27/10/202007:39
Ourense
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
O Parque Tecnolóxico de Galicia (Tecnópole) participa no proxecto de divulgación e igualdade Ciencia e Tecnoloxía en feminino, impulsado pola Asociación de Parques Científicos e Tecnolóxicos de España (APTE), na que está integrado. O obxectivo desta iniciativa, que este ano cumpre a súa terceira edición, é lograr que aumente a porcentaxe de alumnas que elixen a especialidade de Ciencias ou Tecnoloxía en Educación Secundaria e opten posteriormente por carreiras de Ciencia, Tecnoloxía, Enxeñería ou Matemáticas, ou sexa, carreiras STEM (polas súas siglas en inglés). No marco da iniciativa este luns celebrouse dende a Tecnópole unha actividade de difusión científica dirixida a alumnado de primeiro, segundo e terceiro de Secundaria.
O encargado de conducila foi o divulgador científico David Ballesteros, director das aulas de investigación para mozos do Parque Tecnolóxico de Galicia.
Na actividade interviron a directora do Domus, Patricia Barciela, e Iria Míguez, ex-alumna de Aulas Tecnópole e enxeñeira de Telecomunicacións. Explicaron á rapazada as vantaxes de adicar a vida á ciencia ou á tecnoloxía e relataron a súa experiencia particular ao ter elixido carreiras nas que predominan os homes. “É un xeito de darlles ás novas xeracións referentes femininos en estudos pouco habituais para as mulleres”, sinalou Ballesteros. No transcurso da xornada o alumnado participou nun obradoiro para crear unha mostra virtual sobre mulleres científicas e tecnólogas que fixeron historia, baseándose na Realidade Virtual e máis na Realidade Aumentada. Ademais, desenvolveuse outro taller para os que desexen participar cun vídeo no concurso nacional que promove a Asociación de Parques Científicos e Tecnolóxicos de España baixo o título Propostas innovadoras aos retos para o desenvolvemento sustentable.
Na tarde do pasado venres, 23 de outubro, e a través dunha reunión virtual tivo lugar o acto de resolución da XIII edición do Premio ao mellor Proxecto Universitario con Licenza Libre convocado polo Consorcio CIXUG, e que conta coa colaboración da Axencia para a Modernización Tecnolóxica de Galicia (AMTEGA).
Nun ano académico marcado polas circunstancias derivadas da pandemia sanitaria, a fase final do premio contou con 3 candidaturas que foron avaliadas polo xurado a través das súas diferentes presentacións, e nas que se tiveron en conta aspectos tales como o correcto licenciamento dos traballos, así como o uso dunha metodoloxía propia, e que caracteriza especialmente aos traballos en aberto.
Primeiro premio
O primeiro premio gañouno Pablo Costas Sánchez, estudante da Facultade de Informática da Universidade da Coruña que presentou o traballo fin de grao «Extensión dunha ferramenta de probas baseadas en propiedades para permitir o seu uso paralelo ou distribuído», no que se lle engade a execución paralela ou distribuída a PropEr, que é unha ferramenta de probas de software baseada en propiedades, e que está desenvolvida en Erlang. Este recoñecemento implica unha dotación económica de 1.500 euros, que son aportados polo CIXUG ao abeiro do convenio de colaboración asinado coa AMTEGA.
Segundo premio
Ademais, entregouse un segundo premio a Bruno Cabado Lousa, tamén estudante da Facultade de Informática da Universidade da Coruña, polo seu traballo de fin de mestrado «Aceleración de un método de predicción de genes en clústers de sistemas multinúcleo», que se centra na mellora da ferramenta FragGeneScan, que permite a predición de xeito preciso dos xenes en proxectos metaxenómicos actuais. Este segundo premio conta cunha dotación económica de 750 euros, que son achegados pola asociación GPUL, entidade colaboradora desta iniciativa e tamén enmarcado no convenio de colaboración asinado coa AMTEGA.
Finalista
O finalista deste premio, a quen o xurado tamén felicitou polo seu traballo é:
Martín Zapata Martínez – «Leyes de escala en la naturaleza: aplicación a resultados electorales», no que se estudan as distribucións de leis de potencias que soen xurdir en bioloxía, física, economía, xeografía e incluso na internet.
Xurado
O xurado estivo formado polas seguintes persoas:
Premio ao mellor Proxecto Universitario con licenza libre
O CIXUG convoca este premio dentro das actividades incluídas dentro do convenio de colaboración coa AMTEGA, e no que se pretende a mellora dos mecanismos de formación e difusión do software libre no ecosistema universitario galego.
