• Investigadores coreanos desenvolveron un prototipo de lente intelixente que incorpora tecnoloxía pensada para mellorar a calidade de vida de persoas con discapacidade en múltiples facetas, como a saúde ou o lecer.

Trátase dunhas lentes que integran distintos sensores capaces de medir desde o movemento do ollo ata os sinais do cerebro mediante un electroencefalograma.

Estes sensores axudarían a mellorar a saúde do usuario adiantando problemas ou monitorando a súa evolución. Tamén incorpora tecnoloxía útil para detectar caídas ou para a detección rápida de ataques de epilepsia, por exemplo.

Pero a utilidade destas lentes non se limita á saúde, xa que, ademais, están pensadas para mellorar o lecer de persoas con discapacidade física utilizando o movemento dos ollos.

Segundo o texto publicado na revista da American Chemical Society (ACS), este prototipo está pensado para conectarse a outros sistemas e permitir manexar videoxogos.

Por agora, nas probas estes videoxogos limítanse a accións sinxelas como o movemento de obxectos dun lado a outro, pero o obxectivo é ir mellorando para facilitar a participación en videoxogos máis complexos.

Outra función que incorporan estas lentes, cuxa moldura está fabricada mediante unha impresora 3D, é a capacidade de cambiar a tonalidade do cristal en función de se lle chegan raios ultravioletas ou non, converténdose nunhas lentes de sol e axudando a protexer os ollos.