08/06/201808:34
Santiago de Compostela
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
Este luns tivo lugar no Hostal dos Reis Católicos "Estamos prep@rados", un acto de recoñecemento no que Down Compostela e a Fundación Vodafone España entregaron diplomas aos 8 mozos con síndrome de Down e discapacidade intelectual que superaron o programa "Yo me prep@ro" de formación en Novas Tecnoloxías. Con este certificado, ambas as entidades acreditan que os mozos adquiriron as destrezas nas TIC que lles permitirán formar parte do mercado laboral ordinario: manexar programas ofimáticos, usar diversas aplicacións móbiles ou navegar por Internet e mandar correos, entre outras habilidades.
Os encargados de repartir estes títulos foron as autoridades presentes, que tamén entregaron diplomas ás empresas participantes no programa polo seu apoio á inclusión laboral do colectivo. Estas empresas ofreceron aos alumnos a oportunidade de realizar prácticas formativas nas súas instalacións ou mesmo entrar a formar parte dos seus cadros de persoal. E é que a pesar de contar coa formación adecuada, tan só o 5% das persoas con síndrome de Down do noso país puido demostrar a súa valía laboral; por iso, para o colectivo é indispensable contar co apoio e a colaboración do tecido empresarial local.
Tanto os mozos como os empresarios compartiron as súas experiencias, destacando as vantaxes que ofrece para as empresas contar con persoas con discapacidade intelectual entre os seus traballadores xa que, ademais de realizar as súas tarefas con meticulosidade e moita organización, melloran o clima laboral e transmiten alegría e optimismo aos seus compañeiros. Así, animaron a outras empresas a que aposten por políticas inclusivas que ofrezan oportunidades laborais a traballadores con esta discapacidade intelectual.
No acto interviñeron, a secretaria xeral de emprego da Xunta de Galicia, Covadonga Toca; a directora xeral de maiores e persoas con discapacidade da Xunta de Galicia, Fabiola García; a de políticas sociais, diversidade, saúde e centros cívicos do Concello de Santiago, Concepción Fernández; o presidente da Fundación Down Compostela, Juan J. Martínez; e o responsable de Administracións Públicas de Vodafone España en Galicia, Jesús Sueiro.
O presidente da Fundación Down Compostela, quixo dar a benvida a todas as persoas asistentes e dar "os parabéns ás 8 persoas que acaban de terminar este curso de Fundación Vodafone España en Novas Tecnoloxías". "Desde o inicio desta formación, 32 mozos de Down Compostela puideron formarse en novas tecnoloxías e 12 deles conseguiron un contrato de traballo". Martínez quixo engadir que as persoas con síndrome de Down "son traballadores útiles capaces de achegar moito nunha sociedade tan complexa como a que vivimos" e que "a formación é imprescindible para conseguir un posto de traballo hoxe en día".
O responsable de Administracións Públicas da Fundación Vodafone España agradeceu a invitación a este acto poñendo de manifesto que "é unha honra estar hoxe aquí, na presentación dos resultados dun proxecto que comezou en 2013 entre a Fundación Vodafone España e Down España" e que se foi ampliando anualmente. "Desde a Fundación Vodafone España queremos ofrecer as ferramentas necesarias para que as persoas con síndrome de Down adquiran os coñecementos necesarios que faciliten a súa inclusión no mundo laboral". Sueiro destacou que "desde o inicio da formación "Yo me prep@ro" case 1.000 mozos participaron no mesmo e 322 conseguiron un emprego" e quixo reivindicar "máis iniciativas como esta" por ser "sumamente importantes para que todos os colectivos teñan a súa oportunidade".
Pola súa banda, a directora xeral de maiores e persoas con discapacidade quixo "agradecer á Fundación Down Compostela que contasen coa Administración Autonómica nun acto destas características" e "felicitar ás empresas que fan posible a inclusión laboral para que se converta nunha realidade máis palpable". Quixo pechar a súa intervención destacando que "aínda queda moito camiño por andar en canto á inclusión laboral".
Durante a súa intervención, a concelleira de políticas sociais, diversidade, saúde e centros cívicos do Concello de Santiago deu os "parabéns aos participantes tras máis de 700 horas de esforzo e traballo" e destacou a importancia deste tipo de iniciativas colaborativas. Fernández deixou constancia de que "a educación é o mellor investimento que pode facer unha sociedade, xa que é o mellor camiño para lograr a inclusión laboral e a igualdade de oportunidades".
Para pechar a quenda de intervencións, a secretaria xeral de emprego da Xunta de Galicia resaltou que "falar de emprego é falar de cooperación, de formación e de capacitación". Tamén quixo facer fincapé na necesidade de "programas como este porque hai que traballar porque todos e todas teñamos unha vida digna".
Tras as intervencións institucionais, tivo lugar a mesa de experiencias, na que os responsables da cervexaría-tapería Milongas expuxeron as súas impresións tras a contratación de Daniel Pombo, usuario da Fundación Down Compostela, como axudante de camareiro.
Así, José e Mariano Rivas destacaron que a experiencia está a ser "boísima" e que a idea de contratar a unha persoa con síndrome de Down xurdiu tras ler nun xornal local "unha nova sobre outra empresa contratante". "É impresionante ver como se esforzan en conseguir as cousas". Ademais, quixeron destacar o traballo dos preparadores laborais da Fundación porque "fixeron un traballo espectacular".
Marcos Reimunde, responsable de Recursos Humanos de Milongas, destacou que "é unha aprendizaxe continua no que ves a súa ilusión e as súas ganas de traballar".
Por último, Daniel Pombo, explicou o seu día a día no local onde o seu traballo consiste "en atender aos clientes, servir e recoller mesas, montar a terraza, cambiar as cartas de almorzos polas de comida, revisar os baños, montar as mesas de comedor, encher os servilleteros, varrer e fregar o almacén e calquera outra tarefa que me manden". O mozo confesou que "este é o meu primeiro traballo e grazas a Mariano e a Jose cumprín un soño. Ben, varios soños: conseguir un traballo, ser camareiro, gañar o meu propio diñeiro e poder seguir soñando. Agora tócame pensar en que me vou a gastar o diñeiro".
O programa "Yo me prep@ro".
O obxectivo do programa "Yo me prep@ro", que celebra a súa cuarta edición, é proporcionar ás persoas con discapacidade intelectual as ferramentas e estratexias necesarias en aspectos clave como o uso adecuado das TIC: programas informáticos, navegación por Internet, acceso a redes bancarias informatizadas ou aplicacións móbiles. Todo co obxectivo de axudalos a salvar a fenda dixital que os pode condicionar á hora de atopar un posto de traballo normalizado, mellorar a súa autonomía e levar unha vida o máis plena e independente posible.
Nesta edición recibiron formación en novas tecnoloxías 8 usuarios de Down Compostela, que adquiriron as competencias necesarias para poder desempeñar un posto de traballo coa normalidade e eficacia de calquera empregado. Estes alumnos de Santiago de Compostela sumaranse a outros en diversas provincias, alcanzando un total de 960 mozos que recibirán esta formación en toda España.
Na súa formación contan co apoio de catro novos vídeo-tutoriais que a través dunha linguaxe sinxela e accesible, reforzarán os coñecementos ofrecidos no proxecto, e permitirán a calquera usuario comprender como se obtén e para que serve o DNI electrónico, descargar apps para Smartphone ou manexar con soltura aplicacións como WhatsApp.
Tras o éxito de anteriores edicións o proxecto afronta este cuarto ano a nivel nacional con renovado impulso, pois superou as expectativas tanto no número de prácticas conseguidas como na cifra de contratacións alcanzadas: sumados aos contratos laborais para alumnos conseguidos nos anos previos, "Yo me prep@ro" conseguiría durante os seus catro anos de execución un total de 319 insercións laborais en empresas ordinarias de todo o país.
