• O vindeiro curso máis de 280.000 alumnos galegos terán acceso a unha contorna de aprendizaxe na nube con recursos para desenvolver as competencias dixitais necesarias para o seu futuro profesional
• Ademais, a Administración autonómica e a multinacional porán a disposición dos ciclos de FP de Informática plataformas de desenvolvemento de software para mellorar a súa incorporación ao mercado laboral
• O profesorado recibirá formación especializada impartida por profesionais de Microsoft en colaboración con partners do ecosistema dixital galego

Todos os centros educativos públicos de Galicia terán acceso o vindeiro curso de forma gratuíta á plataforma Office 365 de Microsoft, que inclúe a ferramenta de colaboración Microsoft Teams. Máis de 280.000 alumnos e máis de 28.000 docentes poderán aproveitar os recursos da plataforma, que estará dispoñible en galego e castelán, grazas a un acordo entre a Xunta e Microsoft.

Esta plataforma educativa na nube proporciona unha contorna de aprendizaxe segura e innovadora e dota aos alumnos de habilidades dixitais, como a colaboración, creatividade e o pensamento computacional, claves para facer fronte aos requirimentos laborais propios da era dixital.

O acordo de colaboración foi rubricado esta mañá en Santiago, pola conselleira de Educación, Universidade e Formación Profesional, Carmen Pomar; a directora da Axencia para a Modernización Tecnolóxica de Galicia (Amtega), Mar Pereira; e a presidenta de Microsoft España, Pilar López.

A Xunta e Microsoft tamén colaborarán para completar a formación nos ciclos de Formación Profesional da familia de Informática e Comunicacións, poñendo ao dispor dos 27 centros públicos nos que se imparten estes ciclos, plataformas e ferramentas de Microsoft que permitirán a máis de 3.000 alumnos traballar con programas e aplicacións presentes no mercado e demandados no sector profesional

Adicionalmente, como medida de acompañamento, os máis de 360 profesores destes ciclos de FP recibirán formación especializada, impartida por profesionais de Microsoft en colaboración con partners do ecosistema dixital galego.

Incrementar as competencias dixitais

Durante a súa intervención Carmen Pomar sinalou que un dos eixos do modelo educativo galego é a integración real das novas tecnoloxías da información e a comunicación no ensino. “O noso alumnado é nativo dixital e temos a responsabilidade de implantar un ensino tecnolóxico que combine os equipamentos coa adquisición de competencias científicas”, dixo. Neste sentido lembrou que o seu departamento está a desenvolver a Estratexia STEM para fomentar entre o alumnado galego as competencias en ciencias, tecnoloxía e matemáticas, ao tempo que se procura romper a fenda de xénero nestas vocacións.

En relación ao acordo asinado hoxe, Pomar indicou que vai estimular o desenvolvemento de actividades nas escolas relacionadas coas TIC, ao tempo que se promoven actuacións de formación dos docentes, “posto que eles son o piar básico da comunidade educativa e deles depende o aproveitamento eficaz de todas estas novas ferramentas”. “Estamos a facer unha aposta seria pola educación, para fomentar un factor clave no seu éxito colectivo, o capital humano, conscientes de que unha sociedade formada e informada promove o progreso dun país”, destacou.

Pola súa banda Mar Pereira afirmou que este acordo “permítenos ampliar o abano de ferramentas ofimáticas coas que traballan os alumnos dos centros públicos galegos e as aulas Abalar, nas que a actividade educativa se desenvolve con ofimática e sistemas operativos de código aberto e súmase ás medias para consolidar unha educación integramente dixital.

Pilar López, presidenta de Microsoft Ibérica sinalou que “este acordo é un magnífico exemplo da importancia de expor esquemas de colaboración público-privados co obxectivo de preparar e capacitar aos estudantes e docentes coas competencias que require a nova Sociedade Dixital”.

Aulas Dixitais

O acordo asinado esta mañá súmase as medidas da Xunta para consolidar unha educación integramente dixital, que facilite ao alumnado a adquisición das competencias dixitais que require o contexto actual.

A Administración autonómica puxo en marcha en 2010 o Proxecto Abalar, concibido como unha iniciativa para transformar a aula tradicional nunha aula dixital, coa implicación de toda a comunidade educativa. Actualmente, máis de 900 centros e 6.000 aulas de 5º e 6º de educación primaria, Educación Secundaria e Bacharelato, son Abalar, beneficiando a máis de 120.000 alumnos

Neste curso 2018-2019 a iniciativa E-Dixgal do Proxecto Abalar permitiu que preto de 18.000 alumnos estudan exclusivamente con contidos dixitais, dispoñibles on e offline e gratuítos para as familias e teñen acceso a novos contidos colaborativos (SMART). Ademais, está en marcha o servizo de creación de contidos educativos dixitais innovadores, DIXIT, que proporcionará aos docentes a capacidade de crear contidos con ferramentas e tecnoloxías innovadoras, obtendo contidos personalizados e con capacidade de adaptación ao alumnado

A Consellería de Educación, Universidade e Formación Profesional puxo en marcha en 2017 a Estratexia galega de educación dixital, Edudixital 2020, co obxectivo de que todo o alumnado de ensino obrigatorio teña formación en robótica e programación no curso 2020/21 co fin de que ao finalizar os estudos acade un nivel adecuado de competencia dixital e científico-tecnolóxica.

Enmarcada no Edudixital, o departamento educativo da Xunta de Galicia desenvolve a estratexia STEM máis ambiciosa do Estado, con 15 centros impartindo por primeira vez o Bacharelato de excelencia en ciencias e tecnoloxía, o STEMbach, 91 centros con Clubs de Ciencia en centros educativos e 10 centros con Espazos Maker, entre outras iniciativas.