Novas | Faite dixital

11/12/201710:16

Madrid

A canle formativa de FundaciE ofrece un curso online sobre móbiles accesibles para todos

O curso MOOC arrincou o 7 de decembro na UNED Aberta e é gratuíto

A canle formativa de cursos online da Fundación ONCE, posto en marcha en colaboración co Real Padroado sobre Discapacidade, ofrece a partir do 7 de decembro, un novo Curso MOOC (Massive Online Open Courses) sobre a accesibilidade dos teléfonos móbiles para persoas con visión reducida.

O curso, gratuíto e de dúas semanas de duración, pretende dotar aos alumnos de coñecementos, competencias e habilidades sobre a accesibilidade dos teléfonos móbiles para que poidan comprender as principais dificultades que teñen os usuarios con discapacidade, neste caso visual, á hora de utilizalos, e, desde esta perspectiva, dotalos de ferramentas para entender a importancia de que a tecnoloxía sexa inclusiva. E é que, segundo explican os organizadores deste curso, a oferta de teléfonos móbiles existente no mercado é moi diversa. Estes dispositivos ofrecen unha variada gama de prestacións e servizos que, aínda que poden ser moi beneficiosos, non sempre son accesibles para persoas con discapacidade. Así, aspectos como o tamaño reducido da interface, as teclas e os elementos poden afectar a usuarios con dificultades visuais ou de manipulación. Pola súa banda, é posible que as persoas con perda auditiva teñan problemas para utilizar os servizos sonoros como as chamadas telefónicas ou o contido audiovisual, e aquelas con dificultades de comprensión poden non comprender o contido ou non aprender con facilidade a utilizar estes dispositivos. Para lograr que os alumnos entendan esta problemática, o curso conta con seis módulos formativos que inclúen vídeos, textos, test de autoevaluación, exercicios prácticos e ata un foro de atención docente. Ofrece temas como os titulados ‘Sociedade da información, para todos?', ‘Accesibilidade e usabilidade TIC', ou ‘Funcións de accesibilidade dispoñibles para usuarios con visión limitada', entre outros.

Esta formación está dirixida a persoas con discapacidade e as súas familias e asociacións; fabricantes de terminais de comunicacións móbiles e de operadores de comunicacións móbiles, especialmente a quen se dedica á comercialización e ao márketing; empresas e organizacións que contan con persoas con discapacidade entre os seus membros e, en xeral, a todos os que desexan contribuír e fomentar a inclusión nas TIC.

O equipo docente deste novo curso está formado por Natalí González, doutora en Comunicación pola Universidade Complutense de Madrid; David Zanoletty, enxeñeiro informático pola Universidade de Sevilla que tamén cursou o Máster en Enxeñería do Coñecemento pola Universidade Politécnica de Madrid, e Alejandro Rodríguez, doutor enxeñeiro de Telecomunicación pola Universidade Politécnica de Madrid.

O curso comezou o xoves 7 de decembro de 2017 e contará con atención tutorial ata o día 21 do mesmo mes. Permanecerá aberto ata o 8 de abril de 2018.

A canle formativa de cursos online da Fundación ONCE estreouse o pasado ano e o seu obxectivo é abordar en primeira persoa o concepto de accesibilidade universal e a necesidade de incluír criterios de deseño para todos nos distintos proxectos. A súa posta en marcha enmárcase no convenio que manteñen a Fundación ONCE e o Real Padroado sobre Discapacidade e conta co apoio da Universidade Nacional de Educación a Distancia (UNED). Accesible a través de UNED Aberta, a canle incorpora recursos educativos abertos, gratuítos, de calidade e accesibles para todos. O estudante obtén, ademais, o recoñecemento ou acreditación polos méritos conseguidos.

Máis información na seguinte ligazón: Curso en liña "Móbiles accesibles para todos UNED e Fundación ONCE".

Amosar

11/12/201710:09

Madrid

‘Como xestionar aos meus voluntarios sen custo e sen morrer no intento'

Trátase dun almorzo informativo, que será o día 13 de decembro, ás 9:30 horas, no LOOM House Madrid - Real Fábrica de Tapices (Rúa Vandergoten, 1)

A startup Fusion Collective Intelligence, especializada en desenvolvementos dixitais de intelixencia colectiva, organiza o almorzo informativo ‘Ccomo xestionar aos meus voluntarios sen custo e sen morrer no intento', que terá lugar o mércores 13 de decembro ás 9:30 horas en LOOM House Madrid, espazo de innovación colaborativa situado nas instalacións da Real Fábrica de Tapices (Rúa Vandergoten, 1).

O encontro está dirixido a ONG que colaboran habitualmente cunha rede de voluntarios para levar a cabo os seus proxectos, que están abertas a ampliala con novas incorporacións para poder obter un maior impacto social, e que necesitan unha ferramenta alcanzable para coordinar a esa rede de forma áxil, sinxela e eficaz.

Segundo os datos da Plataforma do Voluntariado de España, só o 8% da poboación española maior de 14 anos realiza actualmente algunha actividade de voluntariado. Con todo, o 51,6% das persoas entre 18 e 44 anos móstrase interesado en participar nalgunha causa social, pero non ten tempo para dedicarse a iso de forma continuada e non sempre sabe onde informarse.

Durante o almorzo darase a coñecer Welever, unha innovadora ferramenta gratuíta que resolve as necesidades de xestión das organizacións e que lles permite ampliar a súa rede de voluntarios. Pola súa banda, ás persoas con vocación solidaria ofrécelles a posibilidade de consultar, a través do móbil e de forma xeolocalizada, que iniciativas activas teñen na súa contorna para inscribirse nas que resulten do seu interese e se adapten á súa dispoñibilidade e ás súas habilidades e destrezas.

Jose Almansa, presidente e fundador, e Beatriz Sánchez Guitián, CEO de Welever, presentarán ás ONG asistentes os servizos de valor engadido desta ferramenta, que democratiza a acción social e simplifica a xestión do voluntariado. Tamén contará coa participación de Elena Urízar, experta facilitadora en Visual Thinking.

A asistencia é gratuíta e as prazas son limitadas: Formulario de inscrición na Web de Eventbrite.

Máis información na Web de WELEVER.

Amosar

11/12/201709:17

Santiago de Compostela

O portal da Xunta conta cunha nova canle de axuda para facilitar o uso dos principais servizos da Administración electrónica

Está dispoñible no espazo eServizos da web e ofrece asistencia en liña, manuais de uso e avisos sobre a sede electrónica, Chave365, notifica.gal e a sala de sinaturas
O portal da Administración recibe máis de 6 millóns visitas ao ano, máis dun 18% xa proceden de redes sociais e un 43% realízanse desde dispositivos móbiles
Increméntase o uso dos servizos en mobilidade con 28 apps dispoñibles, que acumulan máis de 650.000 descargas

O portal da Xunta vén de activar o soporte técnico eServizos para axudar aos cidadáns nas súas xestións online a través da sede electrónica e no uso de Chave 365, notifica.gal e a sala de sinaturas. Está dispoñible a través do espazo eServizos de xunta.gal (https://www.xunta.gal/eservizos) e ofrece asistencia en liña, guiando a usuario en función das súas dúbidas; manuais de axudas e respostas a preguntas frecuentes, así como avisos en caso de interrupción destes catro servizos da Administración electrónica.

Cómpre lembrar que a sede electrónica da Xunta facilita a cidadáns e empresas ata 1.400 xestións online coa Administración. O Servizo Chave 365 simplifica o acceso á sede electrónica a través dunhas claves no móbil do usuario, evitando así o uso de certificados dixitais. O sistema de notificacións electrónicas da Xunta envía ao móbil ou ao correo electrónico do usuario o aviso de que ten unha notificación da Administración e a sala de sinaturas permite asinar documentos online.

Con este nova canle de axuda online búscase facilitar o uso destes servizos dixitais, cuxa porta de entrada é xunta.gal. O portal autonómico ten unha media anual de 6 millóns de visitas, das que máis do 18% proceden xa de redes sociais e máis dun 43% se realizan a través de dispositivos móbiles.

Presencia da Administración na Rede

Actualmente, o catálogo de portais e redes sociais da Xunta suma a día de hoxe 250 sitios web e 287 canles en redes sociais, que contan con máis de 1,3 millóns de seguidores.

O reforzo da presenza da Administración autonómica en Internet forma parte da estratexia da transformación dixital que vén desenvolvendo a Xunta a través do Plan de Administración e Goberno Dixital, impulsado pola Axencia para a Modernización Tecnoloxica de Galicia (Amtega). Esta liña de actuación plasmouse na reorganización, simplificación e renovación da rede e portais baixo uns criterios de homoxeneidade e no impulso da presenza en redes sociais.

Apps e reutilización da información do sector público

Para dar resposta ao incremento de servizos en mobilidade impulsouse a publicación de aplicacións para dispositivos móbiles. Actualmente, son 28 as apps da Xunta, acumulan más de 650.000 descargas e abranguen servizos para demandantes de emprego (Mobem), para o ámbito educativo (abalarMóbil), para a mocidade (Carné Xove), relacionadas coa meteoroloxía (Meteogalicia, MeteoRoute), coa pesca (Non piques-Non peques), co turismo (Enoturismo, Sendegal, Turismo de Galicia, Bono Iacobus), e coas TIC na empresa (aplicación do Centro Demostrador TIC, CDTIC).

Fomentar a reutilización de información do sector público por parte de terceiros é outra das liñas de actuación do Plan de Goberno Dixital. O portal Abert@s ofrece 350 conxuntos de datos en formatos abertos que no que levamos de ano rexistrou máis de máis de 39.000 descargas.

Amosar

06/12/201710:53

Papá Noel por videoconferencia nunha aula CeMIT.

Santiago de Compostela

A Rede CeMIT conectará a preto de 1.600 nenos e nenas de toda Galicia con Papá Noel a través de videoconferencia

Alumnado de entre 3 e 7 anos de 34 concellos das catro provincias participarán nesta actividade entre os días 11 e 21 de decembro
Por décimo ano consecutivo a Rede CeMIT dará soporte técnico á conexión con Laponia

Entre os días 11 e 21 de decembro preto de 1.600 alumnos de educación infantil de 32 concellos de Galicia poderán realizar as súas peticións de Nadal a Papá Noel grazas á rede de videoconferencia das aulas CeMIT, presentes en todas as comarcas galegas.

Os escolares de Educación Infantil de Betanzos, Celanova e Barreiros serán os primeiros que reciban esta visita nas aulas CeMIT destes concellos. Este intercambio de mensaxes comezará o luns 11 de decembro a partir das 11 da mañá, cunha duración de media hora en cada aula.

Por toda Galicia

Nos seguintes días, ata o 21 de decembro inclusive, conectarán con Laponia as aulas CeMIT de Abegondo, Bande, Beariz, Boiro, Burela, A Cañiza, Carballedo, Castro Caldelas, Catoira, Cerceda, Ferrol, Fisterra, A Fonsagrada, Leiro, Marín. Muros, Ourense, Ortigueira, Oroso, Pontedeume, As Pontes, Quiroga, Ribeira, Santa Comba, Sarreaus, Valga, O Vicedo, Vilagarcía, Vimianzo e Xunqueira de Ambía, ata completar así as 32 localidades que recibirán a visita virtual do noso Papá Noel.

Ademais dos alumnos de educación infantil dos diferentes colexios de Galicia, tamén terán a posibilidade de solicitar en directo os seus agasallos a Papá Noel o alumnado do Centro Pai Menni de persoas con discapacidade de Betanzos e as persoas con trastorno do espectro autista da Asociación Bata de Vilagarcía de Arousa

O obxectivo desta actividade, que neste ano cumpre o seu décimo aniversario, é facilitar a comunicación entre Papá Noel e os nenos e nenas destas localidades, que poderán falar e interactuar con el poucos días antes da Noiteboa.

Con este tipo de experiencias, a Rede CeMIT da Xunta de Galicia busca converter estas aulas multimedia en puntos de encontro dos municipios e dar a coñecer todas as posibilidades que ofrece este tipo de espazos de comunicación e a tecnoloxía da que dispoñen.

A Rede CeMIT

A Rede CeMIT (Rede de Centros para a Modernización e a Inclusión Tecnolóxica), está integrada por 98 aulas, presentes en 92 concellos e 53 comarcas co obxectivo de promover o uso das novas tecnoloxías entre a poboación, con especial atención aos colectivos máis afectados pola fenda dixital, fomentar a formación dixital entre os profesionais galegos e mostrar á pemes e micropemes as vantaxes da sociedade da información.

Ademais do Plan de Formación, a Rede CeMIT desenvolve campañas de sensibilización e divulgación da importancia e beneficios das TIC entre a cidadanía, empresas e outros colectivos coa organización de charlas e conferencias. Paralelamente, a maioría dos centros da Rede contan co servizo de “aula aberta”, que posibilita o acceso libre e de balde dos usuarios á utilización do equipamento co apoio e asesoramento dun axente especializado.

A listaxe completa e a localización das aulas CeMIT poden ser consultados en http://cemit.xunta.es/centros.

*Xúntase cadro cos horarios de conexión de cada aula

LUNS
11 DECEMBRO