• O proxecto, que permite gozar do dereito de accesibilidade ao lecer e a cultura aos máis de dous millóns de persoas con discapacidade audiovisual en España, protagoniza unha campaña de investimento na plataforma de equity crowdfunding, por un total de entre 250.000 e 300.000 euros.
   

Achegar o cinema e a televisión ás persoas con discapacidade audiovisual é o obxectivo de WhatsCine, un novo proxecto que busca financiamento a través da Bolsa Social, a primeira plataforma de equity crowdfunding autorizada pola CNMV, que pon en contacto a investidores e empresas con valores.  

WhatsCine é unha empresa social, creada en 2013, por emprendedores madrileños, en colaboración coa Universidade Carlos III de Madrid. Trátase dun software que inclúe un triplo sistema de accesibilidade: de audiodescrición (indicado para a discapacidade visual), lingua de signos e subtítulos adaptados para a discapacidade auditiva.  

Grazas a esta tecnoloxía, este colectivo, que engloba en España a máis de dous millóns de persoas, pode gozar do dereito de accesibilidade ao lecer e a cultura compartida en igualdade, con total autonomía, sen sobrecustos para o usuario e sen interferir no resto de espectadores, como ocorre con outros sistemas tradicionais de accesibilidade. WhatsCine funciona a través da pantalla dun dispositivo móbil -para acceder aos subtítulos e lingua de signos- e con auriculares para escoitar a audiodescripción.   

A iniciativa xa está dispoñible en 500 salas de cinema españolas, ademais dos fogares que dispoñen de Movistar+, a través da app Movistar+ 5S, sen custo adicional para o usuario. Un servizo que aglutina o 75% do mercado das televisións de pago no noso país.  

O proxecto foi recoñecido en 2015 co Premio Raíña Letizia de Tecnoloxía da Accesibilidade e en xuño deste ano co Premio Innovación e Creación Antonio Magariños. O último recoñecemento que acaba de recibir, o Premio de App para Todos na categoría  Mellor App, un galardón que os levará como finalistas, o próximo mes de novembro, á Smart City Expo World Congress. A través da Bolsa Social, busca unha ampliación de capital de entre 250.000 - 300.000 euros para replicar o seu proxecto a nivel internacional, concretamente en Latinoamérica e EE.UU., onde viven máis de 60 millóns de persoas con discapacidade audiovisual.

A campaña de investimento comezou o pasado luns 17 de outubro e estará dispoñible ata o próximo 17 de decembro. En tan só catro días, xa conseguiu máis da metade do seu obxectivo mínimo de investimento, concretamente máis de 150.000 euros. Creas Fondo Social SL é o investidor de referencia desta campaña, na que xa investiu un total de 100.000 euros. A empresa foi presentada por José Ramón Riera Gómez, presidente e conselleiro delegado de WhastCine, como nova oportunidade de investimento ante os máis de 60 investidores que participaron no encontro ‘Tecnoloxías con impacto positivo', organizado pola Bolsa Social o 19 de outubro, en Madrid. Durante o acto, José Moncada, fundador e director xeral da plataforma, compartiu cos asistentes a súa visión sobre o investimento con impacto social, ao destacar “como cada vez máis xente decide investir de acordo cos seus valores e busca proxectos con rendibilidade económica pero que, tamén, melloren a calidade de vida ou solucionen un problema social ou ambiental.

Unha tendencia prometedora posto que, segundo o Global Impact Investing Network xa hai 77.000 millóns de dólares investidos neste tipo de activos, cun crecemento anual do 16%”. No encontro analizouse, ademais, como a partir da tecnoloxía se pode multiplicar o impacto social para mellorar así a nosa contorna, desde o fenómeno actual da hiperconectividade e a economía colaborativa. No coloquio participou Adrián García Nevado, director da Zona Centro en Telefónica España, quen apuntou que “actualmente estamos nun momento de formación e consolidación do emprendemento social en España e para logralo as empresas privadas temos un importante papel, non só desde o departamento de RSC senón de todo o negocio”.

