Novas Faite Dixit@l

• Co obxectivo de pasar dun envellecemento activo “Receptor” de actividades e servizos a un envellecemento activo “Emisor” de alternativas

Existen moitas propostas para mellorar o benestar das persoas maiores. Algunhas sempre presentes en ámbitos especializados, por exemplo, realizar exercicio físico, ou optar por unha dieta saudable. Esta oferta, é aínda necesaria e útil, pero este perfil de persoa maior “receptora” de servizos, está a cambiar progresivamente a pasos axigantados. Cada vez existen máis persoas maiores que se expoñen como prioridade, participar activamente, realizar unha achega eficaz e construtiva na sociedade na que se integra, constituíndo o que a Confederación de Maiores Activos (Confemac) denomina “Envellecemento Activo Emisor”.

“Estas persoas dan un paso máis no concepto de benestar porque non só traballan para estar ben fisicamente, senón que ademais, buscan o equilibrio que parte desde o seu propio interior” explican desde da asociación, e “o desenvolvemento de recursos e habilidades persoais que lles acheguen, o máximo confort a elas mesmas e que acheguen benestar á contorna”.

Para que este proceso sexa exitoso, matizan, “debe partir do propio interior, buscar o benestar de dentro cara a fóra, e non ao revés”. 

Para Confemac neste contexto, o modelo de envellecemento activo dos últimos anos consistiu principalmente en ofertar unha ampla gama de talleres, na que había e hai varios papeis moi diferenciados: o da entidade facilitadora de alternativas, o da persoa experta (monitor ou monitora) e o das persoas maiores, receptoras dos coñecementos e habilidades. Este modelo é o que denomina envellecemento activo “receptor”. 

O resultado deste modelo, asegura a entidade, aínda segue sendo válido e ten excelentes resultados pero a situación económica e os perfís das novas xeracións de persoas en idade de xubilación “convídannos a facer un replantexamento alternativo non para substituír, senón para complementar o modelo dos últimos anos”.

As persoas maiores “cada vez están máis preparadas e máis dispoñibles para exercer unha verdadeira participación activa” subliñan, “actuando non só como receptoras de servizos senón tamén como xeradoras de ideas, actividades e programas cara ás persoas da súa propia xeración e a nivel interxeracional”.

Xeracións sénior creativas

A agrupación entende que “xa están a xurdir espontaneamente algunhas iniciativas nesta dirección, pero serán moito máis visibles se se estimulan intencionadamente, fomentando o empoderamento destas persoas”. Nas circunstancias actuais, sinala, “pode ser moi oportuno prestar atención a estas novas tendencias, estimulando unha participación activa e comprometida co propio colectivo e coa sociedade en xeral”.

Así, desde Confemac, programas como “Maiores Solidarios”, “Mostrando outros horizontes”, “Voluntariado para educar en participación e solidariedade desde a experiencia”, o “Taller de experiencias interxeracionais” ou “Experiencia e mocidade, fomentando o emprendemento” desenvólvense, explican “como pioneiros dun envellecemento emisor que convidamos a coñecer para traballar xuntos en iniciativas creativas en prol da participación e o benestar de toda a cidadanía”. 

Por todo iso, o modelo de envellecemento activo “receptor” de alternativas para a ocupación do tempo libre “segue sendo válido” opinan, pero, “as circunstancias convídannos a apostar á vez por un envellecemento activo, creador e emisor de alternativas para a sociedade actual e de futuro. As capacidades están aí pero hai que espertalas, iluminalas, axudar a evidencialas de forma que estas persoas maiores tomen conciencia da súa propio potencial”.

O empoderamento das persoas maiores, conclúen, “debe compaxinar o enfoque individual e o colectivo”. Por iso, propoñen ás entidades que traballan con maiores que “estimulen a súa capacidade de análise confiando na súa creatividade e que en que fomenten e potencien as súas iniciativas. Máis que traballar “para” trátase de traballar “coas” persoas maiores na procura do seu desenvolvemento persoal e colectivo integradas no acontecer cotián da sociedade” conclúen.

A organización galega COGAMI vén de facer balance dos éxitos acadados a través do seu programa de emprego para persoas con diversidades financiado a través da Fundación Vodafone España, máis concretamente a través do programa de inserción Participa coa dis-capacidade, impulsado pola operadora para loitar contra a exclusión social e laboral a través das novas tecnoloxías da información (recursos para atopar emprego, mellorar currículo e rendibilizar as capacidades de cada quen). O programa, que se iniciou coa entrada de 2017 e que remata co ano, cumpriu e mesmo superou as expectativas da área de emprego de COGAMI, que eran de acadar unha taxa de inserción do 49% sobre o total das persoas participantes (150). As cifras finalmente conseguidas roldan xa o 52%. Ou sexa, 78 persoas inseridas. 

Polo que respecta ás persoas que se están a beneficiar da iniciativa teñen perfís semellantes e comparten alicerces de partida: son homes e mulleres en risco de exclusión social e laboral, con diversidades funcionais ou cognitivas e sen contrato laboral previo. Segundo o lugar do que proceden, 24 dos participantes son de A Coruña, outras 24 son de Santiago Compostela, 18 de Ferrol, 18 de Lugo, 19 de Ourense, 22 de Pontevedra e 25 proceden de Vigo. Sete orientadores laborais, situados nas oficinas que COGAMI ten abertas nas principais cidades galegas, son os que se encargan de valorar e avaliar as potencialidades e capacidades de cada unha das persoas participantes no programa e a súa motivación. Amais de asesoramento, o programa ofrece información, formación e capacitación en TIC baseadas en soportes, equipamentos, tecnoloxías e software adaptados, co “propósito de facilitar a busca de emprego e poder acceder ao mercado laboral”. Para isto, desenvolvéronse 5 obradoiros grupais explicativos (encamiñando aos participantes na busca dunha actividade laboral) nos que participaron 102 persoas do programa; xestionáronse 33 prácticas en empresas; impartíronse obradoiros sobre novas tecnoloxías nos que participaron 105 persoas; asesorouse na elaboración do curriculum 2.0 ou audiovisual dende a preparación do guión ata a presentación e gravación; impartíronse 11 círculos de emprego (compartindo experiencias e estratexias seguidas durante a busca de emprego) e, por último, impartiuse formación para explicar as ferramentas ou aplicacións móbiles que existen especializadas na busca de emprego e que se poden descargar nun smartphone.

Por outra banda, visitáronse 176 empresas novas, fíxose seguimento a 243 firmas coas que xa se mantén o contacto. Finalmente, abríronse un total de 427 ofertas de emprego.