O presidente do Goberno galego, Alberto Núñez Feijóo, anunciou hoxe que os puntos de vacinación de Galicia poderán tramitar a Chave365 para que as persoas que o desexen poidan acceder a través das app É-Saúde e PassCovid ao seu certificado de vacinación.
De feito, explicou, hoxe mesmo se publica no DOG a resolución conxunta que habilita ao persoal empregado da vacinación á realización destes trámites de oficio sempre que o paciente o autorice.
Logo de sinalar que Galicia leva tempo defendendo a necesidade de avanzar neste certificado de “enorme utilidade” e de facelo en coordinación coa UE, Feijóo destacou que tanto o certificado galego como o europeo van permitir: facilitar a mobilidade, garantir a protección da saúde pública e contribuír á recuperación da actividade económica.
A aula CeMIT do Concello de Boiro vai deparar á poboación local, este mes de xuño, novas oportunidades para mellorar a súa formación tecnolóxica, tan necesaria hoxe non só para comunicarse e obter información, senón tamén para traballar, mercar ou facer trámites coas administracións. Trátase dunha serie de cursos de formación presencial e online, centrados en sistemas operativos, tratamento de imaxes ou ferramentas de xestión. As prazas son limitadas. As inscricións poden facerse mediante o enderezo electrónico axentetic@boiro.org, o teléfono 981 84 26 35 ou vía Whatsapp no 629 769 139.
Entre os cursos presenciais que se ofertan están o de edición de imaxes con GIMP, que se vai realizar os días 7, 8, 9 e 10 en horario de 10 a 12 horas de forma presencial na aula CeMIT do Centro Social; curso de administración nivel usuaria/o sistema Windows 10, que se vai realizar os días 14, 15, 16, 17 en horario de 10.00 a 12.00 horas. A formación de deseño gráfico de Inkscape, vai ser os días 21, 22, 23 e 24 de xuño no mesmo horario. No mes de xuño desenvolverase tamén formación online cun taller de Hoosuite (xestor de redes sociais) que se vai impartir do 7 ao 10 de xuño de 10.30 a 12.30 horas e un obradoiro de Grantt Projet para planificación de proxectos, que se vai realizar do 14 ao 17 de xuño no mesmo horario. Entre a formación online que se desenvolve na CeMIT, o Concello de Boiro lembra que aínda hai prazas dispoñibles para o actividade sobre posicionamento web, que comeza o día 31 de maio e remata o 3 de xuño, en horario de 10.00 a 12.00 horas.
A Rede CeMIT, liderada pola Axencia para a Modernización Tecnolóxica de Galicia (Amtega), participa nos actos conmemorativos do Día de Internet organizados pola Asociación Somos Digital, a través da súa colaboración virtual no encontro “Experiencias Somos Dixital – Centros de competencias dixitais clave na transición dixital” e a celebración o vindeiro 21 de maio da xornada “Deféndete das noticias falsas” da aula CeMIT de Cuntis poñendo o peche aos actos conmemorativos desta data.
Con estas sesións, a Rede CeMIT ten como obxectivo seguir fomentando o interese pola capacitación dixital e a mellora das habilidades dixitais da cidadanía así como poñer en valor a labor dos seus dinamizadores e dinamizadoras no proceso de transición dixital da cidadanía.
Así pois, o pasado 12 de maio a aula CeMIT de Vimianzo, en representación da Rede CeMIT, participaba de xeito virtual expoñendo o seu proxecto de boas prácticas a través da presentación da campaña levada a cabo para a promoción do comercio e a hostalería locais no encontro nacional “Experiencias Somos Dixital – Centros de competencias dixitais clave na transición dixital”.
Neste acto, dispoñible na canle de YouTube da Asociación Nacional Somos Digital, púxose de manifesto a importantísima labor dos responsables das aulas CeMIT no impulso social e dixital, sobre todo, nun momento no que a pandemia facía palpable a importancia da formación no ámbito dixital. Adicionalmente, neste encontro foi posible coñecer unha gran variedade de boas prácticas levadas a cabo por toda a xeografía española a través dos centros de competencias dixitais de Burgos, Talavera de la Reina, Zamora, Valencia, Córdoba e Cáceres.
Continuando con esta colaboración, o vindeiro 21 de maio está prevista a realización da xornada “Deféndete das noticias falsas” organizada pola aula CeMIT de Cuntis en horario de 12:00 a 14:00 horas.
