A Consellería de Cultura, Educación e Ordenación Universitaria acaba de abrir o prazo para que os centros integrados neste curso escolar no Plan de mellora de bibliotecas escolares (Plambe) soliciten incorporarse ao proxecto Escornabots na biblioteca escolar, que ten como obxectivo estimular a iniciación do alumnado de infantil e primaria no campo da robótica e da linguaxe de programación. En total poderanse sumar á iniciativa 20 centros e os outros 20 centros que xa participan nela poderán solicitar a súa continuidade. O prazo para a tramitación estará aberto ata o vindeiro 27 de abril, e poderá realizarse a través do formulario dispoñible en liña.

A iniciativa enmárcase no Plan Lía 2016/20, que ten entre os seus desafíos avanzar nas alfabetizacións múltiples no marco da biblioteca escolar, así como reforzar o concepto daquelas como laboratorios creativos de aprendizaxes abertos a toda a comunidade educativa. Non en balde, a construción destes pequenos robots de hardware libre fomenta entre o alumnado o xogo, a creatividade, a investigación, a aprendizaxe manipulativa e mais o razoamento lóxico. Así mesmo, o proxecto conecta coa estratexia que a Xunta de Galicia está a desenvolver para promover as vocacións STEM (Ciencia, Tecnoloxía, Enxeñaría e Matemáticas). Neste sentido cómpre lembrar que nos centros de infantil e primaria se desenvolven os programas en colaboración co Colexio Profesional de Enxeñaría en Informática de Galicia, os programas Navega con Rumbo e Programación nas Escolas, co fin de axudar a mellorar as competencias dixitais dos estudantes así como a desenvolverse dun xeito máis seguro no ámbito tecnolóxico.

Xa no ensino secundario, impártense materias de libre configuración autonómica: Programación (para ESO) e Robótica (para bacharelato), nas que este curso 2016/17 hai un total de 4200 e 570 matriculados respectivamente. Os centros que confirmen a súa continuidade no programa obterán acceso aos medios necesarios para a dotación dun recuncho creativo e outras ferramentas necesarias para seguir avanzando no proxecto. Ademais, unha persoa representante da biblioteca poderá participar nunha xornada de formación presencial sobre aspectos relacionados coa biblioteca como laboratorio creativo de aprendizaxe e a cultura do facer na mesma.

No caso dos centros de nova incorporación, terán acceso aos materiais necesarios para a construción dun mínimo de catro Escornabots, en cada caso, así como a outros materiais necesarios para a posta en marcha da iniciativa. Así mesmo, un representante do equipo da biblioteca participará nunha xornada de formación semipresencial ao respecto.

Interplay Produccións e o Concello de Carballo, organizadores do Festival Interplay (cuarta edición) xunto coa Deputación da Coruña, veñen de dar a coñecer a cifra de producións que compiten na sección oficial do certame que se vai celebrar entre o 4 e o 6 de maio na vila coruñesa: até 35 webseries de todo o mundo á procura do máximo galardón. Así o fixeron saber este martes os organizadores do evento, lembrando que a contía de premios a repartir ascende até os 5.000 euros. Ademais, fixeron saber que as devanditas achegas para a sección oficial foron elixidas entre a cifra nada de desprezable de 146 propostas chegadas de todos os recantos do planeta. Das finalmente seleccionadas, cinco son galegas, 12 do resto do Estado e 18 do resto do mundo.

Entre as internacionais hai webseries de Alemaña, Australia, Arxentina, Canadá, Chile, Estados Unidos, Israel, Nova Zelandia, Reino Unido e Ucraína. Ademais, 30 delas competirán polo premio á mellor webserie de imaxe real e 5 ao de animación, 18 ao premio á mellor webserie internacional e 6 á de versión orixinal en galego.

Segundo informou a directora do certame carballés, Sonia Díaz, “o festival fornecerá unha completa panorámica do que se está a cocer no mundo das webseries a nivel global”, achegando novamente unha “presenza abafadora do humor e a comedia, con 25 das 35 producións finalistas encadradas neste xénero”, pero tamén interesantes obras dos máis diversos xéneros: drama, documental, thriller, etc. E, por suposto, un amplo abano de mesturas e experimentos formais e conceptuais, tan propios do sector máis atrevido e imaxinativo do audiovisual contemporáneo.

As webseries finalistas

• As finalistas galegas: Galicia Crime, Antolepsia, Dalle Jas! (2T), As aventuras de Po e Teño unha horta en San Sadurniño.
• As finalistas españolas: El show de Teresa Cuesta, Beto, Caniville, Cómo dejar los porros, Carlinos. La webserie, Judge Dredd: Superfiend. A todo riesgo, Lara Love, Pésame Street, Briget Jon de Triana, Te Quiero, yo tampoco e El Partido 2.
• As finalistas internacionais: Tube Heads, Midnight Miracle, AFK, Camila no tiene un plan, Boy Scauts, You’’re the next, Dang It To Heck!, Amy Street, Discocalypse, Si me volviera a enamorar, 5baksiv.net, Piscóticas inseguras, Waiting on Sound, Convos with my 2 years old, Behind The Blinds AKA Filmmaking 101, Psicosomática, Depto e The Dump / La Dump.

A Concellería de Xuventude de Vilagarcía está a argallar unha iniciativa para formar á veciñanza en novidades tecnolóxicas, poñendo en marcha un obradoiro que funcione, virtual e literalmente, coma un actualizador de coñecementos e habilidades. Trátase do obradoiro APPtualízate, destinado a persoas de entre 18 e 35 anos e entre cuxos eixos temáticos principais atópase o deseño e desenvolvemento de aplicacións móbiles. A razón disto? Segundo informa a Concellería, é un feito que está fóra de dúbida a demanda crecente arredor de profesionais con formación na construción de apps, sendo hoxe por hoxe un importante nicho laboral en fase de proxección.

O curso é de balde e os interesados poden inscribirse até o 28 de abril nas dependencias da Concellería de Xuventude (as prazas son limitadas). O obradoiro contará con 25 horas lectivas e impartirase durante 5 xornadas (os días 3, 4, 5, 11 e 12 de maio) en horario de 9 a 14 horas na aula CeMIT do centro de formación da rúa Matosinhos. As sesións correrán a cargo de monitores da Asociación Socioeducativa e Cultural O Núcleo.

Segundo engade o Concello, a través da iniciativa APPtualízate! o alumnado ampliará os seus coñecementos específicos no manexo de diferentes ferramentas informáticas moi utilizadas actualmente. Ademais, explican os organizadores do obradoiro, non será preciso contar con formación específica previa para poder asistir, “xa que o curso está dirixido a persoas con nivel básico de coñecementos informáticos”. Ademais, os contidos prácticos primarán sobre os teóricos.

A principal temática a abordar será como dixemos o deseño de aplicacións móbiles, aínda que tamén se tocará o tema de programación robótica, realidade virtual e aumentada e modelado e impresión 3D.

Para a realización deste curso en concreto, o departamento que dirixe Sonia Outón, solicitou unha subvención a través do Plan Concello 2017 da Deputación Provincial.

O Concello de Pontevedra presentou os días pasados os resultados dun estudo sobre os hábitos tecnolóxicos dos menores de idade: cousas como que redes sociais empregan, canto tempo están en liña, até que punto cren que marca os seus rumbos de vida o feito de estaren conectadas/os, etc. A enquisa foi elaborada ao abeiro do Plan municipal de prevención de condutas aditivas (PMPCA) da Concellería de Benestar Social, aproveitando o traballo que desempeña este departamento cos centros educativos locais. A base da pescuda foi un nutrido grupo de preto de tres milleiros de estudantes (alumando de 1º a 4º da ESO, de entre 12 e 17 anos). Entre as principais conclusións que se fornecen figura a seguinte: o 75,7% dos rapaces tiveron o seu primeiro móbil entre os 10 e os 13 anos, e o 85% conta con conexión a Internet. Ademais, a gran maioría deles empregan servizos como Whatsapp ou Instagram, malia que o uso das redes sociais polos menores de 14 anos non estea permitido en España. O estudo terá continuidade en setembro con novos datos sobre hábitos por sexo, idade e nivel de formación.

Segundo lembrou a concelleira de Benestar Social, Carme Fouces, o desenvolvemento das novas tecnoloxías e o seu espallamento provocou “un cambio nos costumes, hábitos e actitudes, sobre todo na poboación máis moza xa que naceu practicamente con estes avances”. Neste treito de idade, engadiu, xerouse unha pegada “espectacular”, xa que se modificaron as formas de vivir a nenez e a adolescencia e se abriu marxe para “dedicacións de tempo e con comportamentos moi diferentes aos dos adultos”. Esta situación, sinalou, ten claras potencialidades (desenvolvemento persoal, capacitación, acceso doado ao coñecemento e á comunicación) pero tamén pode achegar unha serie de riscos derivados dun mal uso das tecnoloxías e da falta de supervisión axeitada. Na súa opinión, “o problema xorde cando a tecnoloxía se converte nun fin e non nun medio, e aquí temos o agravante de que a adolescencia constitúe un grupo de risco xa que tende a buscar sensacións novas”. De aí abrolla o problema da adición ás novas tecnoloxías. Segundo indicou Carme Fouces existen unha serie de sinais de alarma para nos axudan a achar un posible caso de conduta aditiva en relación coas TIC. Cousas como privación do sono (co fin de estarmos conectados á Rede durante máis tempo), desleixo con respecto a outras actividades importantes (como a familia, as relacións sociais, o estudo, a saúde, etc), imposibilidade de “desconectar” mentalmente das novas tecnoloxías mesmo cando non se está conectado ou introducir hábitos de illamento con respecto á contorna social máis inmediata.

Resultados da enquisa
75,7% tiveron o seu primeiro móbil entre os 10 e os 13 anos 30,4% tiveron o seu primeiro móbil con 12 anos 85% teñen conexión a internet 25,4% conéctanse a internet entre 1 e 2 horas diarias 14,2% están conectados a internet todo o día 67,5% navegan por internet sen que os seus proxenitores lles poñan limitacións 24,9% entraron en páxinas con contidos eróticos nos últimos 12 meses 7,3% apostaron en xogos on line nos últimos 12 meses 35,6% contactaron con descoñecidos por internet nos últimos 12 meses (o 22,7% menores de 14 anos) 16,7% quedaron con persoas que coñeceran exclusivamente a través de internet nos últimos 12 meses 23,2% bastantes/moitas veces descoidan tarefas escolares ou renden menos en exames por contectarse a internet 26,1% bastantes/moitas veces tiveron a sensación de que si no se conectaban a internet estaban perdendo algo realmente interesante 14,8% bastantes/moitas veces conectáronse a internet aínda que sabían que lles ías a causar problemas. 17,1% bastantes/moitas veces dixeron ou fixeron cousas en internet que non farían ou dirían en persoaComo diciamos ao comezo, o estudo tamén lembra que en España a Lei de Protección de datos non permite aos menores de 14 anos acceder ás redes sociais, e aínda así: 93,3% usan Whatsapp (o 89,2% menores de 14 anos) 77,2% usan Instagram (o 68,4% menores de 14 anos) 54,7% usan Snapchat (o 42,7% menores de 14 anos) 51,2% usan Messenger (o 44,4% menores d e14 anos) 49,2% usan Facebook ( o 34,9% menores de 14 anos) 45,1% usan Twitter (o 27% menores de 14 anos) 31,8% usan Tuenti (o 14,6% menores de 14 anos).

O vindeiro 26 de abril a partires das 19:30 horas o salón de actos da Fundación Barrié acollerá a novena edición do encontro Coruña Bloggers, evento solidario que pretende contribuír á dinamización do mundo dos blogs mediante relatorios enriquecedores para os asistentes e co networking propio dos eventos presencias, o que axuda a dar visibilidade das iniciativas locais, facilitar a divulgación do coñecemento, tecer relacións entre entusiastas da comunicación en liña e, en definitiva, favorecer un ecosistema no que os interesados na publicación de contidos en liña poidan emprender arroupados por outras persoas con inquedanzas semellantes.

Os interesados en acudir xa poden rexistrarse para participar nesta actividade de balde, aínda que cómpre lembrar que prégase aos asistentes que acudan cun mínimo de 1 quilogramo de alimentos non perecedoiros para achegar á Cociña Económica, confiando con que nesta ocasión supérese a barreiro dos 1.000 quilos aportados dende o comezo desta iniciativa.

A primeira charla do Coruña Bloggers de abril recae no profesor universitario Eduardo Mosqueira, quen tamén ten un blog persoal de temas variados (fotografía, astronomía, informática, historia...) e falará de usabilidade a través dun método para probar e atopar erros de usuario que leven a mellorar o software para evitalos.

O segundo relatorio será cousa do xornalista Antonio Sangiao, un dos principais promotores de Coruña Bloggers, quen instruirá sobre Os 10 plugins de WordPress que debes ter instalados no teu blog, ou sexa, unha clase mestra sobre WordPress e os seus complementos.

Completarán a xornada o sorteo dun altofalante Bluetooth por cortesía de Opirata.com e unha sesión de networking nun local de hostalaría próximo.