• Este plan conta cun investimento de máis de 14 millóns de euros e diríxese aos núcleos de menos de 300 habitantes
• Esta iniciativa compleméntase coa que ten en marcha o Goberno central, que se centra en núcleos de maior tamaño e coa que se mobilizarán 21 millóns de euros para dotar de conexión por fibra óptica a 258.000 galegos máis

O presidente do Goberno galego, Alberto Núñez Feijóo, avanzou o xoves na rolda de prensa do Consello que o Plan de banda larga facilitará o acceso a internet de 100 megas a máis de 74.000 galegos de 181 concellos.

Cun investimento de máis de 14 millóns de euros, Feijóo precisou que esta iniciativa da Xunta para garantir á rede en núcleos de menos de 300 habitantes compleméntase coa que ten en marcha o Goberno de España, centrada en núcleos de maior tamaño e coa que se mobilizan 21 millóns para dotar de conexión por fibra óptica a 258.000 galegos máis.

Deste xeito, o traballo conxunto de ambas administracións posibilitará que en 2020 máis do 74% dos galegos poidan acceder a Internet de alta velocidade.

Entre as dúas iniciativas, sinalou o titular do Goberno galego, beneficiaranse máis de 332.000 galegos que viven nas zonas brancas, é dicir, sen conexións de máis de 30 megas. A continuación, valorou a nova de que este venres o Consello de Ministros aprobe un investimento de 150 millóns en axudas á extensión da banda larga.

O titular da Xunta garantiu o compromiso de seguir impulsando o Plan de banda larga 2020, que supón mellorar a dotación de Galicia dunhas infraestruturas esenciais para as comunicacións neste século XXI: as redes ultrarrápidas de Internet. Neste sentido, Feijóo subliñou que dispoñer dun acceso a Internet de calidade supón máis oportunidades para as empresas situadas no rural; máis facilidades para as persoas que viven en lugares pouco poboados e de difícil acceso; e un importante aliciente para que a xente nova se asente no rural galego.

Feijóo concluíu lembrando que a segunda edición deste plan, que se estende ata 2020, ten tres liñas fundamentais: internet en polígonos industriais, cun investimento de 3,4 millóns de euros, e este ano completarase a conexión a redes de ata 350 megas para que Galicia dispoña de 130 polígonos con este tipo de redes. Internet para empresas situadas en zonas illadas, unha liña de axudas de 400.000 euros da que se benefician máis de 30 empresas. E Internet para núcleos de menos de 300 habitantes, “unha liña de actuación que vimos de activar no Consello de hoxe”.