Ao longo destes días son moitos os artigos e novas en prensa, televisión e redes sociais que nos repiten reiteradamente que temos que manternos activos, pero é importante saber o por que e máis aínda importante é facelo ben e sen riscos para á saúde.

Segundo a OMS (Organización Mundial da Saúde), a realización de actividade física ten importantes beneficios para a saúde e contribúe a previr enfermidades, especialmente neste momento de illamento. Así, manterse activ@ físicamente axudaranos a ter unha vida máis sa e feliz, aumenta o noso benestar e permítenos desfrutar dunha mellora na esperanza e calidade de vida, é dicir, permitiranos vivir máis e mellor!

Neste sentido, o Consello Superior de Deportes (CSD) e o Consello Xeral da Educación Física e Deportiva (COLEF) puxo en marcha a campaña #YoMeMuevoEnCasa para promover a actividade e o exercicio físico nos fogares durante os días do estado de alarma polo COVID-19 coas seguintes recomendacións: evita o sedentarismo (non pases moito tempo sentado e reduce o tempo diante das pantallas) e loita contra a inactividade aumentando a túa actividade física.

Con estas recomendacións e a pesar de non poder saír da casa, este pode ser un bo momento para realizar exercicio físico, e neste post, presentaremos como grazas ás TIC e cunha conexión a Internet, poderás realizar exercicio na casa a través de distintos medios:

Participa en clases en directo e mantén o teu ritmo, ou busca o teu momento e accede a videotitoriais de profesionais

A televisión, YouTube ou as redes sociais coma Instagram e Facebook facilítannos unha gran variedade de propostas para manternos activ@s estes días. A continuación facilitámosche algunhas iniciativas:

• Para axudar á preparación e motivación d@s deportistas profesionais, a Xunta de Galicia, a través da Secretaría Xeral para o Deporte, sumouse á iniciativa ‘Píldoras Solidarias. Entrenamento Mental’ da Sociedade Iberoamericana de Psicoloxía do Deporte (SIPD) que preside o psicólogo deportivo galego Joaquín Dosil e consiste en pílulas de 10 minutos de adestramento mental en directo. Para participar nestas actividades é preciso completar o seguinte formulario: https://forms.gle/FE7oaoowsvBxbkQd8.
• A UDC ofrécenos unha canle de exercicios online en UDCTV na que se emiten vídeos en aberto para realizar actividade física na casa co obxectivo de que todo o mundo poida seguir estes vídeos de curta duración e cree rutinas propias en función dos seus intereses.
• RTVE, a través da súa páxina web, recuperou e puxo a disposición de toda a cidadanía o programa de ximnasia dos anos 80 de Eva Nasarre “Posta a punto”, e na súa programación en directo, emite o programa “Móvete na casa” de luns a venres ás 09.00 horas, onde durante 30 minutos o monitor de fitness da academia de Operación Triunfo, Cesc Escolà, propón exercicios sinxelos por idades e con obxectos de uso cotiá.
• Adicionalmente, desde as diferentes canles de YouTube, Instagram ou Facebook adestradores persoais e especialistas poñen á túa disposición clases que poden ser seguidas en directo ou en calquera outro momento. Algúns exemplos son:
  • A Deputación de Ourense co “Programa de adestramento deportivo por Internet” cos monitores do Pazo dos Deportes "Paco Paz" e de luns a venres, ás 10 horas (orientada ao acondicionamento físico) e ás 19 horas (centrada no adestramento en familia), ofrecen clases gratis e un programa que inclúe ximnasia de mantemento, baile, pilates, ioga, step e gap a través de Facebook (@PazoPacoPazDeputaciondeOurense), Twitter (@PazoPacoPaz) e YouTube (@PazoPacoPaz),
  • A nivel local, tamén se promoven iniciativas coma o Multiusos das Fontes do Sar en Santiago de Compostela que ofrece titoriais e clases en directo en redes sociais (Facebook, Instagram e Twitter) cos seus instrutores e a través da aplicación Trainingym ofrecen máis de 350 sesións e clases virtuais aos seus abonados. Outro exemplo son as clases virtuais dos profesionais do Complexo deportivo de Campolongo, que permiten aos seus usuarios continuar coas clases a través de YouTube e cos seus monitores de confianza.
  • Nas redes sociais están a xurdir iniciativas como a de @yomemuevoencasa en Instagram que está a ter unha gran repercusión por contar con algúns dos gurús do fitness e adestradores persoais que ofrecen plans de adestramento en directo cada día nos seus perfís.
  • Os ximnasios e outras entidades deportivas tamén aproveitan as redes sociais para manter aos seus usuarios en forma, habilitando nas súas webs espazos para seguir as clases e actividades online, para recomendacións e consellos, vídeos curtos para exercitar diferentes músculos ao teu ritmo, etc.

Descárgate aplicacións e móvete na túa casa

Outra das vías que nos ofrecen as TIC para realizar exercicio na casa é o manexo de aplicacións para o móbil e tablets que están dispoñibles nas plataformas dixitais da Google Play Store para Android ou a iTunes Apple para sistemas iOS.

Se optas por esta vía para facer exercicio, tan só terás que descargar unha ou varias apps, segundo o que queiras facer.

E xa para finalizar, non queremos despedirnos sen lembrarche que é preciso ter unha serie de precaucións e recomendacións á hora de realizar exercicio na casa:

• Realizar exercicio tendo en conta o teu estado físico actual. Se non estás habituado a realizar actividade, comeza de forma suave e gradual, incrementando pouco a pouco o tempo e intensidade da actividade.
• Quenta antes de comezar a actividade física e estira os teus músculos ao finalizar. Non comeces nin remates bruscamente a actividade.
• Leva roupa cómoda e calzado adecuado.
• Non fagas actividade física despois de comer.
• Mantente hidratad@ adecuadamente.
• Unha vez rematado o exercicio físico, no caso de que suases, cando remates, sécate e cámbiate de roupa para evitar arrefriarte, tamén é importante reforzar a hixiene corporal.
• Mantén a túa casa ventilada e tenta expoñerte ao sol.
• E sobre todo, segue sempre as recomendacións das autoridades sanitarias e se tes dúbidas sobre como facer exercicio na casa, contacta con profesionais cualificad@s do deporte e ten coidado coas propostas que circulan pola rede, asegurándote que contan coas cualificacións necesarias.

Esperamos que pronto poidamos desfrutar do deporte e a actividade física ao aire libre e nos nosos centros deportivos, pero mentres tanto, lembra que este é un bo momento para comezar ou continuar facendo exercicio desde as nosas casas e sacando o máximo partido a todos os recunchos e obxectos que temos por casa... #EuQuedoNaCasa, #EuMóvomeNaCasa e #EuEntrenoNaCasa.