main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

14/12/201709:09
Cartel da iniciativa.
Santiago de Compostela

A Fundación Vodafone España e a Fundación CNSE formarán a 340 persoas maiores xordas no uso de teléfonos intelixentes

  • Preténdese facilitar o uso dos teléfonos intelixentes ás persoas maiores xordas, tanto no ámbito do uso do propio teléfono, como no do lecer e a saúde

 

A Fundación CNSE e a Fundación Vodafone España colaboran nun proxecto de alfabetización dixital no uso de teléfonos intelixentes dirixido ás persoas maiores xordas usuarias da lingua de signos. A formación consiste na impartición de 34 talleres nas 17 federacións territoriais da CNSE.

A aparición destes dispositivos xerou unha nova contorna no que as persoas maiores poden vivir con maior autonomía persoal e independencia, e poden ver mellorada a súa calidade de vida.

Este proxecto enmárcase dentro dun Convenio de Colaboración que foi subscrito por ambas as entidades e asinado polos seus respectivos responsables: Santiago Moreno, por parte da Fundación Vodafone España, e Concepción Mª Díaz, en representación da Fundación CNSE.

A iniciativa inclúe a formación a máis de 300 persoas maiores xordas no uso de teléfonos intelixentes e o acceso a Internet desde os mesmos, mostrándolles como utilizalos, que aplicacións poden usar segundo os seus gustos e preferencias para o contacto con familiares e amigos, para xestionar recordatorios, para moverse en transporte público ou vivir máis activamente. Todo iso utilizando vídeo-pílulas formativas que incorporan lingua de signos, tanto para dispositivos con sistema Android como para os que utilizan o sistema operativo iOS, o que contribuirá a que as persoas maiores xordas poidan asimilar as súas funcionalidades e así, beneficiarse de servizos que favorezan a súa autonomía persoal

Os 34 talleres impartiranse ata marzo de 2018. As persoas interesadas en asistir deberán contactar coas respectivas federacións territoriais da CNSE.

14/12/201709:03
Unha persoa cega utiliza un smartphone.
Santiago de Compostela

Un sistema baseado no móbil para que persoas cegas se movan no seu traballo

  • A cátedra Indra-Fundación Adecco de investigación sobre tecnoloxías accesibles leva tempo traballando nun proxecto baseado na realidade aumentada e dirixido a mellorar a mobilidade das persoas cegas

 

O proxecto denomínase e-Glance e funciona cun smartphone, a través do cal o usuario vai recibindo información sobre o contexto físico que o rodea para facilitarlle a súa mobilidade.

Esta idea, pensada nun inicio para axudar ao usuario na súa contorna de traballo, foi recoñecida co premio Innovación e Tecnoloxía outorgado polo diario ‘La Razón' na súa categoría de Proxecto Social.

Por unha banda, o programa funciona informando ao usuario dos obstáculos que se pode atopar na dirección na que sinale co teléfono móbil.

Ademais, ofrece avisos en tempo real sobre a periferia da persoa cega, é dicir, que non só informa sobre o punto ao que sinale o usuario, senón tamén do que o rodea.

Sen dúbida un fantástico proxecto do que vos iremos informando a medida que vaia avanzando.

14/12/201708:34
Reunión do pacto dixital.
Santiago de Compostela

As 12 empresas do Pacto Dixital de Galicia súmanse ao plan da Xunta para impulsar o talento tecnolóxico na Comunidade

  • Como punto de partida, a Administración propón ás once compañías tecnolóxicas e ao Clúster TIC de Galicia a súa participación no programa de bolsas Áncora e na iniciativa Tecnólogos por un día
  • O Plan DigiTalent é unha iniciativa aberta en torno a tres eixos de actuación: fomentar as vocacións STEM, promover a adaptación aos novos perfís dixitais e a formación de E-líders para a transformación dixital
  • DigiTalent ponse en marcha con máis de 20 actuacións definidas e un orzamento de 5 millóns de euros ata 2020 para reducir a fenda entre a demanda e a oferta de perfís profesionais dixitais

 

A Axencia para a Modernización Tecnolóxica de Galicia (Amtega) pon en marcha o Plan de Promoción do Talento Dixital de Galicia, DigiTalent 2020, para reducir a fenda entre a dispoñibilidade de traballadores con competencias dixitais e a crecente demanda destes perfís no mercado laboral.

