Seis de cada dez persoas con discapacidade melloraron a súa calidade de vida grazas ás Novas Tecnoloxías, segundo se desprende do V Informe Tecnoloxía e Discapacidade presentado este martes, 12 de xuño, por Keysight Tecnhnologies e a Fundación Adecco. Esta análise baseouse nos últimos datos do INE e elaborouse con motivo da celebración do Día Internacional das Tecnoloxías Apropiadas, que se celebra este 15 de xullo, segundo informan ámbalas institucións.

En España, o 20% dos fogares ten algunha persoa con discapacidade entre os seus membros, o que suma máis de tres millóns de persoas, como detalla o informe. Entre as situacións analizadas destaca o problema da accesibilidade das persoas con discapacidade e a súa relación na dependencia deste colectivo. O 51,5% destas familias atopa barreiras de accesibilidade na súa vivenda, entre as que se atopan as escaleiras e os cuartos de baño.

Así mesmo, case un millón de persoas atopa diferentes dificultades para utilizar o transporte público e privado, como acceder a estacións, subir ou baixar do vehículo, orientarse ou comprender sinalizacións. As persoas con discapacidade consideran que moitas destas situacións poderían liquidarse fomentando a accesibilidade, a través de solucións tecnolóxicas que favorezan a independencia e autonomía de todas as persoas.

Doutra banda, o estudo resaltou o papel das Novas Tecnoloxías como "aliadas" da Accesibilidade Universal, como no deseño de melloras tecnolóxicas que fomenten a autonomía, independencia e a calidade de vida das persoas con discapacidade. Así, 6 de cada 10 persoas con discapacidade melloraron a súa calidade de vida grazas ás Novas Tecnoloxías, segundo detalla o informe.

Dentro das facilidades que ofrecen as novas tecnoloxías, o estudo revela que tamén impacta de forma positiva na calidade de vida dos familiares e coidadores deste colectivo. Como se detalla, a Revolución Tecnolóxica tamén puido influír neste incremento do emprego das persoas con discapacidade pois permiten ás persoas con discapacidade desempeñar postos de traballo nos que hai anos estaban practicamente excluídos.

Segundo o informe, a contratación de persoas con discapacidade seguiu unha tendencia ascendente durante os últimos anos, alcanzándose en 2015 o máximo histórico, con 95.238 contratos, un 15% máis que en 2014 e un 56% máis que en 2012.

Outro aspecto destacado no informe é a aparición de aplicacións como Whatsapp que supuxeron un "avance fundamental" para liquidar as dificultades da comunicación telefónica instantánea nas persoas xordomudas.

Estas adaptacións mitigan as dificultades derivadas da mobilidade, a audición ou a visión reducidas, posibilitando que as persoas con discapacidade utilicen o seu potencial no ámbito laboral, en condicións normalizadas. Así, oito de cada 10 persoas con discapacidade cre que a dependencia podería reducirse a través da accesibilidade

Doutra banda, estas tecnoloxías tamén serviron para reforzar a desigualdade, por exemplo, un 52% dos enquisados segue atopando barreiras para utilizar as ferramentas tecnolóxicas convencionais. A maior parte destes obstáculos atópase no económico, segundo relata o informe, aínda que un 37% alude ás barreiras de tipo formativo e o descoñecemento da utilización destes aparellos.

A miúdo, os artigos que publicamos viran ao redor da actualidade, rumores e análises de aplicacións. Aínda que en ocasións, falar dunha experiencia de vida como a de Jordyn Castor resulta gratificante e énchenos de esperanzas.

Jordyn naceu prematuramente, con menos de 1 Kg de peso. Os médicos déronlle aos seus pais, poucas expectativas de vida. E debido ao seu nacemento prematuro, naceu cega. Os seus pais foron un factor importante para ensinarlle a superar todo tipo de obstáculos.

Traballando en Apple para mellorar a accesibilidade

A información que foi compartida nunha entrevista realizada por Mashable, cita que desde pequena estivo atraída pola informática, e foi grazas a esta que puido facerse un lugar no mundo da tecnoloxía. Ademais de ser un exemplo de superación, grazas aos seus coñecementos, axuda a outras persoas invidentes a mellorar a súa experiencia cos computadores.

