main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

04/07/201612:12
Logos de Down España e Fundación Vodafone España
Madrid

DOWN ESPAÑA e a Fundación Vodafone España impulsan o proxecto de formación en novas tecnoloxías para a inserción laboral máis ambicioso do noso país

Máis de 700 alumnos con síndrome de Down recibirán formación tecnolóxica para poder traballar en empresas ordinarias

DOWN ESPAÑA e Fundación Vodafone España van por en marcha durante este ano o proxecto máis ambicioso do noso país de formación en novas tecnoloxías para persoas con síndrome de Down, co obxectivo de facilitar a súa inserción laboral en empresas ordinarias.

Trátase da terceira edición do exitoso programa "Yo me prep@ro", co que 720 alumnos con esta discapacidade intelectual de toda España poderán mellorar e ampliar os seus coñecementos en novas tecnoloxías en aspectos tan claves como o uso adecuado de diferentes programas informáticos, a navegación por Internet, o acceso a redes bancarias informatizadas, ou a interacción con aplicación móbiles. Todo co fin último de axudarlles a salvar a fenda dixital que condiciona enormemente ás persoas con síndrome de Down á hora de atopar un posto de traballo, o que supón unha seria traba ás súas aspiracións de mellorar a súa autonomía e levar unha vida o máis plena e independente posible.

Nesta edición 2016-2017 incorpóranse 240 mozos con síndrome de Down que recibirán a formación por primeira vez, cun total de 10.500 horas formativas. A estes súmanse os 480 mozos das dúas edicións anteriores a quen se lles ofrecerá un curso de refresco dos seus coñecementos para que actualicen as destrezas adquiridas en novas tecnoloxías aplicadas á vida laboral.

Coa confianza derivada dos resultados obtidos nos dous anos previos "nos que se conseguiron preto de 150 contratos laborais para os alumnos con síndrome de Down", esta terceira edición do proxecto deseñouse coa intención de lograr un alcance inédito até agora para este programa. Así, en 2016 "Yo me prep@ro" desenvolverase en 20 localidades distintas de todo o país: Ávila, Barcelona, Burgos, Cádiz, Castellón, Compostela, Córdoba, Granada, Málaga, Murcia, Ourense, Palencia, Pamplona, Pontevedra, Sabadell, Toledo, Valencia, Valladolid, Vigo e Zaragoza. Serán as asociacións federadas a DOWN ESPAÑA en cada unha destas localidades as que impartan os cursos.

Ademais de mellorar a súa formación, os 240 alumnos con síndrome de Down que participen nesta nova edición de "Yo me prep@ro" terán a oportunidade de realizar prácticas en contornas laborais ordinarias. Tras esas dúas primeiras fases, DOWN ESPAÑA alcanzou o compromiso de lograr a inserción laboral de polo menos o 30% do total dos alumnos.

Outro dos puntais deste proxecto é a realización de sete vídeos-tutoriais que, cunha linguaxe sinxela e accesible, detallarán os pasos e instrucións para que os alumnos aprendan a navegar por Internet, xestionar o correo electrónico ou manexar redes sociais como LinkedIn. Todo cunha presentación visual atractiva, directa e moi comprensible.

Ao mesmo tempo Down España levará a cabo unha experiencia piloto que comprenderá o uso da plataforma Mefacilyta desenvolvida pola Fundación Vodafone. Esta experiencia piloto comprende o deseño e validación dos contidos e itinerarios formativos complementarios ao Proxecto

Por último, esta terceira edición de "Yo me prep@ro" vai facer especial fincapé nun dos aspectos que máis decisivamente contribúen a mellorar a inserción laboral do colectivo: a sensibilización no propio mundo empresarial.

Por iso, en cada unha das localidades onde se desenvolva o programa, vai realizarse unha xornada de networking entre representantes do tecido empresarial da zona e mozos e mozas con síndrome de Down. A intención é que os empresarios coñezan persoalmente aos alumnos do curso, que poidan apreciar as súas aptitudes e que comprendan os beneficios que achegan as persoas con discapacidade intelectual no traballo: melloran o clima laboral, achegan alegría e optimismo, e son metódicos e organizados nas súas tarefas.

