07/10/202008:09
As Pontes
Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...
Volven os Amigus Labs das Pontes os vindeiros 17 e 24 de outubro. Segundo informa a organización, a Asociación Amigus, serán dúas charlas de produción e edición de audio e vídeo con ferramentas libres. Realizaranse por streaming e poderemos seguilas por Jitsi ou por YouTube.
A primeira charla será o 17 de outubro, en horario de 11:00 a 12:30 h, e comezará cunha introdución á creatividade de podcasting con Audacity. Nesta sesión falarase sobre como está o panorama actual da creación de arquivos radiofónicos online e sobre que necesitamos para iniciarnos neste ámbito, tanto desde unha forma low-cost como dun xeito máis profesional. Falarase tamén sobre aparellos para gravación, software de gravación e edición, plataformas onde aloxar o podcast, etc.
O día 24 de outubro, no mesmo horario, organizarase unha introdución á edición de vídeo con Shotcut. Nesta charla tocaranse temas como os xeitos de iniciarnos na edición de vídeo, consellos para mellorar as gravacións, plataformas onde aloxar os nosos vídeos… As charlas son de balde e, como dixemos, poderanse seguir por Jitsi ou Youtube. De inclinarnos pola primeira opción deberemos rexistrarnos no formulario habilitado na web dos Amigus Labs, para recibir antes do inicio da charla a ligazón de acceso á sala. En Jitsi poderemos participar dunha forma máis interactiva na charla, mediante o chat ou micro poderemos realizar preguntas. Se nos inclinamos por Youtube, Amigus publicará nas redes sociais a ligazón para seguir a sesión o mesmo día da charla.
Ademais, este sábado 10 de outubro a asociación das Pontes organizará unha xornada de portas abertas de 10:00 a 14:00 horas. “Se tes un proxecto en mente, que sabes que pode facerse, pero que agora non sabes como, tes a oportunidade de vir e coñecer a tecnoloxía que temos a tua disposición así como compañeiros que te axudarán na aprendizaxe e creación do proxecto”, informan dende Amigus.
Os famosos personaxes da miniserie animada 'ON Fologüers' súmanse ao 37 concurso escolar do Grupo Social ONCE que, nesta edición, quere trasladar a mensaxe de que a tecnoloxía é a nosa aliada sempre que fagamos un uso responsable da mesma e non un abuso que pode conlevar riscos e consecuencias non desexadas.
Para iso protagonizaron un capítulo especial no que cada personaxe relata a súa relación coas redes sociais e explica como as novas tecnoloxías axudan ás persoas con discapacidade na súa inclusión na sociedade. Animan desta maneira aos estudantes para facer un uso responsable, e non un abuso, dos móbiles, as tablets e computadores, e a participar nesta edición do concurso escolar.
On Fologüers é unha iniciativa da Fundación ONCE cuxo obxectivo é promover a normalización das persoas con discapacidade e mostrar a discapacidade sen que se fale dela. Os personaxes da serie son novos con e sen discapacidade que desenvolven a súa vida en distintas contornas e protagonizan tramas a través das que coñecemos as barreiras sociais e arquitectónicas ás que deben facer fronte no seu día a día. Durante este verán tamén se sumaron á loita contra o coronavirus e as desigualdades e barreiras que xera para as persoas con discapacidade.
ConexiÓN - AdicciOFF
Baixo o lema 'ConexiÓN, AdicciOFF. Isto non é un xogo', púxose en marcha o 37 concurso escolar do Grupo Social ONCE, un programa de sensibilización educativa que pretende traballar na aula de maneira activa valores como a solidariedade e o pensamento crítico, o importante papel do alumnado, e o traballo colaborativo para conseguir a igualdade de oportunidades para todas as persoas.
O reto deste ano consiste en crear unha campaña publicitaria de sensibilización cunha mensaxe capaz de inspirar a toda a sociedade. No 37 concurso escolar do Grupo Social ONCE poden participar todos os escolares dos centros educativos españois públicos, concertados e privados, desde Primaria ata Bacharelato, ademais de Educación Especial e Formación Profesional.
A participación realizarase por aulas completas (un traballo-unha aula) dirixidas por un docente. Os estudantes de Primaria e Educación Especial (Categorías A, B e E) terán que facer unha cuña de radio dun minuto, como máximo, capaz de transmitir unha mensaxe sobre o bo uso da tecnoloxía por parte dos menores. Deberá ir titulada e, para facilitar a accesibilidade ao traballo, incorporará un documento co texto utilizado.
Pola súa banda, os estudantes de Secundaria (categoría C) terán que deseñar un cartel publicitario que capte a atención e transmita unha mensaxe que fomente o uso responsable da tecnoloxía, evitando o abuso da mesma. Deberá incluír un slogan e unha audiodescripción do traballo.
Para os estudantes de Bacharelato e FP (Categoría D), o concurso pide a realización dun anuncio publicitario, de 40 segundos, para sensibilizar sobre o uso responsable da tecnoloxía e os riscos que carrexa o seu abuso. Terá que estar acompañado dun título e un documento co guion, para facilitar a accesibilidade ás persoas con discapacidade.
O xurado valorará de forma especial a creatividade, a calidade, a mensaxe e a accesibilidade dos traballos presentados que, como en anteriores edicións, concursarán a nivel provincial, autonómico e nacional.
Cada grupo ou aula deberá subir á páxina web do concurso (www.concursoescolaronce.es) o seu traballo. Os directores ou profesores de todos os centros educativos que desexen participar no concurso e acceder aos materiais educativos, poderán facelo a través da propia web ou por vía telefónica no número gratuíto 900 808 111, sendo a data límite de recepción de participacións o 5 de febreiro de 2021.
Con motivo deste 8 de outubro, Día Mundial da Visión, o Colexio de Ópticos-Optometristas de Galicia emitiu un comunicado no que pon de manifesto “o problema que actualmente supoñen os dispositivos electrónicos para a saúde visual das persoas, en concreto da xente nova”. O Colexio profesional tamén anuncia que vai celebrar, entre hoxe e o día 11, a Semana da Optometría, con xornadas de portas abertas nas ópticas. A idea destas actividades é advertir sobre as consecuencias para a visión dun uso prolongado das pantallas.
Segundo advirte o colectivo profesional galego, un exceso de tempo diante destes dispositivos pode ocasionar o Síndrome Visual Informática (SVI), unha afección que provoca visión dobre, borrosa, fobia á luz, bágoas recurrentes, sequidade ocular, irritación nos ollos ou outros síntomas como náuseas e mareos, e mesmo un aumento da miopía. O colectivo lembra que a crise sanitaria non fixo máis que agudizar esta situación, ao apostar os centros educativos polo ensino online como “unha posible solución a esta situación”, unha modalidade que incrementa o número de horas que pasan as nenas e nenos diante dos dispositivos electrónicos, en especial ordenadores, para poder seguir as clases e realizar as súas tarefas durante o novo curso.
Por este motivo, o Colexio de Ópticos-Optometristas de Galicia aconsella seguir unhas normas de ergonomía visual e empregar a regra 20/20/20: deixar de mirar a pantalla durante 20 segundos cada 20 minutos e centrar a mirada en calquera punto que estea a 20 pés (máis de 6 metros) de distancia para descansar a vista. “Se unha persoa fai un uso non axeitado das pantallas sen ter en conta os descansos e as recomendacións ergonómicas pode sufrir os signos e síntomas da Síndrome Visual Informática, que este ano poden aumentar pola dificultade para adaptar as habitacións e os espazos adicados ao estudo dos máis pequenos en casa”, explica o presidente do colexio, Eduardo Eiroa, que engade estoutras recomendacións:
A Fundación Museo do Videoxogo de Galicia colabora coa Universidade da Coruña nas segundas xornadas Mulleres detrás dos videoxogos, que comezaron este venres pasado. Ao seu abeiro, está a achegar dende a súa sede en Cangas do Morrazo a que sería, en palabras da fundación, “a primeira exposición de corte museístico, exclusivamente virtual interactiva, cun enfoque feminista, histórico e social”. Pódese ver a partir deste 5 de outubro na web do MUVI, nun apartado específico centrado nas xornadas. Tamén é accesible a través dos nosos móbiles.