García Nevado sinalou, ademais, que “a revolución dixital é a maior da historia ata o momento. O xurdimento de moitos fenómenos disruptivos ao mesmo tempo levaranos, nos próximos anos, a un novo mundo e a un ser humano moi diferentes ao actual”. Coas súas palabras coincidiu Vincent Rosso, business angel e cofundador de BlaBlaCar en España, quen ademais sinalou que “cada vez somos máis os emprendedores aos que nos importa xerar un impacto social, porque somos conscientes de que vivimos nun planeta finito. Desde a educación hai que transmitir ás novas xeracións unha maior concienciación dos aspectos sociais, valores que tamén teñen que incorporar os emprendedores”. Durante o encontro tamén realizou o seu pitch de presentación a próxima empresa que abrirá a súa campaña de investimento a través da Bolsa Social: Myplayz.

De orixe sevillana, trátase da primeira plataforma de consumo colaborativo para organizar actividades culturais en espazos privados de cidadáns particulares.

¿Como funciona a Bolsa Social?

Ademais de contar cun bo modelo de negocio e potencial de crecemento, os proxectos publicados na plataforma deben producir un impacto positivo constatable na sociedade e o medio ambiente. Antes da súa publicación, as empresas son analizadas polo equipo da Bolsa Social en colaboración con Analistas Financeiros Internacionais (AFI). O investimento realízase mediante a fórmula de equity crowdfunding a golpe de clic, dunha maneira áxil e sinxela. 

Os investidores depositan o seu diñeiro nunha conta especial en Triodos Bank. Se se alcanza o obxectivo de financiamento, a Bolsa Social formaliza a ampliación de capital en nome de todos os investidores. Se non se logra, devólvense as achegas sen custo para os investidores, que contan previamente con toda a información sobre os proxectos, así como os riscos e limitacións que implica a participación nas accións destas empresas. En caso de éxito das campañas, a Bolsa Social esixe ás empresas reportes periódicos dos resultados económicos e do impacto social ou ambiental xerado. Entre os casos de éxito atópase Utopicus, a lanzadeira de iniciativas innovadoras e colaborativas que busca transformar a sociedade, que conseguiu unha ampliación de capital de 248.500 euros, ou Nostoc Biotech, que pechou unha campaña de investimento de 249.700 euros coa súa iniciativa de bioagricultura baseada en solucións naturais de fertilización e protección de cultivos a partir de microorganismos vivos.

• A primeira reunión transnacional dos participantes desenvolveuse en Santiago de Compostela

A Consellería de Cultura, Educación e Ordenación Universitaria lidera o proxecto educativo europeo KA204 “GAMESP – Physical and virtual Games for Education and social Insertion of intellectually handicapped People”, no marco da presente convocatoria Erasmus+ 2016; unha iniciativa que ten como obxectivo contribuír a mellorar a atención á diversidade a través da inserción social de alumnos e alumnas adultas con discapacidade intelectual por medio do uso das ferramentas TIC e de robótica á medida. A primeira reunión transnacional do proxecto celebrouse esta semana no Museo Pedagóxico de Galicia (MUPEGA) en Santiago de Compostela, e nela reuníronse os sete socios participantes, procedentes de cinco países diferentes.

Comunidade virtual

Ao abeiro desta iniciativa desenvolverase unha plataforma en liña e unha comunidade virtual na que as persoas adultas con discapacidade e educadores poidan xogar (realizando unidades de ensino) con ferramentas virtuais, así como interactuar con robots reais que teñan na casa ou no seu centro. Ademais, o proxecto quere involucrar os pais e nais nas actividades de ensino / aprendizaxe.

A partir da plataforma, será posible controlar e programar un obxecto físico ou un robot virtual, robot que tamén se desenvolverá a través deste proxecto. En ambos os escenarios, o robot pode seguir as instrucións que os usuarios lle indiquen.

A plataforma tamén incluirá 10 unidades de ensino baseadas en xogos existentes e en xogos novos, que poden ser creados a partir de adaptación para alumnado adulto con discapacidade. Os xogos buscan traballar diferentes áreas, tales como a orientación, secuenciación, etc.

