10/11/201713:45
A Coruña
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
A transformación dixital converteu a ciberseguridade nun elemento inherente ao funcionamento de empresas e institucións, que precisan perfís cun alto grao de especialización para implementar os seus plans de seguridade. Estes e outros retos neste eido centran a xornada Intelixencia e Ciberseguridade, que se celebra hoxe na Coruña e en cuxa inauguración participaron a directora da Amtega, Mar Pereira, e o director xeral de Emerxencias e Interior, Luis Menor.
A responsable da política tecnolóxica da Xunta sinalou que a Administración autonómica busca “ofrecer máis e mellores servizos dixitais pero tamén dinamizar o seu uso, xerando un clima de confianza, que require da colaboración conxunta de gobernos, corpos e forzas de seguridade e sector tecnolóxico”.
Alta demanda de perfís especializados
En 2016 o Instituto Nacional de Ciberseguridad (Incibe) contabilizou 115.000 incidentes informáticos a empresas e particulares en España, un 130% máis que os 50.000 rexistrados o ano anterior. Esta estatística sitúa a España como o terceiro país máis atacado do mundo, tras Estados Unidos e Reino Unido. Para afrontar esta realidade, as organizacións públicas e privadas precisan de perfís cun alto grao de especialización difíciles de atopar.
A Unión Europea calcula que en 2025 haberá unha carencia de 825.000 perfís tecnolóxicos, que continuará aumentando se non se toman as medidas para paliala. Desde a Xunta apóstase pola colaboración conxunta entre administracións, universidades e sector TIC para captar talento tecnolóxico.
Adaptación ao novo Regulamento Europeo
Un dos retos actuais para empresas e administracións públicas é a adaptación ao novo Regulamento Europeo de Protección de Datos, que entrará en vigor en maio de 2018. Esta lei que incorpora novos dereitos para os cidadáns como o dereito ao esquecemento, o consentimento expreso ou a portabilidade dos datos e implica un maior compromiso das organizacións públicas e privadas coa protección de datos.
A Administración autonómica está a abordar este proceso no marco do Plan Director de Seguridade TIC da Amtega. Nos dous últimos anos as medidas deste Plan incrementaron a capacidade de prevención, detección e reposta ante incidentes de seguridade e facilitaron unha maior colaboración cos corpos e forzas de seguridade do Estado, achegando información de valor para axudar na investigación de posibles de delitos relacionados co ciberespazo. O Plan incide ademais na concienciación dos empregados públicos, cuxa implicación é fundamental no proceso transformación dixital da Administración.
A Xunta e a Federación Galega de Municipios e Provincias (Fegamp) colaborarán por quinto ano consecutivo para facilitar que a capacitación dixital pública e gratuíta chegue a todos os galegos a través das actividades da Rede de aulas CeMIT.
Así se recolle nun convenio, aprobado hoxe polo Consello do Goberno galego, e que asinarán proximamente a Axencia para a Modernización Tecnolóxica de Galicia (Amtega), a Vicepresidencia e Consellería de Vicepresidencia, Administracións Públicas e Xustiza e a Fegamp.
Con este acordo garántese e continuidade e mellora dun servizo fundamental para reducir non só a primeira fenda dixital, a do acceso ás TIC, senón tamén a segunda fenda dixital, a das habilidades dixitais, facilitar unha aprendizaxe permanente neste eido e contribuír á mellora da empregabilidade.
Investimento
Segundo o acordo, en 2018 a Amtega achegará ás administracións locais a través da Fegamp un total de 797.277 euros para a realizar actividades en materia de inclusión dixital nas consideradas aulas de referencia da rede. Pola súa banda, a Fegamp continuará prestando un papel fundamental como canle de comunicación coas entidades locais e será a encargada de transferirlles as correspondentes subvencións.
Este orzamento distribuirase atendendo a criterios de actividade das aulas así como da poboación do concello. A partir do mes de decembro identificaranse as aulas de referencia que continuarán mantendo esta condición e, no caso de que proceda, informarase ás aulas que causen baixa por non dispor dos niveis de actividade mínimos, permitindo que outros centros opten a ser recoñecidos como aulas de referencia e dispor da subvención correspondente.
Ao importe do convenio súmase o investimento que a Amtega realizará no soporte e mantemento das infraestruturas dos centros e na mellora das ferramentas de xestión e formación que ascende a máis de 800.000 euros. En total, o vindeiro ano 2018 a Amtega destinará máis de 1,7 millóns de euros para impulsar a realización de actividades de inclusión dixital na Rede CeMIT.
Obxectivos 2018
O obxectivo final da Rede CeMIT é incrementar os coñecementos dixitais de todos os galegos e galegas, con independencia da súa idade, lugar de residencia ou situación económica para a mellora a súa autonomía persoal, o envellecemento activo e a empregabilidade, entre outros. Concretamente, en 2018 está previsto que a rede imparta máis de 35.000 horas formativas no eido dixital e acade os 80.000 usuarios e usuarias.
Ademais da realización de actividades para dinamizar o uso das TIC, durante o 2018 farase fincapé no uso dos servizos dixitais e potenciarase a colaboración cos aliados dixitais do Plan de inclusión dixital de Galicia 2020, que suma xa máis de 770 colaboradores. O papel dos aliados permite dispor dunha maior capilaridade en todo o territorio galego e unha maior variedade de actuacións e temáticas respecto ao catálogo de formación dixital da Rede.
Tamén se fomentará a certificación de competencias dixitais para facilitar unha mellora da competitividade e do acceso ao mercado laboral da cidadanía e se potenciará a adquisición das competencias e habilidades dixitais necesarias para abordar con confianza o uso das TIC.
267.000 horas de formación e 70.800 usuarios en 6 anos
Desde o comezo en 2011 da actividade das aulas da Rede CeMIT impartíronse 267.000 horas de formación dixital gratuíta, principalmente en alfabetización e capacitación dixital, e acadáronse máis de 70.800 usuarios rexistrados na rede.
Desde 2014, a Rede CeMIT está habilitada para acreditar á cidadanía a certificación galega de competencias dixitais en ofimática (CODIX), onde se encamiñaron máis de 2.950 persoas e obtiveron a certificación máis de 2.100 persoas.
A rede conta cun total de 98 aulas en 92 concellos (das cales 64 son consideradas aulas de referencia por dispor dun alto nivel de actividade en inclusión dixital), e a Xunta busca garantir a capilaridade e universalidade destes servizos promovendo a participación dos axentes sociais, empresariais e entidades públicas para incrementar as actuacións en materia de inclusión dixital en todo o territorio galego.
O pai Anxo García converteuse en personaxe do videoxogo 'Aliens in Chains' para axudar á poboación sen fogar de Madrid, co que a súa asociación Mensaxeiros da Paz e o estudo Liquid Games impulsarán unha campaña de concienciación e captación de fondos que conecte con novos públicos a través da linguaxe dos videoxogos.
Segundo informou este venres Mensaxeiros da Paz, este videoxogo é apto para calquera idade e pódese xogar en móbil ou tableta. Desde hoxe está dispoñible de forma gratuíta en GooglePlay e AppStore.
Na adaptación especial do xogo para esta campaña, que estará dispoñible en España durante todo o mes de novembro, un avatar do fundador de Mensaxeiros da Paz, o pai Anxo, guiará aos xogadores a través da galaxia, facéndolles partícipes durante a viaxe dos proxectos solidarios da organización.
Cada vez que un xogador supere un nivel/quebracabezas, complete unha misión, convide os seus amigos a xogar, participe nun torneo ou compre algún dos elementos especiais que se ofrecen na súa tenda, estará a contribuír ao mantemento do centro social da igrexa de San Antón co 100% dos beneficios económicos xerados pola súa acción.
Asociarase cada compra no xogo a unha doazón concreta e crearase un ítem especial de compra que permitirá ao xogador facer unha doazón directa de maior importe a Mensaxeiros da Paz. Ademais ,incluiranse 'tips' entre niveis que lembrarán aos xogadores como poden axudar máis na campaña.
A igrexa de San Antón, situada no corazón de Madrid e aberta as 24 horas do día e os 365 días do ano, atende sen descanso por centos de persoas sen fogar e sen recursos. Os seus voluntarios ofrecen diariamente máis de 200 menús de almorzos e ceas gratuítos, ademais de aseo para os que o necesiten e café quente e auga fresca a calquera hora.
A Fundación Mapfre e a Fundación Gmp presentaron a app ‘Son Cappaz', aplicación para teléfonos móbiles desenvolvida coa colaboración da Federación de Organizacións en favor de Persoas con Discapacidade Intelectual de Madrid (FEAPS Madrid), membro de Somos Pacientes, a Federación Española de Síndrome de Down (Down España) e a Fundación Garrigou para fortalecer a autonomía das persoas con discapacidade intelectual.
Como explica Down España, “a app ten por obxectivo contribuír a que as persoas con síndrome de Down e outras discapacidades intelectuais sexan máis independentes, desenvólvanse con maior seguridade no seu día a día, teñan máis posibilidades de desenvolver o seu traballo nunha contorna laboral normalizada e estean mellor comunicados cos seus familiares e titores”.
‘Son Cappaz'
A app ‘Son Cappaz', totalmente gratuíta, xa se atopa dispoñible para teléfonos móbiles con sistema operativo Android.
E como apunta FEAPS Madrid, “a aplicación conta con catro funcionalidades prácticas e fáciles de usar. Entre elas atópase ‘O meu Calendario', que reflicte as tarefas da vida cotiá e da contorna laboral do interesado e permite que as persoas de apoio da súa contorna poidan activalo e actualizalo desde calquera dispositivo. Tamén inclúe a funcionalidade ‘Onde Estou?', que contribúe a que estas persoas realicen desprazamentos con maior autonomía e seguridade grazas á creación de rutas que guiarán ao usuario polo traxecto correcto”.
É máis; a app tamén inclúe a funcionalidade ‘Os meus Traballos', na que o usuario poderá acceder a vídeos demostrativos para saber como realizar distintas tarefas, por exemplo poñer en marcha un electrodoméstico ou imprimir un documento; e a funcionalidade ‘Necesito Axuda', coa que se facilita ao usuario a comunicación telefónica coas persoas da súa contorna en caso de requirir axuda ou atoparse nunha situación de emerxencia.
Algo non vai cando vemos a España por debaixo da media europea e fóra do top 40 mundial no que se refire a transformación dixital da súa economía. Esta inmadurez dixital require tanto mellor coordinación entre Administracións, Universidades, empresas e organizacións sociais, como recursos para adecuar titulacións, intensificar a planificación dos seus contidos, crear liñas de investigación específicas e, se é preciso, crear centros especializados que melloren a eficiencia. O Foro Económico Mundial declara a transformación dixital da economía asunto clave para o desenvolvemento e impón un posicionamento decidido que estimule a creatividade. O mar de oportunidades é inmenso e incidirá non só no crecemento económico, senón tamén na redución da desigualdade e no desenvolvemento sustentable. Preguntémonos se o que queremos é un mundo aberto e inclusivo que interconecte os distintos aspectos das nosas vidas, fortaleza o noso sentimento de pertenza a un sistema global máis culto, libre, seguro, san, e con máis oportunidades para a autorrealización e o desenvolvemento dunha democracia global, ou se preferimos un mundo pechado, illado e con profundas desigualdades.
A resistencia ao cambio por parte de moitas empresas aparece como un obstáculo serio. Existen, con todo, correntes que apostan pola emprendiduría social e a economía colaborativa e circular para alcanzar obxectivos xustos nesta era dixital. Non en balde chegou a xerarse un corpo de expertos en economía dixital que está a contribuír significativamente a consolidar modelos de networking e innovación responsable que xustifica a necesidade dun maior impulso pola mellora das competencias dixitais, no marco dun modelo de coxeneración de innovación entre universidades, empresas e movementos de innovación social.
Mellorar a formación dixital leva desafíos que esixen un cambio de paradigma que vai máis aló do empresarial, e abarca tamén o académico, o social, o político e o cultural como referencia.
O mar de oportunidades é inmenso e incidirá no crecemento económico, na redución da desigualdade e no desenvolvemento sustentable.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...