main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

09/05/201708:03
Participantes de "Teño unha horta en San Sadurniño".
Carballo

O humor e a innovación, nexos comúns das webseries gañadoras do Carballo Interplay

Tal e como se agardaba, a cuarta edición do Festival de Contidos Dixitais Carballo Interplay resultou ser un éxito, pola calidade e a cantidade das obras presentadas, polo público convocado e, tamén, pola importante contribución galega na sección oficial. O certame, que se desenvolveu ao longo de tres días na vila coruñesa, foi ante todo un evento creativo e participativo onde primou, ante todo, a arela de divertir e achegar lecer de calidade. De feito, as comedias foron sen dúbida as protagonistas do palmarés. Outro dos puntos salientables desta edición foi o seu carácter de festival de todas e todos: recibiu máis de 140 propostas de todo o mundo.

Respecto das webseries gañadoras, Pesame Street gañou dous galardóns, o de animación e o do público, coa súa resposta á pregunta: Que nos dirían os animais se puidesen falar? Mentres, A todo riesgo acadou os premios de mellor webserie de imaxe real e o de mellor actor, para Miguel Lago Casal. Esta última achega conta a historia de Pedro Germán e Max, que sempre soñaron con ser inspectores de homicidios pero que só conseguiron un traballo como peritos de seguros.

Na categoría de mellor webserie de imaxe real, o xurado integrado polo guionista Rubén Ontiveros, pola guionista e creadora de contidos Isa Calderón, polo director Javi Camino e máis por Javier Trigales (en representación da Asociación Galega de Guionistas) e Giselle Llanio (en representación da Asociación de Directores e Realizadores de Galicia) quixo facer tamén unha mención especial para Te quiero, yo tampoco, unha comedia documental que retrata a relación do director, Miguel Bosch, coa súa parella, Fran.

No que se refire ás importantes contribucións das creadoras e creadores da nosa terra, Teño unha horta en San Sadurniño, conseguiu o galardón de mellor webserie en versión orixinal en galego. Como lembraremos, trátase dun proxecto xurdido para compartir o coñecemento das mulleres maiores do rural galego en relación cos traballos no campo.

Por outra banda, a comedia israelita You''re the next conquistou o premio á mellor webserieinternacional coa súa historia de cinco mulleres na trintena “buscando o seu camiño na vida”. O xurado fixo tamén unha mención especial para a arxentina Si me volviera a enamorar, que se centra no vencello de amizade de tres adultos de arredor de corenta e cinco anos.

A segunda tempada da comedia política El partido, que segundo recorda a organización do Interplay conquistara o ano pasado o premio á mellor webserie de imaxe real, acadou nesta edición o premio CREA á mellor dirección para Álex Rodrigo. Mentres, Hilario Abad e José Luis Bustillo conseguiron o premio AGAG ao mellor guión polo seu traballo en Caniville, que narra as aventuras e desventuras dunha manda de cans. Finalmente, Teresa Cuesta fíxose co premio á mellor actriz polo seu papel en El show de Teresa Cuesta.

Hai vida en Bran?, mellor proxecto de webserie en galego

O xurado composto por Mafalda González-Alegre, de Flooxer; David Sainz, da produtora Diffferent Entertanment; Xosé Regueira, concelleiro de Promoción Económica de Carballo; e Sonia Méndez, directora do Carballo Interplay, decidiron outorgar o premio ao mellor proxecto de webserie en galego, dotado con 1.500 euros para a produción dos tres primeiros capítulos, a Hai vida en Bran?, creada e protagonizada por Ángela Andrada. Trátase, en palabras dos integrantes do xurado, “dunha webserie que conta a vida de Mariña, unha moza licenciada en belas artes que volve á pequena vila de Bran despois de intentar, sen éxito, abrirse camiño no mundo do cómic”. E engadiron: “É unha comedia con pequenas tinturas dramáticas que retrata a Xeración Xabarín, os mozos de soños rotos, criados enfronte dun televisor, aos que se lles prometeu que chegarían lonxe e que agora se atopan cun futuro incerto; trátase pois dun proxecto que quere cambiar o rumbo do audiovisual rompendo estereotipos".

08/05/201710:34
Robot mBot de Makeblock.
Santiago de Compostela

BQ únese ao fabricante de robótica Makeblock para elaborar 'kits' de programación para nenos

A empresa española de tecnoloxía BQ asinou un acordo con Makeblock España, unha empresa de robótica 'open source', para integrar os seus robots en Bitbloq, unha plataforma de programación por bloques. O obxectivo deste acordo é potenciar o uso da tecnoloxía nas aulas españolas, especialmente entre os nenos, segundo explicou BQ a través dun comunicado.

Bitbloq é unha ferramenta de programación que se utiliza en máis de 75 países, sendo a máis común do seu tipo en España. Con ela, o neno non programa escribindo código, senón que encaixa bloques coma se fose un quebracabezas. Presenta unha formulación STEAM, integrando ciencia, tecnoloxía, enxeñería, arte e matemáticas

A plataforma é compatible con calquera robot baseado en Arduino, polo que se pode utilizar nos robots de Makeblock. Grazas a este acordo, non será necesario configurar manualmente os 'kits' de Makeblock e poderá empezarse a programalos nada máis sacalo da caixa.

Os principais obxectivos deste tipo de ferramenta márcanse en ensinar tecnoloxía aos nenos así como en fomentar as vocacións técnicas e científicas. "A robótica e a programación teñen un impacto moi positivo na creatividade dos máis pequenos, por iso queremos que calquera neno con calquera robot poida utilizala", afirmou Alberto Valero, director de BQ Educación.

08/05/201708:52
Community Manager.
Lugo

A Deputación de Lugo quere formar a desempregados da provincia en xestión de comunidades dixitais

A Deputación de Lugo vén de acordar propoñer á Xunta de Galicia a celebración de dúas accións formativas remuneradas para un total de 32 desempregados lucenses, co fin de facilitar a súa inserción laboral. Ambas as dúas accións están dirixidas a mozos menores de 25 anos, ou de 30 nos casos de persoas con capacidades diferentes. Ademais, explicou a entidade que preside Darío Campos, ofrecerán 970 horas de formación, remunerada cuns 700 euros. Estas accións contan tamén co certificado de profesionalidade correspondente.

O primeiro dos obradoiros é Interconectando co terceiro sector, co que se busca crear unha intranet dirixida ás entidades sen ánimo de lucro (terceiro sector) e á Deputación de Lugo para establecer unha nova canle de comunicación telemática. Esta acción inclúe tamén un módulo de xestor de comunidades dixitais (community manager) ou de xestor de redes sociais (social media manager) co que os participantes afonden en novas estratexias de comunicación en liña.

O segundo obradoiro é Oriéntate e coñece Europa, que se dirixe a pór en marcha unha nova plataforma online que facilite entre a cidadanía a procura de emprego. Nela, informou a Deputación, xuntaranse todos os recursos necesarios para a devandita tarefa, como poden ser modelos de currículo, cartas de presentación, como preparar unha entrevista de traballo, ligazóns a páxinas de recursos humanos, portais de emprego, estudos do mercado de traballo ou programas europeos relacionados con emprego. Posteriormente, esta plataforma será incorporada á web provincial www.deputacionlugo.gal; así como a dos concellos que o desexen.

05/05/201708:53
Entrega de diplomas en Narón.
Narón

Narón entregou os diplomas dos participantes nos obradoiros TIC de 2017

O Concello de Narón entregou a semana pasada unha manchea de acreditacións de estudos TIC entre a súa cidadanía. Foron, en total, 86 diplomas correspondentes a tres accións formativas para desempregados impulsadas en 2016 coa Administración autonómica e seis da Aula CeMIT, promovidas dende o Concello este mesmo ano (46 diplomas). Na entrega de acreditacións participaron o alcalde de Narón, José Manuel Blanco, e a concelleira de Formación e Novas Tecnoloxías, Natalia Hermida, que deron os parabéns a todas as persoas participantes nos nove obradoiros. Estes abrangueron, na súa totalidade, máis de dúas mil horas de formación. A edil anunciou que a previsión ao longo deste 2017 é impartir unhas 6.000 horas de contidos a través de diversas convocatorias promovidas desde o consistorio (algunhas das cales abriranse os vindeiros días).

Os cursos da Aula CeMIT de Xuvia (400 horas de formación nos últimos dous meses) foron os seguintes: Xestión Empresarial Básica (200 horas e sete participantes), Mellora da Empregabilidade en Internet (30 horas e oito participantes); Mercadotecnia dixital KPIs (50 horas e nove persoas inscritas); Alfabetización dixital, deseño de currículo e procura de emprego (100 horas e dez alumnos); Posicionamento en Internet e indicadores de xestión (24 horas e catro participantes) e Creación e dinamización da túa web (24 horas e oito asistentes). No referente ás Accións Formativas para Desempregados (ADF) entregáronse un total de corenta diplomas. Dos mesmos, trece correspóndense coas persoas que remataron o curso de Atención sociosanitaria a persoas no domicilio (628 horas); catorce coas de Atención sociosanitaria a persoas dependentes en institucións sociais (478 horas) e trece co de Montaxe de mobles e elementos de carpintería (478 horas).

05/05/201708:49
Logo Technium Lan Party.
Ourense

En marcha no Campus de Ourense a Technium Lan Party

Onte comezou a quedada informática do Campus de Ourense, a xuntanza Technium Lan Party, que se vai desenvolver até o domingo 7 de maio e que este venres vai coller pulo con diferentes actos oficiais e actividades de lecer, divulgativas e formativas.. O encontro TIC, que ten lugar no Pavillón de Deportes do Campus, vén da man da Asociación Sectorial de Estudantes de Enxeñaría Informática coa colaboración da Escola Superior de Enxeñaría Informática e da Vicerreitoría do Campus. A cita insírese desta volta na programación da ICC Week, punto de encontro das industrias culturais e creativas organizado pola Deputación Provincial de Ourense.

A Technium Lan Party é un grande encontro de lecer dixital que xunta centos de mozos e mozas cos seus ordenadores para compartir información e xogos e celebrar torneos e concursos. A actividade na quedada desenvolverase de xeito ininterrompido ao longo das 24 horas dos días de celebración, habilitándose zonas de descanso, de lecer e recreo con diferentes actividades. Respecto das achegas técnicas, as persoas que se acheguen cos seus ordenadores terán conexión de fibra óptica de altas prestacións, cunha zona interna de conexión a rede eléctrica e Internet. Por contidos, celebraranse torneos das principais prácticas deportivas en liña (eSports), por equipos e individuais, tanto en PC como nas distintas consolas, e máis de 4.000 euros en premios.

Blog Xente Dixital

Como aumentar a túa visibilidade en Instagram

Ven 30 Nov

Aínda que as redes sociais naceron orixinariamente para relacionarnos entre nós, é un lugar no que se pode sacar moito rédito empresarial se sabemos como explotalas de maneira adecuada para os nosos intereses. Instagram é unha das redes máis populares na actualidade, polo que estar...

LER MAIS

Tres alternativas gratuitas a YouTube para ver contidos orixinais

Mar 06 Nov

Cando falamos de creadores audiovisuais é habitual pensar en directores de cinema ou guionistas que levaron as súas obras a algún gran formato adaptado ao gran público. Pero con Internet o termo de creador audiovisual expandiuse, describindo tamén aos famosos  youtubers, que crean e...

LER MAIS

Un tipo de letra para recordar mellor o que les

Mar 09 Out

Ao ler algo que necesitamos memorizar, é habitual que poñamos o “piloto automático” e acabemos lendo todo sen realmente memorizar nada. É algo que ocorre a miúdo cando a lectura é obrigada e a única solución ata agora era poñer máis interese no que estamos a ler. E dicimos ata agora...

LER MAIS