Este proxecto, financiado pola Unión Europea, dá resposta e complementa os plans e protocolos de atención a diversidade elaborados pola Consellería de Cultura, Educación e Ordenación Universitaria.

• O primeiro curso MOOC arrinca o 14 de novembro en UNED Aberta e trata sobre conceptos de accesibilidade universal aplicados á Enxeñería.

Fundación ONCE presenta unha canle formativa de cursos online que abordarán en primeira persoa a accesibilidade universal e a necesidade de incluír criterios de deseño para todos nos distintos proxectos.“Pretende formar profesionais capaces de construír unha sociedade inclusiva”, resumiu Jesús Hernández, director de Accesibilidade Universal e Innovación de Fundación ONCE.

A canle Fundación ONCE presentouse onte mércores nun encontro celebrado en Servimedia. A iniciativa enmárcase no convenio que manteñen Fundación ONCE e o Real Padroado sobre Discapacidade e conta co apoio da UNED.

Á presentación acudiron Mercedes Jaraba, directora do Real Padroado sobre Discapacidade; Elena Jariod, xefa de Servizo da área de Programas e Actividades do Real Padroado sobre Discapacidade; Miguel Melendro, vicerreitor Adxunto de Transparencia da Investigación da UNED; Tomás Jiménez, secretario executivo de CRUE Tic, e David Zanoletty, xefe do Departamento de Tecnoloxías Accesibles da Fundación ONCE.

Segundo explicou Jesús Hernández, trátase da posta en marcha dunha canle formativa de cursos MOOC (Massive Online Open Courses) onde, con criterios de deseño para todas as persoas, publicaranse cursos con temas relacionados co deseño universal. O obxectivo é facer pedagoxía sobre esta materia.

Está dirixido a alumnos de enxeñerías, pero tamén a todos os profesionais en exercicio que precisan de formación nesta materia para “construír unha sociedade inclusiva”. “Para construír a sociedade que queremos, todas as titulacións e profesións contan”, aseverou Hernández.

Para Mercedes Jaraba a posta en marcha desta canle de formación coincide cun dos obxectivos do Real Padroado sobre Discapacidade como é a aposta pola formación de todas as persoas e, especialmente, pola formación superior e universitaria que, segundo recoñeceu, aínda adoece de falta de accesibilidade. “A integración plena”, subliñou, “vén polo emprego e, sen o nivel de formación adecuado, non se alcanzará”.

Na súa opinión, hai que apostar por esta tecnoloxía MOCC que pode ser unha achega fundamental para que un maior número de persoas con discapacidade poidan acceder á formación superior.

En representación da UNED, Miguel Melendro mostrou a súa satisfacción pola posta en marcha deste proxecto que, segundo dixo, encaixa á perfección coa filosofía desta universidade “aberta e inclusiva”. Explicou que estes cursos, abertos e de calidade, pretenden chegar non só ao profesorado, senón tamén a administracións, empresas e a todos os profesionais que queiran ser capaces de facer os seus deseños de actuación profesional accesibles para todos.

A canle, accesible a través de UNED Aberta incorpora recursos educativos abertos, gratuítos, de calidade e accesibles para todos. O estudante obtén, ademais, o recoñecemento ou acreditación polos méritos conseguidos.

A primeira convocatoria do curso MOOC, que arrinca o 14 de novembro cunha duración prevista de 4 semanas, leva por título ‘Enxeñería de Factores Humanos/Interacción Persoa-Computador: Necesidades do usuario e produtos de apoio'. Nel abordaranse conceptos de accesibilidade universal nas carreiras de Enxeñería.

Dentro do proxecto atópase tamén o compromiso de editar dous cursos adicionais. Un deles sobre a autoría de Documentos ‘Dixitais Accesibles' e un terceiro sobre ‘Accesibilidade de produtos e servizos TIC: Compras públicas. (UNE-301 549)'.

Por último, en nome da CRUE, Tomás Jiménez mostrou o seu apoio a esta iniciativa e sinalou que aínda queda moito camiño por facer en canto á accesibilidade dos contidos universitarios. “Toda iniciativa que sirva para acurtar esta distancia é ben recibida”. Segundo dixo, estes cursos MOOC rompen as barreiras de acceso físico e teñen vantaxes para a educación en xeral. “O noso papel fundamental agora é trasladar esta iniciativa ao profesorado”, recalcou.  

Para concluír, Jiménez referiuse a un informe de "Inserta Empleo" que confirma que as persoas con discapacidade terían as mesmas oportunidades laborais se accedesen ás mesmas oportunidades formativas.

• Presentado coa Deputación de Barcelona o Informe de Fundación Vodafone España e Cocemfe Barcelona, realizado polo Observatorio da Discapacidade Física; ofrece información sobre como valoran e utilizan as TIC as persoas con discapacidade

En colaboración coa Deputación de Barcelona, presentouse o Informe “Discapacidade, Integración e o papel das TIC”, elaborado pola Fundación Vodafone España e Cocemfe Barcelona. Na presentación participaron o xerente da área de Benestar Social, Pep Muñoz; Pilar Díaz, directora do Observatorio da Discapacidade; e Joana Sánchez, manager de AAPP de Vodafone en Cataluña, ademais de Àngels Pons, directora de GESOP.

O estudo desenvolveu unha investigación cuantitativa para analizar a situación das persoas con discapacidade física, medir as dificultades coas que se atopan no día a día e determinar a axuda que as TIC lles achegan parar superalas.

Entre outras conclusións, o Informe pon de manifesto que dúas de cada tres persoas con discapacidade consideran que “o uso das novas tecnoloxías poden axudar a mellorar o seu benestar”;  ou que unha de cada catro persoas con discapacidade considera que Internet lle proporciona autonomía e independencia,

O estudo completo, elaborado cunha mostra de máis de mil persoas con discapacidade, está dispoñible en www.observatoridiscapacitat.org.

Principais Conclusións en formato accesible.

Este sábado celébrase en Compostela unha xornada organizada pola Escola de Familias da Fundación MAPFRE, en colaboración con Down Compostela, que busca reflexionar sobre a necesidade de incorporar na vida cotiá das persoas con discapacidade o uso das TIC e analizar como estas contribúen a favorecer a súa autonomía e vida independente.

O director da Escola de Familias e Discapacidade da Fundación MAPFRE, Gonzalo Berzosa, aparte de impartir a primeira conferencia da xornada, tamén participará na mesa redonda sobre utilizar a tecnoloxía para fomentar a autonomía persoal e a vida independente, que estará coordinada polo presidente do CPEIG, Fernando Suárez Lorenzo, e na que debaterase sobre o uso axeitado das TIC como ferramentas para o desenvolvemento persoal e a vida autónoma.

O programa da xornada desenvolverase entre as 9:00 e as 13:45 horas do sábado no Hostal dos Reis Católicos, sendo de entrada libra previa inscrición, que pode formalizarse en liña.

O Concello de Santiago presentou este luns unha nova aplicación móbil destinada a romper barreiras de accesibilidade con respecto a unha Sociedade da Información por dereito (e por obriga) universal e integradora. Trátase, máis en detalle, dunha ferramenta para dispositivos accesible para persoas con discapacidade visual e auditiva, recurso tecnolóxico desenvolvido ao abeiro do convenio subscrito polo Grupo Cidades Patrimonio da Humanidade (no que se inclúe precisamente Santiago de Compostela) coa Fundación Orange e GVAM. Na presentación participaron a concelleira de Igualdade e Desenvolvemento Económico, Marta Lois, o presidente da Fundación Orange, Manuel Gimeno, e o director da empresa GVAM, Jaime Solano.

En base a isto, con esta aplicación móbil poderemos percorrer a Ruta intramuros (un itinerario polos monumentos máis senlleiros do casco histórico compostelán), a Ruta gastronómica (dirixida a amosar o noso bo facer na cociña e a calidade dos nosos produtos), a Ruta extramuros (unha oportunidade para coñecer “a beleza de Compostela fóra do seu casco histórico”) ou a Ruta accesible (con puntos de interese adaptados a persoas con discapacidade auditiva ou visual).

Entre outras cousas de interese, a ferramenta tamén incorpora unha pestana chamada Accesibilidadea través da que podemos elixir e descargar exclusivamente os recursos que precisemos. Elementos como subtítulos, vídeos en lingua de signos, audio-descricións, etc. Ademais a aplicación conta cunha opción denominada Como chegar que, mediante GPS, guía ao usuario de punto a punto.

A aplicación Santiago de Compostela nace no marco do proxecto Appside, que promove “a creación de aplicacións de guiado que permitan preparar a visita e descubrir de forma autónoma os museos e cidades máis representativas do noso patrimonio”. Todas estas apps, explicaron na rolda de prensa, “caracterízanse por ofrecer un contido cultural destinado a un público xeral pero que, ademais, estea adaptado ás necesidades das persoas con discapacidade sensorial”.

Appside asinou un convenio estatal para desenvolver unha aplicación accesible para cada unha das 15 cidades Patrimonio da Humanidade.

• 'Downtown, aventura no metro' é un videoxogo gratuíto que permite aos seus participantes como poden axudar ás persoas con síndrome de Down e outras discapacidades cognitivas.

A iniciativa desenvolvida polo Centro de Innovación Experimental do Coñecemento (Ceiec) da Universidade Francisco de Vitoria, tomará protagonismo durante a Noite dos Investigadores de Madrid, o próximo 30 de setemebro.

Álvaro García Tejedor, director do centro, explica que está dirixido a mozos con discapacidades cognitivas, como a síndrome de Down, no que aprenderán a moverse pola rede de transportes do metro. "A través dunha trama divertida aprenderán a usar o billete, o mapa, facer transbordos, calcular traxectos... Desenvolvémolo xunto a Down Madrid e Best Buddies, que nos acompañarán xunto aos mozos e as súas familias nesta presentación. Neste encontro os mozos poderán xogar a Downtown e os pais, monitores e educadores coñecerán os beneficios que teñen os videoxogos como o desenvolvemento cognitivo ou a integración social".

Segundo García Tejedor, levan seis anos traballando nunha área das Ciencias da Computación coñecido como 'Serious games'. "Son un tipo de videoxogo cuxo obxectivo non só é o aspecto lúdico, senón que teñen outros fins como a educación, a integración, a concienciación, etc. Neste campo existen xogos como 'brain training', para desenvolver a capacidade mental, ou os 'exergaming', dirixidos ao exercicio físico".

O 'Downtown' é unha das propostas que a Francisco de Vitoria fai para a Noite Europa dos Investigadores, para a que abrirá as portas do Centro de Simulación Médica e do centro de investigación da escola Le Cordon Bleu. Así, a medicina, os videoxogos ou a gastronomía serán os protagonistas destas actividades, nas que os participantes poderán coñecer o último no campo da ciencia e a investigación nestes sectores da man de quen investigan a diario nestes ámbitos.

• O obxectivo desta renovación é continuar traballando xuntos para contribuír á inclusión e participación das persoas con discapacidade física e orgánica nos diferentes ámbitos da vida

Esta colaboración pon especial atención na promoción da vida independente vinculada á innovación tecnolóxica a favor da accesibilidade e a autonomía de ditas persoas.

Deste traballo conxunto destacamos Turismo Accesible para Todos. A aplicación TUR4all recolle as condicións de accesibilidade de establecementos turísticos de todo o territorio español (cada mes inclúense máis) e nela pódense atopar aloxamentos, bares, restaurantes, bodegas, oficinas de turismo, monumentos, museos e centros culturais, praias, espacios lúdicos, rutas urbanas… A aplicación permíteche planificar a túa viaxe, accedendo á información por provincias, tipo de establecemento e criterios de accesibilidade. Ademáis TUR4all está deseñada para personalizar a busca de establecementos turísticos segundo as túas necesidades.