Foi así que en 2015 únese ás filas de Apple como pasante, para axudar no desenvolvemento de "VoiceOver". Tras terminar a súa etapa como pasante, gañouse un lugar como enxeñeira no equipo de deseño da accesibilidade e a calidade de Apple.

A accesibilidade é un dos factores máis importantes que se consideran en Apple

Actualmente, o seu traballo céntrase en mellorar a accesibilidade para nenos invidentes, mediante o novo Swift Playground que permite ensinar de maneira divertida aos nenos a programar.

Sarah Herrlinger, Xerente Senior de Apple da política de accesibilidade, explica como a filosofía de Apple apunta a ofrecer ás persoas invidentes ou con diminución visual a posibilidade de utilizar a tecnoloxía sen necesidade de comprar accesorios adicionais.
Este esforzo por parte de Apple vese reflectido nos usuarios, e hai poucos días atrás recibiu un premio da "American Council of the Blind"s" pola súa continua dedicación á innovación baseada na inclusión dos usuarios invidentes.

Jordyn Castor, é un exemplo de superación e o seu traballo en Apple demostra o compromiso que a compañía ten cos seus usuarios.

A Fundación Vodafone España e a Asociación Española de Expertos en Relación cos Clientes (AEERC) asinaron un novo convenio de colaboración polo que dan continuidade por cuarto ano consecutivo ao seu proxecto de formación de persoas con discapacidade, ampliando a oferta formativa con novos contidos técnicos, en concreto sobre o programa EXCEL en nivel intermedio e avanzado, ferramenta necesaria para as contornas de Contact Center.

O novo proxecto "Accións Formativas online en Contornas de Contact Center" desenvolverase entre xuño de 2016 e xuño de 2017 e potenciará a formación a 135 persoas con discapacidade, das cales 35 recibirán formación online como Axentes de Contact Center, 50 en Excel intermedio e outras 50 en Excel avanzado.

A aprendizaxe terá unha duración aproximada de cinco meses e consta de 220 horas lectivas, das cales 80 horas serán de visionado de "clases maxistrais" e outras 140 corresponden a exercicios prácticos que o alumno debe cumprimentar e superar para poder continuar.

O curso realízase coa participación en remoto de todos os candidatos en modalidade asíncrona: o alumno visiona vídeos de pílulas formativas e realiza exercicios que lle permiten avanzar de forma individual. Contarase cun titor que alentará e animará ao alumnado ademais de resolver todas as dúbidas que lle vaian xurdindo. Todas as sesións serán monitorizadas por un técnico especializado en métodos educativos a distancia. A formación é selectiva e ao final de cada módulo o usuario debe realizar varios exames que certifican a súa cualificación nas diferentes áreas.

O recrutamento e selección dos alumnos realizarase durante o mes de xullo e setembro e o curso comezará en outubro. Finalmente, no período comprendido de marzo a maio os alumnos realizarán os seus CV e comezarán os procesos de inserción laboral nas empresas que participan en Grupo de Teletrabajo DISCATEL e noutras Asociacións.

A empresa galega Primux Tech, centrada no desenvolvemento e na comercialización de produtos de electrónica de consumo, vén de activar a súa política de responsabilidade social corporativa. E fíxoo colaborando coa asociación Down España e a súa filial Down Galicia. Ao abeiro deste compromiso e tras recibir a proposta de Down Ourense (federada en Down Galicia), a empresa de fabricación e distribución de aparellos electrónicos de lecer ofreceu o seu primeiro contrato laboral a David Novoa, ourensán de 26 anos que se integrou no cadro de persoal por un período mínimo dun ano.

Segundo informa Primux e reflicten fontes da Tecnópole (na que se empraza a sede de Primux), David Novoa conta co respaldo dunha preparadora laboral de Down Galicia e, ao igual ca todos os novos traballadores, recibe formación e apoio continuos dos seus compañeiros dentro do departamento de Loxística e Calidade, onde traballa no inventariado de pezas de reposto, tarefas de retractilado e organización do almacén do departamento técnico postvenda, entre outras funcións.

A Tecnópole (Parque Tecnolóxico de Galicia) tamén lembra que Primux participou recentemente como patrocinadora no 2º Encontro Nacional de Mocidade Down España, celebrado en Santiago de Compostela a finais de maio. Segundo informa Daniel Rodríguez, director executivo de Primux, “estamos comprometidos cos retos da sociedade e, malia que non somos aínda unha gran empresa, queremos contribuír na medida das nosas posibilidades ao seu desenvolvemento”.

DOWN ESPAÑA e Fundación Vodafone España van por en marcha durante este ano o proxecto máis ambicioso do noso país de formación en novas tecnoloxías para persoas con síndrome de Down, co obxectivo de facilitar a súa inserción laboral en empresas ordinarias.

Trátase da terceira edición do exitoso programa "Yo me prep@ro", co que 720 alumnos con esta discapacidade intelectual de toda España poderán mellorar e ampliar os seus coñecementos en novas tecnoloxías en aspectos tan claves como o uso adecuado de diferentes programas informáticos, a navegación por Internet, o acceso a redes bancarias informatizadas, ou a interacción con aplicación móbiles. Todo co fin último de axudarlles a salvar a fenda dixital que condiciona enormemente ás persoas con síndrome de Down á hora de atopar un posto de traballo, o que supón unha seria traba ás súas aspiracións de mellorar a súa autonomía e levar unha vida o máis plena e independente posible.

Nesta edición 2016-2017 incorpóranse 240 mozos con síndrome de Down que recibirán a formación por primeira vez, cun total de 10.500 horas formativas. A estes súmanse os 480 mozos das dúas edicións anteriores a quen se lles ofrecerá un curso de refresco dos seus coñecementos para que actualicen as destrezas adquiridas en novas tecnoloxías aplicadas á vida laboral.

Coa confianza derivada dos resultados obtidos nos dous anos previos "nos que se conseguiron preto de 150 contratos laborais para os alumnos con síndrome de Down", esta terceira edición do proxecto deseñouse coa intención de lograr un alcance inédito até agora para este programa. Así, en 2016 "Yo me prep@ro" desenvolverase en 20 localidades distintas de todo o país: Ávila, Barcelona, Burgos, Cádiz, Castellón, Compostela, Córdoba, Granada, Málaga, Murcia, Ourense, Palencia, Pamplona, Pontevedra, Sabadell, Toledo, Valencia, Valladolid, Vigo e Zaragoza. Serán as asociacións federadas a DOWN ESPAÑA en cada unha destas localidades as que impartan os cursos.

Ademais de mellorar a súa formación, os 240 alumnos con síndrome de Down que participen nesta nova edición de "Yo me prep@ro" terán a oportunidade de realizar prácticas en contornas laborais ordinarias. Tras esas dúas primeiras fases, DOWN ESPAÑA alcanzou o compromiso de lograr a inserción laboral de polo menos o 30% do total dos alumnos.

Outro dos puntais deste proxecto é a realización de sete vídeos-tutoriais que, cunha linguaxe sinxela e accesible, detallarán os pasos e instrucións para que os alumnos aprendan a navegar por Internet, xestionar o correo electrónico ou manexar redes sociais como LinkedIn. Todo cunha presentación visual atractiva, directa e moi comprensible.

Ao mesmo tempo Down España levará a cabo unha experiencia piloto que comprenderá o uso da plataforma Mefacilyta desenvolvida pola Fundación Vodafone. Esta experiencia piloto comprende o deseño e validación dos contidos e itinerarios formativos complementarios ao Proxecto

Por último, esta terceira edición de "Yo me prep@ro" vai facer especial fincapé nun dos aspectos que máis decisivamente contribúen a mellorar a inserción laboral do colectivo: a sensibilización no propio mundo empresarial.

