07/11/201808:25
Santiago de Compostela
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
Dun tempo a esta parte estase a constatar unha realidade que xa practicamente fica fóra de discusión. É esta: quen queira facer tecnoloxía, creala coas súas propias mans e enchouparse ben dos coñecementos e habilidades dos demais, vai poder facelo. Que estamos en Compostela os días 24 e 25 de novembro e queremos avanzar no noso camiño argalleiro? Pois nada mellor que visitar o evento Maker Faire Galicia, que chega á súa cuarta edición na Cidade da Cultura. Por certo que as entidades organizadoras da feira veñen de presentar o programa de actividades. Haberá charlas, obradoiros, campionatos de robots, exhibicións de parkour, circuítos de drons ou carreiras de coches DIY, entre outras moitas accións.
Segundo explican as responsables da cita, esta, amais de incluír a xa tradicional feira expositiva (na que se poderán ver os enxeños máis innovadores dos makers participantes), tamén porá a disposición dos asistentes “un amplo programa de actividades dirixido a todo tipo de públicos de diferentes idades e cunha gran diversidade de contidos e obradoiros, desde a biotecnoloxía, a electrónica ou os bioplásticos até a programación ou a fabricación de zocas con materiais reciclados”.
Asemade, as entidades organizadoras salientan “o exclusivo circuíto de drons que terá lugar no túnel subterráneo da Cidade da Cultura” ou, tamén, a actividade chamada Hebocon, un campionato de robots para familias.
Respecto do capítulo de charlas, amais de contar cos xa anunciados Jose Luís Cordeiro, David Aguilar ou Gael Langevin, a edición deste ano tamén destaca pola integración de conferencias independentes ao abeiro do programa oficial do evento, como as coordinadas polo NOS Day ou o grupo de mulleres tecnolóxicas Galstech, e coas que se fomenta a colaboración entre as diferentes comunidades tech de Galicia.
Para esta cuarta edición, a Maker Faire Galicia volve contar co patrocinio da Fundación Cidade da Cultura de Galicia, que acolle tamén o evento no Gaiás, e do Concello de Santiago a través do programa Compostela Móvese. Tamén colabora co evento a Fundación Española para a Ciencia e a Tecnoloxía – Ministerio de Ciencia, Innovación e Universidades.
Para quen queira recadar máis datos do evento, está a disposición da comunidade argalleira un vídeo de presentación en YouTube.
Esta finde, o sábado 10, imos ter na Coruña unha oportunidade de ver tecnoloxías, falar delas e mesmo facelas. O motivo? A celebración, na Domus, da feira OSHWDem (Open Source Hardware Demonstration), un cita para xente de todas idades sobre tecnoloxías abertas cuxo programa contará con demostracións de aparellos e programas open source, competicións de robots de todos os niveis desenvolvemento e máis obradoiros e charlas sobre estas tecnoloxías. A feira, que vén da man de Bricolabs, chega este sábado á sétima edición. A entrada será libre e gratuíta.
Novamente un dos grandes piares da cita será a súa vertente divulgativa e lúdica, de onde abrolla algúns dos seus principais puntos fortes, como por exemplo as competicións de robótica, nas que o público poderá ver combates de robots autónomos ou como os robots son capaces de descubrir en tempo récord a resolución de desafíos de envergadura, como a saída de labirintos. En termos máis concretos, o programa de actividades inclúe cousas tan interesantes como un reto Clonewars ou (previamente) un obradoiro de construción do robot velocista Cyclops, que se celebrou o 6 de outubro, tamén no Domus, e que xirou arredor de Cyclops, o proxecto open source de Rubén Espino.
Como dixemos, a OSHWDem está organizada por Bricolabs, unha asociación que traballa de maneira horizontal e colaborativa no deseño, construción e testeo de proxectos, prototipos e aparellos, e en cuxa metodoloxía de traballo “non importa tanto o que cada persoa sabe, senón a súa motivación”. A OSHWDem, que conta co apoio do Concello da Coruña a través de Museos Científicos, ten unha web propia con toda a información, de gran utilidade para facermos calquera tipo de consulta sobre o programa.
A OSHWDem, para quen non o saiba, é unha feira de tecnoloxía onde se expoñen inventos cun nexo común: todos eles son proxectos libres, é dicir, que as súas especificacións, esquemas e código foron publicados, de maneira que calquera poida estudalos, entender o seu funcionamento, replicalos e mesmo melloralos. A idea de Bricolabs é que os enxeños en exposición non deixen a ninguén indiferente ao tempo que abranguen (no plano temático) calquera ámbito de actuación que se nos ocorra: novas tecnoloxías, robótica, arte, Internet das Cousas, electrónica, hardware, software, etc.
Cifras e fitos
Dende a súa posta en marcha, a feira deu acollida a máis de 8.000 asistentes e viñeron a expor os seus proxectos libres (ou colaborado) máis de 1.230 argalleiras e argalleiros da comunidade de hardware e software libre. A entrada é libre e de balde, para todos o públicos.
Ángel Fagilde, presidente das Aulas Senior de Galicia (Ategal), e Julio Masid, director xeral de Viaqua, asinaron, en Santiago de Compostela, un convenio mediante o cal a empresa xestora integral de augas subvencionará o proxecto de Ategal para persoas maiores "Talento Senior. Liderando a miña saúde. Pautas para ter unha saúde de cinema", de preparación á xubilación que impartirá a médico de familia e coach Estefanía Zardoya.
Esta serie de talleres celébranse entre xaneiro e maio de 2019 nas sedes de Ategal de Santiago e Ourense, coa particularidade de que non só está destinada a alumnado de Ategal, persoas maiores en xeral, senón tamén aos traballadores das entidades onde se celebran. O primeiro taller celébrase o 22 de xaneiro, na sede de Ategal Santiago, e o 23 do mesmo mes en Ourense. En ambas as localidades realizarase unha sesión cada semana.
Sobre os talleres
"Talento Senior. Liderando a miña saúde. Pautas para unha saúde de cinema" consta de seis talleres gratuítos, centrados, desde un punto de vista integral, na preparación á xubilación. Para iso preséntanse unha serie de ferramentas para enfrontarse a esta etapa vital, empregando unha metodoloxía amena, didáctica e dinámica.
De feito, cada taller leva por título unha coñecida película clásica para dar pautas emocionais sobre as que traballar, co obxectivo final de afrontar esta etapa con positividade e utilidade.
Os talleres teóricos-prácticos de dúas horas con traballo individual, en pequeno grupo e posta en común en gran grupo. Ademais, as exposicións teóricas serán interactivas para favorecer a participación activa de todas as persoas participantes.
Ao longo das sesións traballaranse todas as capacidades potenciadoras do benestar a través do optimismo intelixente: como construír relacións positivas a través da intelixencia emocional; comunicarse é fácil se sabes como: para aprender a entender e facerse entender polos demais; innovación dixital social; mellorar a saúde a través das emocións; e, finalmente, cumprindo anos, xeneratividade e talento senior "neste aprtado poñerase en valor a capacidade de adaptación e as experiencias adquiridas ao longo dos anos e, sobre todo, falarase de como transmitir e deixar pegada ás xeracións máis novas.
Conscientes do papel fundamental que xogan hoxe en día as tecnoloxías de creación e fabricación dixital (impresoras 3D, cortadora láser, prototipado electrónico...) e as metodoloxías activas de aprendizaxe á hora de ofrecer espazos educativos diferentes -máis inclusivos, flexibles e motivadores- , contornas que se adaptan mellor ás formas e ritmos de aprendizaxe de cada individuo, decidimos facilitar un espazo para fomentar o intercambio de experiencias pedagóxicas entre formadores, docentes e facilitadores.
A plataforma FabLabs Sociais nace coa idea de beneficiar a mozos en situacións complexas mediante o desenvolvemento de competencias técnicas e habilidades básicas como a cooperación, o traballo en equipo, ou a comunicación, que lles poidan ser útiles no día de mañá. Para iso, ponse ao alcance de formadores, docentes e facilitadores recursos, materiais e ideas para que os poidan incluír nos seus contextos educativos e lles sexan útiles para ofrecer orientación e acompañamento ao longo do proceso de aprendizaxe.
A posta en marcha da plataforma foi posible grazas á colaboración de membros de FabLabs, entidades, centros educativos e particulares que participaron nos programas formativos Breakers e GarageLabs e que contribuíron nutrindo a plataforma a partir das súas experiencias.
Acceso á plataforma: http://fablabssociales.org.
Terá ascensor o museo?, contarán con baño adaptado no restaurante?, haberá rampla de acceso á praia? estas e outras moitas preguntas son as que se cuestionan miles de persoas cada día antes de saír de casa. Ante esta realidade nace Mapcesible, a App colaborativa de accesibilidade impulsada pola Fundación Telefónica que conta co apoio de COCEMFE. O 14 de novembro presentámola no Espazo Fundación Telefónica.
Baixo o lema Fai visible o accesible, Mapcesible nace co obxectivo de ser unha plataforma colaborativa onde calquera persoa, teña ou non mobilidade reducida, poida mapear a accesibilidade dos lugares que visita ou consultar as valoracións para planificar os seus desprazamentos diarios. Deste xeito é posible localizar a golpe de vista os puntos accesibles en España facilitando, grazas á tecnoloxía, o día a día das persoas con mobilidade reducida.
Esta plataforma colaborativa ofrece información de puntos accesibles incluíndo cinemas, teatros, restaurantes, aloxamentos, ou espazos públicos como praias, prazas de parking, ou polideportivos. Ademais dos lugares subidos polos propios usuarios da App, incorporáronse bases de datos de organismos oficiais como o Ministerio de Agricultura e Medio e Concellos, utilizando diferentes tecnoloxías como big data, intelixencia artificial ou xeolocalización para o beneficio da sociedade.
Conscientes de que a accesibilidade é un problema de todos, Voluntarios Telefónica identificou un problema onde a tecnoloxía podía ter un papel clave. Foi a través de Willy e o Centro Lester, onde se estaban realizando talleres de rehabilitación para persoas que perderan mobilidade por diversas enfermidades. Alí mostráronlles a semente da App e rapidamente uniron forzas para xuntos crear algo grande, Mapcesible.
A partir de aí foron máis de 700 os voluntarios Telefónica os que quixeron sumarse ao reto e mapear, durante as súas vacacións e tempo libre, a accesibilidade de diferentes lugares do noso país.
Outra das claves de Mapcesible é que está aberto a toda a sociedade, permitindo así que calquera persoa se converta en voluntario dixital e poida colaborar coa accesibilidade mapeando novos lugares.
Os usuarios terán que rexistrarse co seu email e responder a unha serie de preguntas sinxelas que permitirán mostrar dunha maneira rápida como de accesible é un lugar, valorando así de maneira colaborativa a accesibilidade de calquera lugar de España.
Mapcesible xa está dispoñible en dispositivos móbiles para as dúas grandes plataformas máis estendidas (iOS e Android) e vía web desde calquera dispositivo.
Colabora mapeando a accesibilidade dos lugares que visites por toda España e axuda a miles de persoas con mobilidade reducida. Clic a clic, entre todos podemos facer a súa vida máis fácil.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...