A realización deste proxecto enmárcase dentro do Convenio Marco subscrito con data 8 de novembro de 2013 entre Fundación Vodafone España, a Confederación Española de Organizacións en favor das Persoas con Discapacidade Intelectual "FEAPS" e DOWN ESPAÑA para a realización de actividades conxuntas en materia de accesibilidade e inserción laboral que redunden en mellorar as condicións de vida das persoas con discapacidade intelectual.

Este convenio busca fomentar a innovación tecnolóxica aplicada á accesibilidade e fará especial fincapé naquelas iniciativas que contribúan á participación das persoas con discapacidade intelectual no ámbito laboral a través de proxectos piloto de innovación e  sesións formativas e de divulgación.

04/07/201612:03
Logo Fundación Vodafone España
Madrid

A Fundación Vodafone España falla a XVI Edición dos Premios Vodafone de Xornalismo

A XVI Edición dos Premios Vodafone de Periodismo galardoou a Javier Salas, Marta García Aller, Antonio García Encinas e Acnur

En "Premios de Xornalismo", nas súas respectivas categorías de "Ciencia", "Economía" e "Integración social", o Xurado decidiu premiar a Javier Salas xornalista especializado en ciencia, tecnoloxía e medio ambiente; a Marta García Aller, profesional con longa  experiencia en comunicación económica, tanto en prensa escrita como en radio; e a Antonio García Encinas, quen nos seus traballos de compoñente social defende o papel da tecnoloxía como apoio fundamental para a integración social das persoas con discapacidade.

En canto ao "Premio á Traxectoria en beneficio de colectivos vulnerables",  recaeu en ACNUR, que se vale da tecnoloxía para asegurar a educación dos refuxiados máis novos grazas a escolas dixitais portátiles, independentes de conexión e electricidade.

01/07/201610:30
O presidente Feijóo durante a comparecencia.
Santiago de Compostela

A Xunta aproba o decreto que permitirá ter unha historia social única electrónica

  • Feijóo avanza que o novo sistema comezará a implantarse de xeito progresivo despois do verán e arrincará con máis de 365.000 historias sociais dixitais
  • O presidente da Xunta asevera que con este sistema se evitarán duplicidades e se mellorarán os tempos de resposta
  • “Significa crear un sistema integrado de intercambio de información, sentar as bases para facer realidade o compromiso de que a historia social se vaia integrando na historia clínica a través da tarxeta sanitaria, dar mellores respostas na atención e desenvolver políticas de prevención”, asevera o titular do Executivo autonómico

O presidente do Goberno galego, Alberto Núñez Feijóo, destacou onte, na rolda de prensa do Consello, a aprobación do decreto polo que se regula a creación, o uso e o acceso á historia social única electrónica; un documento que permitirá aos profesionais do Sistema galego de servizos sociais, independentemente de que pertenzan ao ámbito municipal ou autonómico, o acceso único ao expediente social dos usuarios en formato electrónico.

“Estamos a falar dun documento que supón o primeiro paso para avanzar cara a unha atención totalmente personalizada e adaptada ás necesidades de cada usuario, máis alá da Administración pública que estea atendendo a ese usuario”, aseverou Feijóo, incidindo en que este sistema é froito dun intenso proceso de diálogo.

Máis polo miúdo, o titular da Xunta subliñou que esta iniciativa permitirá ter nunha única historia todos os datos relativos a historia social do individuo e avanzou que o novo sistema comezará a implantarse de xeito progresivo despois do verán, unha vez aprobado definitivamente o decreto, e arrincará con máis de 365.000 historias sociais dixitais.

Neste contexto, cómpre resaltar tamén que, previamente, se fará unha fase de pilotaxe da historia social única electrónica nos concellos de Boqueixón, Brión, Tordoia e Viveiro. Así, a partir do mes de xullo os traballadores sociais destes municipios terán acceso ao expediente social dos usuarios en formato electrónico; e, este período de probas permitirá abordar posibles axustes de cara ao despregamento progresivo nos concellos galegos.

O responsable autonómico aseverou que con este sistema se evitarán duplicidades e se mellorarán os tempos de resposta. E fixo fincapé en que a historia social única suporá un antes e un despois na xestión das prestacións sociais e, tamén, un antes e un despois na xestión das prestacións sanitarias, “xa que significa –aseverou- crear un sistema integrado de intercambio de información, sentar as bases para facer realidade o compromiso de que a historia social se vaia integrando na historia clínica a través da tarxeta sanitaria, dar mellores respostas na atención e desenvolver políticas de prevención”.

01/07/201610:14
Entrega de diplomas +Xtí en Lugo.
Santiago de Compostela

Lugo achegou á súa mocidade ao sector tecnolóxico mediante obradoiros e cursos

Este mércores, 29 de xuño, tiña lugar a entrega de diplomas por parte dos 127 participantes de catro accións formativas organizadas pola entidade local no marco do programa +Xtí de prevención de drogas, e outras 4 organizadas polo servizo de Xuventude do Concello de Lugo, tanto no Centro de Convivencia Uxío Novoneyra como na Casa da Xuventude. Engadir que a encargada da entrega foi a concelleira de Cultura, Turismo, Xuventude e Promoción da Lingua, Carmen Basadre. Indo aos cursos en cuestión, trátase dos cursos de iniciación á reparación de móbiles e electrónica básica, de iniciación á curtametraxe e de lecer inclusivo.

Tamén houbo de de educación de rúa, de peixaría, de horto urbano, de manipulador de alimentos en comercio minorista de alimentación e de control de alérxenos e substancias que producen intolerancias alimentarias, todos eles encamiñados a mozos e mozas de entre 18 e 35 anos, que tiveron lugar entre os meses de febreiro e xuño. Por último, sinalar que a concelleira aproveitou a ocasión para alentar á mocidade a aproveitar todas as oportunidades de formación posíbeis, así como lles lembrou as actividades formativas que están a piques de comezar, obradoiros de iniciación á cociña ou obradoiros de iniciación á fotografía dixital e de fotografíatimelapse e 360º e de vídeo creación, amais doutras actividades de lecer como iniciación á equitación, ou deportes como o parkour, street workout ou acrosport.

01/07/201608:29
Logo form@carm
Santiago de Compostela

form@carm: Formación online para dinamizadores das redes de telecentros

A Asociación de Telecentros abrirá un novo proceso formativo para os dinamizadores das súas redes de telecentros, esta formación que se realizará a través da plataforma de e-learning form@carm, é froito da colaboración da asociación coa Comunidade Autónoma da Rexión de Murcia e a Fundación Integra, e nela un total de 600 dinamizadores das redes de telecentros de, Andalucía, Asturias, Castela e León, Estremadura, Forteventura, Galicia e Navarra poderán realizar varios cursos ata marzo de 2017.

A oferta formativa de form@carm compona diversos cursos e foron elaborados cunha metodoloxía e recursos multimedia que facilitan a adquisición de coñecementos de forma sinxela e cómoda. O alto grao de satisfacción dos alumnos que cursaron os distintos cursos avala a calidade dos contidos ofertados. Actualmente form@carm está a xogar un importante papel na Rexión de Murcia ao complementar a aprendizaxe e a capacitación tanto de emprendedores e empresarios como de traballadores en activo e desempregados co fin de promover a súa reciclaxe e inserción no mundo laboral.

A acción formativa estrutúrase en tres fases, unha fase inicial, antes do verán, de dinamización entre as redes participantes, unha segunda fase de preinscrición e validación de matriculacións, en setembro e unha última fase de formación online, na que os dinamizadores terán 6 meses de acceso aos diferentes cursos , podendo realizar tantos como desexen, coa limitación de 3 cursos simultáneos.

form@carm é un proxecto xestionado pola Fundación Integra e financiado con fondos europeos FEDER da Unión Europea nun 80 %, e nun 20 % por fondos propios da Comunidade Autónoma da Rexión de Murcia.

Desde a Asociación Comunidade Redes de Telecentros, retomouse este proxecto, enmarcándoo na campaña e-skills for Jobs e que se desenvolve dentro do marco de cooperación e compartición de proxectos e recursos que persegue a Asociación entre os seus membros, dado o interese común en fomentar e mellorar a formación das persoas que dinamizan os centros de innovación tecnolóxica/espazos TIC.

Máis información en: comunidaddetelecentros.net/formacarm/ y www.formacarm.es.

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS