main content

main content

Novas Faite Dixit@l

Queres manterte ao día de todo o que acontece ao teu redor no mundo dixital? Consulta as novidades sobre cursos, actividades, ferramentas, novas aplicacións das TIC, proxectos innovadores...

20/12/201609:50
Participantes nos proxectos
Madrid

Tres proxectos para a integración de persoas con discapacidade

  • Foron elixidos na I Convocatoria de axudas a proxectos de investigación aplicada ao desenvolvemento de tecnoloxías accesibles de Indra e Fundación Universia

Tres innovadores proxectos para mellorar a integración laboral de persoas con discapacidade intelectual, auditiva e visual foron elixidos na I Convocatoria de axudas a proxectos de investigación aplicada ao desenvolvemento de tecnoloxías accesibles, lanzada por Indra e Fundación Universia o pasado mes de outubro, co obxectivo de promover o desenvolvemento de solucións tecnolóxicas innovadoras que melloren a calidade de vida e a integración social e laboral das persoas con discapacidade.

En concreto, recibirán o apoio de Indra e Fundación Universia os proxectos de I+D+i audiSmart, unha App para mellorar a audición, proposta pola Universidade Carlos III; Smile@work, unha solución para mellorar a formación profesional das persoas con discapacidade intelectual mediante 'xogos serios' que simulen en 3D contornas e situacións laborais cotiás, ideada pola Universidade Politécnica de Catalunya; e Graces, unha ferramenta para mellorar o acceso das persoas cegas a postos de traballo de alta cualificación no desenvolvemento de software, proposta pola Universidade Politécnica de Madrid.

Os proxectos foron elixidos pola innovación e excelencia tecnolóxica da solución exposta, a súa viabilidade para converterse nun produto ou servizo real que aínda non exista no mercado, a súa utilidade práctica nunha contorna real de inclusión laboral e o alcance do seu impacto, tendo en conta o número de posibles beneficiarios e a posibilidade de internacionalizar a iniciativa. Tamén se tivo en conta que as tres soluciones resultantes serían gratuítas para os usuarios finais e que para o seu desenvolvemento e validación está previsto involucrar a persoas con discapacidade, ao contar coa colaboración de asociacións e empresas que traballan con este colectivo.

Preto dun centenar de grupos de investigación de universidades públicas e privadas de todo o país participaron nesta convocatoria. O xurado está formado por personalidades do mundo da discapacidade que formaron parte do xurado: Natalia Gómez, responsable de Acción Social de Indra; Ramón Capdevila, director xeral de Fundación Universia; Gabriel Barroso, investigador da Universidade Carlos III Madrid; Jesús Celadas, subdirector xeral de Participación e Entidades Tuteladas, da Dirección Xeral de Políticas de Apoio á Discapacidade do Ministerio de Sanidade, Servizos Sociais e Igualdade; Jesús Hernández, director de Accesibilidade da Fundación ONCE; Javier Luengo, director de Plena Inclusión Madrid; e Miguel Valero, director do CEAPAT (Centro de Referencia Estatal de Autonomía Persoal e Axudas Técnicas).

19/12/201613:18
Premiados InLugo.
Lugo

Os Premios #InLugo serviron para confirmar o envexable estado de saúde da innovación provincial

A Deputación de Lugo entregou o sábado uns galardóns directamente encamiñados a salientar e visualizar o importante traballo tecnolóxico-innovador desenvolvido polos emprendedores e PEME da provincia. Falamos dos Premios #InLugo, concedidos no marco do cuarto congreso do mesmo nome e entregados persoalmente polo presidente da entidade provincial, Darío Campos, e o concelleiro de Desenvolvemento Sostible, Daniel Piñeiro. Os recoñecementos foron dar finalmente á Queixería do Campo, a Enfermera Saturada e a Funil.gal. En palabras de Campos e Piñeiro, con estes premios distínguense cada ano iniciativas, persoas e organizacións da provincia que fan “bo uso da Internet, as novas tecnoloxías e as redes sociais”. Na edición deste ano presentáronse case corenta candidaturas repartidas en tres categorías.

A Queixería do Campo foi a iniciativa gañadora dentro da categoría Comercio, Ocio e Restauración. Segundo fixo saber a Deputación, a queixería resultou gañadora nesta modalidade “polo bo uso das distintas redes sociais que xestiona (Facebook, Twitter, Instagram, Pinterest e Youtube)” e tamén polo denominador común de todos os seus produtos e servizos: “A calidade”. A queixería está situada na Praza do Campo, 6, en Lugo. As iniciativas finalistas nesta categoría foron Faragulla.com (web adicada á venda de obxectos especiais de cociña) e UVE Laboratorio de Deseño (estudo de deseño que crea espazos totalmente personalizados ao cliente).

Polo que se refire á categoría Deportes, Cultura e Acción Social, a proposta gañadora resultou ser Enfermera saturada. Detrás desta iniciativa atópase Héctor Castiñeira, creador da personaxe do mesmo nome, un achegamento divulgativo e humorístico ao mundo da enfermaría e os hospitais que abrolla directamente dos universos creados polo libro A vida é Soro, autopublicado en primeira instancia polo propio Héctor Castiñeira e logo transformado en obra de éxito (Plaza & Janes). Os finalistas nesta modalidade foron Lugoslavia (web adicada á actualidade do CD Lugo e cunha forte pegada nas redes sociais Facebook, Twitter, Instagram, Flickr e Youtube) e o CB Breogán (entidade premiada polo seu labor de difusión nas redes sociais e na web da actualidade do club de baloncesto).

Por último, no apartado Tecnoloxía, recoñeceuse o traballo ben feito de Funil.gal, un proxecto nado a Facultade de Ciencias do Campus de Lugo que destaca entre outras cuestións por ser de acceso aberto e gratuíto e por achegar un laboratorio virtual de química que ofrece novas ferramentas multimedia para o ámbito científico. Entre estes recursos atópase un libro electrónico de prácticas de laboratorio de química e unha serie de vídeos onde se visualizan dun xeito ameno os procedementos, as técnicas e o desenvolvemento práctico no laboratorio de química xeral. As ferramentas están dispoñibles na Rede, conseguindo unha ampla difusión nacional e internacional grazas á súa canle de Youtube. Os finalistas nesta modalidade de Tecnoloxía foron Mar Castro, a iniciativa dixital da doutora en comunicación do mesmo nome, experta lucense en protocolo de prestixio nacional e moi centrada en difundir o seu traballo e publicacións a través da súas redes sociais, web e blog. Tamén foi finalista Nudoss.com, proxecto local que nace da empresa Miramar Cruises co obxectivo de dar forma á primeira rede social de cruceiros de Europa.
 

Concurso de fotografía
No marco da cuarta edición do congreso tamén se deu a coñecer o gañador do concurso de fotografía #Inlugo16, Saritísima (@srvQueen), co que se buscaba premiar á mellor imaxe da cidade (podendo estar tamén relacionada co congreso) que os asistentes publicaran nas redes sociais coa etiqueta #InLugo16. A vencedora recibiu un smartphone última xeración.

19/12/201608:59
IV Edición dos Premios Discapnet ás Tecnologías Accesibles.
Santiago de Compostela

Fundación ONCE convoca a IV edición dos Premios Discapnet ás Tecnoloxías Accesibles

Fundación ONCE convocou a IV Edición dos Premios Discapnet ás Tecnoloxías Accesibles, uns galardóns que recoñecen as mellores iniciativas e accións no campo das Tecnoloxías da Información e a Comunicación (TIC) aplicadas á mellora da calidade de vida das persoas con discapacidade, así como ás empresas, entidades ou organizacións que desenvolvesen un labor continuado no campo da accesibilidade TIC.

 

Na súa IV edición, os Premios Discapnet estrutúranse en tres categorías: a primeira delas, a A, galardoará ao mellor produto ou servizo baseado en tecnoloxías da información e a comunicación para a mellora da calidade de vida das persoas con discapacidade que xa estean dispoñibles ou para os que se conte cun plan de implantación a curto prazo.

 

Na categoría B, o premio será para a persoa, empresa, entidade ou organización que máis destacase pola súa traxectoria continuada en materia de mellora da accesibilidade TIC.

 

Finalmente, o apartado C recoñecerá ao proxecto de emprendemento que destaque por potenciar a accesibilidade TIC. Neste caso, premiarase ao produto ou servizo cuxa idea, proxecto e metodoloxía para levala a cabo dispoña ademais dun plan de negocio con xustificada viabilidade e sustentabilidade no tempo.

 

Os interesados en presentar candidaturas ás categorías A e B deberán cumprimentar un formulario online dispoñible no portal dos Premios Discapnet (http://premios.discapnet.es), mentres que os que desexen optar ao galardón do apartado C, o proxecto de emprendemento, terán que darse de alta no portal Uninnova (http://www.uninnova.es).

 

En canto á dotación dos premios, consistirá na entrega dunha obra orixinal dun prestixioso artista con discapacidade a cada persoa ou entidade galardoadas dentro das categorías A e B, e nun cheque de 5.000 euros para o premiado no apartado C, que deberá destinar integramente ao desenvolvemento do proxecto de emprendemento polo que se lle recoñeceu.

 

As bases completas dos premios Discapnet poden consultarse en http://premios.discapnet.es/.

19/12/201608:40
Google Maps para iOS.
Santiago de Compostela

Google Maps mostrará se os lugares son accesibles en cadeira de rodas

Google Maps segue recibindo funcionalidades, e é que o servizo de cartografía e navegación de Google converteuse nun indispensable na vida cotiá de máis dun, sobre todo porque conta coa potencia e o coñecemento do seu buscador, o que enriquece sen igual ao sistema de navegación, aínda que tamén ten os seus fallos, como todo neste mundo que nos rodea. Con todo, a última novidade de Google Maps encántanos a todos, e é que marcará se un lugar é accesible en cadeira de rodas, o que facilitará os plans aos usuarios con dificultades de mobilidade, ou mobilidade reducida.

Esta función que parece tan simple, pode ser vital no día a día destes usuarios aos que nos referimos. E é que estamos nunha época na que todos os lugares deberían ser accesibles para os usuarios con mobilidades reducidas, polo menos na medida do posible. Con todo, a realidade é bastante distinta, xa que nin tan sequera Metro Madrid é na súa totalidade accesible para os usuarios con mobilidade reducida, sendo un servizo de transporte público, pouco máis podemos esperar do resto de recintos privados.

Por agora esta función está a expandirse por Estados Unidos de América, onde está a ser realmente benvida. Google é unha empresa comprometida coa accesibilidade, sobre todo grazas ás súas políticas de integración de persoas con capacidades diversas na súa empresa. Mentres tanto, estas funcións que se atopan en desenvolvemento, iranse expandindo polo resto de lugares onde Google Maps teña posicionamento, facendo a vida máis fácil, non só a quen sofre de mobilidade reducida, senón tamén a familias con membros discapacitados e mesmo a pais e nais que teñen de portar o clásico carro para bebés, todo serán facilidades con estas novas funcións de Google Maps.

19/12/201608:15
Premiados dos Concurso de Proxectos Tecnolóxicos.
Ourense

Expourense e a ESEI premian tres proxectos tecnolóxicos smart

O 15 de decembro tiña lugar na Escola Superior de Enxeñaría Informática do Campus de Ourense a entrega de premios da 16ª edición do Concurso de Proxectos Tecnolóxicos, proposta de Expourense e a Escola Superior de Enxeñaría Informática do Campus de Ourense que quer galardoar os mellores traballos fin de estudos presentados por alumnado do eido tecnolóxico de Galicia e Portugal, salientando a transferencia dos resultados ao tecido produtivo. Desta volta os premiados foron os traballos fin de grao de tres egresados da Universidade de Vigo (graos de Enxeñaría de Tecnoloxías de Telecomunicación e de Enxeñaría Informática): un dron para a medida da temperatura no perímetro de zonas afectadas por incendios forestais, unha aplicación para o seguimento cardíaco perante estímulos multimedia e un portal para a xestión de viñedos.

Ao acto de entrega de premios asistían: Francisco Javier Rodríguez (director da Escola Superior de Enxeñaría Informática); Jorge Pumar (vicepresidente da Deputación Provincial de Ourense) e Cristina Álvarez (directora de Administración de Expourense). Indo aos traballos galardoados, o primeiro premio (300 euros) foi para o traballo fin de grao en Enxeñaría de Tecnoloxías de Telecomunicación de Alberto Novoa, de definición e construción dun RPAS ou dron, para a medida da temperatura no perímetro de zonas afectadas por incendios forestais e a avaliación da súa utilidade para a prevención de posibles reproducións. Con este sistema, nun escenario de por exemplo dez hectáreas o dron faría o percorrido do perímetro en 9 minutos e 40 segundos cun custo de 2,95 euros mentres unha persoa polo método tradicional faríao en 70 minutos e cun custo de 43 euros. O segundo premio (150 euros) foi para Javier Villalobos polo seu traballo fin de grao en Enxeñaría Informática Herba. Trátase, explicou, dunha “aplicación Android de monitorización cardíaca de persoas perante estímulos multimedia, como imaxes ou vídeos, ou mentres están realizando algunha acción ou estado”. A súa vantaxe é que, apuntou Villalobos, “ademais de obter información cardíaca ten en conta outro tipo de estímulos que xa achega a propia aplicación”.

O Premio Especial Deputación de Ourense-Provincia Intelixente (400 euros), foi para Alba Nogueira polo seu traballo fin de grao Portal de xestión de viñedos. Un sistema para rexistrar as actividades dunha explotación vitícola, consultar datos meteorolóxicos próximos ao viñedo e xestionar a vendima e as ofertas de traballo vinculadas a el, entre outras cuestións.

Blog Xente Dixital

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas.

4 sinxelos pasos a seguir para crear a túa propia páxina web

Ven 24 Set

A creación dunha páxina web para darlle un impulso ao teu negocio ou simplemente para compartir co mundo os teus intereses pode parecer, inicialmente, unha tarefa abrumadora e chea de incógnitas. Porén, existen numerosas páxinas e provedores que ofrecen plataformas nas que poderás crear unha páxina...

LER MAIS

3 funcionalidades de Whatsapp que verán a luz proximamente

Mar 21 Set

A aplicación de mensaxería Whatsapp é unha das apps máis utilizadas á hora de comunicarnos: falar cos nosos amigos e familiares, organizar tarefas cos nosos compañeiros de traballo ou establecer citas médicas é moito máis fácil a través desta aplicación. Whatsapp é consciente do nivel de...

LER MAIS

Como utilizar os filtros de Instagram: consellos para o seu uso e como sacarlles proveito

Lun 21 Xuñ

Instragram é a rede social por excelencia: dende os máis mozos ata a xente adulta a utiliza para interactuar cos seus amigos e coñecidos, ver as publicacións dos influencers e famosos ou para facer crecer o seu negocio. O crecemento exponencial da rede nos últimos anos levou a que a app comezara a...

LER MAIS