A situación de confinamento actual na que nos atopamos debido á crise do coronavirus está a incrementar a nosa preocupación sobre como seguir coa formación dos nosos fill@s ademais de buscar alternativas para enriquecer e ocupar o tempo de lecer en familia.

A tecnoloxía e o uso das TIC convértese así nunha ferramenta fundamental para o deseño e planificación do noso día a día en familia, achegando recursos tanto educativos como para desfrutar do tempo libre sen necesidade de saír da casa.

Así pois, para a planificación de ambas cousas debemos ter en conta, nun primeiro intre, o tempo de atención que os nosos nen@s nos van a proporcionar dependendo da súa idade. A continuación amosámosvos unha táboa que vos servirá como referencia á hora de distribuír o tempo para cada tarefa:

Tempo de atención media segundo a idade

Pode que neste intre, algúns esteades a pensar que o día se vos vai facer moi longo se tedes que deseñar actividades que duren poucos minutos pero, aínda que non está demais ter pensadas varias para realizar ao longo do día, non pasa nada porque cada certo tempo se repita algunha.

Ademais é incluso recomendable que tamén aprendan a aburrirse, posto que isto estimula a creatividade e o autocontrol.

Establece rutinas e hábitos diarios

Será de vital importancia ter claro que o noso presente e esta situación excepcional de confinamento fai necesariamente que as nosas rutinas de vida muden e isto pode afectar a todos os membros da familia. Por esta razón unha das opcións que vos propoñemos é a realización dunha xuntanza familiar que nos axude a tomar decisións e acordos conxuntos que faciliten o transcurso dos días.

Nesta reunión falaremos das novas rutinas que imos a formular, podemos incluso propoñer entre todas cales son as mellores, incluso establecer un horario para poder ser conscientes de que toca en cada momento evitando así o descontrol, pero a flexibilidade en todo é fundamental!

A continuación, facilitamos unha listaxe de tarefas a realizar compartido por Unicef, que debería estar presente no noso planning diario:

Ante esta situación na que moitos rapaces e as súas familias pasan máis tempo do habitual na casa é fundamental ir adaptando as rutinas de aprendizaxe, traballo, ocio, tempo libre e descanso.

Así pois, neste contexto é posible que dediquen máis tempo fronte as pantallas polo que a continuación vos propoñemos unhas pautas sinxelas pero eficaces que recolle Unicef, para adaptarnos ao entorno dixital de forma sa e respectuosa:

• Fomenta un ambiente de confianza e empatía no fogar para que os nenos, nenas e adolescentes poidan expresar as súas inquietudes e expor o seu punto de vista. Entender as súas necesidades e acompañalos segundo o seu nivel de madurez, para que poidan acceder a contidos seguros e aptos para a súa idade.
• Evita unha actitude inflexible fronte ao uso de pantallas: No seu lugar, podemos transmitirlles que non é saudable conectarse acotío e que cambiar de actividade fará moito máis levadío o día.
• Dá prioridade ás actividades diarias básicas: Débense respectar os horarios para durmir e comer así como para realizar as obrigacións domésticas. Aínda que a situación sexa excepcional, non debe servir de escusa para esquecer estas rutinas e deixarse levar polo impulso non xustificado de uso da internet e dispositivos.
• Evita distraccións e fixa obxectivos: Cando se empregue Internet para tarefas escolares, é preferible que non usen as aplicacións de mensaxería nin as redes sociais para evitar distraccións e concentrarse no seu obxectivo.
• Dá exemplo: Os menores tenden a imitar os comportamentos que ven nos seus pais e outras persoas de referencia.
• Xestiona adecuadamente o tempo do uso de dispositivos electrónicos: Por exemplo usando ferramentas de control parental ou pactos familiares, que permiten establecer normas e límites de uso, e facilitan o diálogo, permitindo expor dúbidas, preocupacións e intereses. 
• Entende: É importante fixar un tempo de uso, pero é aínda máis importante asegurarse de que o que están a ver, xogando e lendo sexa contido de calidade, adecuado para a idade e implicarnos como adultos o máis posible no consumo de contidos online. 
• Infórmate: Coñece as pautas do uso saudable das tecnoloxías, descobre as ferramentas que facilitan esta tarefa, úsaas e pon en práctica os consellos de expertos.

Algunhas organizacións teñen unha longa experiencia na educación das TIC e ofrecen recursos que vos poden resultar de axuda:

• Vídeos sobre cidadanía dixital para Educación Infantil ( Common  Sense  Education): cancións en inglés sobre aspectos moi importantes para un uso crítico da Internet desde pequenos.
• Mediación  parental (Internet Segura 4 Kids): con recomendacións específicas para acompañar aos nen@s no uso das TIC segundo a súa idade. Así como as guías Infancia e RRSS con consellos e pautas sobre o uso seguro e responsable.
• Plan para o consumo de medios da familia (Asociación americana de Pediatría): entre outras cousas, permite deseñar un plan de uso das TIC co que vos sintades cómodos na vosa contorna familiar.

Esperamos que coa información recollida nesta publicación, poidades afrontar esta nova rutina cos vosos fill@s tentando en todo momento transmitir calma e seguridade, así como controlar a exposición á información e ás “fake news” e aproveitar o tempo con eles.