O Centro de Educación Especial Amicos, con sedes en Ribeira e Boiro, está a desenvolver unha iniciativa formativa e divulgativa para ofrecer aos usuarios un novo modelo de vida a través dos beneficios que proporcionan as tecnoloxías, ao tempo que se fomentan valores e coñecementos propios da sociedade actual coma o traballo en equipo, a xeneralización dos robots, as tabletas ou a Realidade Virtual, entre outros recursos, servizos e tecnoloxías. O programa Meet and Code, desenvolvido ao abeiro de TICneate, conta con financiamento da Unión Europea.

O que se busca coas actividades de Meet and Code é iniciar ás usuarias e usuarios de Amicos no mundo da robótica mediante diversas actividades como, por exemplo, a identificación de material, desenvolvemento de videoxogos, creación de trebellos intelixentes, información sobre os beneficios da robótica ou comprobación dos seus usos.

 Así, na xornada de hoxe celebrouse unha demostración a cargo de We Robots, polo que os usuarios do centro tiveron a oportunidade de manexar enxeños tecnolóxicos, deseñar a través de impresora 3D, trazar circuítos, etcétera.

Desde Amicos sinalan que a participación activa do alumnado neste programa “facilita a súa motivación para avanzar no uso da tecnoloxía no día a día”. Ao longo deste curso, continuaranse desenvolvendo diferentes actividades centradas na Realidade Virtual, dispositivos electrónicos, uso de aplicacións e redes sociais, así como seguir progresando no eido da robótica.

As actividades argalleiras da Asociación Amigus (os obradoiros Amigus Labs) van ter continuidade este 26 de outubro, logo da inauguración oficial, este día 12, do Amigus Labs Centro de Arte e Creación Dixital, así como do Fab Lab As Pontes (na praza do Hospital das Pontes, no número 14). Na sesión do 26 achegárasenos a ferramentas abertas de gran utilidade, tanto para o noso lecer como para ámbitos máis de tipo profesional.

Na nova cita, os participantes mergullaranse nas funcionalidades e potencialidades do software e o software libre para a edición e retoque de imaxes cos programas GIMP (a ferramenta libre de edición de imaxes dixitais con feitura de mapa de bits, tanto debuxos como de fotografías) e Raspberry Pi (un computador miúdo que se conecta a un televisor e un teclado e que pode ser utilizado para cunha manchea de cousas: follas de cálculo, procesadores de texto, editores gráficos, xogos, vídeos de alta definición, etc). O obradoiro desenvolverase en horario de 11:00 a 14:00 horas. Para asistir ao taller é obrigatorio que nos rexistremos na páxina do evento http://www.amiguslabs.org/amigus-labs-gimp-e-raspberry-pi/. A asociación recoméndanos que acudamos cun ordenador portátil co GIMP xa instalado, aínda que teremos a opción de usar os equipos de demostración con Raspberry PI. A inscrición é de balde e o prazo remata o 25 de outubro (prazas limitadas).

• É o maior crecemento rexistrado desde 2016 e reduce a diferencia coa media estatal a 2,6 puntos
• O maior incremento prodúcese nos núcleos de menos de 10.000 habitantes, nos que, por primeira vez, supérase a porcentaxe do 80% de fogares conectados
• En canto ao uso da rede, medra 15 puntos na franxa de idade entre os 55 e os 64 anos
• Nas vilas de entre 20.000 e 100.000 habitantes a media galega supera á estatal na contratación a Internet e de banda larga
• A principal tecnoloxía de acceso a Internet nos fogares galegos é unha conexión móbil de banda larga a través dun dispositivo de man, coa que conta o 83,1% dos fogares

Preto do 89% dos fogares galegos ten contratado Internet, o que supón un incremento do 7,5% con respecto ao ano 2018, superior ao crecemento do conxunto do Estado (5,8%) e o maior rexistrado desde 2016. O crecemento máis importante prodúcese nos concellos galegos con menor poboación, os de menos de 10.000 habitantes, nos que os fogares conectados pasan dun 74,6% a un 81,2%. Nos espazos urbanos o crecemento na contratación de Internet e da banda larga é superior á do conxunto do estado.

Son parte dos datos publicados hoxe polo INE sobre o equipamento e uso das TIC nos fogares en 2019 e analizados polo Observatorio da Sociedade da Información e a Modernización de Galicia (OSIMGA), dependente da Axencia para a Modernización Tecnolóxica de Galicia (Amtega),

As cifras confirman que os galegos por debaixo dos 34 anos superan a media estatal no uso habitual de Internet, pero especialmente en relación ás compras online, de modo que os mozos galegos superan en 6 puntos porcentuais ao conxunto dos españois. Ao mesmo tempo estanse a producir incrementos significativos do uso das TIC entre a poboación de maior idade.

Uso das TIC

O 84% dos galegos e galegas de 16 a 74 anos utilizaron Internet nos tres últimos meses, cun incremento do 4,5%, con respecto ao ano anterior. Entre a poboación máis nova, por debaixo dos 35 anos, o uso de Internet é practicamente universal. Cómpre destacar o crecemento no grupo de idade de 55 aos 64 anos, onde o uso da Rede medra 15 puntos porcentuais respecto ao ano 2018.

Ademais dos usos tradicionais, como a mensaxería instantánea ou o correo electrónico, un dos usos de Internet máis estendidos entre os internautas galegos é a banca electrónica, que utiliza o 64,6% dos internautas na nosa comunidade, catro puntos máis que a media estatal. Salientar tamén o importante uso da nube como sistema de almacenamento de ficheiros con fins privados, que practica un 46,2% dos galegos que utiliza Internet converxendo co conxunto do Estado. 

Tipo de conexión e hábitat

Segundo a información que ofrece o INE, a maior parte das vivendas que dispoñen de acceso a Internet en Galicia, un 83,1% emprega unha conexión móbil de banda larga a través dun dispositivo de man. Trátase da principal tecnoloxía de acceso, por diante da conexión por ADSL, cable ou fibra, que utiliza o 76,2% dos fogares. No conxunto de España as posicións invírtense.

Respecto aos datos relativos ao tamaño do hábitat, é salientable que nos concellos con poboación maior de 20.000 habitantes, a media galega iguala ou supera á estatal na contratación a Internet e a banda larga.

Especificamente nas vilas galegas de 20.000 a 50.000 habitantes rexístrase un forte ritmo de crecemento dos indicadores relacionados coa contratación de Internet e de banda larga. Neste tipo de concellos a conexión a Internet de banda larga medrou máis dun 8,5%, situándose no 94,1%, superando o valor da media estatal en 2,5 puntos porcentuais.

O grupo GPUL, Grupo de Usuarios e Programadores de Linux con centro de actividades na FIC da Coruña, vén de pór en marcha este outono a GPUL School, unha iniciativa que pretende achegar aos membros máis noveis da comunidade universitaria, así como a calquera outra persoa interesada, ás tecnoloxías libres, co obxectivo de que “lles sexan de utilidade na súa vida profesional”.

O programa ten xa varias actividades previstas, todas elas compartindo a arela común de introducir á xente nova no software libre ao mesmo tempo que se achega un punto firme de reflexión, diversión e liberdade de pensamento. Trátase das seguintes actividades obradoiros: Impresión 3D para dummies, Como facer a túa primeira aplicación Android en Java, LaTex: de cero a Infinity e OK Google! Que opinas de pagar para que unha multinacional te espíe na túa casa?

Quen queira máis información sobre GPUL School e a súa liña de traballo, pode visualizala na web do proxecto. Tamén podemos coñecer mellor ao colectivo GPUL a través da sección Comunidade da iniciativa Coruña Dixital, que é o punto de conexión, posto en marcha polo Concello, de todas as contribucións ao software libre e ás tecnoloxías participativas e maker das comunidades de usuarios e desenvolvedores locais.