Este seminario pon o peche a un ciclo de conferencias promovido pola Asociación Somos Digital, para conmemorar o #diadeinternet 2021 co fin de poñer de manifesto a importancia da calidade e a integridade da información que manexa a opinión pública e que repercutirá na súa capacidade para fomentar un pensamento crítico e libre.
As persoas interesadas poden inscribirse a esta sesión de xeito gratuíto a través da páxina web de CeMIT na seguinte ligazón e seguir o seminario desde as súas casas ou achegarse de xeito presencial ás aulas CeMIT de Celanova, Oroso e Pontevedra.
A Rede CeMIT é unha iniciativa posta en marcha pola Amtega e conta coa colaboración de 91 concellos, está integrada por 97 aulas e está presente en 52 comarcas, co obxectivo común de transformar á cidadanía galega nunha sociedade plenamente integrada na sociedade dixital. A rede é un dos instrumentos principais do Plan de Inclusión Dixital de Galicia para ofrecer a cidadanía recursos de capacitación dixital en función do seu nivel de coñecemento.
O conselleiro Cultura, Educación e Universidade, Román Rodríguez, participou hoxe xunto ao reitor da Universidade da Coruña (UDC), Julio Abalde, na inauguración da nova sala do Centro de Investigación en Tecnoloxías da Información e as Comunicacións (CITIC), cofinanciada pola Xunta. O titular de Universidades do Goberno galego sinalou o CITIC como “un referente no eido da I+D+i aplicada ás TIC” e destacou a importancia deste novo espazo para a intelixencia artificial en Galicia.
Román Rodríguez subliñou que Galicia conta “cun sistema investigador de primeiro nivel, punteiro e recoñecido no panorama nacional e internacional, con espazos coma o CITIC, un dos oito centros acreditados como Centros de Investigación do Sistema Universitario de Galicia”. Neste sentido, reafirmou o compromiso da Xunta coa investigación. “Galicia é a única Comunidade cun programa completo de formación investigadora universitaria, con convocatorias para as etapas predoutoral e posdoutoral, así como cun programa de retención de talento”, afirmou.
Un potente programa de formación e retención de persoal investigador que absorbe un orzamento de 40M€ e inclúe os contratos predoutorais e posdoutorais, o novo Programa de Atracción e Retención de Talento e a liña de apoio aos Centros de Investigación acreditados. “De feito, neste CITIC inxectamos preto de 3M€ entre 2020 e 2022 para blindar o financiamento das súas principais liñas de investigación”, explicou o conselleiro.
O conselleiro visitou a nova sala xunto co presidente do Consello Social desta universidade, Antonio Abril, e o director do centro, Manuel González Penedo. Sobre o Demostrador Tecnolóxico, Román Rodríguez referiuse á súa utilidade para achegar á cidadanía proxectos punteiros en áreas como a Ciencia ou a Enxeñería de Datos, a Computación de altas prestacións, a Ciberseguridade ou a Intelixencia Artificial.
Ao respecto salientou que a IA é “unha disciplina en alza na que este centro destaca especialmente e que a Xunta apoia decididamente como quedou acreditado tras o recente acordo cos tres reitores para impartir un grao e máster interuniversitarios centrados nesta materia”.
“Estamos convencidos de que esta nova sala de Demostrador Tecnolóxico realizará un labor fundamental á hora de achegar os distintos avances e proxectos que aquí se realizan”, indicou.
A nova sala, que leva o nome de Demostrador Tecnolóxico, é un espazo de divulgación e demostración da actividade de I+D+i que se realiza no CITIC, que se empregará para amosar e testar proxectos punteiros en Intelixencia Artificial, exhibindo tamén proxectos das restantes áreas do centro como Ciencia e Enxeñaría de Datos, Computación de Altas Prestacións, Servizos e Redes Intelixentes e Ciberseguridade.
O espazo está organizado en catro áreas. Reunións con sistema de videoconferencia, demostradores físicos, espazo de contornas virtuais e realidade aumentada e tótem de pósteres conforman a estrutura desta sala dotada con equipamento de alta tecnoloxía.
A sala, na que se materializou un investimento que supera os cen mil euros, está cofinanciada pola propia UDC e a Consellería de Cultura, Educación e Universidade e o Consello Social da UDC.
A aula da Rede de Centros para a Modernización e Inclusión Tecnolóxica da Xunta de Galicia (CeMIT) do Concello de Ames, programou o ciclo Sácalle partido ao teu móbil. A través de 4 cursos independentes pero relacionados, durante os meses de maio e xuño, ensinarase como tirar o máximo proveito dos móbiles.
Nestes obradoiros, impartidos todos en horario de 17.30 a 18.30 horas, aprenderase como manexar os dispositivos, o sistema operativo e as súas aplicacións fundamentais para, nos cursos máis avanzados, afondar nas aplicacións de Google que adoitan vir preinstaladas, nas aplicacións móbiles de mensaxería e redes sociais máis importantes, así como nas apps máis interesantes e útiles de outros ámbitos.
O primeiro obradoiro comeza o martes 18 de maio e remata o mércores 27 de maio. Durante estas xornadas impartirase o obradoiro de Introdución ao sistema operativo: apps básicas. Neste curso aprenderase sobre a interface xenérica do sistema operativo e das ferramentas móbiles, axustes básicos e avanzados, e aplicacións básicas por descubrir.
A aula CeMIT tamén ten organizado unha actividade formativa sobre aplicacións de Google que se realizará dende o 31 de maio ata o 3 de xuño. Nel, falarase sobre a maioría de aplicacións de Google que xa veñen preinstaladas nos móbiles. Ademais, botarase luz sobre outros recursos tecnolóxicos que resultan ser moi útiles no noso día a día. Xuño comeza en Ames co curso de WhatsApp e redes sociais, que se impartirá dende o 7 ao 10 xuño. Nesta ocasión, ensinarase de forma, case exclusiva, nocións para sacar todo o partido ás apps que se empregan a diario: WhatsApp, Facebook, Twitter e outros servizos de mensaxería e redes sociais.
Por último, como peche do programa, impartirase un obradoiro no que se aprenderá sobre outras aplicacións móbiles moi útiles. As persoas interesadas poderán asistir a este obradoiro dende o 14 ata o 17 de xuño. Trátase do curso final do ciclo no que se descubrirán moitas ferramentas que poden facilitar a vida no día a día: edición de imaxes e vídeos, xestión da nosa economía, listas da compra, receitas, deporte...
A Cidade da Cultura, transformada nun entorno virtual en 360 graos, acolle un ano máis a Maker Faire Galicia, que chega á súa sétima edición repetindo co formato totalmente en liña estreado en 2020, que a converteu nunha das primeiras feiras maker do mundo realizada integramente a través da rede. No encontro, que terá lugar do 2 ao 6 de xuño, argalleiros e argalleiras de seis países diferentes –España, a Arxentina, O Xapón, México, EE.UU., Portugal e O Brasil– presentarán os seus proxectos a través dunha plataforma dixital que recrea o Museo Gaiás e na que as persoas asistentes poderán interactuar cos makers, participar en obradoiros e asistir a charlas e mesas redondas con referentes nacionais e internacionais.
A Cidade da Cultura, transformada nun entorno virtual en 360 graos, acolle un ano máis a Maker Faire Galicia, que chega á súa sétima edición repetindo co formato totalmente en liña estreado en 2020, que a converteu nunha das primeiras feiras maker do mundo realizada integramente a través da rede. No encontro, que terá lugar do 2 ao 6 de xuño, argalleiros e argalleiras de seis países diferentes –España, a Arxentina, O Xapón, México, EE.UU., Portugal e O Brasil– presentarán os seus proxectos a través dunha plataforma dixital que recrea o Museo Gaiás e na que as persoas asistentes poderán interactuar cos makers, participar en obradoiros e asistir a charlas e mesas redondas con referentes nacionais e internacionais.
Na que promete ser a edición máis internacional deste escaparate para a creatividade e o enxeño, poderán coñecerse medio cento de proxectos –34 deles galegos– presentados por makers, asociacións, empresas e centros de ensino. O encontro volve dedicar unha xornada exclusivamente ao ámbito da innovación educativa, na que ademais de tratar temas como o ensino do futuro, a gamificación, os espazos maker ou as comunidades de aprendizaxe, terá lugar un concurso de proxectos coa participación de 13 centros de primaria, secundaria e FP de toda Galicia, que optarán a diferentes galardóns.
O que xa é o evento maker máis importante da Península contará nesta edición con relatores da relevancia de César de la Fuente, biotecnólogo galego e profesor na Universidade de Pensilvania, onde lidera un laboratorio de investigación especializado en crear antibióticos con ordenadores a partir de moléculas naturais. Coñecido polo público xeral por desenvolver un test de baixo custo para detectar a covid-19, foi nomeado polo MIT (Instituto de Tecnoloxía de Massachusetts) como un dos 35 mozos máis innovadores do mundo con menos de 35 anos, e galardoado co Premio Fundación Princesa de Girona Investigación Científica 2021.
A conferencia de César de la Fuente enmarcarase nas dúas xornadas da Maker Faire dirixidas a profesionais e empresas de sectores como biotecnoloxía, robótica, intelixencia artificial, ciberseguridade ou blockchain, nas que tamén se contará con relatores como Jon Hare, un dos game makers máis coñecidos de Europa, creador de xogos míticos como Parallax ou Sensible Soccer, e Keisha Howard, recoñecida activista en favor da inclusión e a diversidade no mundo dos videoxogos, e fundadora da comunidade Sugar Gamers. Con dúas charlas TED (Tecnoloxía, Entretemento e Deseño) no seu curriculum, ten traballado con compañías como como SYFY, Watchmojo, AT&T, HBO, Nintendo, HTC, Microsoft o Google, entre outras.
Outro dos nomes destacados do encontro é o de Valeria Corrales, unha minimaker de Huesca que con só 12 anos triunfou na última edición do programa de televisión Got Talent España, abraiando ao xurado cun robot que ela mesma construíu e que resolveu en directo o cubo de rubik en 29 movementos. A través dunha canle de YouTube creada xunto á súa profesora Patricia Heredia, comparte coñecemento en aberto e proponse inspirar a outras nenas que queiran dedicarse á enxeñería ou a robótica. Foi nomeada Inspiring Girl of the Year pola Fundación Inspiring Girls e elixida mellor alumna de secundaria de STEM de España nos STEM Talent Awards.
O programa da sétima Maker Faire Galicia incluirá como novidade o primeiro EDU Open Space, un espazo para a reflexión ao redor da educación, onde os propios asistentes proporán as temáticas para debater en diferentes mesas redondas en simultáneo. Tamén se celebrará novamente a Game Maker Jam, unha competición para crear videoxogos en 48 horas da que o xoves se coñecerá a temática e o domingo, na xornada de clausura, o gañador ou gañadora do concurso.
Do mesmo xeito que en anos anteriores, as dúas primeiras xornadas desta feira de innovación estarán máis enfocadas ao ámbito profesional, mentres que o venres 4 de xuño a protagonista será a innovación educativa, con contidos dirixidos ao sector do ensino, e xa os días da fin de semana emitiranse contidos destinados a público xeral e centrados en temáticas moi diversas e relacionadas coa robótica, a ciencia, a innovación social, a arte, a economía circular ou o gaming, sempre baixo a filosofía do faino ti mesmo que caracteriza este encontro.
O encontro celébrase nun Museo Gaiás virtual e conta co apoio da Xunta de Galicia, o Concello de Santiago, a Fundación Cidade da Cultura e a Asociación para o Progreso da Dirección (APD). Realízase coa colaboración da Fundación Española para a Ciencia e a Tecnoloxía - Ministerio de Ciencia e Innovación.
Para ter máis información sobre a Maker Faire Galicia e como seguir os diferentes contidos, pode visitarse a súa plataforma en liña, onde xa está aberto o rexistro de asistentes, que é totalmente gratuíto.
A Xunta de Galicia incorporará o vindeiro curso 2021/2022 ao programa de libro dixital E-Dixgal un total de 81 novos centros e ampliará a participación doutros 139 aos cursos de 3º e 4º de ESO, a principal novidade da convocatoria deste ano. Ademais, dous centros educativos que xa o desenvolven en Secundaria incorporan a iniciativa tamén á etapa de Primaria. Deste xeito, o número total de centros integrados no E-Dixgal elévase a 551, dos que 197 son da provincia da Coruña, 90 da de Lugo, 46 da de Ourense e 218 da de Pontevedra.
Das novas incorporacións, 29 son centros da provincia da Coruña e 14 son da provincia de Lugo. No caso da provincia de Ourense súmanse á iniciativa un total de sete centros, mentres que na provincia de Pontevedra os centros novos serán 31. Así mesmo, o CPI de Xanceda (Mesía) e CPR Plurilingüe Padres Somascos, (A Guarda) que xa desenvolven o E-Dixgal en Secundaria, ampliarano o vindeiro curso tamén a Primaria.
