta

Completarán a xornada un sorteo de agasallos (como un reloxo Geeksme por cortesía de Opirata.com) e unha sesión de networking nun local de hostalaría próximo (La Taberna de Rita).

Os interesados en acudir poden solicitar xa a súa invitación a través de Eventbrite, lembrándose aos asistentes que, aínda que a actividade é completamente de balde, prégase a achega dun mínimo de 1 quilo de comida non perecedoira que entregarase á Cociña Económica.

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS