26/05/202108:27
San Cibrao das Viñas (Ourense)
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
A feira científica Galiciencia celebrarase durante os vindeiros tres días: 26, 27 e 28 de maio. Esta iniciativa está promovida polo Parque Tecnolóxico de Galicia (Tecnópole) desde 2006 e busca espertar as vocacións científicas entre o alumnado de Primaria, Secundaria, FP e Bacharelato. Ademais, a feira conta co apoio da Xunta de Galicia, a través da Axencia Galega de Innovación (GAIN) e coa Fundación Española para la Ciencia y la Tecnología (FECYT).
O lema desta 16 º edición, A innovación Pos-COVID a través da revolución do talento, xa deixa entrever que a feira será online debido á actual situación sanitaria. Así, nesta edición participarán un total de 7.588 rapaces, dos que 7.302 serán galegos e o resto de fóra. Isto supón un récord de participación con respecto aos anos anteriores. Concretamente, a provincia de Pontevedra terá 3.171 participantes, mentres que na da Coruña haberá 2.044, na de Ourense 1.338 e na de Lugo 749. Doutra banda, os participantes que non son da comunidade, proveñen de Baleares e Biscaia.
O primeiro evento co que arrancará Galiciencia será “O mundo e as pandemias”, un espectáculo de ciencia, que durará unha hora, ata as 11:30 horas. Neste acto proporase unha experiencia dinámica e interactiva dirixida a estudantes de Secundaria. Por outra parte, realizarase unha aproximación á historia das grandes pandemias, as súas orixes e o efecto sobre a humanidade, ademais de incidir na importancia da ciencia e a tecnoloxía para lograr unha solución á actual pandemia da COVID-19.
Para os interesados nos concursos, cómpre mencionar que, nesta edición, os proxectos poderán visualizarse na páxina web www.galiciencia.online. Deste modo, os participantes poderán optar a un primeiro premio, dotado con 1.000 euros, para financiar a súa participación na maior feira científica a nivel estatal, Exporecerca; un segundo premio de 500 €, que permitirá asistir á Zientzia Azoka, a feira de ciencia que ten lugar cada ano en Bilbao; ou un terceiro premio, dotado con 200 €, para poder participar no programa de actividades organizadas polos Museos Científicos Coruñeses con motivo da Semana da Ciencia. A maiores, haberá un premio para o mellor proxecto liderado por unha rapaza ou cuxa temática estea relacionada con iniciativas que contribúan á igualdade de xénero na contorna da I+D+I. Premiarase tamén o proxecto coa mellor comunicación e presentación oral, o proxecto máis innovador e o proxecto coa mellor valoración popular. En canto aos gañadores do concurso de fotografía, estes poderán contactar a través de Instagram.
O ONTSI (Observatorio Nacional de Tecnoloxía e Sociedade) vén de presentar un informe no que analiza a evolución das competencias dixitais dos internautas baseándose na análise dos datos de 2020 do INE. Segundo os datos, as persoas ocupadas por conta propia, freelance ou autónomas, teñen un nivel de competencias dixitais avanzadas, superior ao das que traballan por conta allea (52,6% vs 39,3%).
Doutra banda, sinálase que os mozos e as persoas de maior nivel educativo tenden a ter competencias dixitais de meirande cualificación. En concreto, están máis estendidas entre as persoas de 16 a 24 anos (75,7%), poboación estudante (83,3%), persoas con educación universitaria (70,2%), así como entre quen conta con rendas mensuais de 3.000 euros ou máis (73%). No outro extremo, están os individuos con menor nivel de competencias dixitais, as denominadas baixas ou básicas, e que se atopan no 54,2% da poboación. Os maiores, pensionistas e persoas con menor nivel de estudos e renda teñen un menor nivel de competencias dixitais. Estas competencias danse en maior medida entre a poboación maior de 55 anos, que se dedica a labores do fogar ou é pensionista, persoas con nivel de estudos inferior á segunda etapa de secundaria e quen conta con renda inferior aos 1.600 euros mensuais. Sen embargo, a porcentaxe de poboación sen competencias dixitais non alcanza o 10% en ningunha das categorías sociodemográficas, sendo entre a poboación de máis de 65 anos, pensionistas e as persoas cun nivel de estudos ata a educación primaria onde maior representación alcanza, en torno ao 7%.
Así, o informe segmenta aos cidadáns en catro niveles de competencias dixitais: sen competencias, competencias baixas, competencias básicas e competencias avanzadas, sendo este último o nivel que identifica individuos cun manexo superior en actividades tales como o uso de información, comunicación a través de Internet, resolución de problemas e utilización de software. En xeral, oito de cada dez internautas mostran competencias dixitais avanzadas en información (84,8%) e comunicación (83,5%). As actividades máis estendidas neste tipo de competencias son a procura de información sobre bens e servizos, realizar chamadas e vídeo-chamadas a través de internet e o uso do correo electrónico. En canto á categoría de resolución de problemas, o 67,9% ten competencias avanzadas sendo as compras en liña, a banca electrónica e a instalación de software ou aplicacións móbiles os usos maioritarios. Pola súa banda, no que á categoría de software refírese, o 49,5% dos internautas ten competencias dixitais avanzadas e son os procesadores de texto os que acaparan o maior uso. Cabe mencionar que os datos reflicten que a situación media de España en competencias dixitais en 2020 é similar á da Unión Europea, 64,6% e 66,9%, respectivamente. As categorías de información e comunicación son aquelas en as que se percibe maior igualdade, e mesmo España supera lixeiramente a media europea en 0,2 e 0,1 puntos porcentuais, respectivamente. Pola súa banda, en resolución de problemas e uso de software atópanse maiores diferenzas e a media europea é superior á española en 2,5 e 3,2 puntos porcentuais, respectivamente.
En definitiva, España mostra valores semellantes ao conxunto da Unión Europea nos casos de poboación máis nova, estudantil, laboralmente activa, con medio/alto nivel educativo e maiores ingresos económicos. Pola contra, entre a poboación de maior idade, pensionista e laboralmente inactiva, de baixo nivel educativo e con baixos ingresos económicos atópanse porcentaxes de competencias dixitais inferiores aos observados no conxunto da Unión.
A Consellería de Emprego e Igualdade vén de constituír a Comisión de Mulleres nas TIC que se encargará de realizar unha análise pormenorizada da situación das galegas na súa relación coa tecnoloxía tanto no eido laboral como do lecer, a crianza, o consumo, a comunicación e a formación.
O estudo desenvolverase no marco dos traballos do Consello Galego das Mulleres, o órgano colexiado de carácter consultivo no que están representadas todas as consellerías da Xunta, as asociacións e federacións de mulleres, as organizacións empresariais e sindicais presentes na Mesa Xeral de Negociación das Administracións Públicas e os concellos por medio da Fegamp.
O obxectivo deste traballo non será outro que coñecer o papel das mulleres galegas ante as tecnoloxías da información (TIC), con especial atención á fenda tecnolóxica, para poder aportar nun futuro inmediato solucións de capacitación.
A covid-19 evidenciou unha maior dependencia da tecnoloxía tanto na vida privada como profesional das mulleres. O teletraballo, a educación e formación en liña, as comunicacións ou as compras pola internet situáronse en primeira liña, recaendo gran parte destas responsabilidades nas mulleres. De aí que a Xunta vexa a oportunidade de analizar polo miúdo a situación actual das galegas e a súa relación coa tecnoloxía, nos diferentes eidos da súa vida: traballo, lecer, crianza, consumo, comunicación, educación e formación.
A Comisión afondará, entre outros aspectos, nos usos que as galegas fan das TIC, para que as utilizan, que coñecementos teñen ao respecto e que necesidades formativas. Ademais estudará se existen diferencias entre o mundo rural e o urbano, por idades ou por factores de índole socioeconómica.
O manexo das novas tecnoloxías contribúe ao empoderamento das mulleres, sobre todo nas zonas do rural, tal e como defendeu Lorenzana ante o último pleno do Consello Galego das Mulleres, no que incidiu en que a fenda de xénero segue presente, a pesares de que o acceso á tecnoloxía resulta cada vez máis doado.
Coñecer a realidade das mulleres fronte ás tecnoloxías para deseñar unha folla de ruta que atenda ás súas necesidades de capacitación e coñecementos é o obxecto do estudo que a Consellería de Emprego e Igualdade encomendou ao Consello Galego das Mulleres.
A Xunta xa ven traballando, no marco da Unidade Muller e Ciencia, en situar nun primeiro plano a perspectiva de xénero na actividade científica e tecnolóxica, con iniciativas que dan coñecer o papel de destacadas referentes nestes ámbitos como o Premio María Josefa Wonenburger ou iniciativas que promoven o encontro entre profesionais das TIC co alumnado galego como Nin+Nin-.
A Xunta de Galicia e a Fundación ONCE presentaron oficialmente o proxecto 'Camiño de Santiago Accesible' que ao longo deste ano Santo Xacobeo fará que o percorrido polos roteiros que conforman o Camiño de Santiago Francés sexa máis fácil para todas as persoas, especialmente para persoas con discapacidade.
Este proxecto busca mellorar a accesibilidade en todos os ámbitos do Camiño de Santiago para o que a tecnoloxía é fundamental, a través do uso de aplicacións e outros sistemas que faciliten a mobilidade de todas as persoas.
Esta iniciativa prevé que durante este ano de celebración, se avalíe a accesibilidade dos albergues que acompañan aos viaxeiros durante o seu roteiro, para buscar posibles melloras, á vez que se potenciará o uso de aplicacións.
As aplicacións convertéronse en pezas clave para lograr esta mellora da accesibilidade do roteiro e a Xunta e a fundación queren animar aos camiñantes para utilizalas para facilitar o camiño.