A fundación argallou a mostra a petición da Universidade da Coruña, nunha actividade enmarcada dentro das ditas xornadas. “O obxectivo da exposición”, sinalan dende o MUVI, “non soamente se limita a ser unha solución tecnolóxica innovadora dentro do eido museístico, cultural e expositivo, senón que busca, a través da súa formulación físico-virtual, explorar novas vías de eficacia á hora de presentar e relacionar contidos, obxectos, obras ou ideas”. Navegando por ela, os visitantes terán a posibilidade de gozar “cunha experiencia profunda”, con gran cantidade de información audiovisual e con ligazóns externas que nos convidan a afondar en diferentes vertentes da temática tratada”, explican, engadindo que se “trata dun resumo práctico, elegante e innovador que trata de poñer cara e contexto a algunhas das mulleres máis relevantes da industria a través dun percorrido cultural, ambientado no único museo sobre videoxogos de Galicia”.
A xornadas
A Facultade de Ciencias de Comunicación da UDC organiza a segunda edición das xornadas internacionais Mulleres detrás dos videoxogos, que este ano celébraranse de forma virtual, dende o día 2 ao 9 de outubro. A actividade achega un programa que combina relatorios e faladoiros en directo, abertos á participación do público, con outro tipo de contidos en vídeo e unha exposición virtual sobre pioneiras dos videoxogos.
A exposición virtual
A Fundación Museo do Videoxogo de Galicia presenta un modelo de exposición que permitirá descubrir e analizar ao longo de case 50 anos de historia a obra dunha chea de mulleres vencelladas ao eido do lecer interactivo, dende os comezos ata a actualidade, “fomentando deste xeito a comprensión e alcance do seu legado”, explican dende o MUVI. Na visita virtual teremos acceso íntegro aos espazos do museo e neles poderemos atopar instalacións expositivas distribuídas en puntos de referencia, con videoconsolas e videoxogos representativos das biografías de cada unha das mulleres abordadas na mostra.
A aula CeMIT de Ribeira anunciou este venres a súa programación para estes meses de outubro, novembro e decembro: un máis que completo feixe de actividades formativas tecnolóxicas para incrementar a alfabetización dixital da cidadanía, a súa autonomía online, as súas posibilidades de atopar emprego e, tamén, os recursos dos que dispoñen para facer fronte á crise da COVID. O ciclo Outono TIC está constituído por un paquete de cursos destinados a persoas adultas do municipio. A concelleira de Innovación Tecnolóxica, Ana Barreiro, acompañada do axente TIC Manuel Bello, debullou na mañá deste 2 de outubro un programa que inclúe tanto accións formativas para principiantes como outras máis especializadas, tendo unha duración entre as 6 e as 20 horas.
Entre os cursos para principiantes atópanse os seguintes: Whatsapp desde cero, Facebook desde cero, Instagram desde cero e Coñece o teu móbil, neste último caso con dous cursos, un en outubro e outro en decembro. Ademais haberá outras ofertas sobre informática básica, retoque de imaxe (GIMP), sede electrónica, ofimática na nube (Google Drive) e Libreoffice (Write, Calc e Impress).
Aquelas persoas interesadas poden inscribirse a partir do luns 5 de outubro ben na propia Aula CeMIT (teléfono 981 876 043) situada en Cubeliños ou ben na páxina web do centro. Barreiro e Bello engadiron que “dadas as limitacións COVID cada curso ten un aforo de oito usuarios en lugar dos doce habituais”.
Rede Araña
Ademais, Ana Barreiro avanzou que o Concello está en xestións para poder albergar unha semana en outubro e outra en novembro unha colaboración da iniciativa Rede Araña, destinada a mellorar as competencias dixitais das persoas en situación de desemprego, con tres eixes diferenciados: Aulas TIC, Muller TIC e Brúxula, esta última enfocada en usuarios con problemas de drogodependencia. De frutificar tales xestións, darase cumprida conta das datas e o contido específico desta colaboración.
A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...
A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...
Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...