Para avanzar neste obxectivo o Plan DigiTalent contempla, como punto de partida, máis de 20 actuacións en torno a tres eixos de actuación: impulsar as vocacións STEM, promover a adaptación aos novos perfís dixitais e a formación de E-líders para a transformación dixital. Cun orzamento público-privado de 5 millóns de euros ata o 2020, DigiTalent formúlase como unha iniciativa aberta ás achegas dos axentes do ecosistema dixital, entre os que están as 12 empresas que en 2013 se adheriron ao Pacto Dixital da Xunta para impulsar o crecemento tecnolóxico da Comunidade

Actualmente en Galicia só o 9,3% dos matriculados no sistema universitario cursa carreiras do ámbito STEM (estudos científicos, tecnolóxicos, en Enxeñarías ou Matemáticas). Unhas cifras que contrastan coa alta empregabilidade dos profesionais do ámbito dixital. Só na Comunidade o sector tecnolóxico mantivo una taxa de emprego estable en torno ao 1,6%, batendo o seu récord de emprego en 2016 con máis de 16.000 traballadores.

Responsables das empresas tecnolóxicas adheridas ao Pacto Dixital, Indra, Everis, Iecisa, Satec, Televés, R, Altia, Coremain, Telefónica, Vodafone, DXC e o Clúster TIC de Galicia participaron esta mañá nunha xuntanza de traballo coa directora da Axencia para a Modernización Tecnolóxica de Galicia, Mar Pereira, para articular a súa participación no Plan DigiTalent. 

 

Programa de bolsas e tecnólogos por un día

Como punto de partida, a Xunta propuxo a estas a súa participación en dúas das iniciativas previstas en DigiTalent: o Programa de bolsas Áncora e a Iniciativa Tecnólogos por un día.

Áncora é un programa de prácticas non laborais en grandes empresas do sector TIC, tanto en centros de traballo de Galicia como do estranxeiro, con compromiso de contratación das persoas que superen con éxito o período de prácticas, que será de entre 6 e 9 meses. Está dirixido a estudantes universitarios, de FP ou recentemente titulados que estean cursando formación da rama tecnolóxica.

Tecnólogos por una día é unha iniciativa dirixida a rapazas e rapaces de entre 12 e 17 anos, que terán a oportunidade de experimentar en primeira persoa a xornada laboral dun profesional do sector, participando nas distintas actividades que teña na axenda de traballo (reunións, visitas a clientes tecnolóxicos, comida de traballo, etc.). O obxectivo é mostrarlles as dinámicas que dominan este tipo de profesións e resolver as súas dúbidas vocacionais.

 

Primeiro eixo: impulso das vocacións STEM

Aínda que un 50% dos alumnos galegos matriculados en bacharelato cursan a rama de ciencia e tecnoloxía, a maioría non chega a matricularse nunha carreira STEM. Por iso, o primeiro eixo do Plan busca fomentar o atractivo vocacional das profesións científico-tecnoloxías entre a poboación máis nova, especialmente entre as mozas, con exposicións e accións lúdico-formativas e actividades de mentorado. Crearanse espazos con equipamento de última xeración para achegar aos máis novos as novas tendencias tecnolóxicas, axendas de actividades con talleres e competicións de robótica, enxeñaría, programación, etc.

Nesta mesma liña fomentarase o atractivo das profesións STEM desde as primeiras etapas escolares con actuacións como Tecnólogo por un día ou campamentos de verán con obradoiros TIC. E tamén o talento precoz con programas para a xestión de talento STEM de alto rendemento para alumnos con aptitudes tecnolóxicas avanzadas.

 

Segundo eixo: fomento de novos perfís dixitais

Calcúlase que Europa contará con 500.000 postos vacantes para profesionais TIC no 2020 e que nos vindeiros anos o 90% das profesións requirirán de novas competencias dixitais. A transformación dixital está a crear novas profesións que afectan a todos os sectores: novos perfís tecnolóxicos e a transformación de profesións tradicionais que requiren de novas habilidades dixitais.

Para afrontar estes cambios DigiTalent contempla actuacións para ofrecer capacitación continua aos profesionais con accións formativas e de asesoramento como o programa Áncora, sesións divulgativas de novos perfís dixitais, ou o Observatorio Tecnolóxico DXC.

Facilitar a adaptación de profesionais non TIC con programas de reciclaxe profesional e garantir capacitación dixital básica de todos os profesionais

 

Terceiro eixo: E-líders para a transformación dixital

Europa precisará ata o 2020 uns 250.000 perfís profesionais directivos con capacidade de liderar a transformación dixital da súa empresa. Por iso o Plan conta con medidas para facilitar a estes perfís directivos formación e sensiblización e iniciativas para impulsar o emprendemento e a xeración de ideas innovadoras.

 

Pacto Dixital de Galicia

En 2013, un total de 11 empresas tecnolóxicas, de ámbito internacional, rexional e o Clúster TIC de Galicia asinaban coa Xunta un acordo no que, ambas partes, asumían un decálogo de compromisos para atraer investimento a Galicia, favorecer a internacionalización das pemes galegas e colaborar para conseguir o crecemento do sector. Desde entón fraguáronse diferentes iniciativas como os centros de emprendemento dixital de Telefónica Galicia Open Future; o centro para a innovación social dixital, Vodafone Conecting for Good Galicia ou o Centro de Excelencia en Intelixencia de Negocio de DXC. Todos eles situados na Cidade da Cultura, conformando xunto coa sede da Amtega, o polo tecnolóxico do Gaiás.

 

13/12/201710:34
SIRIA.
Santiago de Compostela

SIRIA, a tecnoloxía que sorprendeu a todo o mundo

  • A través da tecnoloxía, tratamos de recuperar a atención cara ás persoas que loitan por levar unha vida digna
     

Xa desvelamos o misterio que encerraba a nosa app de intelixencia emocional SIRIA, lanzada fai dez días. Detrás da voz do asistente virtual escondíanse declaracións de homes e mulleres reais en situación de exclusión social, e a quen as persoas que probaron a app puideron abrazar persoalmente despois de coñecer as súas historias.

Trátase, por tanto, dunha campaña que creamos co obxectivo de recuperar a atención da nosa sociedade cara a un problema que non deixa de crecer, a pesar de que xa non teña espazo nas noticias. Segundo datos de Nacións Unidas, 767 millóns de persoas viven baixo o limiar da pobreza. Esta cifra viuse incrementada con crises humanas como a de Siria, que provocou que máis de 6 millóns de persoas tivesen que abandonar o seu fogar.

“Tivemos que inventarnos unha app con intelixencia artificial para que volvamos conectar cun problema moi real, para que non esquezamos que non hai nada que conmova máis que unha historia verdadeira”, explica Neves Turienzo, vicepresidenta da nosa organización. “As historias que conta a nosa aplicación móbil son as vidas de persoas de carne e óso que tiveron que fuxir dos seus países ou que un bo día atopáronse sen fogar, sen dereitos ou sen cobertura sanitaria e que necesitan a nosa axuda para saír adiante”, engade.

Historias dunha verdade que emociona

Persoas como Baker, un mozo sirio de 24 anos que desertou do exército e tivo que escapar do seu país, deixando alí á súa familia. Chegou a Grecia nunha balsa. Agora vive en Barcelona, mentres continúa os seus estudos. Ou como Magdalena, de 61 anos, que chegou a España desde Romanía cun suposto contrato de traballo, pero foi vítima dun engano e atopouse sen diñeiro e sen ningún sitio onde ir. Hoxe vive nunha residencia de Sevilla. Ou Pastora, española de 50 anos que sufriu malos tratos, ten problemas de saúde e un fillo drogodependente. Agora acode ao Centro de Redución de Danos de Médicos do Mundo en Vigo. Ou tamén Jaime, que ata os 35 anos traballou na hostalería, pero por mor dunha depresión perdeuno todo e viuse abocado a vivir na rúa.

“Quixemos levar a cabo este experimento social para ver como reaccionaban as persoas que se prestaron a probar a nosa app ao descubrir que alén da pantalla había mulleres e homes de verdade, que viven situacións críticas, e os atopasen cara a cara. O resultado confirma que a realidade sempre supera á ficción. Estas persoas necesitan que a sociedade non as esqueza”, subliña Neves Turienzo.

A campaña completa, coas historias reais, recóllese na web www.oyesiriamedicosdelmundo.org.

13/12/201710:17
Logo Lidera.
Curtis

A Xunta celebra un encontro sectorial dirixido á mocidade sobre marketing social e turismo

  • Estes encontros sectoriais terán continuidade mañá no Espazo Xove de Carballo baixo o título ‘Xestión, Emprego, Ruralidade e Xuventude. O minufundio en positivo’; e o vindeiro luns no Espazo Xove de Viveiro, onde se abordará o tema do ‘Emprendemento activo: a importancia das emocións’
  • A responsable do departamento autonómico de Xuventude sinala que o obxectivo destes encontros “é establecer unha dinámica de diálogo e coñecemento mutuo entre a xuventude e os axentes económicos do territorio”, coa finalidade de impulsar novas oportunidades de colaboración e mentoring
  • No marco do proxecto Lidera, Ferrol acollerá o vindeiro sábado 16 o Encontro Mostra transfronteiriza da Xuventude Emprendedora (Emotraxe), un evento para a aprendizaxe e para compartir experiencias nos ámbitos da participación, o compromiso social e o emprendemento

 

A directora xeral de Xuventude, Participación e Voluntariado da Xunta de Galicia, Cecilia Vázquez, participou no Espazo Xove de Curtis nun encontro sectorial con mozos e mozas e distintos actores do territorio no marco do proxecto ‘Catalizador de oportunidades de emprego e emprendemento xove transfronteirizo’ (acrónimo Lidera), aprobado ao abeiro do programa europeo Interreg V A España Portugal 2014-2020 (Poctep).

O programa de actividades do encontro divídese en tres bloques: o relatorio ‘Os logros do marketing máis alá das ventas. Marketing social: o compromiso co entorno’ da man das persoas responsables de marketing das entidades Cafento e Down Compostela; unha mesa de experiencias no sector do turismo que leva por título ‘Aproveitamento do recurso Camiño de Santiago’ e na que participan un representante do albergue de Muxía, representantes da Asociación Muxía Turismo Rural, e Antón Pombo, autor da guía Anaya dos albergues do Camiño de Santiago; e finalmente un taller de comunicación sobre comercialización no sector turístico a cargo da empresa de comunicación ‘A Catro Mans’.

A titular do departamento autonómico sinalou que “este tipo de iniciativas impulsan a relación e integración da xuventude na realidade económica do territorio, reforzando o coñecemento do marco local da vida dos mozos e mozas; reforzan o achegamento da mocidade á realidade do tecido empresarial galego; promoven o coñecemento e valorización dos recursos e potencialidades que ofrece o territorio; e ofrecen unha ferramenta para que os mozos e mozas adquiran coñecementos que axuden ao seu desenvolvemento persoal e profesional”.

No marco do proxecto Lidera ao longo dos meses de novembro e decembro estanse a desenvolver encontros sectoriais nos doce Espazos Xove dependentes da Dirección Xeral de Xuventude, Participación e Voluntariado. Así mañá o Espazo Xove de Carballo acollererá o encontro ‘Xestión, Emprego, Ruralidade e Xuventude. O minifundio en positivo’, e o vindeiro luns o Espazo Xove de Viveiro será o escenario da sesión ‘Emprendemento activo: a importancia das emocións’.

Cecilia Vázquez manifestou que “o obxectivo destes encontros sectoriais é establecer unha dinámica de diálogo e coñecemento mutuo entre a xuventude e os axentes económicos do territorio, unha ferramenta para impulsar a aparición de oportunidades de colaboración e mentoring”.