Tamén se creará unha web accesible informativa na que os viaxeiros poderán atopar toda a información que necesitan sobre as opcións e axudas de accesibilidade que teñen á súa disposición.
Así mesmo, ao longo do percorrido instaláronse códigos Vumarks, unha tecnoloxía que permite aos viaxeiros, a través dos seus dispositivos móbiles, acceder á información de accesibilidade dos puntos de interese máis relevantes.
O proxecto tamén pretende potenciar a accesibilidade de aplicacións móbiles de gran uso, centrando os esforzos na app de IGN, e dando a coñecer app deseñadas para a orientación e guiado de persoas con discapacidade, como Blind Explorer e Microsoft Soundscape.
O 'Camiño de Santiago Accesible' é unha iniciativa posta en marcha pola Fundación ONCE en 2019 para facer máis transitable o Camiño francés, un dos máis visitados polos peregrinos. Conta coa colaboración do Real Padroado sobre Discapacidade, Instituto Xeográfico Nacional, os ministerios de Fomento, de Sanidade, Consumo e Benestar Social, de Industria, Comercio e Turismo, e o de Cultura e Deporte, así como coa participación do Xacobeo 2021, Xunta de Galicia, Junta de Castilla y León, A Rioxa, Reyno de Navarra, Gobierno de Aragón e a Asociación de Municipios do Camiño de Santiago, a Federación Española de Asociacións de Amigos do Camiño de Santiago e Microsoft.
A directora xeral de Formación e Colocación, Zeltia Lado, presentou hoxe ás principais asociacións de mulleres autónomas, empresarias e mentoras de Galicia a iniciativa Feminino é dixital que forma parte do programa Autónomos Dixitais co que a Xunta formará en comercio electrónico ata finais de xuño e de xeito gratuíto a 1.200 traballadores e traballadoras por conta propia e aqueles que perderan o seu negocio como consecuencia da covid-19 e estean en situación de baixa no réxime de autónomos.
No webinario, Lado destacou a importancia de adaptarse o antes posible á nova era dixital e dar resposta aos novos perfís profesionais relacionados co marketing, a analítica dixital ou o e-commerce que o mercado laboral vén demandando, con máis intensidade desde que comezou a pandemia, indicando, neste senso, que a Xunta, por iso, está apostando “por unha formación sen fronteiras que permita ter unha visión global do mercado”. Apuntou, ademais, que o e-commerce adquiriu moita importancia ao longo da pandemia, nacendo novos hábitos na compra de produtos.
Lado incidiu en que a iniciativa non só está dirixida aos autónomas dadas de alta, senón tamén a aquelas que tiveron que pechar os seus negocios como consecuencia da pandemia co obxectivo de que teñan acceso a unha segunda oportunidade a través da dixitalización. A formación, ademais de gratuíta, é flexible e adaptable aos horarios de preferencia. Impártese a través dunha aula dixital e conta con titorización persoal.
Feminino é dixital, que comezará o próximo 26 de maio, forma parte do programa Autónomos Dixitais que este ano diríxese a catro perfís: ademais das mulleres, á mocidade (menores de 30 anos); persoas entre 31 e 44 anos; e maiores de 45 anos. Para cada un deses catro perfís impartiranse dous cursos en formato dixital: un básico sobre fundamentos para a creación dun proxecto de comercio electrónico; e un avanzado, de especialista en e-commerce.
Cada curso consta de 50 horas de formación e ao remate os alumnos e alumnas recibirán un diploma de aproveitamento avalado pola Xunta. As persoas interesadas en participar nos cursos poden solicitar a súa praza a través da páxina web www.autonomosdixitais.com, do mail info@autonomosdixitais.com e da páxina da Oficina do Autónomo da Xunta, www.oficinadoautonomo.gal.
Dous cursos
O primeiro dos cursos, Fundamentos para a creación dun proxecto de comercio electrónico, centrarase en coñecer os conceptos básicos e aspectos xurídicos do e-commerce, adquirir nocións básicas sobre márketing dixital, promoción e ferramentas 2.0 en Internet e identificar canles de comercialización e distribución.
Na acción formativa avanzada, de Especialista en e-commerce, dirixida a persoas con experiencia profesional na materia ou formación previa, coñeceranse as opcións de financiamento de proxectos de comercio electrónico, como elaborar un plan de márketing online, afondarase en aspectos como a protección de datos, seguridade ou medios de pagamento dispoñibles, crearse e xestionarase unha tenda online con Prestashop e darase formación en xestión de datos, provedores e loxística de envío.
Os obxectivos principais do programa son mellorar o grao de dixitalización das persoas traballadoras autónomas de Galicia e brindarlles a oportunidade de reposicionar o seu negocio, reemprendelo e/ou emprendelo. Do que se trata é de reforzar o tecido empresarial galego e, por iso, esta iniciativa enmárcase nas medidas específicas que está a adoptar a Xunta para facer fronte á covid-19.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...