A Xunta de Galicia e Indra, unha das principais compañías globais de tecnoloxía consultoría, formalizaron o seu acordo para a posta en marcha, nas instalacións da Cidade da Cultura de Santiago de Compostela, o Centro de Excelencia en Tecnoloxías Innovadoras Sociosanitarias (Cetiss), cuxo fin é impulsar a transformación dixital dos servizos sociais e de saúde. Así, será posible a innovación en campos como o envellecemento activo, o cartón social, o fogar dixital ou a alimentación saudable.
O presidente da Xunta de Galicia, Alberto Núñez Feijóo, e o presidente de Indra, Fernando Abril-Martorell, foron os encargados de formalizar a firma deste acordo.
Neste contexto, Feijóo aseverou que este centro, que comezará a súa andaina o próximo mes de agosto, concentrará coñecemento e actividades de innovación tecnolóxica para afrontar e dar resposta aos retos nestas áreas.
Innovación tecnolóxica
O Cetiss nace co obxectivo de concentrar coñecemento e actividades de desenvolvemento e innovación tecnolóxica de diversas áreas sociosanitarias. Concíbese, así mesmo, como un centro demostrador de produtos e solucións orientados a mellorar a asistencia e calidade de vida dos cidadáns, nalgúns dos cales Indra e a Xunta xa están a traballar actualmente. É o caso de Fogar Dixital, que permite abordar un modelo de control teleasistido e proactivo aos pacientes crónicos, facilitando a detección temperá de posibles empeoramentos de saúde e evitando desprazamentos. Tamén é relevante, neste ámbito, o desenvolvemento da Historia Social Única, que contribuirá a axilizar a tramitación dos servizos e prestacións e a prestar unha atención máis personalizada.
Outro importante fin do Cetiss será o de actuar como elemento dinamizador para a creación dunha comunidade estable entre empresa, universidade, institucións sanitarias e centros de I+D+i galegos, que promova a mellora continua e a innovación establecendo marcos de relación entre os diferentes axentes involucrados, tanto a nivel local como internacional.
Esta iniciativa enmárcase no Pacto para o desenvolvemento Dixital de Galicia que asinou a Amtega en 2013 coas principais empresas TIC con presenza nesta comunidade autónoma. O seu obxectivo é establecer un compromiso de cooperación firme entre a Xunta e o sector TIC para converter ao sector da economía do coñecemento nun dos motores da economía galega.
O presidente galego destacou que con este convenio para crear o Cetiss, no que traballarán entre 35 e 50 persoas, súmase unha nova iniciativa que consolida a Cidade da Cultura como "polo dixital de Galicia". Ademais, incidiu en que todas son iniciativas que tratan de mellorar o día a día dos cidadáns e de xerar oportunidades na Comunidade Autónoma.
Os pasados días 31 de maio e 1 de xuño, celebráronse as VII Xornadas #ASPACEnet "Conectados coa parálise cerebral" na sede da Fundación Vodafone España. Nesta edición, centrada na innovación, os verdadeiros protagonistas foron as persoas con parálise cerebral, quenes comentaron aos asistentes os pormenores dos proxectos de innovación e de transformación dixital nos que participaron durante este ano.
As Xornadas foron inauguradas o xoves 31 de maio, pola súa presidenta Manuela Muro e por Francisco Román, presidente de Vodafone e a Fundación Vodafone España, quen valorou de forma moi positiva a recente renovación do convenio de colaboración entre a Confederación ASPACE e a Fundación Vodafone España.
Pola súa banda Manuela Muro agradeceu a Vodafone o apoio que brinda ao Movemento ASPACE que "permite mellorar a nosa calidade de vida grazas ás tecnoloxías da información e o apoio á comunicación". Muro ademais comentou que "cando todo un Movemento Asociativo unimos esforzos cunha entidade como a Fundación Vodafone para apostar pola innovación, os logros só se poden traducir nunha transformación dixital que imparte de forma positiva na nosa participación na sociedade, no exercicio dos nosos dereitos, e na nosa inclusión".
