Novas Faite Dixit@l

A empresa galega SDweb, con sede en Santiago e especializada en desenvolvemento web e formación-comunicación dixital, vén de obter un importante recoñecemento pola súa plataforma eHabilis, innovador sistema para a aprendizaxe a distancia (e-learning) e a xestión de datos na nube. A distinción veu da man da Fundación Transforma España, da que forman parte a Asociación Para el Progreso de la Dirección (APD), La Caixa, Banco Santander, Grupo Cofares, Telefónica ou Adecco, entre outras organizacións. A fundación sitiou a eHabilis entre as dez mellores iniciativas tecnolóxicas especializadas na xestión do talento e do coñecemento. A orixe deste logro está na participación de eHabilis no certame Talent Summit, impulsado por Transforma España. 

Este recoñecemento é especialmente significativo se temos en conta que chega nun importante intre de medre e espallamento para a empresa compostelá, que vén de inaugurar na capital galega unha factoría de software de máis de douscentos metros cadrados para afianzar o seu proxecto de crecemento e expansión a novos mercados dende Santiago.

Con case dez anos no mercado, a compañía tecnolóxica galega SDweb Solucións Dixitais está especializada en tecnoloxías TIC para impulsar a capacitación e o adestramento. Os seus ámbitos principais de actividade son, polo tanto, a innovación, a especialización, o re-investimento de beneficios e máis a orientación a produtos tecnolóxicos. 

Segundo nos conta Antonio Carro, director xeral da empresa compostelá, eHabilis é unha plataforma de xestión do coñecemento corporativo na nube cun amplo espectro de aplicación. O seu principal obxectivo é “transformar o modelo tradicional de xestión do coñecemento nas organizacións, esencialmente dominado pola simple execución de plans anuais de formación, en moitas ocasións sen dispor dunha información clara e obxectiva das necesidades reais dunha organización”. A base de eHabilis, unha das súas principais razóns de ser, é mudar o devandito enfoque “cara a un modelo que permite a estas organizacións sacar o máximo partido ao coñecemento do seu equipo humano, antepondo o descubrimento e difusión do coñecemento interno á procura de coñecemento no exterior; e implementando unha estratexia lúdica de aprendizaxe grazas ao concepto de gamificaciónque incorpora en todos os seus niveis”, explica Antonio Carro. 

Para Brais Martínez, responsable de Produto de eHabilis e responsable de Desenvolvemento de Negocio en SDweb, a participación no Talent Summit 2018 supuxo “un respaldo moi importante ao duro traballo realizado até a data polo equipo humano que desenvolve a plataforma eHabilis, dado que crear e difundir no mercado un produto tecnolóxico que sexa recoñecido como vangardista é realmente difícil”. 

Pola súa banda Ricardo Della-casa, responsable da sede da empresa en Barcelona, pon o foco na “elevada competencia que existe na carreira por desenvolver solucións cada vez mellores e máis eficientes, onde é moi difícil manterse nas primeiras posicións de forma continuada”. 

En opinión de Juan Casanova, responsable de Tecnoloxía da plataforma, “chegamos ata aquí grazas a que contamos con persoas moi cualificadas e implicadas no proxecto, que ademais están apoiadas por unha visión e investimento constante da compañía en innovar e desenvolver nova tecnoloxía”.

• De acordo co Plan Estratéxico aprobado este xoves polo Padroado da Fundación ONCE

O impulso do I+D+i será o ano que vén un dos principais eixos de actuación da Fundación ONCE para seguir mellorando a calidade de vida das persoas con discapacidade, tal e como consta na actualización do Plan Estratéxico para o horizonte 2018-2021, aprobado este xoves nunha reunión do Padroado da Fundación ONCE. 

Esta reunión do Padroado, máximo órgano de goberno da Fundación ONCE, estivo presidida por Miguel Carballeda, presidente do Grupo Social ONCE, e contou coa presenza de S.A.R. a Infanta Dna. Margarita. No encontro estiveron presentes tamén Ana Isabel Lima, secretaria de Estado de Servizos Sociais, e Jesús Celada, director xeral de Políticas de Discapacidade, a quen se nomeou novos patróns en representación do Goberno.

Durante a reunión, Alberto Durán, vicepresidente executivo da Fundación ONCE, puxo de manifesto a importancia de que os cidadáns con discapacidade poidan utilizar as tecnoloxías. "As persoas con discapacidade non podemos quedarnos fóra desta cuarta revolución industrial que estamos a vivir, e que está baseada na expansión da tecnoloxía. Desde a Fundación ONCE somos conscientes de que campos como a intelixencia artificial, a biotecnoloxía e a internet das cousas, entre outras, son unha oportunidade tanto para a integración laboral das persoas con discapacidade, como para a mellora da súa calidade de vida", manifestou.

Desde esta perspectiva, o padroado da Fundación ONCE acordou que o impulso do I+D+i producirase de forma transversal e terá sempre o obxectivo de poñer ás persoas con discapacidade no centro da innovación. Así, promoveranse estratexias de impacto que axuden a que a información sobre produtos de apoio e solucións tecnolóxicas de accesibilidade chegue de forma  efectiva aos usuarios.

A Fundación ONCE estudará tamén a posta en marcha dun programa de intercambio de profesionais con outras organizacións nacionais e internacionais do ámbito da innovación, o emprendemento social e/ou a accesibilidade co ánimo de coñecer outras experiencias. 

Por último, no próximo exercicio lanzarase un programa de contidos, accións e proxectos de capacitación para o emprego nas profesións dixitais dirixido a persoas con discapacidade. Este programa chega trala fase piloto da Academia Dixital, un proxecto posto en marcha pola Fundación ONCE en 2018 co obxectivo de formar en novas tecnoloxías a mozas con discapacidade e que, nesta etapa, finalizaron un total de 120 alumnos.