• Asevera que o polo de Rozas o forman tres piares: novas infraestruturas por 10M€, un programa conxunto de I+D xunto con Indra e Babcock de 115M€ e solucións tecnolóxicas baseadas en avións non tripulados cun investimento de 24M€
• Explica que se espera impulsar 19 iniciativas empresariais que poidan “xerar empregos moi cualificados que melloren o tecido do sector aeronáutico en Galicia”
• Cada proxecto en fase de incubación contará cunha axuda de ata 100.000 euros da Xunta e acceso a investimentos en capital de Indra de entre 50.000 e 500.000 euros
• As empresas en fase de aceleración accederán a unha liña de financiamento de Xesgalicia de entre 50.000 e 250.000 euros por proxecto e investimentos en capital de 50.000 euros
• O emprazamento provisional será o Palacio de Feiras e Congresos de Lugo, pero o definitivo será o Centro Público de Innovación no Novo Barrio da Residencia

O presidente do Goberno galego, Alberto Núñez Feijóo, avanzou onte a posta en marcha da primeira aceleradora galega do sector aeronáutico, como parte do polo tecnolóxico-industrial de Rozas e que mobilizará 4,75 millóns de euros en apoio á innovación ata o final de 2021.

O eixo desta aceleradora é o polo tecnolóxico de Rozas, formado por tres piares: as infraestruturas que se están a construír como o Centro de Investigación Aeroportada, cun investimento de 10 M€; o programa conxunto de de I+D, cun investimento de 115M€, 40 da Xunta e 75 das colaboradoras Indra e Babcock; e as solucións tecnolóxicas baseadas en avións non tripulados adquiridas a través de compra pública innovadora, cun investimento de 24 M€.

Durante a rolda de prensa do Consello, Feijóo aseverou que esta aceleradora, que conta co impulso da Xunta e co apoio da Fundación da Confederación de Empresarios de Lugo, o CTAG, Indra e Babcock, terá como obxectivo facilitar a creación e o crecemento de compañías innovadoras no sector aeronáutico de Galicia.

Con este fin, no vindeiro mes de novembro porase en marcha a primeira edición desta aceleradora, á que despois se unirán outras dúas máis. En total, espérase impulsar 19 iniciativas empresariais que poidan “xerar empregos moi cualificados que melloren o tecido do sector aeronáutico en Galicia”, explicou, precisando que despois da convocatoria e da selección de proxectos desenvolveranse dúas fases: a incubación e a aceleración, que non teñen por que ser necesariamente consecutivas.

Sobre a fase de incubación, titular da Xunta subliñou que está dirixida ás empresas en fase temperá, que se atopen entre o nacemento da idea e a validación do modelo de negocio. Respecto ao financiamento, cada proxecto en fase de incubación contará cunha axuda de ata 100.000 euros da Xunta e acceso a investimentos en capital de Indra de entre 50.000 e 500.000 euros.

Por outra banda, a fase de aceleración, que estará dirixida a empresas que xa existen, cun modelo de negocio validado e cunha certa facturación, terá unha duración dun ano, durante o que cada empresa poderá recibir os servizos e o apoio necesario polas súas características. Cómpre salientar que estas empresas accederán a unha liña de financiamento de Xesgalicia de entre 50.000 e 250.000 euros por proxecto e, por parte de Indra poderán recibir investimentos en capital risco ou préstamos desde 50.000 euros por proxecto.

Ao longo da súa intervención, Feijóo resaltou que a nova aceleradora prestará aos proxectos participantes numerosos servizos, entre os que destacan: espazos de traballo e coworking, infraestruturas de proba, acceso ao aeródromo, medios TIC e plataformas de xestión, consultarías técnica e de negocio, apoios na procura e negociación de financiamento, acceso á bolsa de traballo do polo tecnolóxico e industrial de Rozas e formación.

A aceleradora estará aberta tamén a calquera outra institución, empresa ou entidade que desexe colaborar. Así, nesta primeira edición, os colaboradores serán: Delta Vigo, unha das empresas punteiras do sector; Centum, que desenvolve sensores e sistemas de comunicación aeronáuticos; Sixtema, especializada en sistemas de localización e cartografía;a Fundación Kiom, que presta servizos técnicos e de apoio á xestión; o Instituto Tecnolóxico de Matemática Industrial; o centro tecnolóxico Gradiant; e o Consorcio Aeronáutico Galego.

Provisionalmente, situarase no Palacio de Feiras e Congresos de Lugo. Aínda que o emprazamento final da aceleradora será o Centro de Público de Innovación que está programado para o Novo Barrio da Residencia. Sobre este punto, Feijóo aseverou que os orzamentos de 2019 recollerán un investimento de 3 millóns de euros para impulsar a execución deste centro, que xa dispón dun proxecto básico.