main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

19/09/201709:24
O conselleiro de Política Social, José Manuel Rey Varela, e ol reitor da Universidade de Santiago de Compostela, Juan Manuel Viaño Rey, firmaron un convenio de cooperación.
Santiago de Compostela

A Xunta de Galicia impulsa a formación das persoas maiores de 50 anos a través da Universidade de Santiago de Compostela

  • O conselleiro José Manuel Rey Varela asinou hoxe o convenio de cooperación coa institución académica
  • A Administración autonómica investirá no IV Ciclo Universitario un orzamento de 27.500 euros
  • Ofrece materias como historia de Galicia, bioloxía humana, literatura española, historia da menciña e da ciencia, xeografía de Galicia, patrimonio documental ou informática entre outras

 

O conselleiro de Política Social, José Manuel Rey Varela, e o reitor da Universidade de Santiago de Compostela, Juan Manuel Viaño Rey, asinaron hoxe un convenio de cooperación para o financiamento do IV Ciclo Universitario como vía para impulsar as actividades educativas, culturais e formativas que faciliten ás persoas maiores o seu desenvolvemento persoal e social. No acto de sinatura, celebrado en San Caetano, tamén estivo presente a directora xeral de Maiores e Persoas con Discapacidade, Fabiola García Martínez.

O programa universitario de maiores da USC é unha vía de formación dirixida a persoas maiores de 50 anos que busca a integración conceptual do programa nos demais ciclos que se imparten dentro desta institución educativa. O IV Ciclo Universitario ofrece materias como historia de Galicia, bioloxía humana, literatura española, historia da menciña e da ciencia, xeografía de Galicia, patrimonio documental ou informática entre outras. Para a implantación deste IV Ciclo, a Consellería de Política Social investirá 27.500 euros.

A Administración autonómica valora de xeito positivo esta colaboración, destacando a importancia de que as persoas maiores galegas teñan a oportunidade de formarse e seguir aprendendo de maneira activa e participativa.

O convenio terá vixencia ata o 31 de decembro de 2017, non obstante, financiaranse os gastos realizados desde o 1 de xaneiro do presente exercicio.

19/09/201709:17
Gigas Solidarios de Orange e Aldeas Infantís.
Santiago de Compostela

Orange ofrece conexión a Internet gratis a familias con escasos recursos

  • O programa ‘Gigas Solidarios' de Orange, que se desenvolve en colaboración con Aldeas Infantís SOS, beneficia a familias en situación de especial vulnerabilidade que teñan fillos escolarizados menores de 18 anos para que gocen de acceso a Internet gratuíto nos seus fogares

En liña coa súa vontade de estender todos os beneficios da revolución dixital a cada vez máis persoas Orange lanzará en outubro o programa Gigas Solidarios. O obxectivo desta iniciativa é dotar de conexión a Internet gratuíta durante un ano a familias que se atopen en situación de vulnerabilidade socioeconómica e que conten con fillos escolarizados menores de 18 anos.

O proxecto comezará a partir de outubro incorporando a 500 familias e espérase que, a través da colaboración dos clientes de Orange e o seu apoio á iniciativa cos megas non consumidos da súa tarifa a final de mes, que se traducirá en axuda a máis familias, póidase chegar ata 1.000 familias ao longo deste curso escolar.

O programa Gigas Solidarios desenvólvese en colaboración con Aldeas Infantís SOS, entidade encargada da selección das familias, priorizando en base a criterios de urxencia social e especial vulnerabilidade, e de facer o seguimento do progreso da iniciativa a través dos seus centros de día repartidos por varias provincias españolas.

As familias participantes neste programa beneficiaranse de:

  • 12 meses de servizo gratuíto “4G na casa”, que actualmente inclúe 50 GB mensuais para navegación ultrarrápida 4G+.
  • Entrega, en réxime de cesión gratuíta, dun Router Wifi 4G Huawei B310 4G
  • Entrega, en réxime de cesión gratuíta, dunha Tablet 10” Wifi Lenovo Miix 320, equipada con teclado+Windows+ Office Mobile.
  • Sesión de formación “Educar para protexer”, para ofrecer ás familias información sobre o uso seguro e responsable das tecnoloxías.

Orange ten un compromiso total con esta iniciativa na que están involucrados tanto a propia empresa, como os seus empregados, que poderán exercer de voluntarios para realizar as entregas dos equipamentos e axudarán aos clientes á primeira posta en marcha e configuración dos equipos, así como serán os encargados da formación sobre o seu uso.

Gigas Solidarios conxuga plenamente coa aposta de Orange pola educación dixital como unha das áreas estratéxicas clave da súa Responsabilidade Social Corporativa. Neste contexto, o uso responsable das tecnoloxías por un colectivo tan sensible como é o dos nenos e adolescentes é un campo no que Orange leva traballando desde fai xa máis de 10 anos, especialmente nos temas de prevención e sensibilización. Con iniciativas como, por exemplo, o portal Navega Seguro, a plataforma EducaInternet ou as charlas que sobre o uso responsable das tecnoloxías realizan empregados de Orange en colexios e que xa chegaron a máis de 18.000 escolares.

19/09/201709:02
Coruña Bloggers.
A Coruña

Ábrese a inscrición para a vindeira edición de Coruña Bloggers

O encontro Coruña Bloggers despediuse antes do verán coa celebración do seu primeiro aniversario, saldando as súas primeiras 10 edicións cun total de 1.751 quilogramos de alimentos recollidos para a Cociña Económica, e agora anuncian o inicio dunha nova tempada na que pretenden superar as 2 toneladas de alimentos recollidos neste evento solidario aberto a calquera interesado no mundo tecnolóxico, non sendo unha actividade exclusiva para blogueiros, e pregándose aos asistentes a inscribirse previamente e acudir cun mínimo de 1 quilo de alimentos non perecedoiros a xeito de contribución para os máis desfavorecidos da cidade herculina.

XI edición de Coruña Bloggers terá lugar o vindeiro 27 de setembro ás 19:30 horas na Fundación Barrié da Coruña, sendo desta volta os relatores que compartirán os seus coñecementos cos asistentes Óscar Domínguez, fundador de DesarrolloSEO, e Javier Varela, community manager experto en posicionamento en redes sociais.

Domínguez impartirá unha charla titulada A Importancia do SEO, na que explicará a importancia para empresarios, blogueiros... de estar ben posicionados, ter presenza en buscadores, unha imaxe destacada e facer visible os negocios a ollos dos usuarios da Internet; mentres que Varela, comentará as mentiras na Rede nos momentos nos que se produce unha emerxencia, polo que dará consellos para facer un bo uso das redes sociais durante unha emerxencia como os recentes atentados de Barcelona.

19/09/201708:54
Richard Stallman.
Santiago de Compostela

Richard Stallman, un dos pratos fortes da Galicia Maker Faire

O monte Gaiás de Santiago, emprazamento da Cidade da Cultura de Galicia, será no mes de novembro o gran referente do movemento argalleiro e auto-desenvolvedor. Ou sexa, do colectivo Maker, ou, o que o é o mesmo: a gran fronte internacional de xente que se xunta para botaren abaixo os límites da creación tecnolóxica de cada quen, individuais, colectivos, reais ou imaxinarios. Esta gran fronte, que ten cada vez máis adeptos e seareiros na nosa terra, ten unha cita a marcar no calendario os días 24, 25 e 26 de novembro, a Galicia Maker Faire de Santiago. Como era de agardar, tratándose como se trata o movemento Makerdunha gran casa integradora, con portas e xanelas abertas, todas e todos estamos convidados. Entre os puntos fortes do programa figura un que vimos de coñecer: a presenza na quedada de Richard Stallman, o creador do movemento do software libre a nivel mundial. 

Stallman, que ofrecerá unha charla no evento, é unha das figuras máis sobranceiras do movemento do software libre a nivel mundial, coñecido por ter creado en 1984 o sistema operativo GNU, actualmente GNU/LINUX, a primeira alternativa aos principais sistemas de software privativo: Windows e MacOs. Entre os seus principais cometidos cómpre salientar o de acadar, a través da súa fundación Free Software Foundation, unha meirande concienciación entre os gobernos para que empreguen programas abertos tanto a nivel de xestión e uso cotián como nas escolas públicas. Segundo informa a organización, amais da charla de Richard Stallman, o programa achegará unha manchea de actividades de divulgación e lecer orientadas a tódolos públicos e disciplinas: obradoiros de innovación e creatividade, campionatos de drones, robótica, actuacións interactivas e moito máis. A día de hoxe fica aberta a convocatoria para todo aquel que queira participar nesta vindeira edición, tanto na categoría de Maker como de Minimaker (proxectos infantís). O prazo de inscrición remata o 15 de outubro. 

O evento vén da man de Enrique Saavedra e Matilde Rodríguez, do Concello de Santiago (Concellería de Igualdade, Desenvolvemento Económico e Turismo) e da Fundación Cidade da Cultura de Galicia. 

Na presentación da feira, celebrada o pasado mes de maio, fíxose saber que durante as edicións de 2015 e 2016 acudiron máis de 24.000 asistentes e máis de 300 makers dando conta dos seus enxeños, converténdose “en punto de encontro dos mellores creadores da Comunidade e axudando a potenciar unha Galicia máis innovadora e colaborativa”, explicouse. 

Nesta nova edición, ademais, puxéronse en xogo unha serie de novidades. Por exemplo o cambio de emprazamento, que pasa a ser a Cidade da Cultura, con todo o que de visibilidade e amplitude implica o troco de localización. Ademais, a feira terá un día máis de actividade, o venres 24 de novembro, que se reservará para o sector profesional, “favorecendo que os expositores poidan dirixir dun xeito máis óptimo a súa oferta de produtos e servizos, diversificándose en función do diferente público obxectivo”. A fin de semana do 25 e 26 manterase para o público xeral.

 

A cousa Maker
O movemento Maker é a cultura de “fágao vostede mesmo”, “Do it Yourself” en inglés. O termo Maker é unha palabra acuñada por Dale Dougherty, fundador en 2005 da revistaMake, que lle dá nome ó que se levaba facendo dende anos antes nos hackerspaces e fablabs: milleiros de artistas, enxeñeiros, programadores, autodidactas e seareiros dos programas libres de todo o mundo compartindo ideas, experiencias e proxectos, creando unha nova cultura baseada na colaboración e libre acceso á tecnoloxía.

19/09/201708:48
Entrada á Casa da Mocidade en Allariz.
Allariz

Allariz achéganos aos segredos da animación en 3D

Allariz presentou onte un programa formativo que inclúe, entre outras cousas, un vieiro directo cara as novas tecnoloxías ao servizo do audiovisual, máis polo miúdo cara ao eido da animación en 3D. O Curso de introdución ao desenvolvemento de películas de debuxos animados vaise desenvolver dende outubro deste ano a xullo do ano vindeiro. As materias a impartir artéllanse en dous bloques, un de contidos prácticos (3D) e outro de teóricos. Celebrarase na Casa da Mocidade de Allariz.

O primeiro dos bloques abordará cuestións como a interface, o modelado (técnicas, mallas e curvas, modelado de textos), cámaras e iluminación, texturas e materiais, modelado de personaxes, animación (claves e liña de tempo, editores, animación de obxectos, de personaxes e de FX) e composición. O bloque teórico introducirá aos participantes en procesos de produción, pre-produción (linguaxe cinematográfica, ideas para o guión, storyboard), creación de personaxes (anatomía, estereotipos, poses e siluetas, liñas de acción), teoría da animación (técnicas, os principios da animación, as leis físicas aplicadas, tempo e ritmo, animación facial, locomoción) e elaboración de proxectos de animación (mercados e festivas, axudas á produción). 

As persoas que estean interesadas en asistir ao obradoiro deberán chamar ao 615 395 871 ou ben enviar un correo electrónico a animacion3d@allariz.com.

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS