main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

08/11/201917:01
Presentación da iniciativa.
Monforte de Lemos

Executivas e a Deputación de Lugo retoman en Monforte a súa visualización do talento feminino

Monforte retoma este luns o programa Referentes Galegas nas Aulas, impulsado conxuntamente pola Asociación de Executivas de Galicia e a Deputación de Lugo. Trátase dun proxecto que xorde da necesidade de mostrar ante as novas xeracións (e ante as non tan novas tamén) as importantes contribucións femininas á ciencia, á tecnoloxía e ao emprendemento nas súas moitas manifestacións ao longo da historia.

Búscase, polo tanto, fomentar as vocacións STEM entre as mozas, poñendo o foco no alumnado da ESO, FP e Bacharelato da provincia. Deste xeito, o programa Referentes Galegas nas Aulas visualizará ante as mozas e mozos mulleres con nomes e apelidos sobranceiras nos seus ámbitos innovadores. Pilar García Porto, voceira socialista do Goberno da Deputación, destacou hoxe que a devandita é unha iniciativa “que promovemos dentro do noso firme compromiso para lograr o empoderamento da muller e a igualdade”, facendo fincapé no convencemento da entidade provincial acerca do potencial da iniciativa para “achegar ás novas xeracións diferentes testemuños de mulleres que son referentes, exemplos a seguir nos seus ámbitos profesionais”. O programa de encontros retomarase o vindeiro luns, ás 13.15 horas, no IES A Pinguela de Monforte, ao que asistirá a directora técnica na área de servizos e aplicacións do Centro Tecnolóxico de Telecomunicacións de Galicia, Gradiant, Antía Fernández López, e a formadora e consultora en desenvolvemento do talento, Gloria Santamaría Martínez. Hai programadas outras seis visitas antes de final de ano en centros de toda a provincia e en total serán 14 encontros aos que asistirán preto de 700 alumnos.

06/11/201918:42
Francisco Conde, durante a súa intervención.
Santiago de Compostela

A Xunta aposta por adaptar a industria aos retos dixitais para que as empresas gañen tamaño e avancen en internacionalización

  • O conselleiro de Economía, Emprego e Industria, Francisco Conde, participou en Santiago na apertura do Innovation & Manufacturing Brokerage Event, que reúne hoxe e mañá a expertos en innovación e fabricación avanzada de sete países
  • O encontro celébrase no marco da RIS3 Transfronteiriza Galicia-Norte de Portugal, unha estratexia intelixente única en Europa e que pon o foco na Industria 4.0 e na mobilidade
  • Salienta o traballo que se está realizando dentro do próximo programa marco Horizonte Europa, centrado en fortalecer as bases científicas e tecnolóxicas da UE
  • Lembra que a Consellería destinará o próximo ano preto de 210 millóns de euros a lograr unha Galicia máis innovadora, potenciando os sectores nos que a Comunidade xa é líder e explorando novas posibilidades de desenvolvemento

 

O conselleiro de Economía, Emprego e Industria, Francisco Conde, salientou esta mañá en Santiago, na apertura do Innovation & Manufacturing Brokerage Event, centrado na innovación e na fabricación avanzada, a aposta de Galicia por adaptar a industria aos retos dixitais para que as empresas gañen tamaño e avancen en internacionalización. Por iso, lembrou que a Consellería de Economía, Emprego e Industria destinará o próximo ano preto de 210 millóns de euros a lograr unha Galicia máis innovadora, potenciando os sectores nos que a Comunidade xa é líder, como o naval, o téxtil e a automoción, e explorando novas posibilidades que enriquezan o tecido industrial.

 

Así, sinalou que Galicia ten atopado novos focos de innovación, como o polo aeroespacial, o polo das TIC ou o polo de biotecnoloxía, que busca en Santiago novas sinerxías co ecosistema bio rexional, dotado dunha aceleradora centrada no descubrimento de novos fármacos. Tamén lembrou a aposta galega polos hubs de innovación dixital, e a nova convocatoria de axudas para empresas participantes nos mesmos que desenvolvan proxectos de I+D+i. Prevese ademais poñer en marcha un plan de impulso á transformación dixital, dotado con 5,3 millóns de euros.

 

No marco da Axenda Industria 4.0, a posta en marcha de solucións para avanzar na nova industria concretarase en iniciativas como os Centros de Fabricación Avanzada, que terán como obxectivo validar e demostrar recursos de tecnoloxías dixitais made in Galicia en sectores industriais concretos. Por outra banda, e mediante o fomento da colaboración entre empresas complementarias que xeren solucións conxuntas, impulsarase a iniciativa Maquinaria 4.0, que incidirá no desenvolvemento de provedores de bens de equipo para a nova industria.

 

O conselleiro de Economía, Emprego e Industria resaltou que o Innovation & Manufacturing Brokerage Event se desenvolve no marco da RIS3 Transfronteiriza Galicia-Norte de Portugal, unha estratexia de especialización intelixente única en Europa que permite definir ámbitos de colaboración internacional, concretar programas de especializacións comúns, reforzar os sectores estratéxicos, e proxectar un desenvolvemento económico baseado na innovación e na investigación. Na súa intervención, Francisco Conde sinalou que a alianza entre Galicia e Norte de Portugal ten entre as súas prioridades a Industria 4.0 e a Industria da Mobilidade, con respostas baseadas na transformación dixital.

 

O conselleiro resaltou o traballo que se está realizando dentro do próximo programa marco europeo de innovación Horizonte Europa, centrado en fortalecer as bases científicas e tecnolóxicas da Unión Europea, fomentar a súa competitividade e facer fronte aos grandes desafíos mundiais. Tal e como apuntou Conde, o programa marco centrarase na revolución dixital, a economía circular e a transición cara un modelo de consumo baixo en carbono.

 

A Consellería de Economía, Emprego e Industria, a través da Axencia Galega de Innovación (Gain) organiza o Innovation & Manufacturing Brokerage Event, que se celebra hoxe e mañá no Palacio de Congresos de Santiago e que reúne a especialistas procedentes de toda España, Reino Unido, Italia, Grecia, Portugal, Holanda e Polonia.

 

Realízase en colaboración coa Comissão de Coordinação e Desenvolvemento Regional do Norte de Portugal e a Agência Nacional de Inovação de Portugal, no marco da Estratexia de Especialización Intelixente Transfronteiriza Galicia-Norte de Portugal, e coa colaboración da Vanguard Initiative for New Growth through Smart Specialisation, unha rede de rexións europeas creada para impulsar o crecemento económico e social a través da innovación empresarial e industrial, da que forman parte Galicia e Norte de Portugal.

31/10/201912:47
Mar Pereira.
Santiago de Compostela

A Amtega conta cun orzamento de máis de 115 millóns de euros no 2020 para consolidar unha Galicia máis dixital

  • Completará a extensión de redes de 100Mbps en máis de 600 núcleos do rural cun investimento de preto de 4 millóns de euros e lanzará unha nova actuación para mellorar a cobertura de voz e datos nas zonas máis illadas
  • Estenderá a educación integramente dixital a 50 novos centros, o que permitirá superar os 30.000 alumnos con libro dixital
  • Destina máis de 14 millóns de euros para avanzar na dixitalización da Administración e da Xustiza
  • Ampliará a extensión da Historia Social Única Electrónica coa posta marcha da plataforma “Asiste” que proporcionará servizos en mobilidade para os cidadáns e os seus familiares e coidadores
  • Iniciará a ampliación de CPDI para duplicar a súa capacidade e satisfacer as crecentes demandas derivadas dos avances na dixitalización
  • Aprobarase a Estratexia Dixital de Galicia 2030 que terá entre os seus instrumentos estratéxicos unha Rede de Nodos de especialización tecnolóxica coordinada dende o GaiásTech

 

A Axencia para a Modernización Tecnolóxica de Galicia (Amtega) incrementa nun 4% o seu orzamento para o 2020, que ascende a 115.913.010 euros, dos que preto do 70% están destinados a investimentos para consolidar unha Galicia máis dixital e reforzar as súas capacidades para facer fronte aos retos marcados por Europa no 2030. Así o explicou a directora da Amtega, Mar Pereira, durante a súa comparecencia na Comisión de Economía, Facenda e Orzamentos do Parlamento de Galicia para detallar as contas do seu departamento para o vindeiro ano

En total, a Axencia pública destinará 79,06 millóns de euros, case un 6% máis que en 2019, a investimentos para completar a dixitalización da administración e da Xustiza, reforzar a dispoñibilidade e seguridade dos servizos dixitais; estender a educación dixital; avanzar na innovación tecnolóxica nos servizos sociais e nos novos mecanismos para a conservación e difusión do patrimonio cultural; modernizar sectores chave como o turismo e a mobilidade; mellorar a conectividade, con especial foco no rural e apoiar a xeración de talento dixital e reforzar as capacidades do sector TIC de cara a vindeira década.

Servizos públicos dixitais

En 2020 a dixitalización dos servizos da Administración e de Xustiza contará cun investimento de máis de 14 millóns. Para dar resposta aos obxectivos marcados na Lei de Administración Dixital de Galicia, abordarase a reformulación da Oficinas de Rexistro en Oficinas de Atención á Cidadanía, na creación da figura do funcionario habilitado e o rexistro de apoderamento ou na aprobación dun marco de competencias dixitais que tomará como referencia o marco europeo.

No ámbito Xudicial, no que xa están en marcha todas as pezas do expediente xudicial electrónico, duplicaranse as salas de vistas dixitais, que pasarán de 40 a 90 en 2020, lanzarase una nova versión do visor de expediente xudicial e completarase a implantación da sinatura dixital en todos os órganos xudiciais e nas fiscalías. Vinculado ao anterior reforzaranse a seguridade das telecomunicacións corporativas e duplicarase a capacidade de almacenamento do Centro de Proceso de Datos Integral do Gaiás, cun investimento de 2,7 millóns de euros.

No ámbito educativo a Amtega destinará 12 millóns de euros á estender e consolidar a educación dixital, integrando no libro dixital un mínimo de 50 centros e superando os 30.000 alumnos con acceso a esta plataforma, que permite o acceso on e offline a todas as materias curriculares, ademais de recursos dixitais innovadores e que dispón dun Soporte Premium 24x7 para toda a comunidade educativa.

Continuaremos aplicando a innovación aos servizos sociais cunha dotación de 2,9 millóns de euros, parte dos cales a estender a Historia Social Única Electrónica (HSUE), que xa conta con máis de 600.000 historias dixitais, coa posta en marcha da plataforma “Asiste”, que permitirá que calquera cidadán teña a través do seu móbil un contacto áxil e directo cos servizos sociais e será, ademais, unha canle a través da que familiares e coidadores teñan acceso seguro a avisos e alertas en tempo real.

Transformación dixital da economía e da sociedade

No 2020 destinarase 1 millón de euros á desenvolver novas medidas do Plan eMobility como a posta en marcha da oficina virtual da mobilidade que permitirá a xestión integral nun único punto e de xeito telemático, da relación entre a administración e o sector do transporte. Tamén se avanzará na incorporación de novos servizos tanto ao Portal (bus.gal) como da aplicación bus.gal, incluíndo a extensión do pago a través da app.

A iniciativa Memoria Dixital de Galicia contará con algo máis de 3 millóns de euros o vindeiro ano para lanzar unha nova convocatoria de axudas para a dixitalización; poñer en marcha a nova plataforma de xestión do catálogo de patrimonio; estender nas bibliotecas municipais do catálogo colectivo único de rede de bibliotecas de Galicia, (actualmente hai 200), e establecerase o plan de implantación e primeiras fases de execución no caso das bibliotecas escolares.

O Plan Smart Turismo dispón de 2,1 millóns de euros para, entre outras medias, consolidar a xestión electrónica integral da inspección turística; aplicar técnicas de Big Data para coñecer os fluxos turísticos e deseñar estratexias proactivas de turismo sostible; e dotar á rede de oficinas de turismo dependentes da Xunta de Galicia dunha plataforma integral de cartelería dixital.

Para facilitar a capacitación dixital dos/das galegos/as a Amtega destinará máis de 1,3 millóns de para as actividades do Plan de Inclusión Dixital e a Rede CeMIT, que no vindeiro ano impartirá preto de 35.000 horas de formación gratuíta, coa previsión de acadar os 96.000 usuarios, 8.000 máis que este ano.

Impulso ao talento dixital e ao hipersector TIC

Continuar reforzando o ecosistema dixital galego é outro dos obxectivos da Amtega para o 2020 que se verá referendado coa aprobación da Estratexia Dixital de Galicia 2030, a nova folla de ruta para o novo período. Un dos instrumentos estratéxicos da EDG2030 será a posta en marcha dunha Rede de Nodos de especialización tecnolóxica que se coordinarán desde o Gaiastech, un espazo de demostración e experimentación en tecnoloxías disruptivas, que facilitará o posicionamento do hipersector TIC galego nas tendencias tecnolóxicas da vindeira década. O Centro estará, situado na Cidade da Cultura, conta cunha dotación de 1 millón de euros para o 2020 e abrirá as súas portas no segundo semestre do ano.

En colaboración con empresas do sector tecnolóxico desenvolverase a segunda edición do Plan de Promoción do Talento Dixital de Galicia 2018 – 2020 para reducir a fenda crecente entre a demanda e a dispoñibilidade de talento dixital con 37 liñas de actuación das que se beneficiarán ata 6.000 persoas

No marco do programa de impulso aos contidos dixitais DICO Mindset, tras completar o proceso de compra pública innovadora, no 2020 iniciarase o desenvolvemento e pilotaxe, en colaboración coa CRTVG, da plataforma de experiencias tecnolóxicas interactivas, na que se investirá máis de 1 millón de euros.

Conectividade

En 2020, cun orzamento de 3,9 millóns de euros de Fondos FEADER culminaranse os despregamentos de fibra previstos no II Plan de Banda Larga da Xunta 2020 en 615 núcleos de menos de 300 habitantes do rural galego, unha actuación complementaria ás que ten en marcha o Estado e que aseguran unha cobertura de fibra con velocidades de máis de 100Mbps para máis do 80% dos galegos. Unha porcentaxe que se ampliará coas convocatorias pendentes do Estado

Así mesmo, está previsto o lanzamento en 2020 dunha nova actuación en colaboración cos concellos para incentivar novos despregamentos de redes de tecnoloxía móbil, de voz e datos, co obxecto de mellorar a cobertura en zonas de sombra.

28/10/201908:03
Persoa usando unha fotocopiadora.
Santiago de Compostela

A Xunta avanza no novo modelo de xestión dos sistemas de impresión e dixitalización, que xa reduciu nun 40% o número de dispositivos

  • A Amtega inicia a licitación dun un novo acordo marco para consolidar a extensión do servizo integral de impresión e dixitalización, adaptado ás necesidades da Administración electrónica
  • Integra nunha mesma contratación o mantemento e dotación de equipos e a subministración de consumibles mediante o sistema de pago por copia
  • Reduce os custes de impresión, o número de dispositivos instalados e de páxinas impresas
  • Complementa as iniciativas que a Xunta vén desenvolvendo para acadar unha xestión dixital de todo ciclo de vida dos documentos e dos procedementos administrativos

A Xunta de Galicia avanza na consolidación do novo modelo de xestión dos sistemas de impresión e dixitalización corporativos, que comezou a implantar en 2017 para adaptar este servizo ás necesidades da administración electrónica. Con este obxectivo a Axencia para a Modernización Tecnolóxica de Galicia (Amtega) licita un novo acordo marco para a contratación centralizada do mantemento e renovación de equipos e o subministro de consumibles mediante o sistema de pago por copia.

 

Co primeiro contrato marco abordouse a primeira fase da reorganización do parque de equipos de impresión da Xunta, reducindo nun 40% o número de dispositivos. O novo contrato marco, aprobado hoxe, permitirá completar a segunda fase do proceso Unha vez implantado o novo modelo de xestión consolidarase un aforro anual de 1,8 millóns de euros, grazas á redución do número de equipos instalados e a optimización de custes derivados da contratación centralizada.

 

Con esta iniciativa a Administración autonómica busca mellorar a calidade dos seus medios de impresión e dixitalización, adaptándoos ás capacidades e necesidades do proceso de dixitalización no que está inmersa.

 

Liñas de actuación

O novo contrato marco permitirá estender a toda a Administración xeral o uso compartido das máquinas por departamentos ou grupos de traballo, limitando o emprego de impresoras en postos individuais para servizos de atención directa ao cidadán ou aqueles que manexen información sensible. Nesta mesa liña, continuaranse a reducir os equipos de impresión a cor en favor de solucións en branco e negro.

 

Outra das medidas que contempla o acordo é a homoxeneización dos equipos, establecendo un número de modelos reducidos. Deste xeito, facilitarase a súa xestión asegurando a posibilidade de xestionar remotamente todas as máquinas. Ademais, incorpóranse sistemas de control de impresións por máquina para poder analizar as necesidades reais de cada posto de traballo.

 

Este novo sistema permite simplificar a carga administrativa grazas á facturación centralizada baixo a fórmula de pagamento por uso e emisión de facturas únicas por centro de gasto. O acordo marco prevé un investimento de ata 12,2 millóns de euros.

 

Un paso máis para unha administración dixital

A aprobación deste novo acordo marco é unha das actuacións do Plan de Acción de Dotación e Xestión sostible no Posto de Traballo, que desenvolve a Axencia para a Modernización Tecnolóxica de Galicia (Amtega), para garantir que os empregados públicos dispoñan dos medios tecnolóxicos axeitados ás súas funcións e á prestación dos servizos dixitais para cidadáns e empresas que require o contexto actual.

 

O Plan complementa as iniciativas que a Xunta vén desenvolvendo desde o ano 2010 para consolidar unha Administración integramente dixital. Os indicadores do Plan de Goberno e Administración dixital 2020 sinalan que se está a avanzar neste obxectivo, tanto entre os cidadáns como a nivel de uso interno.

 

A xestión online está a consolidarse entre os galegos como a opción para relacionarse coa Administración. Entre xaneiro e xuño de 2019 máis do 50% das xestións rexistradas pola Administración autonómica presentáronse online, ben a través da sede electrónica da Xunta ou das oficinas virtuais, ou no rexistro electrónico.

 

En canto ao uso do servizos dixitais internos por parte do empregados públicos, cómpre destacar a Plataforma de interoperabilidade Pasaxe!, con 4,7 millóns de consultas no primeiro semestre, un 32% máis no último ano.

Tamén se incrementa o uso da sinatura dixital e no primeiro semestre deste ano rexistráronse na Xunta máis de 1,8 millóns de documentos asinados electrónicamente fronte a algo máis de 1 millón de 2018.

 

Por outra banda, este ano aprobouse a Lei de Administración Dixital de Galicia coa que a Comunidade acada un marco normativo único para universalizar o uso e o acceso aos servizos públicos dixitais.

28/10/201907:45
Discos duros nun rack.
Santiago de Compostela

A Amtega pon en marcha a terceira edición do programa “Tecnólog@ por un día” con máis de 70 prazas para estudantes de 12 a 17 anos

  • Os participantes compartirán unha xornada de traballo con profesionais dalgunha das 12 empresas tecnolóxicas que colaboran na iniciativa
  • O prazo de inscrición estará aberto ata o 8 de novembro para que os docentes dos centros educativos poidan inscribir aos seus alumnos e alumnas
  • Os máis de 100 rapaces e rapazas que participaron nas edicións anteriores valoran moi positivamente a iniciativa e recoméndana aos seus compañeiros
  • Para un de cada tres participantes esta iniciativa supuxo a primeira aproximación ás profesións dixitais

A Axencia para a Modernización Tecnolóxica de Galicia (Amtega) pon en marcha unha nova edición do programa “Tecnólog@ por un día”, que ofrece a estudantes de 12 a 17 anos a oportunidade de experimentar, en primeira persoa, unha xornada laboral con profesionais de empresas do sector TIC en Galicia. É unha das iniciativas do Plan de Promoción de Talento Dixital de Galicia 2020, DigiTalent.

 

Esta terceira edición ofrece 74 prazas, unha cifra récord desde o seu lanzamento, grazas a colaboración de 12 entidades que, xunto coa Amtega, repetirán a experiencia de acoller a “Tecnólog@s por un día”: Altia, Coremain, DXC Technology, everis, Iecisa, Orange, Sivsa, Corporación Televés e os socios do Clúster TIC Galicia Aldaba, Dos espacios, Sixtema e Tecalis.

 

Nesta nova quenda prestarase especial atención a reducir a fenda de xénero que existe entre mulleres e homes nos estudos nos campos STEM, reservando un terzo das prazas para as nenas.

 

Máis prazas, máis tecnólog@s

Ata o 8 de novembro permanecerá aberto o prazo para que o persoal docente inscriba ao alumnado interesado en participar, cumprimentando o formulario dispoñible no espazo web DigiTalent, onde poderán consultar as prazas ofertadas por cada empresa colaboradora así como a súa localización, indicando as preferencias do alumnado. 

 

Na mesma web tamén se atopa dispoñible a documentación de referencia para que docentes, alumnado e profesionais das entidades colaboradoras coñezan todos os detalles da actuación e aclaren calquera dúbida que poidan ter.

 

Unha vez finalizado o período de inscrición, as prazas asignaranse aplicando o resultado dun sorteo e a continuación serán as empresas as que se poñan en contacto co alumnado seleccionado para concretar a data e o horario da xornada que resulte conveniente para ambos. 

 

Durante os meses de novembro e decembro as entidades colaboradoras acollerán nas súas instalacións aos participantes co fin de mostrarlles as dinámicas das profesións TIC, aclarar as súas dúbidas vocacionais e ofrecerlles a oportunidade de participar directamente en actividades que os profesionais teñan na súa axenda como sesións de traballo, reunións con clientes e socios tecnolóxicos, etc.

 

Valoración da iniciativa entre os máis novos

Ata o de agora o programa espertou o interese de máis de 300 estudantes e contou coa implicación de máis de 70 docentes de máis de 60 centros educativos galegos distintos.

 

Os máis de 100 participantes nas edicións anteriores tiveron a oportunidade de mergullarse en proxectos tecnolóxicos de selo galego en sectores e ámbitos como a administración, o retail, a industria ou o transporte, entre outros. Destaca o nivel de satisfacción acadado coa actividade por parte do alumnado, que o consideran unha experiencia moi enriquecedora e destacan tanto a boa acollida como o ambiente de traballo como aspectos máis positivos.

 

A maioría dos participantes (94%) volvería a ser tecnólogo por un día e a práctica totalidade (98%) recomendaría a experiencia a outros compañeiros. Cabe destacar que para un de cada tres participantes esta iniciativa supuxo a primeira aproximación ás profesións dixitais xa que non coñecían a ninguén que traballase neste eido.

 

Nova edición de DigiTalent

Para este curso 2019/2020 púxose en marcha recentemente a segunda edición do Plan DigiTalent, co que se desenvolverán 37 iniciativas para impulsar as vocacións tecnolóxicas, os novos perfís dixitais e reforzar as capacidades dos profesionais que teñen que liderar a transformación dixital.

 

Toda a actualidade sobre as actuacións recollidas no catálogo DigiTalent, atópase dispoñible no espazo web digitalent.xunta.gal, que ofrece información actualizada (datas, localizacións e instrucións para a participación) sobre as actuacións.

Blog Xente Dixital

Como aumentar a túa visibilidade en Instagram

Ven 30 Nov

Aínda que as redes sociais naceron orixinariamente para relacionarnos entre nós, é un lugar no que se pode sacar moito rédito empresarial se sabemos como explotalas de maneira adecuada para os nosos intereses. Instagram é unha das redes máis populares na actualidade, polo que estar presente nela é...

LER MAIS

Tres alternativas gratuitas a YouTube para ver contidos orixinais

Mar 06 Nov

Cando falamos de creadores audiovisuais é habitual pensar en directores de cinema ou guionistas que levaron as súas obras a algún gran formato adaptado ao gran público. Pero con Internet o termo de creador audiovisual expandiuse, describindo tamén aos famosos  youtubers, que crean e producen...

LER MAIS

Un tipo de letra para recordar mellor o que les

Mar 09 Out

Ao ler algo que necesitamos memorizar, é habitual que poñamos o “piloto automático” e acabemos lendo todo sen realmente memorizar nada. É algo que ocorre a miúdo cando a lectura é obrigada e a única solución ata agora era poñer máis interese no que estamos a ler. E dicimos ata agora porque un...

LER MAIS