Esta iniciativa formativa, dentro do proxecto Lidera, forma parte da actividade “Crece” que ten como obxectivo provocar un coñecemento, proceso e contexto de traballo en rede, no que se involucren os distintos actores e reactivos do territorio a través da xeración de espazos de desenvolvemento local no ámbito de influencia do proxecto.

 

Emotraxe

A titular de Xuventude rematou a súa intervención lembrando que no marco do proxecto Lidera o vindeiro sábado 16 de decembro descorrerá na cidade de Ferrol o Encontro Mostra transfronteriza da xuventude emprendedora (Emotraxe), un espazo de encontro e de aprendizaxe para que a xuventude poda compartir experiencias e emocións á vez que amosar publicamente as súas vivencias de participación, compromiso social e de emprendemento.

O programa de actividades de Emotraxe contará con dous relatorios e tres mesas redondas. Os relatorios, baixo os títulos ‘Onde está o límite’ e Emocións a través da mirada’ correrán a cargo de Josef Ajram e Sissí, respectivamente; e as mesas redondas descorrerán ao longo da xornada baixo os títulos ‘Mocidade en movemento, o valor de tomar a iniciativa’, ‘Competencias clave para superar o reto da inserción laboral e emprendemento’ e ‘Implicados ao 100%: iniciativas xuvenís con impacto social’. Así mesmo, o encontro contará cun espazo expositivo para que as entidades galegas e portuguesas podan mostrar os seus proxectos e actividades.

 

Proxecto Lidera

O proxecto Lidera foi aprobado ao abeiro do programa Interreg V A España Portugal 2014-2020 (Poctep) e ten como obxectivo promover o desenvolvemento económico transfronteirizo a través das capacidades laborais e de emprendemento dos mozos e mozas do territorio. Conta cun orzamento de 1.428.692, 93 euros e unha duración de catro anos (2016-2019).

Son socios do proxecto: a Dirección Xeral de Xuventude, Participación e Voluntariado; a Fundación Galicia Europa; a Cámara Oficial de Comercio, Industria, Servicios e Navegación de Santiago de Compostela; a Asociación Comercial de Emprendedores de Galicia (Ascega): o Instituto Português do Desporto e da Juventude (IPDJ); a Federación Nacional de Asociaciones Juveniles Portuguesas (FNAJ) e a Comunidade Intermunicipal do Ave.

Novas

14/12/2017
A Fundación Vodafone España e a Fundación CNSE formarán a 340 persoas maiores xordas no uso de teléfonos intelixentes
LER MAIS
14/12/2017
Un sistema baseado no móbil para que persoas cegas se movan no seu traballo
LER MAIS
14/12/2017
As 12 empresas do Pacto Dixital de Galicia súmanse ao plan da Xunta para impulsar o talento tecnolóxico na Comunidade
LER MAIS

Blog Xente Dixital

Polaroid volve: así foi a súa morte e a súa resurrección

Mér 27 Set

No mundo tecnolóxico actual todo o que nos atopamos é dixital e moi avanzado. Con todo, entre os amantes da tecnoloxía sempre hai xente que sente nostalxia polo do pasado, polo que se facía hai uns anos… é dicir, polo retro. O antigo ten un brillo especial que nos fai lembrar aquel tempo, e...

LER MAIS

Tecnoloxía do futuro presente: robots con ADN para tratar enfermidades á carta

Ven 22 Set

Hai pouco máis de 10 anos cando falabamos de avances na medicina tiñamos que comentalo con palabras como microscópico ou falar de milímetros como unidades de medida. Na actualidade, as palabras cambiaron e xa temos que falar de micras ou nanometros e de nanotecnoloxía. E a nanotecnoloxía é o que...

LER MAIS

As empresas galegas son as que máis empregan a administración electrónica no Estado

Xov 21 Set

No mundo empresarial estar adaptado ás novas tecnoloxías é estar un paso por diante da competencia, e en Galicia avanzamos nesa liña, polo menos segundo o último estudo publicado polo Instituto Nacional de Estatística (INE) titulado “Ou uso dás TIC e do Comercio electrónico nas empresas 2016/2017...

LER MAIS