A continuación Sara Sánchez, responsable do programa #ASPACEnet presentou os resultados da enquisa realizada a entidades sobre novas tecnoloxías. A conclusión é que a maior parte das entidades considera esta área prioritaria, pero os recursos para abordala son escasos. O día terminou con talleres prácticos de "Design Thinking" onde se trataron o plan de formación de líderes en tecnoloxía de apoio, o centro de recursos tecnolóxicos, e o fortalecemento do traballo en rede.
O segundo día das Xornadas #ASPACEnet 2018 foi a quenda para a comunidade Conecta2Xaccesibilidad, onde se presentaron os catro proxectos de Transformación Dixital que levaron a cabo algunhas das nosas entidades, con outras entidades do Terceiro Sector.
Vanesa Morán de ASPACE Asturias, presentou o primeiro dos proxectos "Tv PC á carta " que levaron a cabo xunto a APACE Toledo e ASPACE Sevilla. Vanesa comentou que grazas a este proxecto "coñecemos novas ferramentas que utilizamos para realizar actividades, como son Eva Facial Mousse, Mefacylita e Mousse For All". TV PC á carta promove a participación de persoas con parálise cerebral de diversos perfís, unindo para iso a radio, a televisión e a escritura para dar a coñecer e experimentar a realidade de persoas con esta discapacidade.
"Comunico, aprendo e cóntocho" é o proxecto que realizou ASPACE Salamanca xunto a APAMP Vigo. Ten como obxectivo facilitar o acceso aos contidos do currículo ordinario a alumnos e alumnas con diversidade funcional e afectación motórica, favorecendo os procesos de inclusión educativa co apoio das TACS e soportes informático. En palabras de Mª Luz Oliveira e Manuel Da Silva, pais de Adrián que participou no proxecto "Comunico, aprendo e cóntocho" deunos moita tranquilidade, motivounos pensar en que Adrián pode chegar a desenvolver todo o seu potencial cognitivo grazas a que pode dispoñer dunha ferramenta tan importante como é a da comunicación".
"Transformación dixital nas aulas" é o proxecto realizado entre Fundació El Maresme, Fundación Gil Gayarre e AMIDOWN León co obxectivo de desenvolver actividades orientadas a traballar o currículo de primaria. Utilízanse materiais que potencian a aprendizaxe en forma de fichas, e prográmanse tanto no computador como na Tablet. Regina Suñé Puig, titora de aula na Escola l'Arboç de Fundació o Maresme comenta que "é unha ferramenta cómoda e lúdica para traballar cos nenos o vocabulario de nivel de Primaria. Permítenos reforzar o coñecemento de pictogramas para que despois os poidan recoñecer e utilizar no seu caderno de comunicación".
Por último "Mírame, eu decido" é o proxecto que traballou ASPACECIRE xunto a AUTRADE. O obxectivo deste proxecto é aumentar a autonomía e as decisións das persoas con discapacidade. A través das accións do proxecto, as e os participantes poden ter coñecemento das novas tendencias de moda, poden quedar, consultar sobre os diferentes produtos ou coñecer diferentes adaptacións de roupa.
Nas Xornadas tamén houbo tempo para coñecer o programa Talento ASPACE e o traballo en rede que se realiza, coa exposición de representantes das nosas federacións en Cataluña FEPCCAT, e en Andalucía con ASPACE Andalucía, quen deu a coñecer aos asistentes como traballan e intercambian coñecementos nos grupos do programa, o tema das novas tecnoloxías e sistemas de comunicación.
Finalmente presentáronse os proxectos de innovación tecnolóxica que se realizaron durante o ano grazas á Fundación Vodafone, en nove entidades diferentes, ASPACE Gipuzkoa, ASPACE León, Fundació El Maresme, ASPACE Granada, Fundació ASPACE Catalunya, ASPACE Navarra, ASPACE Salamanca, AVAPACE e Fundació L´Espiga. Nestes proxecto leváronse a cabo adaptacións sinxelas pero indispensables para mellorar a calidade de vida das persoas con parálise cerebral, como adaptacións de pulsadores para avisar aos coidadores cando é necesario, unha sala de estimulación multisensorial de baixo custo, control da contorna en xardinería ou adaptacións para secar o pelo, facer funcionar a batidora, ou acender e apagar a TV entre outros.
#ASPACEnet é un dos proxectos que desde a Confederación ASPACE puxemos en marcha grazas á colaboración da Fundación Vodafone España. #ASPACEnet ten como misión mellorar a autonomía e a calidade de vida das persoas con parálise cerebral, a través da tecnoloxía e, especificamente, grazas ás Tecnoloxías de Apoio (TA) e os Sistemas Alternativos e Aumentativos de Comunicación (SAAC).
Acceso a esta noticia completa na Web da Confederación ASPACE.
Os últimos datos do Observatorio para a Sociedade da Información (Osimga) sitúa no 78,7% a porcentaxe de fogares galegos con Internet contratado, un incremento do 10,1% no último ano. Cabe salientar que no período 2013 – 2016, o incremento na contratación de internet foi un 20%, o que permitiu reducir a fenda dixital respecto á media europea en 6,8 puntos porcentuais.
Foi un dos datos expostos no Pleno do Observatorio para a Sociedade da Información (Osimga), presidido pola directora da Amtega, Mar Pereira, onde deu conta dos últimos datos do Observatorio, do Plan de Traballo do Osimga para 2018 e fixo balance da situación de dous anos de execución da Axenda Dixital de Galicia 2020.
Penetración das TIC
Entre os indicadores destacados están tamén os referidos ao tecido empresarial galego que sinalan que as empresas galegas apostan pola banda larga móbil, presente en máis do 80% das pemes e no 69% das microempresas. O crecemento do uso de Big Data ou sinatura dixital achéganos aos desafíos marcados na Axenda Dixital de Galicia 2020, con valores que superan a media estatal.
Tamén aliñados co obxectivos da Axenda Dixital, Galicia rexistrou un forte crecemento no número de empresas e no emprego do sector TIC: 2.579 empresas e 16.866 traballadores dan conta dun sector consolidado e estratéxico na economía galega.
Ademais, en 2017 rexistrouse un incremento de 419 novas empresas do sector TIC, o que marcou un máximo histórico no número de altas de novas entidades e unha de cada catro empresas TIC ten previsto contratar persoal nos vindeiros anos.
No marco do balance das actuacións do Osimga no ano anterior, destacouse a publicación do primeiro estudo da Xunta sobre a seguridade e confianza dixital nos fogares galegos. Este estudo pioneiro amosou a crecente preocupación dos galegos nesta materia xa que o 90% considera recomendable ter máis información para navegar de xeito seguro pola rede.
Axenda Dixital 2020
En dous anos de Axenda Dixital lévanse investidos 600 millóns de euros, 150 deles de capital privado, nos diferentes plans de transformación dixital.
Neste sentido a directora da Amtega destacou que este ano completarase a dotación de redes ultrarrápidas nas 81 superficies empresariais previstas e convocarase unha nova liña de axudas para empresas illadas do rural. Así mesmo, Mar Pereira lembrou que as axudas autonómicas e estatais permitirán que outros 330.000 galegos accedan á fibra óptica no 2020.
Entre outros avances no proceso de dixitalización destacou que as xestións online coa Xunta superan ás que se realizan de forma presencial e sitúanse xa no 51%. No ámbito educativo o Proxecto Abalar posibilitou que 12.000 rapaces estuden exclusivamente con libros dixitais. As 98 Aulas CeMIT contan con máis de 72.000 usuarios rexistrados e máis de 280.000 horas de formación gratuítas impartidas desde a súa creación.
Con respecto aos sectores estratéxicos da economía galega, a Axenda Dixital ten en macha plans tecnolóxicos innovadores como o Plan Smarturismo coa dixitalización integral dos procedementos de turismo para os axentes do sector. No eido cultural, a Memoria Dixital de Galicia xa permitiu a posta en marcha da nova Galiciana, que integra os documentos dixitalizados do Arquivo e da Biblioteca dixitais de Galicia.
O Programa Primare está impulsar a dixitalización do agro coa posta en marcha dunha plataforma de servizos de valor engadido e no sector da pesca iniciou a dixitalización de 35 lonxas. Ademais, no ámbito forestal entra en funcionamento este ano unha nova rede de videovixilancia dixital forestal como apoio á prevención e seguimento dos incendios.
Plan de Traballo Osimga 2018
Entre as novidades do Plan de Traballo do Observatorio para 2018 destaca a incorporación de novos indicadores na Enquisa a Fogares, que permitirán obter información sobre ciberseguridade, redes sociais e economía colaborativa na sociedade galega.
Ademais no marco de colaboración con outras entidades, como a Unidade de Muller e Ciencia, elaborarase unha nova edición dos informes sobre o uso das TIC desde unha perspectiva de xénero e a situación das mulleres no sector TIC. Co fin de contribuír a avaliación do Plan Estratéxico da Xuventude, darase continuidade ao estudo temático sobre A Mocidade e as TIC. No marco do Plan de Software Libre, o Osimga realizará novas vagas de estudos temáticos en 3 ámbitos: O Software libre nas empresas, no sector TIC e nos concellos.
As actuacións en macha do Plan de Banda Larga da Xunta e do Estado garanten que máis de 330.000 galegos de 258 concellos, que carecen de acceso a redes ultrarrápidas, teñan cobertura de 100Mbps de velocidade no 2020. O operador Telefónica, adxudicatario da última liña de axudas do Plan autonómico e doutras subvencións estatais, cubrirá preto do 80% dos habitantes previstos con ámbalas medidas. Así o explicaron esta mañá a directora da Axencia para a Modernización Tecnolóxica de Galicia (Amtega), Mar Pereira e directora de Telefónica en Galicia, Marta Menéndez.
Dos máis de 330.000 habitantes beneficiados por estas medidas un total de 74.400 viven en núcleos de menos de 300 habitantes e contarán con acceso á fibra óptica grazas a axuda de 14,2 millóns de euros que a Xunta concedeu a Telefónica no marco Plan de Banda Larga de Galicia 2020. Ademais, como adxudicatario doutras axudas estatais, Telefónica facilitará o acceso a redes ultrarrápidas a outros 184.000 galegos de núcleos de maior tamaño e os habitantes restantes cubriranse coas actuacións doutros operadores que accederon as subvencións do Estado.
Mais de 35 millóns de euros públicos
En total os plans autonómicos e estatais supoñen un investimento público de 35,2 millóns de euros para incentivar a extensión de fibra óptica en núcleos dun total de 258 concellos galegos que non dispoñen desta tecnoloxía nin previsión de contar con ela.
Ambas medias garanten que en 2020 o 74% dos galegos terán acceso a redes de máis de 30 Mbps, unha porcentaxe que se incrementará coas novas convocatorias do Estado. A última foi publicada en abril por un importe de 18,5 millóns de euros, e prevese que se resolva en outono.
Banda larga en polígonos
A extensión de fibra en núcleos de poboación é a terceira actuación do Plan de Banda Larga da Xunta 2020, que se suma á de polígonos e á de axudas á empresas illadas do rural.
Este ano completarse a conexión de 81 polígonos industriais de toda Galicia a redes de ata 350 Mbps, que sumados aos que xa contan con redes ultrarrápidas serán un total de 130 superficies empresariais, que representa o 93% da superficie empresarial ocupada.
Redes ultrarrápidas en empresas e centros educativos
Ademais, a finais de ano está previsto lanzar unha nova liña de axudas para facilitar a conexión a empresas de zonas illadas. Na convocatoria de 2017 beneficiáronse destas axudas máis de 30 empresas de zonas illadas das catro provincias, que puideron conectarse a internet de entre 50 e 350 Mbps con 400.000 euros tamén cofinanciados con FEADER.
No ámbito educativo, en colaboración co Estado, estase a desenvolverse a iniciativa “Escolas Conectadas” que está na recta final para dotar a máis de 800 centros educativos públicos con redes de máis de 100 Mbps. Unha vez finalizada esta actuación, nos próximos meses, o 100% dos centros públicos de primaria e secundaria de toda Galicia terán acceso a redes ultrarrápidas.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...