Por iso, en cada unha das localidades onde se desenvolva o programa, vai realizarse unha xornada de networking entre representantes do tecido empresarial da zona e mozos e mozas con síndrome de Down. A intención é que os empresarios coñezan persoalmente aos alumnos do curso, que poidan apreciar as súas aptitudes e que comprendan os beneficios que achegan as persoas con discapacidade intelectual no traballo: melloran o clima laboral, achegan alegría e optimismo, e son metódicos e organizados nas súas tarefas.

A realización deste proxecto enmárcase dentro do Convenio Marco subscrito con data 8 de novembro de 2013 entre Fundación Vodafone España, a Confederación Española de Organizacións en favor das Persoas con Discapacidade Intelectual "FEAPS" e DOWN ESPAÑA para a realización de actividades conxuntas en materia de accesibilidade e inserción laboral que redunden en mellorar as condicións de vida das persoas con discapacidade intelectual.

Este convenio busca fomentar a innovación tecnolóxica aplicada á accesibilidade e fará especial fincapé naquelas iniciativas que contribúan á participación das persoas con discapacidade intelectual no ámbito laboral a través de proxectos piloto de innovación e  sesións formativas e de divulgación.

O proxecto "Comunícome con ritmo" premiado no V Concurso Nacional de Proxectos en Tecnoloxías de Apoio e Comunicación (2015), contou cun gran número de persoas que utilizan sistemas aumentativos e alternativos de comunicación.

Partindo da súa motivación pola música, o proxecto consiste en que a partir dunha canción que eles elixen, adaptan a letra para explicar cuestións que lles son propias. Desta maneira, a música e a forma en que se interprete convértense nun medio ideal para expresarse.

O obxectivo do proxecto foi facer protagonistas aos nenos e nenas aumentando a súa autoestima e creatividade, facéndolles vivir novas experiencias fomentando as habilidades de comunicación. Contou con 169 participantes.

Coñece as súas experiencias destes meses a través da videomemoria: https://www.youtube.com/watch?v=10sSbRLT77w

Esta semana a operadora Telefónica presentou un novo e ambicioso proxecto anti-fenda dixital. Trátase do proxecto Movistar+ 5S, unha proposta que a compañía cualifica de “pioneira” e que ten como obxectivo achegar o lecer dixital aos dous millóns de persoas que teñen no ámbito estatal diversidade funcional sensorial. Máis polo miúdo, preténdese “ofrecer por vez primeira nunha televisión contidos cos tres sistemas de accesibilidade integrados nunha mesma ferramenta”. Estes tres sistemas son: audiodescrición, subtítulos para persoas xordas e lingua de signos.

O acto de presentación, celebrado este martes 14 (coa presenza da raíña Letizia e do presidente da operadora, José María Álvarez-Pallete), coincidiu de maneira significativa co Día Nacional das Linguas de Signos Españolas. Movistar+ 5S, informou a firma de telecomunicacións, mobilizará un investimento anual de máis de 1 millón de euros. “Permitirá aos ditos colectivos”, engadiuse, “gozar dos contidos de Movistar sen límites e acceder á cultura e ao lecer ao mesmo tempo que o resto da poboación”. O servizo será de balde e compatible cos sistemas operativos iOS e Android. Para accedermos a el só teremos que descargar a aplicación Movistar+ 5S. Logo teremos que elixir a modalidade de LSE dependendo das nosas características sensoriais.

Con Movistar+5S, as persoas xordas teñen a posibilidade de elixir os subtítulos/texto no seusmartphone ou tableta ou, tamén, visualizar na pantalla do seu dispositivo a imaxe dun intérprete de LSE sincronizada cos diálogos da película ou serie de TV. Pola súa banda, as persoas cegas poden escoitar a audiodescrición do filme a a través duns auriculares conectados ao dispositivo móbil.

Nesta primeira fase, o servizo lánzase con máis dun centenar de películas e series, entre os que se inclúen Mad Max, Oito apelidos cataláns, Os Minions 3, Zootropolis, Nación Secreta, Spotlight, Penny Dreadful, Outlander ou Better Call Saul. O obxectivo é incluír cada mes 35 estreas de cinema e 70 episodios de series. “Isto”, informou Telefónica, “representa unha importante ampliación da oferta de accesibilidade nas canles en directo de Movistar+, que xa viña ofrecendo o 95% dos seus contidos novos adaptados para as persoas xordas, do mesmo xeito que toda a publicidade”.