A colaboración de GPUL tamén forma parte das actividades realizadas ao abeiro do convenio de colaboración asinada coa Amtega para a promoción do software libre en Galicia.
Agradecemento
O CIXUG agradece a cesión da plataforma de reunións virtuais «faladoiro.melisa.gal» por parte da asociación MeLiSA, e que foi empregada para a celebración do acto de resolución deste premio. «faladoiro» é unha plataforma baseada en BigBlueButton, e que forma parte das actividades de promoción de ferramentas libres levadas a cabo polo colectivo con sede en Melide.
Os mozos participantes do programa 'Top Gamers Academy', que se está emitindo diariamente a través de YouTube e Twitch, así como os domingos na canle Neox do Grupo Atresmedia, coñecerán de primeira man os problemas de accesibilidade aos que deben facer fronte as persoas con discapacidade de maneira xeral na sociedade e especificamente cando queren gozar no seu tempo de lecer dun videoxogo calquera.
Na tarde deste luns os concursantes coñecerán a Enrique García Cortés, experto en accesibilidade e videoxogos da Fundación ONCE. Durante a súa estancia na academia explicará aos alumnos a importancia que ten o deseño para todos e a accesibilidade neste sector, tanto para a industria como para as propias persoas con discapacidade.
Ademais, impartirá unha clase de accesibilidade software co videoxogo de PlayStation 'The Last of Us Parte II', que foi deseñado tendo en conta a accesibilidade, pois ten máis de 60 características que permiten axustar a 'xogabilidade' segundo as necesidades do usuario. Por último, 'Kike' retará aos concursantes para xogar diversas partidas no videoxogo 'Fall Guys'.
Por Talento Dixital
Esta participación en 'Top Gamers Academy' apoia o desenvolvemento das liñas de traballo de 'Por Talento Dixital', un programa co que a Fundación ONCE está a promover a formación das persoas con discapacidade en perfís dixitais, e entre eles a industria do videoxogo.
Desde a Fundación ONCE enténdese que as persoas con discapacidade teñen dereito a poder gozar desta forma de lecer e ademais é un nicho de emprego que debe aproveitarse para lograr a súa plena inclusión. Por iso, está a asinar convenios de colaboración cos diversos axentes do sector.
O Museo Centro Gaiás da Cidade da Cultura transfórmase este novembro no espazo virtual que acollerá a Maker Faire Galicia, que na súa sexta edición estrea un novo formato totalmente en liña. O encontro volverá ser un grande escaparate para a creatividade e o enxeño, pensado para todos os públicos, ao que neste ano atípico se accederá de maneira remota desde calquera punto do planeta.
O evento lanzou a plataforma en liña na que as persoas interesadas poden xa rexistrarse de balde para asistir ao evento, que se desenvolverá entre o 18 e o 22 de novembro. Nesta plataforma, os e as visitantes poderán acceder ao interior do Museo Centro Gaiás, convertido nun entorno virtual en 360 graos. Movéndose a través deste espazo, poderán interactuar con cada un dos expositores participantes, conectándose en directo cos e coas makers para coñecer polo miúdo os seus proxectos.
Ademais deste espazo expositivo, programaranse diferentes charlas e obradoiros durante os cinco días do evento, que inclúe dúas xornadas dedicadas ao ámbito profesional e empresarial, unha centrada no eido educativo e outras dúas destinadas a público xeral e moi especialmente aos e ás makers máis novas. Personalidades do ámbito da neurotecnoloxía, do desenvolvemento de aplicacións, ou influencers do do it yourself cóntanse entre os relatores dun programa que poderá seguirse enteiramente a través de videoconferencia.
Proxectos de neurociencia ou robótica
Dous dos nomes máis destacados do programa deste ano veñen dos campos da robótica e da neurociencia. Trátase por un lado de Yannick Roy, co-fundador e director executivo de NeuroTechX, a comunidade internacional máis grande de entusiastas da neurotecnoloxía. Esta organización sen ánimo de lucro loita por difundir coñecemento, recursos e oportunidades de aprendizaxe arredor da neurotecnoloxía, e xerar sinerxías entre proxectos de innovación neste eido. A comunidade conta xa con 16.000 membros en todo o mundo, que comparten información e impresións sobre proxectos de neurociencia, tecnoloxía e DIY.
Por outra banda, participará tamén o coñecido youtuber especialista en robótica James Bruton. Antigo deseñador de xoguetes, este enxeñeiro eléctrico e mecánico levou a súa paixón pola robótica a outro nivel coa creación de incribles proxectos de código aberto que comparte de xeito gratuíto con vídeos detallados que sobe ao seu canal. Un dos seus proxectos máis coñecidos é o can robótico coñecido como “Open Dog”.
Da ‘comida real’ ao espazo exterior
Tamén terán o seu oco na Maker Faire Galicia temas de tanta actualidade como o realfooding, un movemento que medrou de xeito exponencial nos últimos anos. O programa incluirá unha charla da co-creadora e CEO de MyRealFood, Sofía Belenguer, que falará das orixes e evolución desta aplicación, popularizada polo nutricionista Carlos Ríos que tamén está detrás do proxecto, que axuda ás persoas a volver e manter unha dieta saudable baseada na “comida real”, deixando de lado produtos ultraprocesados. Tamén no eido da alimentación contarase con Maitane Alonso, a maker que sorprendeu á NASA coa súa máquina de conservación de alimentos.
E xa no eido da industria espacial compartirá tamén a súa experiencia Antón Vázquez de Alén Space, unha empresa galega dedicada ao desenvolvemento, deseño e construción de satélites dixitais, tanto software como hardware.
Completan o programa iniciativas do eido social como a iniciativa Cosendo o paro, que traballa na integración sociolaboral de persoas en risco de exclusión como nais migrantes ou mulleres expresidiarias, que traballan no deseño e confección de roupa e outros produtos.
A Maker Faire Galicia 2020 celebrarase co apoio da Xunta de Galicia, o Concello de Santiago, e Asociación para el Progreso de la Dirección (APD).
A Axencia para a Modernización Tecnolóxica de Galicia (Amtega) e a entidade colaboradora Red Araña poñen en marcha unha variedade de programas formativos que contan con financiación da Xunta de Galicia, co obxectivo de promover actuacións que permitan a inserción sociolaboral de persoas desempregadas a través da adquisición de destrezas dixitais e sociais.
As actividades desenvolveranse durante os meses de outubro e novembro principalmente en formato presencial (sempre que as autoridades sanitarias o permitan) e por videoconferencia e consistirán en talleres de competencias dixitais para a mellora da empregabilidade, actividades de networking, talleres de habilidades sociais, creación de ideas de negocio, etc.
Os obxectivos
A través destes programas formativos, as persoas participantes terán a oportunidade de adquirir competencias e destrezas dixitais, mellorar e potenciar as habilidades sociais, deseñar unha estratexia de promoción de contactos persoais e profesionais offline e online, aprender a traballar en equipo e incentivar a creatividade.
Ademais, os talleres de traballo complementaranse con itinerarios personalizados e sesións interactivas onde recibirán formación para axudarlles na procura de emprego como as claves afrontar una entrevista de traballo; aumentar a súa rede de contactos profesionais e persoais a través do Networking; facilitar o seu acceso a procesos de selección, así como impulsar novas ideas de negocio e fomentar a cultura emprendedora.
Inscrición e participación
As persoas interesadas en participar tan só deberán cumprir co requirimento de estar en procura de emprego coa tarxeta do Servizo Público de Emprego activa e o DNI vixente e estar dados de alta como usuarios CeMIT para inscribirse nas actividades dispoñibles a través das aulas CeMIT ou na web CeMIT segundo o seguinte calendario:
Red Araña, entidades polo emprego
É unha organización de acción social de carácter non lucrativo que busca promover actuacións que permitan a inserción sociolaboral dos desempregados/as con especial atención a aqueles colectivos vulnerables.
A súa misión é a de agrupar e facilitar o desenvolvemento do maior número de entidades sociais que traballan nesta inserción xerando experiencias empresariais sostibles, comprometidas co seu entorno e que permitan o acceso ao mercado de traballo a aquelas persoas con maiores dificultades.
A Rede CeMIT
A Rede CeMIT é unha iniciativa posta en marcha pola Amtega e conta coa colaboración de 92 concellos, está integrada por 98 aulas e está presente en 53 comarcas, co obxectivo común de transformar á cidadanía galega nunha sociedade plenamente integrada na sociedade dixital. A rede é un dos instrumentos principais do Plan de Inclusión Dixital de Galicia para ofrecer a cidadanía recursos de capacitación dixital en función do seu nivel de coñecemento.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...