main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

29/01/202408:11
Muller usando un portátil nunha oficina.
Santiago de Compostela

Máis do 84% das empresas tecnolóxicas galegas utiliza software libre

  • Un informe publicado polo Observatorio da sociedade da información e comunicación de Galicia (OSIMGA) destaca que a metade das empresas TIC oferta bens ou servizos aos seus clientes en software libre
  • O uso deste tipo de programacións supera ás privativas no caso dos navegadores de internet, xestión de contidos web, aplicacións de desenvolvemento de software, e aplicacións de deseño gráfico e para a formación
  • Os produtos máis ofertados son para a xestión de contidos, páxinas web e marketing dixital; así como sistemas de virtualización, servidores e aplicacións na nube

O uso do software libre mantívose por riba do 84% nas empresas TIC galegas en 2022, segundo o estudo sobre uso deste tipo de programación nas empresas TIC de Galicia no ano 2022, publicado polo Observatorio da Sociedade da Información e a Modernización de Galicia (OSIMGA). O 84,1% empregan este tipo de software nos seus equipos informáticos, sexan ordenadores ou servidores, o que representa unha tendencia estable nos últimos anos.

As aplicacións libres con maior implantación nas empresas galegas seguen a ser os navegadores de internet e as aplicacións ofimáticas libres, as de xestión de contidos web e xestores de correo electrónico, todos eles cunha presenza superior ao 49% no sector.

As empresas TIC galegas como provedoras de solucións libres

O 51,1% das empresas TIC que vende produtos de software ofertou bens ou servizos en software libre no 2022.

Sobre o total de empresas TIC, os programas que máis distribúen en versión de Software Libre son: Xestión de contidos; páxinas web; marketing dixital; sistemas, servizos de virtualización, servidores e aplicacións na nube; e-commerce e ofimática, ofrecidas todas elas por máis da cuarta parte das empresas que venden software.

No 2022, o 89% das empresas TIC que ofrecen produtos ou servizos de Software libre proporcionan consultaría tecnolóxica de Software Libre, un 4,2% máis que o ano anterior; e un 64,2% das empresas TIC proporciona consultaría de servizos de Software Libre propio, experimentando un incremento do 4,6% respecto ao ano 2021.

Hai que lembrar que a Axencia para a Modernización Tecnolóxica de Galicia fomenta o software libre no ámbito empresarial a través de diversas accións formativas e de divulgación que contan co soporte da Oficina de Software Libre.

Os datos deste informe poden consultarse na seguinte ligazón: www.osimga.gal.

27/01/202418:14
Fragamento da presentación do informe sobre o uso das TIC polas mulleres.
Santiago de Compostela

As mulleres galegas de entre 35 e 64 anos utilizan máis as tecnoloxías que os homes

  • O 89,1% das mulleres declara usar internet, fronte ao 89,5% dos homes, que só as superan de xeito significativo a partir dos 65 anos
  • As mulleres son tamén as que máis usan internet en formularios e tramitacións on-line da Administración electrónica, así como para participar en redes sociais, educación e actividades relacionadas coa saúde

As mulleres galegas de entre 35 e 64 anos usan internet máis que os homes, e, ademais, as de entre 45 e 64 anos superan tamén aos homes no uso de dispositivos electrónicos.

Nas franxas de idade inferiores aos 35 anos, o uso das tecnoloxías é practicamente o mesmo entre homes e mulleres, con índices que superan o 99%, salvo no caso do uso de dispositivos electrónicos por parte de escolares de primaria ou inferior, no que esta porcentaxe sitúase en torno ao 78%, tanto por parte dos nenos como das nenas.

O informe “Mulleres en dixital: o uso das TIC desde unha perspectiva de xénero”, que acaba de publicar o Observatorio da Sociedade da Información e a modernización de Galicia da Xunta (OSIMGA), indica que só se manteñen diferenzas detectables nas persoas maiores de 65 anos. Nesta franxa, un 85,4% das mulleres utiliza dispositivos electrónicos, fronte a un 89,9% dos homes e un 57,7% das mulleres declaran usar internet, fronte a un 62,3% dos homes.

As características da poboación de Galicia explican que, tendo en conta todas as idades, o 89,1% das mulleres declaren usar internet, unha porcentaxe que é do 89,5% no caso dos homes.

O informe de OSIMGA, que depende da Axencia para a Modernización Tecnolóxica de Galicia, analiza comparativamente os principais indicadores que definen as diferenzas de xénero no uso das tecnoloxías en Galicia, a partir de datos obtidos no marco do convenio asinado co Instituto Galego de Estatística (IGE).

Uso de Internet, Comercio Electrónico e e-Administración

A proporción de mulleres que compran a través da rede no 2022 acada o 60,5%, cun crecemento de case o 20% dende o ano 2019, cando a porcentaxe das internautas galegas que compraban na rede era do 50,9%. Por tramos de idade, compran máis as mulleres ca os homes por internet ata os 54 anos, e invértese a tendencia nos maiores, ata superar os 8 puntos porcentuais a prol dos homes entre os 65 e 74 anos.

Con todo, en termos globais, a porcentaxe de homes que compran a través da rede en Galicia supera en 0,3 puntos á das mulleres.

No relativo ao uso da Administración dixital, no ano 2022, as mulleres superan aos homes en todas as actividades analizadas e que serven para informarse ou realizar trámites electronicamente.

O 81,1% das mulleres que usan internet obteñen información das Administracións públicas e máis do 80% descargan e envían formularios oficiais cumprimentados. O 61,6% das mulleres descargaron no último ano documentos persoais xerados pola administración.

Comportamento na rede: Servizos e actividades de Internet utilizados

As diferenzas entre galegos e galegas no relativo ás actividades e servizos que utilizan na rede varían en función da natureza das actividades. Ambos sexos amosan como actividades máis comúns na internet a mensaxería instantánea, busca de información, ler novas e usar o correo electrónico.

As mulleres superan aos homes nos hábitos de participación en redes sociais, educación online, actividades relacionadas coa saúde.

Pola contra, nas actividades relacionadas co software como son instalalo, descargalo, configuralo ou transferir arquivos, o nivel de uso das mulleres sitúase varios puntos porcentuais por detrás dos homes.

Os datos deste informe poden consultarse na seguinte ligazón: www.osimga.gal.

20/01/202412:17
Intelixencia artificial.
Santiago de Compostela

A Xunta pon a disposición das administracións públicas unha guía coas pautas para a implantación dunha Intelixencia Artificial segura e eficiente

  • O obxectivo do documento é que administracións e organismos públicos poidan aproveitar todas as potencialidades da automatización dos procesos e a xestión intelixente dos datos coa máxima seguridade para as persoas
  • As guías e códigos de conducta son un complemento a aspectos cun carácter máis normativo recollidas na lexislación sobre IA, que está en fase de creación
  • A Xunta está a elaborar a primeira Lei de Intelixencia Artificial en Galicia que permitirá un uso eficaz, eficiente, ético e seguro desta tecnoloxía na Administración xeral e no sector público autonómico da Comunidade

A Xunta de Galicia, a través da Axencia para a Modernización Tecnolóxica de Galicia, acaba de publicar unha Guía coas pautas que poden seguir as administracións públicas para garantir un uso eficiente e seguro da intelixencia artificial.

A intelixencia artificial permite hoxe axilizar e simplificar os procesos administrativos coas tecnoloxías de automatización; así como ofrecer un trato máis eficaz e personalizado, grazas á xestión intelixente dos datos. A Xunta de Galicia quere facilitar a adopción desta tecnoloxía a todas as administracións e para iso pon á súa disposición a Guía práctica para a xestión da intelixencia artificial nas administracións públicas.

O documento, que está dispoñible na web da Axencia para a Modernización Tecnolóxica de Galicia ten como obxectivo que as Administracións e organismos públicos poidan aproveitar todas as potencialidades da automatización dos procesos e a xestión intelixente dos datos coa máxima seguridade para as persoas, os seus dereitos e a súa intimidade.

Para garantir un uso eficiente e seguro da intelixencia artificial é necesario que as persoas que traballan na Administración coñezan, nas súas respectivas responsabilidades, aspectos como a identificación e avaliación de oportunidades de uso da IA, ou o deseño, desenvolvemento e implantación das ferramentas necesarias. É tamén imprescindible coñecer os riscos da intelixencia artificial e ter a capacidade de xestionalos. Neste sentido, a guía proporciona información tanto sobre o ciclo de vida dos sistemas de IA como as necesidades de xestión de riscos.

De acordo cos criterios estratéxicos da Unión Europea, as guías e códigos de conducta son un complemento aos aspectos de carácter normativo que recolle a lexislación sobre intelixencia artificial que está en fase de creación.

Futura lei de impulso da Intelixencia Artificial en Galicia

De xeito paralelo, a Xunta está a preparar a Lei para o desenvolvemento e impulso da intelixencia artificial en Galicia, unha norma que permitirá un uso eficaz, eficiente, ético e seguro desta tecnoloxía na Administración Xeral e no sector público autonómico de Galicia

A lei establecerá os principios éticos para o deseño, adquisición, implementación e uso de sistemas de IA por parte da Administración baixo criterios de dilixencia, auditabilidade, explicabilidade, transparencia, imparcialidade, ausencia de prexuízos, seguridade ou privacidade.

18/01/202419:44
Comisión de expertos para o asesoramento no desenvolvemento e uso ético da intelixencia artificial en Galicia.
Santiago de Compostela

Rueda pon en valor o potencial de Galicia para situarse á vangarda no impulso de novas tecnoloxías

  • O presidente da Xunta reúnese coa Comisión de expertos para o asesoramento no desenvolvemento e uso ético da intelixencia artificial en Galicia
  • Asegura que a futura lei sobre intelixencia artificial vai consolidar Galicia como referente no uso ético desta tecnoloxía e como lugar atractivo para a inversión empresarial neste eido

O presidente da Xunta, Alfonso Rueda, salientou hoxe o potencial de Galicia para situarse á vangarda no impulso de novas tecnoloxías e das medidas que garantan un uso seguro e axeitado das mesmas.

Durante un encontro coa Comisión de expertos para o asesoramento no desenvolvemento e uso ético da intelixencia artificial en Galicia, Rueda puxo como exemplo a futura lei sobre intelixencia artificial na que se está a traballar o Goberno autonómico. Unha normativa que vai consolidar Galicia coma referente europeo no uso ético destas tecnoloxías e coma lugar atractivo para a inversión empresarial neste sector.

Rueda agradeceu o labor de asesoramento desta Comisión e lembrou que o obxectivo último dos avances tecnolóxicos sempre ten que ser “mellorar a calidade de vida das persoas”. Para iso, salientou, é preciso o traballo conxunto entre administracións, universidades e o tecido produtivo.

 

14/01/202412:49
XuntaEU.
Santiago de Compostela

XuntaEU concentra nunha aplicación para móbiles os principais servizos da Administración dixital

  • A nova ferramenta facilita a accesibilidade aos servizos públicos e xa está dispoñible para a súa descarga en dispositivos móbiles con Android e iOS
  • Para acceder aos servizos é necesario identificarse dun xeito seguro coa Chave 365 ou co DNI electrónico
  • A aplicación permite, entre outras utilidades, consultar notificacións e expedientes, recibir avisos ou xestionar citas

A aplicación de referencia para móbiles da Xunta de Galicia, XuntaEU, xa está dispoñible para a súa descarga en dispositivos con Android e iOS.

Esta ferramenta concentra o acceso a información e servizos dixitais que xa estaban dispoñibles en diferentes canles en internet e facilita a accesibilidade a estes servizos grazas á universalización na utilización dos dispositivos móbiles e a súa conectividade a alta velocidade. Ademais, a aplicación simplifica e garante a seguridade da relación da cidadanía coa Administración.

Para poder acceder aos servizos, as persoas usuarias deben identificarse dun xeito seguro a través dos sistemas Chave 365 ou do DNI electrónico. Este último está, polo de agora, dispoñible unicamente para dispositivos Android. No primeiro caso haberá tamén un dobre factor de autenticación, polo que a persoa recibirá un código PIN no teléfono a primeira vez que acceda á aplicación. Neste primeiro acceso tamén deberá expresar o seu consentimento opcional para a recepción de avisos, para o uso da cámara coa única finalidade de ler códigos QR, ou para permitir o inicio de sesión con recoñecemento facial ou pegada dixital.

Na súa primeira versión, a aplicación permite acceder ás notificacións postas a disposición en Notifica.gal, consultalas, aceptalas ou rexeitalas. Tamén dá acceso á información básica dos expedientes e presentacións nos que a persoa usuaria figure como solicitante ou representante. Para a realización de tramitacións relacionadas con estes expedientes, a aplicación proporciona un acceso directo á sede electrónica.

A aplicación permite o acceso ao listado de tarxetas ou carnés emitidos pola Xunta de Galicia, que poden ser validados por terceiros directamente dende o dispositivo a través dun código QR. Na actualidade xa están dispoñibles neste sistema o Carné Xove, o Carné profesional en instalacións térmicas de edificios, o Carné profesional de operador de guindastre torre, o Carné de operador de guindastre móbil autopropulsado Categoría A e o Carné profesional de operador de guindastre móbil autopropulsado Categoría B.

XuntaEU proporciona tamén acceso aos certificados dos que dispoña a persoa usuaria. Neste momento, os documentos dispoñibles son o Certificado de habilitacións profesionais, a Licenza de pesca marítima de recreo en superficie, a Licenza de pesca marítima de recreo submarina e a Licenza de pesca marítima de recreo en embarcacións.

Tamén permite consultar as citas programadas coa Administración. Na actualidade están integrados o sistema de citas das Oficinas de Atención á cidadanía e Rexistro e o sistema de citas das Oficinas de Atención das consellerías. Ademais, os usuarios e usuarias poden consultar ou dar de alta apoderamentos do Rexistro Electrónico de Apoderamentos de Galicia.

Outras utilidades son a xestión do sistema de Chave 365 para renovar os datos de usuario ou dalo de baixa; a posibilidade de consultar ou modificar os datos persoais almacenados na Carpeta Cidadá, así como a recepción de avisos personalizados.

XuntaEU inclúe tamén unha utilidade para comprobar a validez de documentos asinados electronicamente, tanto de maneira manual como mediante o uso da cámara para escanear o código QR.

 

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS