14/12/201813:50
Santiago de Compostela
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
A directora da Axencia para a Modernización Tecnolóxica de Galicia (Amtega), Mar Pereira; o director xeral de Mobilidade da Consellería de Infraestruturas e Mobilidade, Ignacio Maestro, o director de IT, Información, Procesos e Operacións de Abanca, José Manuel Valiño; e o delegado da Xunta na Coruña, Ovidio Rodeiro, presentaron hoxe as novas funcionalidades da aplicación e do portal de Transporte Público de Galicia, bus.gal.
Desde hoxe os usuarios do transporte público por estrada poden solicitar online, desde un pc ou desde o seu dispositivo móbil, servizos de transporte á demanda en calquera das localidades nas que está dispoñible. Ademais, tanto no portal como na app, atoparán información actualizada dos servizos entre localidades das máis de 1.400 liñas de autobús que integran a oferta de transporte público por estrada.
Outra das novas funcionalidades da aplicación é o seguimento en tempo real das rutas dos autobuses, unha opción que está xa operativa para os usuarios das 273 liñas de autobús da área metropolitana de Coruña e que se estenderá ao resto dos viaxeiros a medida que as empresas concesionarias envíen a información ao Centro de Mobilidade de Galicia.
Os responsables da Xunta e de Abanca anunciaron, tamén, que o pago por móbil inicia a súa andaina na Coruña, nunha das liñas de transporte metropolitano desta área, onde durante dous meses se pilotará a solución desenvolta pola entidade bancaria. Tras este período, a nova modalidade de pago estenderase progresivamente naqueles autobuses que teñan adaptadas as súas canceladoras.
Estas medidas forman parte da folla de ruta que establece o Plan de Modernización Tecnolóxica da Mobilidade en Galicia, e-Mobility, que están a desenvolver a Amtega e a Consellería de Infraestruturas e Mobilidade para impulsar a dixitalización do sistema concesional de transporte que dá servizo a uns 20 millóns de viaxeiros anuais con máis de 1.000 autobuses, 1.419 liñas e 14.140 paradas
Plan e-Mobility
O Plan e-Mobility ten como obxectivos xerais a dixitalización integral de todos os procesos de xestión e tramitación por parte dos operadores e o desenvolvemento de novos servizos para os usuarios.
Entre as liñas de traballo establecidas no plan está a monitorización en tempo real das rutas de transporte público por estrada para deseñalas e planificalas dun xeito máis eficiente e adaptadas ás necesidades dos viaxeiros. Ademais, dixitalizaranse todos os procesos de xestión e tramitación da oferta de transporte por parte dos operadores, que terán á súa disposición unha Oficina Virtual do Transporte.
O Plan foi aprobado en 2017 polo Goberno galego, cun investimento previsto de máis de 6,6 millóns de euros ata o 2020. Esta iniciativa desenvólvese en coordinación co traballo que está a realizar a Consellería para a reorganización do transporte de pasaxeiros por estrada e que culminará coa aprobación en 2019 do Plan de Transporte Público de Galicia.
O Consello da Xunta aprobou recentemente as directrices xerais dese Plan, que renovará todas as liñas de autobús regular interurbano da Comunidade a partir do ano 2019. Trátase dunha planificación que ten por obxectivo aproveitar a caducidade das actuais concesións de servizos de autobús para dotar a Galicia dun sistema de transporte público renovado e moderno para responder con maior eficacia ás necesidades de mobilidade da sociedade do século XXI. Procúrase facer estensivo un modelo que resulte máis útil para os cidadáns, máis sostible desde o punto de vista ambiental e eficiente desde a perspectiva económica.
En agosto de 2017 iniciouse esa renovación coa posta en marcha da primeira fase deste Plan de transporte, que permitiu implantar xa as novas modalidades de prestación dos servizos: o autobús compartido e o transporte baixo demanda. A comezos do ano 2019 a Xunta someterá a información pública os novos mapas de liñas de autobús que apostarán por ampliar a aplicación desas formas de transporte novidosas, que permiten aumentar notablemente as posibilidades de mobilidade do medio rural.
A directora da Escola Galega de Administración Pública, Sonia Rodríguez-Campos, informou esta mañá ao Consello Reitor do organismo sobre as actividades da EGAP no 2018 e anunciou o programa previsto para o próximo ano.
Así, o Plan de formación presentado para 2019 suporá a convocatoria dun total de 523 actividades formativas e 26.343 prazas dirixidas ao persoal da Administración autonómica, local e de xustiza, ao persoal de administración e servizos das tres universidades galegas e ao persoal ao servizo das entidades públicas instrumentais e da Administración institucional de Galicia. Ao igual que en anos anteriores e co propósito de achegar a actividade ao maior número de persoas posible, o Plan combina as modalidades presencial, de teleformación e de autoformación.
Durante a presentación, Sonia Rodríguez-Campos destacou o reforzo das materias relativas a igualdade e violencia de xénero e a súa convocatoria para todos os destinatarios da Escola sen excepción. Así, estas materias suman dentro do Plan de 2019 un total de 30 edicións formativas e 1730 prazas a través de títulos coma Linguaxe administrativa non sexista e imaxe igualitaria na práctica da xestión pública ou Sexting, sextorsión, violencia de xénero dixital e control machista, entre outros.
Outra das novidades destacadas pola directora da EGAP foi a especial atención do Plan de formación ás necesidades derivadas dos recentes cambios normativos e avances tecnolóxicos co fin de que os empregados públicos poidan asumir e contribuír á implantación das TIC no sector público. Seguindo esta liña a programación de 2019 inclúe títulos novidosos coma Aspectos avanzados e implantación da normativa de protección de datos na Xunta de Galicia ou Avanzado en comunicación e colaboración dixital. Enfoque e uso creativo das tecnoloxías dixitais.
Ademais a directora do organismo confirmou a continuidade das dúas principais novidades acometidas en 2018. Por unha banda, destacou o mantemento da reorganización do plan formativo cunha oferta común en idiomas, plan ofimático e autoformación, dirixida a todos os empregados públicos de Galicia e, por outra banda, a descentralización de todas as probas presenciais co obxectivo de eliminar barreiras xeográficas e favorecer a conciliación familiar.
Cursos superiores e cursos monográficos
Finalmente, Sonia Rodríguez-Campos fixo referencia aos cursos superiores e cursos monográficos previstos para os próximos meses. De entre todos eles destacan a celebración dos cursos monográficos A nova Lei de contratos do sector público en perspectiva: problemas derivados da súa aplicación e primeiras interpretacións e Atención integral e atención humanizada aos usuarios e ás familias; do curso superior Avaliación de impacto ambiental de proxectos de Galicia; e da xornada O patrimonio cultural como instrumento de desenvolvemento sustentable e de relevancia turística.
Grazas a todo o anterior, resaltou Sonia Rodríguez-Campos, a Escola continúa afianzándose como un centro aberto a todas as persoas interesadas en formarse e nunha peza imprescindible para acadar unha Administración de calidade, eficaz e eficiente no cumprimento dos fins de interese xeral que ten asignados.
UnLtd Spain, fundación que apoia o emprendemento de impacto social puxo en marcha Plantacción, unha comunidade colaborativa na que compartir ideas con potencial para xerar impacto positivo en varios ámbitos, destacando as cidades sustentables. A través do concurso de ideas "O futuro das nosas cidades" que finalizará o 8 de maio, os usuarios poden achegar ideas e/ou votar, comentar e compartir as ideas do resto dos usuarios co obxectivo de identificar os principais retos das cidades de hoxe e de mañá. O propósito de Plantacción é promover a innovación social a través do fomento da participación cidadá e impulsar o emprendemento neste sector. Para realizar a formulación deste reto baseámonos no ODS 11: cidades e comunidades sustentables proposto polas Nacións Unidas dentro dos Obxectivos de Desenvolvemento Sustentable, que busca fomentar cidades máis inclusivas, seguras, resilientes e sustentables. O gañador do reto "O futuro das nosas cidades" poderá elixir entre dous cursos de innovación social vinculados á solución creativa de problemas.
Tres empresas galegas (Aldaba, DomusVi e Clínica Cobián) e a Universidade dá Coruña, a través do Centro de Investigación en Tecnoloxías da Información e as Comunicacións (CITIC) e o Instituto de Investigación Biomédica da Coruña (INIBIC), uníronse hai dous anos nun consorcio para desenvolver un modelo de medicina participativa con persoas maiores mediante o uso de tecnoloxías wearables, a través de pulseiras de medición de actividade física e soño, e unha aplicación personalizada que permite recoller de forma periódica as ocupacións e percepcións dos usuarios participantes na súa rutina diaria e no propio proxecto.
Esta iniciativa centrouse na mellora de tres problemas que preocupan á poboación maior: a prevención de caídas, o insomnio e a incontinencia urinaria. Para iso, desenvolvéronse solucións baseadas na posta en marcha de diferentes plans de intervención (actividade física, relaxación e/ou reentrenamiento do chan pélvico, e asesoramento ocupacional) con persoas maiores usuarias de centros residenciais de DomusVi na Coruña, Oleiros e Carballo. Tamén se fixo uso de aplicacións a través de Internet que permiten o rexistro de información diaria ou semanal, e a integración de forma automática de datos que se rexistran en pulseiras de autocuantificación (actividade física e calidade de soño) co fin de mellorar o seu estado de saúde e calidade de vida.
O proxecto comezou en marzo de 2016 coa análise da estado da arte, o deseño e desenvolvemento tecnolóxico e a definición das diferentes intervencións (plans específicos de actividade física, relaxación, fisioterapia de chan pélvico e asesoramento ocupacional, e formación no uso de dispositivos tecnolóxicos). Durante o ano 2018, máis de 20 voluntarios, con idades comprendidas entre os 67 e os 90 anos, e unha idade media de 82 anos, participaron na posta en marcha do proxecto de forma experimental.
Durante o primeiros seis meses das probas piloto implementouse un programa de intervención multifactorial, conformado por unha serie de intervencións non farmacolóxicas dirixidas a mellorar a saúde e a calidade de vida dos participantes: un programa específico de actividade física adaptado ás capacidades e necesidades de cada persoa, e especialmente dirixido á prevención das caídas; actividades de relaxación, destinadas a favorecer o descanso e soño; un programa específico de reentrenamiento de chan pélvico, para a mellora da continencia urinaria; un programa de asesoramento ocupacional específico para cada condición de saúde; ou o uso dunha aplicación tecnolóxica en portátiles ou tablet, para rexistrar as percepcións subxectivas e as ocupacións realizadas ao longo de cada semana. Antes da intervención, realizáronse unha serie de test e probas de avaliación (estandarizadas a nivel internacional) para establecer o estado inicial de saúde dos participantes. Trala intervención, levaron a cabo dúas fases de re-avaliación, unha aos seis meses, inmediatamente despois de finalizar a intervención, e outra de seguimento tres meses despois.
Ao longo de todo o período, os usuarios foron autocuantificados mediante pulseiras de rexistro de actividade física e soño, que ofrecen datos obxectivos que poden ser contrastados coas percepcións subxectivas dos participantes, recollidas a través da aplicación web de rexistro semanal de ocupacións.
O seguimento dos participantes realizouse a través da plataforma ClepIO onde, tanto os propios usuarios como familiares ou persoal clínico debidamente autorizados, poden acceder aos datos e informes xerados durante o proxecto.
Grazas a este proxecto, Aldaba enriqueceu as prestacións de ClepIO, converténdoo no Rexistro Persoal de Saúde (PHR) máis completo do mercado. Á súa vez, os centros DomusVi poden incorporar un novo servizo aos seus clientes, que ofrece un conxunto de actividades, dispositivos tecnolóxicos e ferramentas de seguimento para a mellora da autonomía física, a calidade do soño e, sobre todo, as percepcións dos seus usuarios, entre outros aspectos, permitíndolles o acceso aos familiares debidamente autorizados. Así mesmo, a Clínica Cobián mellorou os protocolos de intervención na área de fisioterapia de chan pélvico, converténdose nun centro de referencia nesta especialidade.
