main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

26/05/201708:38
Smartphone coa app JoinIn.
Santiago de Compostela

Lanzan unha App de participación cidadá e creación de iniciativas para mellorar a cidade

Unha aplicación móbil para impulsar a participación cidadá e a súa colaboración para mellorar a súa cidade, o seu barrio ou a súa rúa, é o lanzamento levado a cabo por unha start up especializada en apps e innovación colaborativa e unha empresa social dedicada a promover a solidariedade e a sustentabilidade. Chámase JoinIn App e quere crear unha rede global de persoas e organizacións socialmente responsables.

A través da aplicación, calquera persoa pode propoñer unha acción colaborativa para resolver un problema ou mellorar algún aspecto da vida na súa cidade, así como solicitar a colaboración doutras persoas para convertela en realidade. Á súa vez, poden elixir entre outras iniciativas postas en marcha por Ong ou asociacións, para dedicar parte do seu tempo libre a colaborar nalgunha actividade en beneficio da súa comunidade. A ferramenta tamén permite aos gobernos locais poñer en marcha as súas propias iniciativas na aplicación.

“Contamos cunha poderosa ‘arma de construción positiva de comunidades' que pon na man de 2.000 millóns de usuarios mundiais de smartphones a posibilidade de participar na mellora da súa comunidade e consecuentemente na sustentabilidade do noso planeta. ‘Somos o que facemos', e queremos animar aos cidadáns para tomar a iniciativa”, afirma Marco van der Ree, presidente e cofundador de JoinIn.

26/05/201708:19
Cartel do evento.
Santiago de Compostela

O CPEIG xuntará en Santiago un amplo e referencial elenco de expertos en protección dixital

O Colexio Profesional de Enxeñaría en Informática de Galicia (CPEIG) segue adiante co seu amplo programa de actividades de divulgación, formación e debate para este ano 2017, un ano no que, como lembraremos, a entidade profesional celebra os seus dez anos de andaina. Amais da Noite da da Enxeñaría en Informática (prevista para o 16 de xuño en Santiago) e a mostra sobre a historia informática da USC, o CPEIG tamén está a impulsar estes días unha nova edición da Xornada de Ciberseguridade en Galicia. A cita vén da man da colexio e conta co patrocinio da empresa tecnolóxica Emetel e a colaboración de ABANCA e Symantec. Contarase cun notable elenco de expertos en materia de protección dos datos e as comunicacións. Para formalizarmos a inscrición xa está habilitada unha web específica de seu. O obxectivo é pór á comunidade galega á vangarda dunha das grandes inquedanzas actuais do empresariado, administracións e particulares: Como facer para que o coñecemento de noso ou da nosa empresa só estea a disposición de quen queiramos que estea?

A cita será no Centro ABANCA Obra Social da praza de Cervantes, en Compostela. A xornada comezará ás 10 da mañá cunha benvida institucional na que participarán o presidente do CPEIG, Fernando Suárez; a directora da Axencia para a Modernización Tecnolóxica de Galicia (AMTEGA), Mar Pereira; o director xeral de Emetel, Manuel Lago; e Roberto Baratta, responsable de Seguridade de ABANCA. A partir das 10.15 horas, sucederanse varios relatorios sobre administracións públicas, a cargo de Xavier Gatius, do Centro de Seguridade da Información de Cataluña (CESICAT); Rafael Pedrera Macías, do Centro Nacional de Protección de Infraestruturas Críticas (CNPIC), e Adrián Lence Paz, pola AMTEGA. Despois dunha pausa, a xornada retomará a actividade contra o mediodía para ofrecer varios relatorios sobre a empresa, dos que se ocuparán Ramsés Gallego, de Symantec, e un conferenciante por determinar en representación de Microsoft. Ás 13 horas celebrarase unha mesa redonda baixo o epígrafe de As empresas galegas no novo contexto tecnolóxico” a cargo de Roberto Baratta; Andrés Tarascó, de Tarlogic; Iago Fortes, de Inprosec; Susana Rey, de R; e Rafael Ave, de Emetel. O peche da xornada será ás 14.00 horas a cargo de Roberto Baratta e Fernando Suárez.
 

Datos do INCIBE
Segundo informa o CPEIG, o alicerce deste encontro está nos desafíos claros que pon de manifesto o medre da Sociedade do Coñecemento. Un medre que leva implícito o crecemento de ameazas. O CPEIG sinala a este respecto, reflectindo datos do Instituto Nacional de Ciberseguridade (INCIBE, que as incidencias en seguridade nas redes informáticas a raíz do ciberataque de alcance mundial de mediados do mes de maio afectaron a máis de 360.000 equipos e deixaron pegada en 180 países diferentes. Segundo explica o CPEIG, “nos últimos tempos, os atacantes informáticos profesionalizáronse e os expertos alertan de que a súa motivación xa non é técnica nin intelectual, senón económica e política; trátase dun risco global que pode ter moi graves consecuencias para a economía ou a seguridade da cidadanía”. En opinión do CPEIG, a resposta a ese risco global vai alén da tecnoloxía e require “dun enfoque multidisciplinar”, ademais “dunha estreita colaboración de gobernos e empresas que cómpre reforzar”. Cara a isto precisamente se dirixe a xornada do CPEIG.

24/05/201709:54
Foto de grupo das VI Xornadas #ASPACEnet.
Madrid

Fundación Vodafone España acolle as VI Xornadas #ASPACEnet en Vodafone Praza

  • Estas Xornadas celebráronse os días 19 e 20 de maio en Madrid e foron unha gran ocasión para que as entidades expuxeran os seus proxectos e xuntos debatesen sobre o futuro de #ASPACEnet

 

#ASPACEnet é un proxecto que ten como misión mellorar a autonomía e a calidade de vida das persoas con parálise cerebral a través da tecnoloxía e, especificamente, as Tecnoloxías de Apoio (TA) e os Sistemas Alternativos e Aumentativos de Comunicación (SAAC).

As Xornadas contaron cos seguintes fitos:

1. Entrega de Premios do “I Concurso de Videotutoriais #ASPACEnet”:

  • Na categoría de Adaptacións “de baixo custo”, o premio é para AVAPACE e o seu vídeo “Pau de selfie”, que ensina como adaptar un pau de selfie para que sexa utilizado por persoas con diversidade funcional. 
  • ASPACE Asturias levouse o premio na categoría de Monografías “”, co vídeo “Implementación do proxecto #ASPACEnet”, no que ensinan como levaron a cabo o seu proxecto #ASPACEnet no centro.
  • No caso da categoría de Casos “de Provisión de Tecnoloxía de Apoio”, o premio é para Aremi Lleida e o vídeo “O meu mundo nun clic: Daniel”, no que coñecemos como a tecnoloxía lle facilita o día a día a Daniel.
  • Por último, APACE Toledo leva o premio da votación popular realizada en redes sociais. O seu vídeo “A voz dos meus ollos”, onde presentan un caso real de tecnoloxías de apoio para discapacidade, foi o máis votado, con 1730 gústame.

2. As entidades presentaron os proxectos de colaboración #ASPACEnet 2016/2017.

  • Proxecto TvPC á carta (Atenpace, APACE Toledo e ASPACE Asturias)  traballarán conxuntamente para crear un blogue e unha canle de contido audiovisual, similar a unha canle televisiva.
  • Proxecto Non nos cortamos ( Aremi Lleida e ASPACE BARCELONA) que ten como obxectivo elaborar unha curtametraxe por entidade e celebrar un festival de curtos no que poder compartir as experiencias do proceso de creación
  • Proxecto RadioRed, unha iniciativa de radio colaborativa que xa foi premiada na edición anterior do concurso e que este ano se amplía coa participación de ASPACE Coruña, AMAPPACE Málaga e APAMP Vigo.
  • Crea en Rede é o proxecto de ASPACE Salamanca, UPACE Xerez e ASPACEBA Badaxoz que ten como obxectivo crear un equipo de traballo que elabore material adaptado baseado en unidades didácticas do currículo escolar, para traballar cos alumnos máis gravemente afectados.
  • O proxecto ASPACE chef - Convídasme a comer? unirá ASPACE Huesca, ASPACE Xixón, ASPACE Cáceres, APCA Alacante e ASPACE Navarra na tarefa de realizar un obradoiro de cociña no que se terán en conta as posibilidades, competencias e necesidades das persoas con parálise cerebral, así que tamén se recopilarán receitas de cociña de comidas de diferentes texturas.
  • Proxecto EnRUTA2 (ASPACE León e ASPACE Salamanca) crearán videoguías para persoas con mobilidade reducida, co fin de que poidan consultar posibles itinerarios e rutas de saída e goce do lecer.

3. Deuse a benvida a dous novos colaboradores: Fundación Tecsos presentando as solucións de Teleasistencia Móbil Accesible e a Empresa Mouse4all.

4. Tívose a oportunidade de falar sobre o futuro do programa #ASPACEnet e a nova convocatoria de proxectos colaborativos que nesta nova edición irá máis enfocada a solucións innovadoras baseadas en tecnoloxías como a realidade virtual, realidade aumentada, intelixencia artificial, interfaces naturais e interoperables con outros métodos de acceso alternativos e aumentativos, …

A actividade do proxecto pódese seguir en Twitter a través do hashtag #ASPACEnet e #conecta2Xaccesibilidad  e na web  http://aspacenet.aspace.org/

24/05/201709:41
Anciá con cámara dixital.
Santiago de Compostela

Cinco tecnoloxías que melloran a vida dos maiores

  • O uso das novas tecnoloxías non ten idade, e cada vez son máis os maiores que aproveitan as posibilidades do mundo dixital

 

O mundo dixital é cada vez máis accesible para todos, mesmo para as persoas maiores. E é que moitas innovacións tecnolóxicas van encamiñadas a mellorar a calidade de vida da poboación anciá en varios dos seus ámbitos. O obxectivo non só é enriquecer a súa experiencia como usuarios dixitais senón tamén facer máis fácil o seu día a día. Pero, ¿cales son os beneficios que Internet pode achegar aos máis maiores? A continuación descríbense diversas tecnoloxías que melloran a vida das persoas da terceira idade: desde apps para a saúde ata propostas para mellorar a memoria.

Segundo datos do Instituto Nacional de Estatística recollidos no informe 'Un perfil das persoas maiores en España ', un 34,7% dos maiores de 65 anos utilizou Internet no últimos tres meses. Esta cifra medrou case un 30% desde 2006 a 2016, o que demostra que a tecnoloxía cada vez está máis integrada no día a día das persoas anciás, que confían na Rede para hábitos diarios como informarse.

Son moitos os ámbitos nos que se está aplicando a tecnoloxía para facer máis fácil a vida das persoas de maior idade. Programas informáticos, apps para dispositivos móbiles, avances en redes sociais, etc., todo pode ser moi útil para eles. Estes son algúns dos usos máis estendidos:

1. Tecnoloxía adaptada para maiores

O primeiro que hai que garantir é que o acceso ás novas tecnoloxías sexa posible para a terceira idade. Internet é un mundo por completo novo para moitas persoas maiores, polo que é habitual que experimenten dificultades ao navegar pola Rede ou ao utilizar os seus teléfonos móbiles. Con todo, hoxe en día é posible adaptarlles sistemas operativos como Android, é dicir, facelos máis intuitivos modificando os menús ou aumentando o tamaño de imaxes e texto. Algunhas aplicacións coas que se pode facer isto son WISER, Large Launcher e ata SwiftKey, coa que se pode agrandar o teclado do teléfono.

2. Aplicacións que coidan a saúde dos maiores

A medida que van pasando os anos, velar pola saúde convértese nunha prioridade aínda máis importante. E grazas a algunhas apps, coidarse resulta moito máis fácil. No que a deporte e exercicio físico se refíre, é moi interesante Podómetro, unha aplicación que permite calcular as distancias e as calorías consumidas nos paseos dos máis maiores. Outra das necesidades máis comúns é estar ao día cos medicamentos que han de tomar. Para non perderse nin un só detalle existe a app Medisafe, que avisa mediante notificacións de cando se deben tomar os fármacos.

3. Aplicacións para comunicarse coa familia

Unha das palabras que mellor define a esencia da internet é conexión. A Rede achega ás persoas, tamén ás maiores. Neste sentido, algunhas cidades do mundo como a xaponesa Iruma están a impulsar iniciativas para axudar aos anciáns que se perden a través de identificadores con códigos QR. Ademais, servizos de mensaxería instantánea e programas sinxelos como Skype contribúen a que moitas persoas maiores estean en contacto cos seus seres queridos e amigos cando non é posible desprazarse da casa.

4. Apps para a memoria

Da mesma forma que se adestra o corpo, tamén se debe exercitar o cerebro. Para combater ou, polo menos, minimizar os efectos da perda de memoria, existen aplicacións como Memory Trainer, coa que poder desenvolver as capacidades de cálculo mental, linguaxe e lóxica. Desta maneira, na palma da man está todo o poder para deseñar rutinas de adestramento mental e exercitar a actividade cerebral de forma continua.

5. Aplicacións divertidas

As persoas maiores dispoñen de moito tempo libre, así que o entretemento é unha parte esencial nas súas vidas. As posibilidades que ofrece a tecnoloxía son infinitas: desde libros dixitais lixeiros con pantallas especiais que non cansan a vista ata videoxogos intuitivos para tabletas e dispositivos móbiles. A iso únese unha ampla oferta de contidos audiovisuais (películas, series e documentais) que Internet e os televisores Smart TV ofrecen a mozos e maiores.

Tecnoloxía para todos

A tecnoloxía non funciona como unha barreira entre xeracións, senón máis ben o contrario. Con esforzo, innovación e orixinalidade pode ser moi sinxelo facilitar a inclusión das persoas maiores na contorna tecnolóxica e dixital. E, como se viu no texto, isto pode ter consecuencias moi positivas nas súas vidas, pero tamén é algo que beneficia a todos e que nos fai medrar e avanzar como sociedade.

24/05/201709:25
Cartel do curso.
Cuntis

Seminario gratuíto online para usar Internet con seguridade dende a aula CeMIT de Cuntis

A Federación Galega de Asociacións Universitarias Séniors (FEGAUS), como aliado do Plan de Inclusión Dixital de Galicia, está a colaborar coa Rede CeMIT na realización de actividades formativas destinadas, prioritariamente, a persoas maiores de 45 anos (aínda que sen excluír a calquera outra persoa interesada por motivos de idade), a través do seu proxecto Ágora Tecnoloxía.

A colaboración consiste nun ciclo de seminarios online enfocado a persoas cun nivel de aceptación e uso das novas tecnoloxías inicial. Nestes seminarios daranse a coñecer os principais usos que teñen os dispositivos móbiles e tabletas no perfil de usuario destinatario, coa clara intención de desbloquear os temores e barreiras psicolóxicas que en moitos casos existen no seu uso por parte dos maiores, achegándolles os coñecementos necesarios e a aplicación directa da tecnoloxía no seu día a día.

Este venres 26 de maio en horario de 11:00 a 12:30h emitirase en directo por Internet dende a Aula CeMIT de Cuntis (Pontevedra) o seminario gratuíto "Usa Internet con seguridade. Protéxete dos perigos da Rede". Navegar por Internet tamén ten os seus perigos e a mellor forma de protexerse é coñecelos. Neste seminario falarase de como manter protexidos os ordenadores e teléfonos intelixentes de posibles ameazas como virus e outros perigos. En concreto falarase de:

  • Precaucións para unha navegación segura en computadores, teléfonos intelixentes e tabletas
  • Ferramentas gratuítas de protección, análise e desinfección para equipos informáticos
  • Aplicacións e consellos de privacidade e seguridade de datos
  • Información sobre conexións seguras no fogar e a través de redes wifi

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS