26/03/201808:42
Santiago de Compostela
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
Empresas e administracións públicas están a afrontar a adaptación ao novo Regulamento Xeral de Protección de Datos, que entrará en vigor o 25 de maio de 2018. Este proceso e o seu impacto nas entidades locais son o obxectivo da xornada que se celebrou este venres en Santiago, organizada pola Federación Galega de Municipios (FEGAMP) e Colexio de Enxeñaría en Informática (CPEIG) e Axencia para a Modernización Tecnolóxica de Galicia (Amtega) e Balidea.
A directora da Amtega, Mar Pereira, foi a encargada de inaugurar o encontro, xunto co presidente do CPEIG, Fernando Suárez, e o vicepresidente da FEGAMP, Manuel Mirás. Na súa intervención, Pereira destacou que o novo Regulamento Xeral de Protección de Datos obriga ás Administracións a xerar un clima de confianza cos cidadáns no actual contexto dixital e que tamén contribuirá a concienciar á sociedade sobre a importancia de xestionar adecuadamente a súa privacidade na Rede e nas súas relacións online con empresas e entidades públicas.
Mar Pereira fixo fincapé na complexidade que supón a adaptación ao novo regulamento, especialmente para as entidades de menor tamaño como os concellos e avanzou as liñas que está a seguir a Xunta para cumprir co RXPD.
Medidas da Administración autonómica
A Xunta enmarca este proceso no seu Plan Director de Seguridade TIC, que se está a adaptar ás esixencias da nova normativa cunha folla de ruta en dúas fases. Entre as accións a curto prazo están o nomeamento dos delegados de protección de datos, que serán empregados públicos, un por consellería e tamén un da Amtega, que actuará de coordinador; a publicación do rexistro das actividades de tratamento; a modificación das cláusulas informativas; o desenvolvemento de análises de riscos e avaliacións de impacto; a implantación das medidas de seguridade correspondentes e asegurar a correcta atención dos dereitos dos interesados.
A Xunta contará con servizos de apoio para a adecuación ao RXPD. Por unha banda, implantarase un completo sistema de xestión da protección de datos persoais, que garanta un cumprimento pleno do RXPD e que permita demostrar sen dúbidas a debida responsabilidade proactiva. Por outra, porase en marcha un servizo especializado de asesoramento para os Delegados de Protección de Datos.
Estes servizos están en fase de licitación e contémplase a posibilidade de articular a súa extensión a outros organismos públicos non integrados na Amtega e as Administracións locais, a través de convenios.
O presidente do Goberno galego, Alberto Núñez Feijóo, avanzou o xoves na rolda de prensa do Consello que o Plan de banda larga facilitará o acceso a internet de 100 megas a máis de 74.000 galegos de 181 concellos.
Cun investimento de máis de 14 millóns de euros, Feijóo precisou que esta iniciativa da Xunta para garantir á rede en núcleos de menos de 300 habitantes compleméntase coa que ten en marcha o Goberno de España, centrada en núcleos de maior tamaño e coa que se mobilizan 21 millóns para dotar de conexión por fibra óptica a 258.000 galegos máis.
Deste xeito, o traballo conxunto de ambas administracións posibilitará que en 2020 máis do 74% dos galegos poidan acceder a Internet de alta velocidade.
Entre as dúas iniciativas, sinalou o titular do Goberno galego, beneficiaranse máis de 332.000 galegos que viven nas zonas brancas, é dicir, sen conexións de máis de 30 megas. A continuación, valorou a nova de que este venres o Consello de Ministros aprobe un investimento de 150 millóns en axudas á extensión da banda larga.
O titular da Xunta garantiu o compromiso de seguir impulsando o Plan de banda larga 2020, que supón mellorar a dotación de Galicia dunhas infraestruturas esenciais para as comunicacións neste século XXI: as redes ultrarrápidas de Internet. Neste sentido, Feijóo subliñou que dispoñer dun acceso a Internet de calidade supón máis oportunidades para as empresas situadas no rural; máis facilidades para as persoas que viven en lugares pouco poboados e de difícil acceso; e un importante aliciente para que a xente nova se asente no rural galego.
Feijóo concluíu lembrando que a segunda edición deste plan, que se estende ata 2020, ten tres liñas fundamentais: internet en polígonos industriais, cun investimento de 3,4 millóns de euros, e este ano completarase a conexión a redes de ata 350 megas para que Galicia dispoña de 130 polígonos con este tipo de redes. Internet para empresas situadas en zonas illadas, unha liña de axudas de 400.000 euros da que se benefician máis de 30 empresas. E Internet para núcleos de menos de 300 habitantes, “unha liña de actuación que vimos de activar no Consello de hoxe”.
A directora da Axencia para a Modernización Tecnolóxica de Galicia (Amtega), Mar Pereira, e o presidente do Consello Consultivo de Galicia, José Luis Costa, asinaron hoxe un convenio de colaboración para facilitar á adaptación deste órgano á Lei 39/2015 de Procedemento Administrativo Común das Administracións Públicas.
Este acordo facilitará ao Consello Consultivo o acceso ao catálogo de servizos dixitais que a Amtega ten á disposición doutras administracións públicas no marco do Plan de Administración e Goberno Dixital 2020. Un dos principios deste Plan é a aposta pola interoperabilidade e a reutilización das plataformas e recursos dixitais entre os diferentes niveis administrativos para simplificar o acceso á Administración electrónica, tanto aos empregados públicos como aos cidadáns e empresas.
A colaboración entre a Amtega e o Consello Consultivo comezará coa posta á disposición deste órgano do Portasinaturas, a plataforma da Xunta que permite asinar documentos de xeito electrónico, evitando desprazamentos, o uso do papel e axilización da tramitación.
Progresivamente e, en función das necesidades que se determinen, o Consello Consultivo poderá acceder a outros servizos como as notificacións electrónicas, a plataforma de interoperabilidade, ou o Arquivo Electrónico.
Segundo recolle o acordo asinado hoxe, o Consello Consultivo achegará a Amtega 73.800 euros ata 2021 para financiar as actuacións previstas.
Plan de Administración e Goberno Dixital 2020
A Xunta de Galicia vén traballando na dixitalización da Administración cunha folla de ruta desde o ano 2010, primeiro con Plan de Modernización da Administración Autonómica, co que se asentaron as bases da Administración electrónica e agora co Plan de Administración e Goberno Dixital 2020 co que se dá resposta ás esixencias do novo marco normativo. Un Plan aprobado en 2015 cun investimento de 27,7 millóns de euros en 5 anos que nos permitiu afrontar as esixencias das Leis 39/40 desde un bo punto de partida.
Como complemento ao cumprimento destas leis, a Xunta está a tramitar a Lei de Administración Dixital de Galicia para universalizar o uso e o acceso da cidadanía aos servizos públicos dixitais, así como os instrumentos de funcionamento interno para a xestión dixital da Administración.
A contratación de internet nos fogares galegos con nenos en idade escolar, de 3 a 16 anos, increméntase ata o 94%, 5 puntos máis que no ano anterior e 20 puntos máis que nos fogares nos que non residen nenos. A contratación deste servizo increméntase aínda máis nos fogares onde residen estudantes maiores de 16 anos, acadando o 98,1%.
Son datos do estudo “A mocidade e as TIC” correspondente ao ano 2017, elaborado polo Observatorio da Sociedade da Información en Galicia (Osimga) adscrito á Axencia para a Modernización Tecnolóxica de Galicia (Amtega).
Incremento da actividade dixital nos máis novos
Un 97,2% de mozos de 16 a 34 anos navegou por internet nos últimos 3 meses, fronte ao 66,4% das persoas de 35 a 74 anos que navegaron por Internet nese período.
En relación á frecuencia do uso de internet, o 91,1% dos mozos e mozas de 16 a 34 anos navega diariamente, fronte ao 75,2% de internautas de 35 a 74, o que amosa unha diferenza xeracional de 15,9 puntos porcentuais neste indicador.
Respecto aos hábitos dos internautas, aumentan as compras de bens ou servizos a través de internet nos 3 últimos meses entre os mozos ata o 48,7%, 3,7 puntos máis que o ano anterior e tamén entre os internautas de maior idade que alcanzan o 32%, (0,5 puntos máis que o ano anterior).
Respecto aos trámites coas administracións públicas, os internautas máis novos (16 a 34 anos) relacionáronse en maior medida coas administracións públicas a través de internet, especialmente na procura de información (79,5%) ou no envío de formularios cubertos (75,4%). As diferenzas cos trámites feitos por internautas de 35 a 74 anos están entre os 18 puntos no caso da procura de información e os 14 puntos no envío de formularios.
Os obstáculos no uso das TIC varían segundo a convivencia con nenos
As motivacións para non contratar aínda internet nos fogares con nenos e nenas en idade escolar continúan sendo os custos de equipamento e conexión. Pola contra, nos fogares que non teñen menores en idade escolar, nin estudantes maiores de 16 anos, a motivación principal para non dispoñer de internet é a percepción de que non lles resulta útil nin interesante.
O Goberno quere levar fibra óptica a 300 Mbps a 803.685 galegas e galegos. Así o fixo saber onte o Ministerio de Enerxía, Turismo e Axenda Dixital, na presentación do Plan 300x100, dirixido a impulsar “a transformación dixital da economía no ámbito estatal e pechar a fenda dixital xeográfica”. Ou sexa, a fenda de oportunidades e de accesibilidade que separa o rural dos espazos urbanos, máis plenamente inseridos na Sociedade da Información (por contar con meirande e mellor oferta, máis oportunidades de acceso e, en xeral, máis poder adquisitivo). O plan, en termos concretos, prevé estender a fibra óptica e os 300 Mbps de capacidade ao 100 por cen dos núcleos de poboación de España. Está dotado con 525 millóns de euros para o período 2018-2021.
O plan, que é un novo paso do Programa de Extensión da Banda Larga de Nova Xeración (PEBA-NGA) posto en marcha no ano 2013, quere pór o foco nas pequenas poboacións e as zonas rurais, sendo a nosa terra (polo disperso da súa poboación, pola súa orografía e pola gran cantidade de aldeas e vilas de pequeno tamaño), un dos principais obxectivos do programa. De feito, destinaranse para Galicia case 70 millóns de euros, achegándose arredor de 87 euros por cidadán durante o período de vixencia da iniciativa. Na cita de hoxe deuse a coñecer que os 525 millóns de euros que se destinarán ao Plan 300x100 serán co-financiados con fondos FEDER (395 millóns de euros) e que este venres o Consello de Ministros dará luz verde á primeira partida destas axudas coa convocatoria de até 150 millóns de euros para estender a banda larga en 2018.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...