Cunha participación de ata 25 usuarios, aplicáronse un total de nove test e escalas de valoración, obtendo máis de 300 avaliacións, e completouse o rexistro semanal das ocupacións e percepcións de cada participante composto por 15 preguntas, xerándose máis de 5.500 respostas. En relación ao uso de tecnoloxías wearables, obtivéronse máis de 2 millóns de datos que, nunha segunda fase do proxecto, permitirán definir perfís de usuarios e predicir cambios significativos de comportamento aplicando técnicas de intelixencia artificial. Para que estes datos se poidan utilizar en futuras investigacións, farase accesible un extracto dos mesmos de maneira anónima a través do módulo opendata, seguindo as especificacións establecidas pola Unión Europea na súa filosofía de Ciencia Aberta.
Sobre Domusvi
En Galicia, DomusVi conta con 4.631 prazas para persoas maiores nun total de 28 residencias en funcionamento; oferta que será ampliada cando estean finalizadas senllas instalacións en construción no centro de Vigo e de Pontevedra. Ademais, é concesionaria do servizo de axuda a domicilio de Santiago de Compostela e dos centros sociocomunitarios do Concello de Narón. Tamén xestiona o centro de atención á Discapacidade en Bóveda con 150 prazas.
O pasado ano a compañía realizou un investimento de case 90,5 millóns de euros en Galicia (Informe de actividades e memoria de responsabilidade social).
A Fundación Española para a Ciencia e a Tecnoloxía (FECYT) estrea Science Truck, un novo proxecto de divulgación da ciencia protagonizado por youtubers que se emitirá en directo desde centros educativos de ensino secundario. Está dirixido aos máis novos e ten o obxectivo de espertar o interese pola ciencia e aumentar as vocacións científicas.
Trátase dunha aposta clara por parte da Fundación pola produción de contidos audiovisuais directamente para as canles de YouTube e redes sociais co fin de xerar contido de divulgación da ciencia alí onde está presente o público novo e adolescente.
O proxecto contará con algún dos youtubers de ciencia de fala hispana máis coñecidos da actualidade. Os encargados de conducir o programa son dous recoñecidos youtubers científicos: Javier Santaolalla e Inés Dawson. Santaolalla é doutor en Física de partículas e creador das canles de YouTube "Dáte un voltio", "Dáte un Vlog" e "Dáte un meu", que suman máis dun millón de subscritores e máis de 50 millóns de reproducións. Dawson é estudante doutoral na Universidade de Oxford e creadora das canles "Draw Curiosity" e "INÉS-table". Ademais, o programa contará coa colaboración de Rocío Vidal, xornalista científica quen ten a canle, "A gata de Schrödinger", especializado en combater as pseudociencias.
Este primeiro programa emitirase desde o I.E.S. CARPETANIA de Yepes (Toledo). Terá como eixo temático a paleontoloxía e como primeiro invitado ao youtuber Francesc Gascó, paleontólogo e creador da canle "O Pakozoico". En próximos programas estarán como invitados José Luis Crespo (Quantum Fracture) e o matemático Santi García.
O programa emitirase en directo o próximo 18 de decembro ás 13:00 h a través da canle de YouTube e a páxina de Facebook de FECYT. As datas de emisión dos próximos programas iranse detallando a través das redes sociais de FECYT.
FECYT quixo apostar por este novo formato xerado directamente para internet xa que, segundo os datos da última Enquisa de Percepción Social da Ciencia e a Tecnoloxía, o uso da internet como fonte informativa aumentou desde un 52,7% en 2010 a un 63,4% en 2018 e supera á televisión entre persoas de 15 a 34 anos. En concreto, as redes sociais son as máis utilizadas por un 48,1% do total dos enquisados.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...