20/11/201709:02
Santiago de Compostela
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
Os protagonistas da serie 'on Fologüers' da Fundación ONCE viaxarán á Amazonía peruana, no marco do Día Mundial do Saneamento ou Día Mundial do Retrete de Nacións Unidas que se celebra o próximo 19 de novembro, para coñecer, coa colaboración da Fundación Aquae, a importancia de ter un retrete, segundo informaron ambas as entidades.
Así, a Fundación ONCE aborda esta situación no cuarto capítulo da segunda tempada da serie baseándose no proxecto de cooperación 'Auga limpa e saneamento na Amazonía peruana', impulsado por a Fundación Aquae en 2014 xunto a Unicef.
Nesta ocasión, será Toni, o protagonista con discapacidade auditiva que comunica en linguaxe oral, o que descubra a importancia de dispoñer dun retrete. Para iso, durante o capítulo 'On the water', Toni viaxará á Amazonía peruana para descubrir como un saneamento seguro pode cambiar a vida a miles de persoas.
Segundo o informe da Organización Mundial da Saúde (OMS) e de Unicef, 2.100 millóns de persoas carecen de acceso a auga potable e dispoñible no fogar e 4.500 millóns non dispoñen dun saneamento seguro, o que leva a unhas consecuencias dramáticas para a saúde, a dignidade e a seguridade destas persoas, así como para o medio ambiente e o desenvolvemento social e económico.
Por iso, a Fundación ONCE e a Fundación Aquae colaboran neste capítulo que se sitúa na Amazonía peruana, onde o 85% da poboación non ten acceso a auga potable, e no que serán dous mozos de Loreto, poboación rural do Amazonas peruano, quenes expliquen como se constrúe un váter sustentable.
Ademais, segundo o presidente da Fundación Aquae, Ángel Simón, a meta do saneamento o Obxectivo de Desenvolvemento do Milenio no que menos se avanzou. "Ser conscientes do importante papel que xoga o saneamento para a saúde é o primeiro paso para conseguir este reto", asegurou á vez que recomendou "ofrecer cooperación en forma de transferencia de coñecemento ás persoas que máis o necesitan".
Pola súa banda, o director xeral da Fundación ONCE, José Luis Martínez Donoso, sinalou que o obxectivo da serie é "reflectir o concepto do deseño para todos". "Transmitimos valores como a solidariedade, o compromiso, o compañeirismo, que levados ao noso día a día permítennos lograr a inclusión das persoas con discapacidade", afirmou.
A serie 'On Fologüers' pódese ver en Flooxer, plataforma audiovisual que apoia a creadores con talento, e nas canles de redes sociais de Antena 3, La Sexta, Onda Cero Radio e Europa FM.
Os días 28 e 29 de novembro vaise celebrar no Campus de Ourense unhas xornadas destinadas directamente a loitar a prol da igualdade de xénero na industria do videoxogo, un ámbito, todo hai que dicilo, onde segue a haber maioría profesional de homes e que fica aínda inzado (en forma e máis en contido) de estereotipos de xénero que cómpre superar. Estamos a falar das xornadas Videogamificación e sexualidades: identidades, xéneros e discursos interactivos. Consecuencias para a industria e a educación. A respecto dos porqués da organización deste encontro, as docentes María Isabel Doval, da Facultade de Ciencias da Educación, e Alma Rodríguez, da Escola Superior de Enxeñaría Informática, teñen claros os moitos motivos polos que cómpre visualizar o sexismo no sector: “A industria do videoxogo segue lonxe dos estándares de igualdade que debería manter”.
Segundo engaden as coordinadoras da iniciativa, “cada vez son máis as mulleres de peso na industria e as protagonistas femininas nos videoxogos e tamén son xa case a metade da porcentaxe de xogadoras habituais”. Porén, matizan, “as mulleres só conforman o 22% do sector de desenvolvemento e un 10% do cadro de competidores e competidoras profesionais en ligas”. Neste contexto, recalcan, xorde a necesidade tanto de dar a coñecer “o verdadeiro papel da muller na industria, da man de xornalistas, desenvolvedoras, estudantes, artistas e xogadoras profesionais”. As xornadas Videogamificación e sexualidades, patrocinadas pola Unidade de Igualdade da Universidade de Vigo, abranguerá conferencias, presenciais ou non, e diferentes mesas redondas e obradoiros prácticos, contando coa participación de expertos e expertas de diferentes eidos tanto do mundo profesional como académico. As actividiades arrancarán cunha conferencia sobre a reprodución de microculturas patriarcais e masculinidades hexemónicas a través dos videoxogos, a cargo de Jorge García, sociólogo da Universidade de Santiago de Compostela, e rematará cun obradoiro no que as persoas participantes probarán diferentes videoxogos para ver como se representa neles a sexualidade e levar a cabo unha análise crítica.
As xornadas están dirixidas sobre todo (aínda que non de xeito exclusivo), ao alumnado. As persoas interesadas poden inscribirse de balde ata o 26 de novembro en videojuegosygenero@uvigo.es.
O proxecto Rede de Escolas na Nube vaise ampliar a todas as Escolas Rurais Agrupadas de Galicia. Así o deron a coñecer este mes os impulsores actuais do dito proxecto, o Centro de Supercomputación de Galicia (CESGA), a empresa Balidea e máis a Xunta (AMTEGA e a Consellería de Educación e Cultura). Como lembraremos, a Rede foi creada hai case oito anos co obxectivo de explorar (e explotar) as vantaxes da computación na nube (cloud computing) desenvolvidas na contorna das pequenas escolas rurais, na nosa terra os Centros Rurais Agrupados (CRA). O dito traballo foi posible na súa orixe grazas ao apoio financeiro que HP Labs emprestaba ao CESGA e en 2014 recibiu un importante pulo orzamentario para un proxecto europeo de cara a validar e mellorar os achados obtidos noutras zonas rurais e illadas de Europa. Agora, a Rede de Escolas de Nube volve recibir impulso coa posibilidade de espallarse a todo o noso rural.
A dita nova (o espallamento da iniciativa) deuse a coñecer nunha xuntanza entre a Consellería de Educación e AMTEGA, por unha banda, e os equipos directivos de todos os Centros Rurais Agrupados (CRAs) de Galicia. Na presentación da Rede de Escolas na Nube ofrecéuselles a posibilidade de incorporarse ao proxecto. Como recordaremos, catro deles (o CRA Boqueixón - Vedra Neira Vilas, o CRA de Vilaboa Consuelo González Martínez, o CRA Amencer de Ribadavia, e o CRA Nosa Señora do Faro de Ponteceso) están a participar desde 2012 como centros piloto ao abeiro da iniciativa. O proxecto de innovación educativa Rede de Escolas na Nube xurdiu como colaboración entre o CESGA, quen coordinou a iniciativa, a empresa galega Balidea Consulting & Programming, a Consellería de Educación e a Axencia de Modernización Tecnolóxica de Galicia da Xunta de Galicia. Segundo se lembrou na xuntanza, a Rede de Escolas na Nube supón “un modelo de infraestrutura, servizos e metodoloxía de traballo baseado en computación cloud e software aberto ao servizo do ensino e a colaboración entre as escolas rurais distribuídas, creando unha rede na que se poidan compartir de maneira segura experiencias educativas, materiais e aprendizaxe, adaptada a contorna ás necesidades deste modelo de escola rural distribuída e multinivel”.
Asemade, fíxose fincapé nos bos precedentes abertos polo proxecto: “A Rede de Escolas na Nube é un claro exemplo dunha colaboración de éxito entre institucións públicas e privadas galegas”, unha iniciativa que, neste caso concreto, é quen de “repercutir nun beneficio directo para a sociedade, así como nunha aposta de futuro para a creación de produtos innovadores made in Galicia”.
A start up Fusion Collective Intelligence, especializada en desenvolvementos dixitais de intelixencia colectiva, lanzou en España a plataforma Welever, que pretende democratizar a responsabilidade social empresarial e promover unha nova forma de facer voluntariado corporativo que pon o protagonismo no empregado e xestiónase a través do teléfono móbil.
Welever está pensado para que as empresas poidan activar a súa responsabilidade social dunha forma sinxela, escalable e económica: o custo varía desde 36 euros por empregado ao ano para unha empresa con 50 empregados activos, ata un euro para as que teñen 25.000 traballadores activos.
A ferramenta xestiónase internamente, sendo os propios traballadores quenes propoñen as iniciativas solidarias que conforman o Programa de Liderado Social, de acordo cos seus intereses e cos Obxectivos de Desenvolvemento Sustentable (ODS) definidos pola empresa.
A app está xa dispoñible para contornas iOS e Android. Unha vez descargada no móbil, e vinculado o seu perfil de usuario coa empresa, pode dar de alta as súas iniciativas solidarias para que os seus compañeiros poidan participar nelas, así como sumarse a colaborar nas actividades propostas por outros empregados ou pola propia organización. A aplicación conta con chat interno e a posibilidade de enviar notificacións push.
O delegado territorial da Xunta na Coruña, Ovidio Rodeiro, visitou no seu domicilio a Mari Carmen Lamela,unha usuaria do servizo de teleasistencia, na súa modalidade de copago, que aos seus 87 anos leva preto de dez dada de alta nun programa que está cofinanciado pola Xunta de Galicia a través da Consellería de Política Social en colaboración coa Cruz Vermella.
A teleasistencia é un sistema de atención personalizada baseado nas novas tecnoloxías da comunicación, que permite aos seus usuarios e coidadores manter o contacto, a través da liña telefónica (fixa ou móbil), durante 24 horas ao día e todos os días do ano. O sistema funciona grazas a un centro receptor atendido por persoal cualificado, capaz de atender as súas demandas ou mobilizar os recursos necesarios en caso de emerxencias sociais ou sanitarias.
Esta comunicación faise posible con só apertar un botón. Está destinada a persoas maiores, non dependentes, e ten carácter preventivo e de promoción da autonomía persoal. Os seus obxectivos son incrementar a seguridade do usuario e fomentar a súa autonomía persoal, adaptar a teleasistencia ás necesidades reais das persoas, e ofrecer unha resposta segura ante a posibilidade dunha situación de risco.
Avances tecnolóxicos
Na segunda xeración da tecnoloxía, a xeolocalización 'LoPe' engade a outros servizos unha importante resposta de seguridade e tranquilidade para os familiares e coidadores de persoas con deterioración cognitiva, xa que permite coñecer a súa situación en todo momento e detectar riscos de forma automática.
Ovidio Rodeiro sinalou que na actualidade hai na provincia da Coruña 1.985 persoas atendidas por este servizo. Delas, 125 residen en Santiago, 385 na cidade da Coruña, 251 en Ferrol, e os 1.224 restantes noutras localidades da provincia. Outras 100 persoas son usuarias da tecnoloxía LoPe. Deste xeito, na provincia da Coruña estanse atendendo na actualidade 2.085 persoas mediante teleasistencia, o que supón o 41 por cento dos demandantes na Comunidade.
O delegado territorial da Xunta felicitou a Mari Carmen e agradeceu a súa hospitalidade e a súa colaboración para dar a coñecer este servizo. Ovidio Rodeiro lembrou que este servizo está implantado en Galicia desde o ano 2007, cun crecemento importante a partir do ano 2012. “Está orientado tanto a coidadores como ás propias persoas dependentes, pois nestes casos é tan importante a tranquilidade dos coidadores e familiares como a integridade física do usuario”, sinalou.
Política social
Ovidio Rodeiro aproveitou a ocasión para facer un balance do "esforzo que a Consellería de Política Social leva a cabo en Santiago e a súa comarca". O delegado lembrou que o Concello ten na actualidade 5.247 horas dispoñibles sen utilizar, o 58,75%, sobre un total de 8.930. Con 3.683 horas utilizadas, o 41,24%, Compostela é a cidade de Galicia "con peor cociente de execución, o que provocou que quedase fóra da última ampliación", que supuxo un incremento de máis do 30 por cento das horas SAF na Comunidade. A partida destinada a este capítulo supera o millón de euros ao ano.
O delegado tamén lembrou que na actualidade na cidade hai 288 persoas que reciben mensualmente a Renda de Inclusión Social de Galicia (RISGA), o que supón un investimento de 1,7 millóns de euros ao ano. Na comarca as cifras elévanse ata os 2,4 millóns de euros para dar cobertura a 391 usuarios.
Finalmente, Rodeiro engadiu que este ano o Plan Concertado incrementou a nómina de persoal de recursos humanos cun novo educador social, o que deixa en 220.000 euros á partida anual que a Xunta de Galicia destina a financiar ao cento por cento os equipos de Servizos Sociais que poñen a disposición do concello. Ovidio Rodeiro estimou en máis de 2,9 millóns de euros os recursos que destina a Política Social exclusivamente no Concello compostelán.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...