Os centros de nova incorporación en Primaria comezarán a traballar co libro dixital o vindeiro curso en 5º, e estenderano o seguinte a 6º. No caso dos que se sumen ao proxecto na etapa de Secundaria, comezarán en 1º de ESO e terán o compromiso de ir estendéndoo progresivamente ata completar os catro cursos.
A convocatoria deste ano incluía por primeira vez a posibilidade de ampliar o programa aos cursos de 3º e 4º de ESO (ata o momento está implantado en 5 e 6 de Primaria e en 1º e 2º de ESO). Serán en total 139 os colexios e institutos que se acollan a esta ampliación, o que suporá case duplicar o número de alumnos de ESO con E-Dixgal en Galicia. Deles, 46 son centros da provincia da Coruña, 28 da provincia de Lugo, cinco da provincia de Ourense e 60 da provincia de Pontevedra.
Esta mellora supón, ademais, que por primeira vez un alumno galego poderá estudar con libro dixital gratuíto durante seis cursos consecutivos.
A ampliación do proxecto E-Dixgal é unha das liñas de acción da Estratexia Galega de Educación Dixital 2030, a folla de ruta coa que o Goberno galego vai impulsar a dixitalización do sistema educativo, e que inclúe medidas como a dotación de espazos maker e polos creativos nos centros, ou a implantación da Intelixencia Artificial no curriculum de todas as etapas educativas.
Así mesmo, enmárcase no Plan EDU100 (Plan de Infraestruturas Dixitais Educativas 2021-2023), coordinado pola Amtega, que supón un investimento 134,6M€ nos próximos tres anos. Ao seu abeiro o Consello da Xunta autorizou xa a adquisición de 45.000 ultraportátiles e equipos para 2.000 aulas, así como a compra de 55.000 equipos fixos e portátiles destinados a docentes. Tamén se deu luz verde á adquisición de 5.000 paneis interactivos para aulas de centros educativos, que cumprirán co obxectivo de que o 100% das aulas de centros públicos dependentes da Consellería de Cultura, Educación e Universidade entre 1º de Primaria e 2º de Bacharelato sexan dixitais; capacidade de conexión de ata 1Gbps e wifi en todos os espazos docentes.
Arredor de 800 docentes participaron este fin de semana nunha xornada formativa sobre educación dixital a través dun encontro virtual que, ademais de para afondar na mellora de coñecementos e competencias neste ámbito, serviu de punto de encontro para o intercambio de experiencias e boas prácticas en materia tecnoloxía dixital. Así mesmo, o encontro tivo como obxectivo acompañar ao profesorado na incorporación destas tecnoloxías ao proceso de ensino-aprendizaxe na aula, e para debater sobre propostas metodolóxicas innovadoras neste ámbito.
O conselleiro de Cultura, Educación e Universidade, Román Rodríguez, aproveitou a apertura da xornada –na que interveu telematicamente desde a Aula Nova do Centro de Autonómico de Formación do Profesorado, CAFI– para agradecer persoalmente o compromiso dos profesores galegos coa mellora da súa carreira profesional a través da actualización constante dos seus coñecementos e destrezas, e que despois trasladan ás aulas cos alumnos. Loou, ademais, o sobreesforzo engadido no seu labor diario nun curso marcado pola pandemia.
O titular de Educación referiuse á formación do profesorado como “unha carreira de fondo que esixe dunha adaptación continua aos novos tempos e ás novas necesidades”. O Goberno galego deseña cada curso, a través do Plan Anual de Formación do Profesorado, as estratexias e as ferramentas formativas para o profesorado galego, sempre buscando a máxima correlación entre as accións estratéxicas da Consellería e as liñas de formación ofertadas.
Tan só nos últimos meses máis de 30.000 docentes participaron nalgunha das accións formativas en competencias dixitais ofertadas pola Consellería, como a de Educación Dixital celebrada este fin de semana. Na última década, as accións programadas centráronse principalmente no ámbito lingüístico (pola extensión do ensino plurilingüe), así como en materia de convivencia e inclusión, en igualdade e en competencias STEM e no eido dixital, a raíz da implantación do E-Dixgal.
De cara aos próximos anos, segundo avanzou o conselleiro, vaise facer un especial fincapé na formación tecnolóxica, que resultará necesaria para afrontar o impulso á dixitalización do sistema educativo que está impulsando a Consellería de Educación e que se vai materializar en accións como a dotación de espazos maker e polos creativos nos centros escolares, ou a implantación da Intelixencia Artificial en todas as etapas educativas.
“Sacarlle o máximo proveito a todas estas iniciativas depende, sobre todo, de contar con profesorado ben preparado, con coñecementos especializados para poder levar adiante con éxito estes proxectos”, abondou o conselleiro, que especificou que “a excelencia dos nosos estudantes só se pode garantir con docentes tamén excelentes”.
A Xunta porá en marcha este mes de maio a segunda edición do programa Autónomos Dixitais enfocado para que as persoas traballadoras autónomas melloren as súas competencias en comercio electrónico e saiban como aproveitar mellor as novas canles online de comunicación que existen para ofrecer aos seus clientes os seus produtos e servizos.
A iniciativa non só está dirixida aos autónomos dados de alta, senón tamén a aqueles que tiveron que pechar os seus negocios como consecuencia da pandemia co obxectivo de que teñan acceso a unha segunda oportunidade a través da dixitalización. A formación, ademais de gratuíta, é flexible e adaptable aos horarios de preferencia, impártese a través dunha aula dixital e conta con titorización persoal.
A conselleira de Emprego e Igualdade, María Jesús Lorenzana, presentou hoxe na Mesa do Emprego Autónomo de Galicia a iniciativa coa que se prevé formar a 1.200 traballadores por conta propia en e-commerce xa que, segundo explicou, o comercio electrónico adquiriu unha gran importancia ao longo da pandemia, nacendo novos hábitos na compra de produtos. De feito, expuxo que, de acordo co VII estudo sobre e-commerce en España, realizado polo por IAB -a maior asociación mundial de comunicación, publicidade e marketing dixital presente en 47 países- o comercio por Internet segue crecendo, e en España un 72% dos cibernautas de entre 16 a 70 anos utilizan a rede como canle de compra.
En palabras da conselleira, a Xunta ten que seguir apostando polo comercio tradicional, incentivando nas tendas as compras e axudando ao mantemento dos seus postos de traballo e, ao mesmo tempo, debe seguir impulsando a formación en dixitalización para apoiar aos autónomos ante os novos retos.
Neste contexto, naceu o programa Autónomos Dixitais que este ano diríxese a catro perfís: a mocidade (menores de 30 anos); mulleres; persoas entre 31 e 44 anos e autónomos que tiveron que pechar o seu negocio como consecuencia da covid-19; e maiores de 45 anos. Para cada un deses catro perfís impartiranse dous cursos en formato dixital e gratuítos: un básico sobre fundamentos para a creación dun proxecto de comercio electrónico; e un avanzado, de especialista en e-commerce. Cada curso consta de 50 horas de formación e ao remate os alumnos e alumnas recibirán un diploma de aproveitamento avalado pola Xunta.
O primeiro dos cursos, Fundamentos para a creación dun proxecto de comercio electrónico, centrarase en coñecer os conceptos básicos e aspectos xurídicos do e-commerce, adquirir nocións básicas sobre márketing dixital, promoción e ferramentas 2.0 en Internet e identificar canles de comercialización e distribución.
Na acción formativa avanzada, de Especialista en e-commerce, dirixida a persoas con experiencia profesional na materia ou formación previa, coñeceranse as opcións de financiamento de proxectos de comercio electrónico, como elaborar un plan de márketing online, afondarase en aspectos como a protección de datos, seguridade ou medios de pagamento dispoñibles, crearse e xestionarase unha tenda online con Prestashop e darase formación en xestión de datos, provedores e loxística de envío.
Os interesados en participar nos cursos, que se comezarán a impartir a partir do próximo 20 de maio, poden solicitar desde mañá a súa praza a través da páxina web www.autonomosdixitais.com ou do mail info@autonomosdixitais.com.
Os obxectivos principais do programa, en palabras da conselleira, son mellorar o grao de dixitalización das persoas traballadoras autónomas de Galicia e brindarlles a oportunidade de reposicionar o seu negocio “reemprendelo e/ou emprendelo”. Do que se trata é de reforzar o tecido empresarial galego e, por iso, esta iniciativa enmárcase nas medidas específicas que está a adoptar a Xunta para facer fronte á covid-19.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...