A Cátedra Tecnoloxía e Accesibilidade da UNED - Fundación Vodafone España desenvolve accións centradas en mellorar a vida e o acceso á educación superior principalmente ao colectivo de estudantes con discapacidade da universidade baseadas no uso e aplicación das TIC.

Os proxectos e traballos de investigación realizados neste ano, 2016, son:

• 3ª Edición da Rede de voluntarios TIC para a accesibilidade de recursos audiovisuais educativos no repositorio en Cadea-Campus da UNED.
• Avaliación e mellora da accesibilidade da app móbil de Cualificacións da UNED desenvolvida en 2015.
• Deseño e desenvolvemento da app móbil Multimedia en 2016.
• Participación no Consorcio MUSACCES cuxo obxectivo é achegar o Museo do Prado a colectivos de especial accesibilidade (invidentes, persoas xordas e reclusos) con apoio das Tecnoloxías da Información e a Comunicación.
• Desenvolvemento de accións formativas para persoas maiores co fin de achegar o uso de smartphones para este colectivo a partir dunha serie de guías e vídeos sobre o uso e manexo deste tipo de dispositivos, dispoñibles na web da Fundación Vodafone.
• Participación en conferencias e congresos científicos de ámbito nacional e internacional co fin de divulgar e comunicar as accións e traballos da Cátedra no tema da accesibilidade e as novas tecnoloxías.
• Celebración dun workshop anual co fin de divulgar e comunicar as accións e traballos realizados por persoas ou organizacións de relevancia nacional e internacional vinculadas a esta temática.

O Observatorio de Accesibilidade TIC da Fundación ONCE deseñou unha enquisa para coñecer as barreiras de acceso que presentan as páxinas web dos medios de comunicación en España para as persoas con discapacidade.
 
Desta forma, o obxectivo da sondaxe é coñecer as barreiras que atopan as persoas con discapacidade cando tratan de acceder aos sitios web de xornais, emisoras de radio e canles de televisión, para poder así mellorar a súa relación con Internet e o exercicio do seu dereito á información.
 
Na enquisa online, á que se pode acceder mediante a aplicación accesible desenvolvida por ILUNION Tecnoloxía e Accesibilidade, pregúntase aos usuarios cales son as principais barreiras que atopan cando acceden á versión dixital de diferentes medios de comunicación a través da web ou de aplicacións móbiles.
 
A enquisa, que é anónima, estará dispoñible até o próximo 20 de xuño a través da seguinte ligazón: http://mediosdecomunicacion.consultaopinion.com/encuesta.aspx?idEncuesta...
 
Convídase a participar nela a calquera persoa con discapacidade usuaria de televisión, prensa e/ou radio.
 
O Observatorio de Accesibilidade TIC de Fundación ONCE leva desenvolvendo estudos desde 2004, dispoñibles no portal Discapnet
(www.discapnet.es).
 
A súa finalidade é, por tanto, contribuír ao desenvolvemento dunha sociedade da información inclusiva a través de iniciativas orientadas a xerar coñecemento sobre a accesibilidade dos produtos e servizos baseados nas tecnoloxías da información e as comunicacións (TIC).
 

O proxecto "Somos, estamos e contámoscho" púxose en marcha en 2015 nas dúas entidades APAMP Vigo e AVAPACE. Tivo como obxectivo difundir a realidade e os dereitos das persoas con parálise cerebral desde a súa propia perspectiva, xa sexa realizando visitas a centros educativos, institutos ou universidades, ou ben aproveitando as visitas que fan distintos colectivos aos centros de parálise cerebral.

Este proxecto ten as súas raíces na iniciativa "Mellor cóntocho eu" que impulsou AVAPACE no 2012 e que tamén foi premiada en #ASPACEnet. Agora, dúas entidades traballan conxuntamente e suman esforzos para dar voz ás persoas con discapacidade.

Coñece as súas experiencias destes meses a través da videomemoria.